Ilamoommohu Meksikote, Chiyapasi gashshooti giddo Sani Huwani Chankalayito yinannihu shiimu katamiraati. Ayiddiꞌya, Maya sirchi giddo Choli yinanni gaꞌre widooti. Anniꞌyanna amaꞌya 12 ooso ilino; insa giddo ani ontikkiho. Anje noommo woyite, aninna roduuwiꞌya Yihowa Farciꞌraasine ledo Qullaawa Maxaafa xiinxallinoommo. Ikkollana, wedellimmaꞌya yannara Qullaawu Maxaafi amaale harunsa hoogaꞌya gaabbissannoe.

 Tonaa sase diro ikkieta, jingilli assitanno xagga adhanna moora hanafummo. Hakko diriꞌyanni, mininni fule bayichunni bayicho haꞌreemmoha ikkummo. Tonaa lee diro ikkieta, maariwaanu irshi giddo loosa hanafummo. Hakkiicho mittu diri geeshsha loosoommo; mitto hashsha, lowo maariwaana yowolote hogombe haꞌnanni heeꞌneenna, jingilli assitanno xagga doyissitanoti wole gaamo massaara qodhite dagge siꞌunke. Insa massaara tokkossuta lubboꞌya gatisiꞌrate kubbe wayi giddora eummo; hakkiinni waa daahe wayi giddonni fulummo. Gedensoonni, xooqe Ameerika haꞌrummo.

 Ameerikahono jingilli assitanno xagga daddalanna jaddo loosa diaguroommo. Tonaa honse diro ikkieta, manna mulqiꞌrootto hattono shaate woꞌnaalootto yine kassanse usurrie. Usuru mine, jaddo loossanno gaamo ledo karsame jaddo lede looseemmoha ikkummo. Konni daafira, gashshaano Pensiliveeniyaho, Luwisibergi yinanniwa qorophine agarrannihu usuru minira massitue.

 Luwisibergi usuru mine, akatiꞌya roore anganni fuli. Mitte jaddo loossanno gaamo malaate bisoho naqqasiꞌroommo daafira, usuru mine hattee gaamo miilla ledo mulenni egennamummo. Roore shittanna mannu ledo xaa xaa ganameemmoha ikkummo. Mitto barra, usuru mini nafara gaamo baxxine ganammummo. Beeziboole godoꞌlinanni dullinninna ispoorte loonsanni siwiillanni nafa ganammoommo. Ganansho uurrisate, usuru mini agaraasine hindiiddissanno gaaze horoonsiꞌrate geeshsha iillitino. Hakkunni gedensaanni, usuru mini gashshaano lowo geeshsha qorophine agarranniwa horo bushino usuranyi heeꞌranno kifile eessitue. Hanqe gobba gudeemmo; qoleno xonameemmo. Manna shiimu coyira nafa ganeemmo. Isinni manna gana hagiirsiissannoe. Hatte yannara, asseemmo coyira horo digaabbeemmo.

 Hattenne qorophine agarranni kifilera usurame noommo yannara, roore woyite kifileꞌyanni difuleemmo. Hakko daafira, yanna sayisiꞌrate Qullaawa Maxaafa nabbawa hanafummo. Gedensoonni, mitte usuru mini agaraasincho Uullate Aana Gannatete Hegerera Heeꞌra Dandaatto yaanno maxaafa uyitue. a Qullaawa Maxaafa xiinxallate kaaꞌlannoha konne maxaafa nabbawummoti, anje Yihowa Farciꞌraasine ledo Qullaawa Maxaafa xiinxallummo waro rosoommoha lowo roso qaagummo. Hakkiinni, finqillete akatiꞌyanni kainohunni heeshshoꞌya mageeshshi geeshsha anganni fultinoro hedummo. Qoleno mininke mannire hedummo. Lame roduuwiꞌya Yihowa Farciꞌraasine ikkino daafira togo yee hedummo: ‘Insa hegere heeshsho afiꞌraraati. Ane mayi hoolannoeyya?’ Heeshshoꞌya biddi assiꞌrate murciꞌre kaoommohu hakka woyiteeti.

 Ikkollana, heeshshoꞌya biddi assiꞌrate kaaꞌlo hasiissannoeta afoommo. Konni daafira, balaxe kaaꞌlannoe gede Magano Yihowa eeggifate huucciꞌrummo. Hakkiinni, Ameerikaho nootera Yihowa Farciꞌraasinete sinu biirora sokka borreesse, Qullaawa Maxaafa xiinxallisseꞌꞌe yuummo. Sinu biiro, qooxeessaho noo songo kaaꞌlitannoe gede assitu. Hatte yannara, fiixa ikkinokki manni daye laꞌꞌaera difajjinanni; hakko daafira, qooxeessaho noo songonni mittu rodii sokka borreesse Qullaawu Maxaafi aana xintantino borro soyie; tini heeshshoꞌya biddi assiꞌrate roore kakkayissinoe.

 Aantete, lowo diro miila ikke heeꞌroommota jaddo loossanno gaamo agure fulummo; konne assa anera loworeeti. Hatte yannara gaamote murrichino qorophine agarranni kifilera no; hakko daafira, boohaarshu yannara isiwa mare, Yihowa Farciꞌraasincho ikka hasiꞌroommota kulummosi. Hakkiinni isi togo yiie: “Addinta Yihowa Farciꞌraasincho ikka hasiꞌroottoha ikkiro qarru dino. Maganu ledo noohe aantera mereero eꞌꞌe diafeemmo. Gaamote giddonni fula hasidhe calla yitanni noottoha ikkiro kayinni, iillannohe qarra afootto.”

 Hakkunni gedensaanni noote lame dirra giddo, usuru mini loosaasine akatiꞌya biddi yaanni noota huwattu. Konni daafira, bashsho gede gadacha agurtue. Lawishshaho, usuru mini agaraasine hayishshiꞌnanni kifile haadhe hadhannoe woyite anga kateenunni usura agurtue. Agaraasinete giddo mittu isinni, heeshshoꞌya biddi assiꞌraꞌya agureemmokki gede jawaachishinoe. Usuru mininni fulammora albaanni noo diro, lowiidihu usuru minira mule noote hakkeeshshi geeshsha agarrannikki kaampe massinoonnie. Tonne diro usuramummo gedensaanni, 2004nni usuru mininni fulummo; hakkiinni usuranyu otobisenni Meksiko haaꞌne haꞌnie.

 Meksiko iillummo gedensaanni mulenni, Yihowa Farciꞌraasineti Gambooshshu Addaraashe noowa hase afummo. Mite yee gambooshshe haꞌroommohu usuru mini yuniforme uddiꞌreeti; korkaatuno nooeti garu uddano hattee callaati. Suudiꞌya hakkeeshsha baxisannoha ikka hoogirono, Yihowa Farciꞌraasine faasiiqqe haadhinoe. Danchummansa laummoti, addu Kiristaani mereero noommota huwatummo. (Yohaannisi 13:35) Hakko barranni, songote cimeeyye Qullaawa Maxaafa biddiitto xiinxalleemmo gede qixxaawo assitue. Mittu diri gedensaanni, Wocawaaro 3, 2005nni cuuame Yihowa Farciꞌraasincho ikkummo.

 Arfaasa 2007nni hanafe, aganu giddo 70 saate mannaho Qullaawa Maxaafa rosiiseemmoha woꞌma yanna sawaakicha ikkummo. Hakkiinni 2011nni, Seenne Adhitinokki Roduuwira Qixxaawinohu Qullaawu Maxaafi Rosi Mine (xa Maganu Mangiste Sawaakooti Rosi Mine yinanni) rose maassamummo. Kuni rosu mini songote giddo uyinoonnie looso looseemmo gede lowo geeshsha kaaꞌlinoe.

 Hakkiinni 2013nni, kaajja minaamaꞌya Piilaari adhummo. Ise albi heeshshoꞌya hiittootero kuleemmose woyite, haariintino gede assite ‘Ani tenne diammaneemma’ yitanno. Korkaatuno bashsho ikkeemmo gede ikke diegennoommo. Aninna minaamaꞌya, ani techo soorrame togoo mancho ikkaꞌya Qullaawu Maxaafi mannu heeshsho biddi assate wolqa afiꞌrinota buuxissanno yine ammanneemmo.—Roomu Sokka 12:2.

 Yesuusi Luqaasi 19:10te “Manchi Beetti bainoha hasaranna gatisara dayino” yiino. Kuni qaali ane heeshsho giddo woꞌmino. Xa ragu tunsinoe mancho diꞌꞌikkoommo. Qoleno bashsho gede manna digawajjeemmo. Qullaawu Maxaafi kaaꞌlonni, heeshshoꞌya hagiirru noota ikkitino, hattono mannu ledo dancha aante nooe; roorenkanni kayinni, Kalaqaanchiꞌya Yihowa ledo dancha gede jaalooꞌmoommo.