Nisoratin’i Lioka 16:1-31
16 Nivola tamy mpianatsiny rey koa Jesosy hoe: “Nisy lahilahy panarivo nana mpanompo raiky zay. Niandraikitsy ty tan-tranony ao mpanompo io, le nasaran’olo hoe nandanilany ty hananan’ny tompony.
2 Farany nikaiky azy tompony iny le nivola hoe: ‘Ino raha reko mikasiky anao zao? Ameo ahy ty tatitsin’ny asa nankiny taminao, fa tsy mahazo miandraikitsy ty an-tranoko ato sasy iha.’
3 Le nieritseritsy mpanompo iny hoe: ‘Ino lahy ty hataoko? Halàn’ny tompoko iny tsy ho mpiandraikitsy ty hananany zany aho? Kanefa zaho tsy mana hery hiasà am-baibò eny. Laha hangataky koa mahamenatsy ahy.
4 Ha! Haiko ty raha ataoko soa hisy olo handramby ahy ho an-tranony ao, lafa voaroaky aho.’
5 Le nikaihiny kiraidraiky olo nananan’ny tompony trosa rey, ka hoy ty asany tamy raiky voalohany iny: ‘Ino ty ananan’ny tompoko aminao?’
6 Le nivola ie hoe: ‘Menaky oliva injaton’ny bata.’* Le hoy mpanompo iny: ‘Alao taratasy fifanekea nataonao iny, le mipetraha le sorato malaky hoe 50.’
7 Bakeo nivola tamy raiky hafa koa ie hoe: ‘Ka iha, ino ty ananany aminao?’ Le nivola olo iny hoe: ‘Vary* injaton’ny kora.’* Le hoy ty asany: ‘Alao taratasy fifanekea nataonao iny, le sorato hoe 80.’
8 Le nideran’ny tompony iny mpanompo iny ndre nanao raha tsy marina aza, satria nahihitsy.* Mivola ani-zay aminareo aho satria mahihitsy kokoa mandilatsy ty anan’ny mazava ty anani-zao tontolo zao,* lafa manao fifanaraha amin’olo.
9 “Zao koa ty ambarako anareo: Anovo ze hahazoa nama amy alalan’ny hanana tsy marina, amy zay lafa lany hanana zay, le horambesin-drozy amy tanà* mandrakizay any nareo.
10 Ze azo atokisa amy raha kelikely le azo atokisa amy raha bevata koa, le ze tsy marina amy raha kelikely le tsy marina amy raha bevata koa.
11 Ka laha tsy asehonareo hoe azo atokisa nareo lafa mampiasa an’ny hanana tsy marina iny, ia ty hatòky anareo amy tena hanana iny?
12 Laha tsy asehonareo koa hoe azo atokisa nareo amy ze raha ataonareo amy hananan’olo, ia ty hanome raha anareo?
13 Tsy misy mpanompo mahavita manompo tompo roe, fa ty raiky ho halany, le ty raiky ho teany, na ty raiky hipitihany le ty raiky tsy hodareany.* Tsy mahavita manompo a-Ndranahary noho ty Hanana nareo.”
14 Nijanjy an’ny raha iaby rezay Fariseo tea drala rey, le nikizaky an’i Jesosy.
15 Farany nivola tamin-drozy Jesosy hoe: “Nareo mivola ty vatanareo hoe marina amin’olo eo, kanefa hai-Ndranahary ty fonareo, satria ze raha eritseretin’olo hoe vatan-draha, le mampangaroharo ty fahità-Ndranahary azy.
16 “Zisiky amy Jaona eo avao ty Lalàna noho ty Mpaminany. Nanomboky teo amy zay, le ty Fanjakà-Ndranahary ro vaovao soa torỳ amin’olo, sady misisiky ho ao ty karazan’olo iaby.
17 Aleo mba moramora ty haharava ty lanitsy noho ty tany, tozay ty tsy hahatanteraky ty anaka tsipiky amy Lalàna ao.
18 “Ze lahilahy misaraky amy valiny bakeo manambaly olo hafa, le mandranto. Ze manambaly ampela nisarahan’ny valiny koa, le mandrato.
19 “Nisy lahilahy raiky panarivo nisiky akanjo namboary tamy lamba volomparasy noho rongony. Nanao ze hahafalifaly ty vatany avao ie sanandro sady nanao ze teateany avao.
20 Fe nisy mpangataky kaihy hoe Lazarosy zay napetraky tam-bavahadiny eo. Feno bay mpangataky io.
21 Mba ta hihina ani-ze hany latsaky baka amy latabon’ny lahilahy panarivo iny ie. Ndre ty amboa aza avy eo milelaky an’ny bainy rey.
22 Tafara atoy, nimaty mpangataky iny le nandesin’ny anjely tanilan’i* Abrahama eo.
“Nimaty koa lahilahy panarivo iny le nalevy.
23 Tamy ie nijalijaly tanaty Lolo* ao iny, le niandra ie ka nahita an’i Abrahama ta lavitsy eroy, le tanilan’i* Abrahama eo Lazarosy.
24 Farany nikaiky ie le nivola hoe: ‘Abrahama babako, mba ferineso aho! Mba iraho Lazarosy hampijobo ty lohan’ny rantsantanany anaty rano ao mba hampanintsinintsy ty lelako, fa mijaly aho amy afo miroaroa toy ato.’
25 Fe hoy ty asan’i Abrahama: ‘Tiarovo anako fa fa niazonao iaby ze raha soa nirinao tamy androm-piainanao, fa Lazarosy nijaly avao. Fe henanizao ie ampaherezy atoy, fa iha mijaly.
26 Fa nasia teva* koa anè hampisaraky anay aminareo, amy zay tsy afaky mandeha aminareo eny ze ta hiala aminay etoy, le tsy afaky miampita aminay etoy koa ty baka aminareo eny.’
27 Le hoy ty asany: ‘Laha zay ie, le mba mangataky aminao aho baba mba haniraky an’i Lazarosy ho an-tranon’ny babako any.
28 Tsy zay fa mana rahalahy limy aho, le iraho ie hanazava soa amin-drozy tsy no ho avy amy pilasy fampijalea toy atoy koa rozy.’
29 Fe nivola Abrahama hoe: ‘Mana an’i Mosesy noho mpaminany rey rozy, ka engao rozy hijanjy ani-reo.’
30 Le hoy ty asany: ‘Abrahama babako, tsy hijanjy ani-reo rozy. Fa laha misy olo baka amy maty mandeha amin-drozy any, le hibebaky rozy.’
31 Fe hoy ty asan’i Abrahama: ‘Laha tsy mijanjy an’i Mosesy noho mpaminany rey rozy, le tsy ho resy lahatsy ndre misy olo maty hovelomy aza.’”
Fanamariha ambany pejy
^ 1 bata = 22 litra.
^ Na: “Varimbazaha.”
^ 1 kora = 220 litra.
^ Na: “hendry.”
^ Na: “anan’ny fotoa henanizao.” Henteo F.S.B. “Zao tontolo zao.”
^ Na: “tanà ipetraha.”
^ Na: “hataony sahala tsy misy dikany.”
^ Abt: “tan-tratran’i.”
^ Abt: “tan-tratran’i.”
^ Na: “kintsỳ.”
