Ilamoommohu Kanaadaho, Montiriyali yinannihu Kiwubeeki giddo jawiidi katamiraati. Ane, meya rodooꞌyanna lame labballo roduuwaꞌya anniꞌyanna amaꞌya baxillunni lossinonke; mininke noohu Rosimoonti yinannihu baxisanno qooxeessiraati. Heeshshonke keerunna salaame woꞌmitinote.

 Anjeꞌyanni Qullaawa Maxaafa afate halcho nooe. Tonaa lamu dirihu heeꞌre, Haaru Gondoori giddo Yesuusi xagge nabbawe lowo geeshsha hagiidhoommoti qulli yitannoe. Yesuusi manna baxannonna mararanno gari dhagge ikkinoe daafira, isi gede ikka hasiꞌrummo. Diriꞌya lexxanni haꞌrita kayinni, busha jaalla ledo hosa hanafoommo daafira, tini hasattoꞌya baꞌanni hadhu.

 Anniꞌya sakisofoone yinanniha muuziiqu uduunnicho godoꞌlannoho; isi muuziiqu uduunnesi calla ikkikkinni muuziiqu baxilleno iqqinoe. Muuziiqa lowo geeshsha baxeemmo daafira, mulenni gitaare gana rosummo. Hatte taaenkura, jaallaꞌya ledo rooki yinanni muuziiqi gaamo kalaqiꞌnummo; qoleno duucha bayicho muuziiqa godoꞌla hananfummo. Muuziiqa qixxeessitannoti mite egennantino dirijjitta ane ledo egennantuhu gedensaanni, ledonsa looseemmo gede koyissue. Hakkiinni mitte jawa muuziiqu dirijjite ledo loosate sheemaate eummo. Ane muuziiqa lowo manni baxa hanafi; qoleno Kiwubeeki giddo ganyine raadoonetenni fannanni.

 Halcheemmori baalu nooeha lawinoe. Ani aja beettooti, maccaho, qoleno lowo woxi nooe; looseemmohuno baxeemmo loosooti. Barra barra ispoorte looseemmo, qaalu xaꞌmo xaꞌminannie, boonannoe manni furma ganinke yaannoe, hattono televizhiinete leelleemmo. Hashsha kayinni gamba yiino mannira muuziiqa godoꞌleemmo, hattono addi addi jila haꞌreemmo. Boonannoe manni albaanni waajjeemmokki gede, wedellichu heeꞌrenni ago ageemmo; gedensoonni jallaagishshanno xaggano adha hanafummo. Qoleno wolootu daafira hedeemmokkiha ikkummo; hattono maaeela coye assa hanafummo.

 Laꞌꞌannoe mannira hagiirraamo laweemmo daafira, mitootu ane gede ikka halchitanno. Giddiidiꞌya kayinni hagiirraamo diꞌꞌikkino; hakko iso calliꞌya noommo woyite, baasa dadilleemmo. Lowo geeshsha yaadeemmoha ikkummo. Qoleno lowo geeshsha qiniinoe saatera, muuziiqa attantannoeri lamu mannooti Eedisi amadeenna reyitu. Hakkawote lowo geeshsha masoommo! Muuziiqa baxeemmoha ikkirono, konne looso loosanni heeꞌreemmo heeshsho kayinni giwissannote.

 Loosiꞌya qiniinoha ikkirono, alamete aana bushu coyi woꞌminota afoommo. Mannu kuꞌu koꞌonne miicannohu mayiraati? Maganu mayira sammi yiinoro hakkawaro dhagge ikkannoe. Isinni xaꞌmoꞌyara dawaro qolannoe gede duucha hige Magano huucciꞌreemmo. Addi addi bayicho haꞌreemmowiinni higummoti, Qullaawa Maxaafa haaro ikke nabbawa hanafummo. Nabbaweemmori giddo rooriidi leellannoekkiha ikkirono, alamete goofimarchi gambise dayino yee hedummo.

 Qullaawa Maxaafa nabbawanni heeꞌre, Yesuusi mitte hige halalla mare 40 barra xoominota huwatummo. (Maatewoosi 4:1, 2) Hakkiinni, ‘Anino xoomoommoro Maganu xawannoe’ yee hedummo; hakko daafira, xoomate barra amadummo. Xoomammora lame lamala gatte heedheenna, lamu Yihowa Farciꞌraasine dagge saanqa gangantu; hakkiinni wonanni agare noohu gede, minira eꞌe yuummo. Insa giddo mittu Zhaaki yinanniho; iso ille qase lae, “Heeꞌnoommohu goofimarchu barra ikkinota mayinni anfeemmo?” yee xaꞌmummo. Isi anera dawaro qolara Qullaawa Maxaafasi fane 2 Ximootewoosi 3:1-5 nabbawie. Hakkiinni wole batinye xaꞌmo aana aanaho xaꞌmummo; insa qoltinoeti ammansiissanno dawaro dhagge ikkitinoe; dawaro qoltinoehuno Qullaawu Maxaafinni callaati. Mitu barri geeshsha hasaambummo gedensaanni, xooma hasiissannoekkita huwatummo.

 Yihowa Farciꞌraasine ledo Qullaawa Maxaafa ganye xiinxalla hanafummo. Gedensoonni, seeda umoꞌya haxe hooꞌlummo, hattono Gambooshshu Addaraashe haꞌre woꞌmanka gambooshshe beeqqa hanafummo. Gambooshshunniwa faasiinqe haaꞌnoonnie daafira, halaalu noowa dayommota roore buuxummo.

 Qullaawu Maxaafinni roseemmo rosi garinni heeꞌrate kayinni, heeshshoꞌya giddo lowore biddi assiꞌra hasiissinoe. Umihunni, jallaagishshanno xagga adha aguranna maaeela heeshsho agura hasiissinoe. Qoleno umiꞌyara calla heda agure wolootu daafira heda rosa hasiissinoe. Lame qaaqquulleꞌya ama nookkiha lossiꞌranni noommo daafira, insara baxille leellishanna ayyaanaamittete hasiisannonsare assa rosa hasiissinoe. Konni daafira, muuziiqu loosoꞌya facci asse agure, faabiriku giddo shiimu damoozira loosa hanafummo.

 Konne baala coye agura shota diꞌꞌikkitino. Jallaagishshanno xagga agurate sharramanni noommo yannara, araado ikkitinoe daafira hattee agureenna dhiwanni qarrisie; qoleno wirro togoo xagga adha hanafoommo woyiti no. (Roomu Sokka 7:19, 21-24) Roore qarra ikkitinoeti kayinni maaeela heeshshoꞌya agurate. Qoleno haarote amadoommo loosi lowo geeshsha daafursannoho; adheemmo damoozi kayinni digariho. Alba muuziiqunni lame saate giddo calla afiꞌreemmo woxe afiꞌrate xa sase agana looseemmo.

 Huuccatto heeshshoꞌya biddi assiꞌrate sharrammeemmo woyite hexxo mudheemmokki gede kaaꞌlitinoe. Qoleno Qullaawa Maxaafa ganye nabbawa lowo geeshsha kaaꞌlitannota huwatoommo. Mite qummeeshshuwa woletenni roore kaaꞌlitinoe. Hakkuri giddo mitte 2 Qorontoosi 7:1te; kuni qummeeshshi Kiristaanu ‘manninatenna ayyaana batteessannori baaluwiinni umonsa keereensiꞌranno’ gede amaalanno. Wolu qummeeshshi kayinni Filiphisiyusi Sokka 4:13te; kuni qummeeshshi (NW), “Wolqa aannoehu isi kaaꞌlonni woꞌmunku coyira ikkitanno jawaante nooe” yaanno. Kuni qummeeshshi busha rosichonna gadeꞌya qeeꞌla dandeemmota huwachishinoe. Maganu Yihowa huuccattoꞌya macciishshe, Qullaawu Maxaafi giddo noo halaale huwateemmo gedenna harunseemmo gede kaaꞌlinoe. Tini heeshshoꞌya isira sayise oyeemmo gede kakkayissinoe. (1 Pheexiroosi 4:1, 2) Hakkiinni, 1997nni cuuame Yihowa Farciꞌraasincho ikkummo.

 Albi heeshshoꞌya agura hoogoommoro, xa lubbotenni diheeꞌreemmo. Xa kayinni addu hagiirre afiꞌre heeꞌranni noommo! Yihowa, Elvii yinannita worba galte uyinoe. Ise ledo woꞌma yanna soqqamaasine ikkine mannaho Qullaawa Maxaafa rosiinseemmo. Kuni loosi giddiidi hagiirre afiꞌre kassi yee heeꞌreemmo gede assannoe. Yihowa iso afeemmo gede assinoe daafira lowo geeshsha galaxxeemmosi.—Yohaannisi 6:44.