Nisoratin’i Lioka 14:1-35
-
Lahilahy voan’ny kibonabona, nafahin’i Jesosy tamy andro sabata (1-6)
-
Miambanea lafa asàn’olo (7-11)
-
Asao ze tsy afaky mamaly an’ny raha nataonao iny (12-14)
-
Fanohara mikasiky olo nasà fe nila fialan-tsiny (15-24)
-
Tsy afaky ho mpianatsin’i Jesosy ze tsy mahafoy ty raha iaby (25-33)
-
Sira lasa boka (34, 35)
14 Ndraiky zay koa Jesosy nandeha nihina tamy tranon’ny sefon’ny Fariseo raiky zay, tamy andro sabata, le nanenty azy soa ty olo tao.
2 Ingo amy zay nisy lahilahy raiky nisy arety nitsanga talohan’i Jesosy teo. Boboboboky iaby ty vatany.*
3 Farany nanontanean’i Jesosy olo nahay Lalàna noho Fariseo rey hoe: “Azo atao va ty mitaha* amy andro sabata?”
4 Fe tsy nisy nivola rozy, ka nitsapàn’i Jesosy lahilahy iny le nafahiny aretiny iny, bakeo nampandehaniny ie.
5 Le hoy ty asany tamin-drozy: “Laha latsaky anaty vovo* any ty ananareo na ty aombinareo, ia aminareo ty tsy avy le haninto azy bakao ndre amy andro sabata aza?”
6 Le tsy nahafivola rozy.
7 Nihitany bakeon’iny hoe nifily ty pilasy farani-ze soa olo nasà rey, ka nanao fanohara ie. Hoy ty asany tamin-drozy:
8 “Lafa misy olo manasa anao hamonjy fety amy mariazy, le ka mamonjy ty* pilasy farani-ze soa satria mety nanasa olo manan-kaja mandilatsy anao ie.
9 Le hamonjy anao olo nanasa anareo iny, ka hivola hoe: ‘Ameo an’olo toy pilasinao io.’ Le ho menatsy iha hifindra amy pilasy farany afara any.
10 Fa lafa misy olo manasa anao, le ndany vonjeo ze pilasy farany afara any. Amy zay lafa avy olo manasa anao iny, le hivola aminao hoe: ‘Mamonjea aloha etia nama.’ Le hahazo voninahitsy anatrehan’olo iaby niaraky nihina taminao tao rey iha.
11 Fa ze manondrotsy ty vatany ro ho lasa ambany, le ze miambany ro hasondrotsy.”
12 Bakeo nivola tamin’olo nanasa azy iny ie hoe: “Lafa manasa olo hihina midỳ na hihina hariva iha, le ka manasa ty namanao na ty rahalahinao na ty longonao na ty olo tanà raiky aminao panarivo rey avao, satria mety hanasa anao koa rozy, ka ho voavaly raha nataonao iny.
13 Fa aleo ty mahantra noho ty kilemaina noho ty kombo noho ty jiky ro asao lafa misy fety anasanao olo,
14 amy zay ho sambatsy iha, satria tsy hana raha havaly anao rozy. Le hovalea-Ndranahary raha nataonao zay amy fameloma ty marina.”
15 Lafa naharè ani-zay ty raiky amin’olo nasà rey, le nivola tamy Jesosy hoe: “Sambatsy ze mihina* amy Fanjakà-Ndranahary ao.”
16 Le hoy Jesosy taminy: “Nisy lahilahy raiky nanao fety be harivariva, le nanasa olo maro ie.
17 Lafa niavy ty lera hanaova an’ny fety iny, le nirahiny ty mpanompony mba hivola tamin’olo nasà rey hoe: ‘Miavia fa fa parè ty raha iaby.’
18 Fe samby nila fialan-tsiny iaby rozy. Ty raiky voalohany nivola hoe: ‘Nivily tany* aho, le mila mandeha any manenty azy. Mba ialao tsiny any lahy aho!’
19 Le nivola koa ty raiky hoe: ‘Nivily aomby sarety folo aho, le handeha hanenty an-drozy vasa mahazaka asa rozy. Mba ialao tsiny any lahy aho!’
20 Ty raiky hafa koa nivola hoe: ‘Vo vita mariazy aho, ka tsy afaky ho avy any.’
21 Farany niavy amy tompony iny any mpanompo iny, le nitantara an’ny raha rey taminy. Le neloky tompon-trano iny ka hoy ty asany tamy mpanompony iny: ‘Ndany malaky, miboaha mana amy lala be noho lala kelikely an-tanà eto, le andeso atoy ty mahantra noho ty kilemaina noho ty jiky noho ty kombo.’
22 Lafa niavy mpanompo iny, le nivola hoe: ‘Fa vita raha nampanovinao iny nahoda, fe mbo misy pilasy ty ao.’
23 Le hoy tompony iny: ‘Ndany mana amy lala hafa miboaky amy tanà toy, le anovo ze hahavy ty olo any ho avy atoy, soa ho atsiky tranoko toy.
24 Satria ambarako anareo fa tsy hisy hanandra ty hany hariva nikarakarako olo nasà rey.’”
25 Nisy vahoaky maro amy zay niharo lia tamy Jesosy. Le nitoliky Jesosy ka nivola tamin-drozy hoe:
26 “Laha misy olo mamonjy ahy kanefa tsy malay* ty babany noho ty reniny noho ty valiny noho ty anany noho ty rahalahiny noho ty anabaviny, na ty ainy mihintsy aza, le tsy afaky ho mpianatsiko.
27 Ze tsy manday ty hazo fijaleany* ka tsy manaraky ahy, le tsy afaky ho mpianatsiko.
28 Ia aminareo, ohatsy, laha ta hamboatsy tilikambo, ro tsy mipetraky tse le manao kontikonty hoe hotrino ty ho lany, mba hahità hoe ampy hamità an’ny raha iny va ty raha ananany sa tsy ampy?
29 Laha tsy manao ani-zay ie, le mety hametraky fototsy, kanefa tsy ho afaky hamita an’ny tilikambo iny. Le hikizaky azy iaby ze olo mahita an’ny raha iny,
30 ka hivola hoe: ‘Lahilahy tia namboatsy tilikambo kanefa tsy nahavita zisiky farany.’
31 Ia koa ty mpanjaka handeha hialy amy mpanjaka hafa, ka tsy hipetraky tse hila hevitsy vasa ho vitany ty hialy amy mpanjaka mana maramila 20 000, kanefa ty azy 10 000 avao?
32 Laha tsy ho vitany ty hialy aminy, le haniraky ambasadera ie mba hangataky filongoa tany mbo lavitsy olo iny.
33 Manahaky ani-zay koa fa tsy afaky ho mpianatsiko ze tsy mahafoy ty hananany iaby.
34 “Tena soa vatany ty sira, fe laha lasa boka ty sira, akory ty hampimpolianareo ty tsirony?
35 Tsy hay atao amy tany na amy zeziky ie, ka harian’olo avao. Ze mana sofy hijanjina, le mijanjina soa.”
Fanamariha ambany pejy
^ Na: “Voan’ny kibonabona ie.” Kibonabona io karazan’arety vokatsin’ny ranon-draha maro loatsy anaty vatan’olo raiky.
^ Na: “manafaky aretin’olo.”
^ Na: “kirijy.”
^ Na: “mandry mihorira amy.”
^ Abt: “mihina mofo.”
^ Na: “baibò.”
^ Na: “tsy somary kelikely ty fitiavany.”
