Lophoommohu Finilaandete gobbara, Taampere yinanni katamira qaccete noo qooxeessiraati; qooxeessu haqqe woꞌmitinohonna luulu nookkiho. Mininke manni ammaꞌnote hakkeeshshi geeshsha ikka hoogirono, rosonna dancha amanyoote kayinni naadanno. Amaꞌya Jarmanete ilantinote; hakko daafira, shiimu heeꞌre akaakkaꞌya heedhannowa Galchimi Jarmane haꞌreemmo woyiti no.

 Anjenni hanafe ispoorte baxeemmo. Shiimu noommo waro baalanta ispoorte godoꞌleemmo; 14 diro meddi yiieta kayinni, teenisete godoꞌle roorsiꞌrummo. Tonaa lee diro ikkieta, barrunni lame woy sase hige qajeela hanafummo; qajeelsannoe manchi ledo barra lame hige rosiisiꞌrummo gedensaanni, hawarro umiꞌyanni rosiisiꞌreemmo. Godoꞌlete gari lowo geeshsha dhagge ikkannoe; qoleno teenise godoꞌlaꞌya surreꞌyanna bisiꞌya guunte layiꞌrate kaaꞌlitannoe. Jaallaꞌya ledo yanna sayisanna sae sae biira aga baxeemmoha ikkirono, jingilli assitanno xagga diadheemmo; woy ago quwa sae diageemmo. Ane diinagge teenisete godoꞌleeti; heeshshoꞌya giddo ise roorinori dino.

 Tonaa lamala diro ikkieta, ATP yinanni dirijjite qixxeessitino godoꞌlera eꞌꞌe godoꞌla hanafummo. a Duucha hige qeeloommo daafira, gobbate deerrinni maccaha ikkummo. Lemiina lame diro ikkieta, alamete deerrinni teenisete godoꞌlera egennantinori 50 manni wido ikkummo.

 Lowo diro, alamete aana addi addi bayicho haꞌre teenisete godoꞌle godoꞌlanni keeshshoommo. Haꞌroommowa mitowa, dhagge ikkanno bayicho daaꞌꞌatoommo; kayinni alamete aana duuchankawa nooha batinye qarra laoommo; kuri giddo gamu jaddote, jingilli assitanno xagga adhatenna qooxeessu daafamaati. Lawishshaho, Ameerikaho heeꞌne mite katamma haꞌnoommowa, mitu qooxeessi jaddo batidhinoha ikkino daafira marreemmokki gede hoolloonninke. Kuri baalunkuri dadillisinoe. Qoleno, baxeemmo looso loosanni noommoha ikkirono, giddoꞌya harshammi diyitino.

 Hatte yannara, jaalaꞌya Saana Yihowa Farciꞌraasine ledo Qullaawa Maxaafa xiinxalla hanaffe no. Ammaꞌnote coye baxase dhagge ikkituerono, xiinxallitannota kayinni digiwoommo. Hakkiinni 1990nni ise adhummo; aane noo diro ise cuuante Yihowa Farciꞌraasincho ikkitu. Ani kayinni Maganu noota ammaneemmoha ikkirono, ammaꞌnote coye hakkeeshshi geeshsha dibooneemmo. Jarmanete gobbati ahaaheꞌya Qullaawa Maxaafa duucha higge nabbabbannoti qulli yitannoe; isinni ise huuccatto assiꞌreemmo gara rosiissinoe.

 Mitto barra Saana ledo, Yihowa Farciꞌraasine ikkino minaanninna minaama qae haꞌnummo; minaanni suꞌmi Kaariiti. Isi maroommo widoonni, ‘goofimarchu barrire’ kultannota Qullaawu Maxaafi masaalo leellishie. (2 Ximootewoosi 3:1-5) Tini masaalo alamete aana bunshe togo batidhinohu mayiraatiro kultanno; tenne huwatummoti lowo geeshsha dhagge assiꞌrummo. Hakko barra, ammaꞌnote daafira hakkeeshshi geeshsha dihasaamboommo. Hakko barrinni hanafe kayinni, Kaari ledo Qullaawu Maxaafire hasaawa hanafummo; roseemmo coyino ammansiisie. Yanna hooggannoe daafiranna duucha woyite doogo haꞌreemmo daafira, ganyine xaada didandiinoommo. Ikkirono Kaari hexxo dimudhino. Xiinxallisannoe woyite xaꞌmeemmo xaꞌmora sokka borreesse dawaro qolannoe. Huluullitannoete jajjabba xaꞌmo baalantera Qullaawu Maxaafinni ammansiissanno dawaro afiꞌrummo; gale hosanni Qullaawu Maxaafita qara sokka huwatummo; hattino: Maganu Gashshooti Maganu hedo woꞌmitanno gede assannota wodanchummo. Maganu suꞌmi Yihowa ikkinota afaꞌyanna isi ninkera yee assinore huwataꞌya lowo geeshsha hagiirsiissinoe. (Faarso 83:18) Duuchunkurinni roore dhagge ikkitinoeti, Maganu qixxeessinote wodote kakkalooti. Maganu wodote kakkalo qixxeessinohu mulla higge harunsate woy seera wonshate yee ikkikkinni manna baxanno daafiraati. (Yohaannisi 3:16) Qoleno Maganu jaala ikkanna keeru woꞌmino gannatera hegerera heeꞌra dandeemmota huwatoommo. (Yaiqoobi 4:8) Hakko daafira, “Konni baalunku coyira galatu nooeta leellisha dandeemmohu hiittoonniiti?” yee heda hanafummo.

 Heeꞌreemmo heeshsho daafira seekke hedummo. Roore hagiirraamo assitannoti aa ikkitinota Qullaawu Maxaafinni rosoommo daafira, rosoommo halaale wolootaho kulate hedummo. (Soqqamaasinete Looso 20:35) Teenisete godoꞌlera qajeeloommoha ikkoommo daafira, godoꞌlete yee diru dirunku mito 200 barra qaetenni wolewa haꞌreemmo. Maateꞌyano wolu baalunkurinni roore ane diinagge qinaabbanno gede kaaꞌlate lowo geeshsha sharrantanno. Konni daafira heeshshoꞌya biddi assiꞌra hasiissannoeta huwatummo.

 Lowo deerra massitannoe ispoorte ammaꞌnote yee aguraꞌya, lowo mannira adhama hooggara dandiitannota afoommo. Ikkollana Yihowa albinni roore afanna hegere heeshsho hexxo, teenise godoꞌle afiꞌreemmo baꞌraaꞌri baalunkunni lowo geeshsha roortanno; hakko daafira, agure fula diqarrissinoe. Wolootu yitannore macciishsha dihasiꞌroommo; tini ani gudeemmo hajooti. Hakkawoyite lowo geeshsha kaaꞌlinoe qummeeshshi Faarso 118:6te; togo yitanno: “Kaaliiqi [“Yihowa,” Haaro Alame Tiro] ledoꞌya heeꞌre kaaꞌlannoe daafira, diwaajjeemmo; mannu assannoeri dino.”

 Hatte taaera, mite dirijjitta lowo woxe afiꞌnanni godoꞌlera eate furma ganeemmo gede koyissinoe; tennera sumuu yoommoro, mittoreno yaadummokki lowo diro godoꞌla dandeemmo. Ani kayinni wodanaꞌya mitto assiꞌre kaoommo daafira, koyishshansa diadhoommo; qoleno yannate gedensaanni ATP qixxeessitanno godoꞌle godoꞌla facci asse agurummo. Qullaawa Maxaafa xiinxallanni keeshshummo gedensaanni, Maaja 2, 1994nni cuuame Yihowa Farciꞌraasincho ikkoommo.

 Maganu daafira heda hanafoommohu heeshshoꞌya giddo dadillisanno coyi iilleennae diꞌꞌikkino. Qoleno halaale hasiꞌre afiꞌroommoha diꞌꞌikkino. Hakkawoyite heeshshoꞌya qinaabbinote yee hedeemmo daafira, wolere dihalchoommo. Ikkollana, hedeweelcho Qullaawu Maxaafi halaale afummo; qoleno ani afoommotenni roortino heeshsho noota huwatummo, hattono hedoommokkita lowo geeshsha woyyitino heeshsho heeꞌra hanafummo! Maatenke lowo baxillinna mittimma noota ikkitino. Sase labballu oosoꞌya ispoortetenni ikkikkinni ammanatenni ane faale hadhino daafira tashshi yiinoe.

 Teenise godoꞌla xaano baxeemmo. Saꞌu dirra giddo, teenisete godoꞌle ledo xaadooshshe afiꞌrino looso loose heeshshote hasiisannore afiꞌreemmo; lawishshaho, mitte teenisete gaamo qajeelseemmo, hattono murricha ikke looseemmo. Ikkollana, xa heeshshoꞌya giddo qaru coyi ispoorte diꞌꞌikkitino. Alba, teenisete godoꞌlera dandooꞌya roore woyyeessiꞌrate lamalate kiiro lowo saate qajeeleemmo. Xa kayinni, woꞌma yanna sawaakicha ikkoommo daafira, wolootuno ane heeshsho biddi assinoha Qullaawu Maxaafi biddishsha rossannonna harunsitanno gede kaaꞌleemmo; tini lowo geeshsha hagiirsiissannoe. Maganu Yihowa ledo nooe jaalooma balaxisiisaꞌyanna albillitte woyyitino yanna daggannota kultanno hexxoꞌya mannaho kulate diinaggaawaꞌya taalle nookki hagiirre afiꞌreemmo gede assitinoe.—1 Ximootewoosi 6:19.