Nisoratin’i Lioka 13:1-35
-
Mibebaha tsy no ho ripaky (1-5)
-
Fanohara mikasiky aviavy tsy nisy voany iny (6-9)
-
Ampela vokoky nitahan’i Jesosy tamy andro sabata (10-17)
-
Fanohara mikasiky voan-tsinapy noho levira (18-21)
-
Miezaha mafy mba hilitsy amy vavahady tery (22-30)
-
Heroda, azy “amboanala mahihitsihitsy iny” (31-33)
-
Nitany an’i Jerosalema Jesosy (34, 35)
13 Tamy fotoa zay, nisy tamin’olo teo rey nitantara tamy Jesosy hoe nisy Galilianina nivonoan’i Pilato, le naharony tamy soro nataon-drozy ty lion-drozy.
2 Le nivola tamin-drozy Jesosy hoe: “Mieritseritsy va nareo hoe mpanota marè mandilatsy an’ny Galilianina hafa rey rozy satria zay ty raha nahazo an-drozy?
3 Tsy zay mihintsy. Fe ambarako anareo fa ho ripaky manahaky an-drozy koa nareo iaby laha tsy mibebaky.
4 Ka olo 18 nimaty niravohan’ny tilikambo ta Siloama ao rey? Mieritseritsy va nareo hoe mpanota marè mandilatsy ty olo iaby mipetraky a Jerosalema ao rozy?
5 Tsy zay mihintsy. Fe ambarako anareo fa ho ripaky manahaky an-drozy koa nareo iaby laha tsy mibebaky.”
6 Bakeo nanao fanohara ie ka nivola hoe: “Nisy aviavy nitiry tamy tanimboalobokin’ny lahilahy raiky zay, le namonjy teny ie mba hila voany fe tsy nahita mihintsy.
7 Bakeo nivola tamy mpikarakara an’ny tanimboaloboky iny ie hoe: ‘Fa telo tao aho zay niavy teto avao mba hila voany tamy aviavy toy, fe tsy nahita mihintsy. Tampaho any io! Manino raha io ro engà hibaha pilasy eo avao? Lasa tsy azo ampiasà tany io henanio.’
8 Le hoy ty navalin’ny mpikarakara tanimboaloboky iny: ‘Engao eo avao tse ie nahoda zisiky amy tao ho avy, fa hohalìko ty manodidy azy sady hasiako zeziky.
9 Laha mamoa ie, le zay ty soa! Fa laha tsy mamoa ie, le tampaho any.’”
10 Ndraiky Sabata zay, nampianatsy tamy synagoga raiky zay ao Jesosy.
11 Henteany nisy ampela nisy fanahy raty ty teo. Narary tanatin’ny 18 tao ampela io tratsin’ny fanahy raty iny, ka tena nivokoky le tsy afaky niandra mihintsy.
12 Lafa nahita azy Jesosy, le nikaiky azy ka nivola hoe: “Afaky amy aretinao iny iha!”
13 Le nametra-tana taminy ie, ka avy le niandra ampela iny le nanome voninahitsy a-Ndranahary.
14 Fe neloky ty mpiandraikitsy an’ny synagoga iny satria andro sabata ty nanafahan’i Jesosy an’ny arety iny. Le nivola tamy vahoaky rey ie hoe: “Enin’andro ro natao hiasà, ka amy andro reo nareo ro tokony ho avy hanafaha ty aretinareo, fa tsy amy andro sabata.”
15 Fe hoy ty navalin’ny Tompo azy: “Mpiatsaravelatsihy nareo! Tsy samby mampiboaky ty aombinareo na ty ampondranareo mifehy am-bala ao va nareo amy andro sabata, le manday an-drozy minon-drano?
16 Ka ampela anan’i Abrahama tia koa fa nifehezin’i Satana tanatin’ny 18 tao, ka tsy tokony hovahà va ie amy andro sabata mba tsy ho voafehy manahaky ani-zay sasy?”
17 Lafa nivola an’ny raha reo ie, le nimenatsy iaby mpanohitsy azy rey. Fa vahoaky rey nifalifaly iaby lafa nahita ty raha mahatseriky iaby nataon’i Jesosy.
18 Le nivola koa ie hoe: “Mitovy amin’ino ty Fanjakà-Ndranahary? Azoko ampitovizy amin’ino raha io?
19 Manahaky voan-tsinapy* nalan’olo raha io, ka namboleny tamy zaridainy ao, bakeo nitiry le nilasa hazo. Le namboatsy trano tamy sampany eny ty voro.”
20 Le nivola ndraiky ie hoe: “Azoko ampitovizy amin’ino ty Fanjakà-Ndranahary?
21 Manahaky levira nalan’ny ampela raiky raha io, ka naharony tamy lafariny intelon’ny meza bevata* zisiky nitomboan’ny koba iaby iny.”
22 Tamy Jesosy tan-dala ho a Jerosalema any iny, le niteteziny iaby ndre tanàmbe ndre tanà kelikely, ka nampianariny ty olo.
23 Le nisy lahilahy raiky zay nivola taminy hoe: “Tompo, kelikely avao va ty olo ho avotsy?” Le hoy ty asany tamin-drozy:
24 “Miezaha mafy mba hilitsy amy varavara tery, satria ambarako anareo fa maro ty ta hilitsy ao fe tsy ho afaky.
25 Fa lafa mitsanga tompon-trano iny ka manily an’ny varavara iny, le hitsanga amonto ao nareo bakeo handondò* am-baravara ao ka hivola hoe: ‘Tompo, mba vohao zahay!’ Fe ho zao ty havaliny anareo: ‘Tsy haiko hoe olo baka aia nareo.’
26 Bakeo hivola nareo hoe: ‘Nihina noho nino niaraky taminao zahay, le nampianatsy mbamy lala aminay eny rey iha.’
27 Fe hivola aminareo ie hoe: ‘Tsy haiko hoe olo baka aia nareo. Mialà amiko eto iaby nareo mpanao raha raty reo!’
28 Le hitàny noho hangìtsy* nareo lafa mahita an’i Abrahama, Isaka, Jakoba noho mpaminany iaby rey amy Fanjakà-Ndranahary ao kanefa nareo ho voaroaky amonto any.
29 Le ho avy baka antinana, andrefa, avaratsy, noho baka antimo any ty olo, ka hangalaky pilasy* amy latabo amy Fanjakà-Ndranahary ao.
30 Le misy ty farany ho voalohany, le misy ty voalohany ho farany.”
31 Tamy fotoa* zay mihintsy, nisy Fariseo namonjy an’i Jesosy ka nivola taminy hoe: “Mialà eto iha fa ta hamono anao Heroda.”
32 Le hoy ty asany tamin-drozy: “Ndany volano amboanala mahihitsihitsy iny hoe: ‘Mandroaky demonia noho manafaky aretin’olo aho androany noho hamaray, le afakamaray ho vita ty raha ataoko.’
33 Fe ndre zay, tsy maintsy manohy ty liako avao aho androany noho hamaray noho afakamaray, satria tsy mety laha* hoe vonoa ivelan’i Jerosalema ty mpaminany.
34 Jerosalema, Jerosalema, mpamono ty mpaminany noho mpitoraky vato ze olo irahy aminao any iha! Impiry aho ro nita hamory ty ananao, manahaky renin’akoho mamory ty anany ambany elatsiny ao rey, fe tsy nahefa nareo.
35 Hengà eo nareo noho ty tranonareo!* Ambarako anareo fa tsy hahita ahy sasy nareo zisiky hivolananareo hoe: ‘Enganè mba hahazo fitahia azy avy amy anaran’i Jehovah iny!’”
Fanamariha ambany pejy
^ Grika: sinapi. Raha mitiry sinapy io, le kaihy koa hoe motarda.
^ Abt: “sehà.” 1 sehà = 7,33 litra.
^ Na: “hamaipaiky.”
^ Zany hoe hangìtsy satria ho meloky noho ho kivy tanteraky.
^ Abt: “handry mihorira.”
^ Abt: “lera.”
^ Na: “tsy azo eritserety.”
^ Na mety hoe “Hengà le tsy hisy hipetraky sasy ty tranonareo!”, zany hoe ty tempoly.
