Ilamoommohu Meksikote aliyyeenni, Siyutaati Obiregoni yinanni katamiraati; honse ooso giddo ani ontikkiho. Heeꞌneemmohu katamu qacceraati; hakkiicho anniꞌya shiima irshanke loosiisanno. Qooxeessu heeꞌrate baxisannoho; maatenkeno baxillunna mittimma noote. Ani ontu dirihu heeꞌreenna, hombobolatte irshanke huntu; hakkiinni wole katama haꞌnummo.

 Anniꞌya mulenni woxe afiꞌra hanafinoha ikkirono, agaancho ikki. Tini ikkitosi amanke ledo noosi aantenna ninke oosonsa daaffino. Aninna roduuwiꞌya anninke sijaara moorre aga hananfummo. Mite yee age dimboommohu lewu dirihu heeꞌreeti. Hakkiinni mulenni anninkenna amanke babbaxxe heeꞌra hanafi; araadoꞌyano lexxitanni hadhu.

 Amanke wolu manchiwa hadhe heeꞌra hanaffu; ninkeno ledose haadhe hadhunke. Kuni manchi isera woxe diaannose; ise afidhanno woxinni heeꞌrano didandiinoommo. Hakko daafira aninna roduuwiꞌya afiꞌnummo looso baala loosa hananfummo; ikkirono hakkuno hasiisannonkere hidhate diꞌꞌikkinonke. Ani caamma feyemmo, hattono daabbo, gaazeexa, maastikanna wole coyibba hireemmo. Qoleno katamu giddo dureeyyete mininni fushshine hunnoonni sagale hasiꞌranni haꞌreemmo.

 Tonne diro ikkieta, mittu manchi katamu ishine tunganni basera ledosi looseemmo gede koyisie. Hakkiinni roso agure hakko loosira higummo; qaeno agure hakko heeꞌra hanafummo. Kuni manchi barrunni baatannoe woxi mitte doolaare nafa diꞌꞌikkanno; qoleno iteemmore aannoehu ishine tunganni basenni xinqeeti. Ishinu bayicho tungoonnire gamba asse miꞌnoommo daasira galeemmo. Hakko noo manni maaeela coye coyiꞌranno, hattono foorannoho. Insa giddo batinyu jingilli assitanno xagga adhitannoreetinna dimbitannoreeti. Heeshshoꞌya giddo baalantenni roore bushshino yanna hatteeti; waajje huxiꞌranni, hashsha baala wiꞌleemmo. Buximaꞌyanna gari roso rosa hoogaꞌya lowo geeshsha saalfachishshannoe. Hakko ishine tunganni basera mitu sasu diri geeshsha heeꞌroommo; hakkiinni Meksikote giddo wole katama haꞌrummo. Hakkiicho looso afiꞌre awawanna fuutta gamba assa, shonkoora hiiqqanna dinnicha uma hanafummo.

 Shoolu diri gedensaanni, galagale Siyutaati Obiregoni haꞌrummo. Hakkiicho aduwiꞌya giddo mitte qaallittete; ise minese heeꞌreemmo gede fajjitue. Hakkiinni bararraaqissanno haaqee haaqiiꞌra hanafummo; qoleno lowo geeshsha hexxo mudhoommo daafira, aneneeto shaate hedummo. Mitto hashsha togo yee Magano huucciꞌrummo: “Mootichaꞌya, ati noottoha ikkiro, afeemmohe gede kaaꞌlie; hegere geeshsha atera soqqameemmohe. Addu ammaꞌno nooha ikkiro, afeemmo gede kaaꞌlie.”

 Bashshonni ayyaanaamittete coye rosa baxeemmo. Shiinqu heeꞌre nafa, duucha beetekiristaane haꞌroommo; ikkirono maroommowa baalawa irraawe higoommo. Korkaatuno baalanti beetekiristaane hakkeeshshi geeshsha Qullaawa Maxaafa dihoroonsidhanno; qoleno Magano afeemmo gede dikaaꞌlitinoe. Mite beetekiristaanna woxeho wojji yitanno; mite beetekiristaanna eanno manni kayinni foorannoho.

 Tonaa honsu dirihu heeꞌreenna, rodooꞌya minaanni Yihowa Farciꞌraasine ammaꞌnote misilla horoonsiꞌrate daafira Qullaawu Maxaafi yaannore kultinosita kulie. Isi Fulo 20:4, 5 nabbawie. Kuni qummeeshshi misilla seekka hasiissannonkekkita kulanno. Kiiro 5 togo yitanno: “Kaphu magannara kumbuultinoonte; insano magansidhinoonte. Ani hinaasaancho Maganooti [“ane calla magansiꞌnaera hasiꞌreemmo Maganooti,” Haaro Alame Tiro].” Hakkiinni ballinke togo yiie: “Maganu maalale loosate misilla horoonsiꞌrannoha ikkoommero woy iso magansiꞌrate misilla horoonsiꞌnammora hasiꞌrannoha ikkoommero, misilla seekkidhinoonte yaannoni?” Tini xaꞌmo lede afate quqquxameemmo gede assitue. Hakkunni gedensaanni, Qullaawu Maxaafi rosi daafira isi ledo duucha hinge hasaamboommo. Isinni hasaawu lowo geeshsha baxisannoe daafira, yanna afummokki gooffanno.

 Gedensoonni, ballinke Yihowa Farciꞌraasine gambooshshe haaꞌre haꞌrie. Hakko laoommorinna macciishshoommo rosi lowo geeshsha dhagge ikkinoe. Gambooshshunniwa wedellootu nafa madiraketenni dhagge ikkanno garinni qaale kultanno! ‘Dhagge ikkanno rosooti!’ yee hedummo. Umu dubbinoehanna suudiweele noommoha ikkirono, Yihowa Farciꞌraasine faasiiqqe haadhinoe. Mitte maate isinni, gambooshshu gedensaanni ledonsa hurbaate itammora koyissinoe!

 Yihowa Farciꞌraasine ledo Qullaawa Maxaafa xiinxallaꞌya, Maganu Yihowa shaqqado Anna ikkinota huwateemmo gede assitinoe; noonke jajjinna ronsoommo rosi ikki geeshshihano ikkiro, woy dagoomu giddo egennammoommore ikkinummorono ikkano hoongummoro, woy sirchinke baxihano ikkiro, Yihowa ninke daafira hedannota rosoommo. Isi horonta mallaadannokki Maganooti. (Soqqamaasinete Looso 10:34, 35) Jeefoteno ayyaanaamittete gooroꞌya fulummo. Heeshshoꞌyano xaate xea diꞌꞌikkitino.

 Heeshshoꞌya woyyaabbanni hadhu! Sijaara aga, ago doogimale aga, hattono maaeela coye coyiꞌra agurummo. Anjeꞌyanni hanaffe giddoꞌya noo xissono sunu sununni fula hanaffu; bararraaqissanno haaqee haaqiiꞌrano agurummo. Anjeꞌyanni lowo qarri iillinoe daafiranna gari roso rosoommokki daafira, alba ani ditidhoommoho yee hedeemmo; xa kayinni, giddoꞌya rumuxxite keeshshitinota tenne hedono qeeꞌla dandoommo.

 Yihowa baxxannotinna lowo geeshsha irkissannoeti kaajja minaama nooe. Xa ammanate roduuwaꞌya jawaachishanninna rosiisanni woradu aliidi laꞌꞌaancho ikke soqqamanni noommo; ammanate roduuwiꞌya maateꞌya gedeeti. Qullaawu Maxaafi wodanaꞌya sissinoe daafiranna Yihowa rosiisannoha kaajja roso rosoommo daafira, xa ditidhoommoho yee dihedeemmo.