Filippiinsi gobbara Pagisaniyani yinanni katamira noo foonchuwa daaꞌꞌatara lowo manni daanno. Anniꞌya Naardo Leroni lophinohu hakkooti; maatenke buxichote. Anniꞌya gashshootu giddo, polisete mereeronna loosu bayicho mussinnu batiꞌrino gara laiti hifatamannohanna hanqannoha ikki.

 Anniꞌyanna amaꞌya sette oosonsa lossiꞌrate lowo geeshsha daafurtanno. Insa ilaallate noo gatta agarate yee, duucha woyite qaetenni xeertiꞌre haꞌre keeshshanno. Aninna rodiiꞌya Rodiiliyo ninkeneeto towaaxxate sharrammeemmo; isinni duucha woyite hudiꞌneemmo. Wole ooso gede, hakkeeshshi geeshsha godoꞌlineemmo yanna dinonke. Ninke mine ooso baalanti lamala diro ikkannonsa woyite gate loosa hanaffanno; qoleno lowo geeshsha ayirritanno kokonaate dunke hossi yitino baga fulleemmo. Duhu ayirrinkero, goshoonshanni haaꞌre haꞌra agurranna woluri assine anfeemmori dino.

 Anninke duucha woyite ganannonke; isi amanke gananna laꞌꞌa kayinni roore xissiissannonke. Ise ganannota hoolate woꞌnaalleemmo; kayinni hoolleemmo wolqa diafiꞌnoommo. Konnira aninna Rodiiliyo lophinummoro annanke shineemmo yine maꞌlinoommo. Baxannonke anni heeꞌroommenkero yee lowo geeshsha halcheemmo!

 Anniꞌya ikkito giirtinoe daafiranna hexxo mudhoommohura, 14 diro ikkieta mininni fule haꞌrummo. Hakkiinni mite yanna geeshsha dooggate heeꞌroommo; hatte yannara, maariwaana aga hanafummo. Gedensoonni yowolo laaqanni, gobba daaꞌꞌatanno manna foonchunniwa massate looso loosa hanafummo.

 Boodu diri gedensaanni, Maniila yinanniwa yuniversite eꞌꞌe roso rosa hanafummo. Ikkirono, Qidaamenna Sambata wirro Pagisaniyani haꞌre loosa hasiissannoe daafira, xiinxalleemmo yanna hoogummo. Heeshshoꞌya haafa labbe leeltue; maariwaana adhaꞌyano yaaddoꞌya dihooltinoe. Konni daafira, meetamfetamini, kokeyininna heroyini yinannita jingilli assitanno xagga adha hanafummo. Jingilli assitanno xagga adha duucha woyite foorrete widira massitanno. Heeꞌreemmohu buxima, miiconna qarru batiꞌrino qooxeessiraati. Konni baalunku coyira kaimu gashshooteho yee hedoommo daafira, gashshoote dibaxeemmo. Maganoho alba qole “Heeshsho togoota ikkitinohu mayiraati?” yuummo. Ikkirono addi addi ammaꞌno xaꞌmoꞌyara dawaro qoltaera didandiitino. Yaaddoꞌya hawate yee jingilli assitanno xagga lede adha hanafummo.

 Filippiinsi gobbara 1972nni, rosaano gashshooteho finqiltu. Anino tenne finqille giddora eummo; tini finqille waajjinanni deerra iillitino. Lowo manna usurroonni; hakkiinni boodu agani gedensaanni, gobba gudisse olanto gashshitanno gede assini.

 Finqillete giddora eoommo daafira gashshaasine waajje, galagale dooggate galeemmoha ikkummo. Jingilli assitanno xagga araadora yee moorate higummo; qoleno gedensoonni, woxeho yee dureeyyete ledonna wole gobbanni dayino manni ledo foora hanafummo. Lubbote heeꞌrono hoogono, mittore dilawannoe.

 Hatte yannara, amaꞌyanna maaꞌniidi rodiiꞌya Yihowa Farciꞌraasine ledo Qullaawa Maxaafa xiinxalla hanaffe no. Anniꞌya tennera giirame borronsa giire hunino. Ikkirono insa tenne baala qeele sae, cuuame Yihowa Farciꞌraasine ikkino.

 Mitto barra mittu Yihowa Farciꞌraasinchi, Qullaawu Maxaafi albillitte uulla woꞌmate aana taashsho heedhannota kulanno yee anniꞌyara kulisi. (Faarso 72:12-14) Anniꞌyara tini hexxo lowo geeshsha dhagge ikkitinosi daafira, isi konne coye buuxate murciꞌri. Isi Qullaawu Maxaafi xiinxallosinni, Maganu taashsho woꞌmitino gashshoote abbannota calla ikkikkinni, minaannuwunna annuwu maa assitara hasiꞌrannoro wodanchi. (Efesooni Sokka 5:28; 6:4) Shiima yanna gedensaanni, isinna wolootu roduuwiꞌyano gudisante Yihowa Farciꞌraasine ikkitu. Ani xeertowa heeꞌreemmo daafira, tenne baala diafoommo.

 Gedensoonni 1978nni, Awustiraaliya haꞌrummo. Ikkollana tenne dureettenna keeru noo gobbara nafa, giddiidi harshammo afiꞌra didandoommo. Agonna jingilli assitanno xagga adha hakkawoteno diaguroommo. Hakko dironni, Yihowa Farciꞌraasine hasaawissue. Insa uullate aana keeru woꞌmanno yee Qullaawu Maxaafi kulanno hexxo leellishshueta hagiidhoommo; kayi hakkeya insa yitinore ammane insa ledo xiinxalla dihasiꞌroommo.

 Hakkiinni mulenni, Filippiinsi haꞌre boode lamala geeshsha hakko heeꞌrummo. Roduuwiꞌya, anninke dancha anna ikkate lowo geeshsha sharramanni noota kultue; ani kayinni isira lowo geeshsha hanqoommo daafira, isi ledo xaada dihasiꞌroommo.

 Maaꞌne rodooꞌya, alamete aana qarrunna miico togo batidhinohu mayiraatiro Qullaawu Maxaafinni kultue. Tini qaaqqo huluullitannoe xaꞌmuwara dawaro qola dandaase dhagge ikkitue. Haꞌrammora kaummota anniꞌya Uullate Aana Gannatete Hegerera Heeꞌra Dandaatto yaanno maxaafa uyie. a Hakkiinni togo yiie: “Xaate kabbi facci yaa aguri. Kuni maxaafi hasidhanni noottore afiꞌratto gede kaaꞌlannohe.” Qoleno, Awustiraaliya marummoro Yihowa Farciꞌraasine hase xaadeemmo gede amaalie.

 Anniꞌya amaale macciishshe, Birizibeni yinanniwa ani heeꞌreemmowa mule noota Yihowa Farciꞌraasineta Gambooshshu Addaraashe haꞌrummo. Qullaawa Maxaafa ganye xiinxallate sumuu yuummo. Daanieeli fooliishsho 7 nna Isayaasi fooliishsho 9 nooti Qullaawu Maxaafi masaalo, albillitte mussinnu horonta nookkiti Maganu Mangiste gashshitannonketa huwateemmo gede kaaꞌlitinoe. Qoleno uullate aana Gannatete hagiidhinanni heeꞌneemmota rosummo. Maganu soqqamaasincho ikka hasiꞌroommo; ikkirono, aneneeto eemadha, jingilli assitanno xagganna ago doogimale adha agura hattono maaeela heeshshoꞌya agura hasiissannoeta wodanchummo. Adhummokki ledoꞌya heedhanno beetto agurummo; qoleno araado ikkitinoe coyibbano qeelummo. Yihowa albinni roore addaxxa hanafummoti, wole coyibbano biddi assiꞌreemmo gede kaaꞌlaera huucciꞌrummo.

 Gale hosanni, rosanni noommo rosi heeshsho soorre biddi assannoha ikkinota wodanchummo. Qullaawu Maxaafi, sharrammummoro “haaro mannimma” uddiꞌra dandiineemmota kulanno. (Qolasiyaasi Sokka 3:9, 10) Anino konne assate sharramummoti, anniꞌya akati biddi yiino yine kulloonnieri adda ikkara dandaannota huwatummo. Konni daafira, hanqonna iso giwa agure, anniꞌya ledo araaramate hedummo. Gedensoonni, anniꞌyara gatona yoommo; qoleno isira anjeꞌyanni kayise amadoommo koma agurummo.

 Wedellichu heeꞌre, wolootu hoode haꞌre akkimale ikkoommo; hattono busha akata lossiꞌroommo. Qullaawu Maxaafi busha hoshsha huntanno yaannoti halaale ikkitinota umiꞌya heeshshonni laoommo. (1 Qorontoosi 15:33) Xa kayinni Yihowa Farciꞌraasine mereero ammanantino jaalla afiꞌroommo; insa woyyaawoommo mancho ikkeemmo gede kaaꞌlitinoe. Qoleno kaajja galteꞌya Looreta afiꞌroommohu insa mereerinniiti. Ise ledo mannaho Qullaawu Maxaafi kaaꞌlannonsa gara rosiinsanni heeꞌnoommo.

 Qullaawu Maxaafi kaaꞌlonni, anniꞌya ani alba horo hedoommokki garinni soorrame, amaꞌyara shaqqado minaanna hattono umosi heeshshi assannohanna keere baxanno Kiristaancho ikkino. Isi ilamummohunni kayise mite yee hanqafinoehu, 1987nni cuuame Yihowa Farciꞌraasincho ikkummo gedensaanni xaandummo yannaraati!

 Anniꞌya amaꞌya ledo mitteenni, 35 saꞌꞌanno diro Qullaawu Maxaafi hexxo mannaho duduwino. Isi diinaggaawe loosannohanna manna kaaꞌla baxannoha shaqqado mancho ikkino. Tenne baala dirra giddo, iso ayirrisanna baxa rosoommo. Qoleno isi beetto ikkoommota kula hagiirsiissannoe! Anniꞌya 2016nni fooliishshiꞌrino; ikkirono, isino anino Qullaawu Maxaafi roso harunsine akatanke biddi assiꞌnoommo daafira, iso qaageemmo woyite tashshi yaannoe. Xa isira hili komano dinoe. Qoleno, iimi Annaꞌya Magano Yihowa afiꞌraꞌya lowo geeshsha hagiirsiissinoe; isi maatete giddo kalaqamanno qarra baala hunara qaale eino.