Nisoratin’i Lioka 17:1-37
17 Bakeo nivola tamy mpianatsiny rey Jesosy hoe: “Tsy maintsy misy avao ty raha mety hahavy olo hanota,* fe ho azon-draha ze olo mahavy an’ny raha zay!
2 Mbo aleoleo aza asia vato fikoseha vary ty vozon’olo zay le hatoraky an-driaky any ie, tozay hahavy ty raiky amy maliniky rey hanota.*
3 Mitandrema nareo. Volano* ty rahalahinao laha manota, ka laha mibebaky ie le engao ty hadisoany.
4 Ndre manota aminao impito aza ie anatin’ny andro raiky ka mimpoly aminao eo impito, le mivola hoe: ‘Mifona* aho’, le tsy maintsy manenga ty hadisoany iha.”
5 Le hoy apostoly rey tamy Tompo: “Ampitombò ty finoanay.”
6 Le hoy Tompo: “Laha nanam-pinoa nareo ndre kelikely manahaky voan-tsinapy io avao aza, ka mivola amy hazobe* roy hoe: ‘Miombota le mitiria an-driaky any!’, le haneky anareo* ie.
7 “Ndao hatao hoe mana mpanompo miasa tany na miaraky aondry nareo. Lafa moly baka am-baibò any ie, hivola aminy va nareo hoe: ‘Avia malaky, ndao hihina an-databo eto’?
8 Tsy hivola aminy va nareo* hoe: ‘Ndany karakarao ty hany hohaniko hariva, le misoloa siky, le ameo hany aho, ka lafa baka nihina noho nino aho vo mahazo mihina noho mino koa iha’?
9 Tsy hisaotsy an’ny mpanompo iny nareo* satria ze raha nampanovy azy avao ro nataony, sa tsy zay?
10 Manahaky ani-zay koa fa lafa vitanareo ze raha nampanovy anareo, le mivolana hoe: ‘Zahay anè mpanompo avao! Ze tokony ho nataonay avao ro nataonay.’”
11 Lafa nana a Jerosalema any ie, le nandalo tanelanelan’i Samaria noho Galilia.
12 Lafa nilitsy tamy tanà kelikely raiky zay ie, le nisy boka folo lahy nitojiky azy, fe nitsanga ta lavidavitsy teny.
13 Le nikaiky marè rozy hoe: “Jesosy e, Mpampianatsy e, mba ferineso zahay!”
14 Lafa nahita an-drozy ie, le nivola hoe: “Mandehana miseho amy mpisoro any.” Le nandeha rozy. Mbo an-dala eny rozy le fa nalio.
15 Ty raiky amin-drozy amy zay lafa nahita hoe niafaky aretiny iny, le nimpoly ka nanome voninahitsy a-Ndranahary tamy feo marè.
16 Le niankohoky tan-tombon’i Jesosy eo ie ka nisaotsy azy. Samaritanina ie amin’io.
17 Le hoy Jesosy: “Tsy fa malio iaby va rozy folo? Ka nanaia ty sivy?
18 Le tsy mba nisy nimpoly hanome voninahitsy a-Ndranahary va laha tsy olo baka amy firenena hafa toy avao?”
19 Bakeo ie nivola hoe: “Mitsangàna le ndany amy zay. Ty finoanao ro nahafaky an’ny aretinao iny.”
20 Le nanontanean’ny Fariseo rey Jesosy hoe ombia ty hiavian’ny Fanjakà-Ndranahary. Le hoy ty navaliny: “Tsy avy le ho hita ty fiavian’ny Fanjakà-Ndranahary,
21 sady tsy hisy hivola hoe: ‘Atoy ie!’ na ‘Aroy ie!’ satria anivonareo* eo ty Fanjakà-Ndranahary.”
22 Bakeo nivola tamy mpianatsiny rey ie hoe: “Ho avy ty andro, le hirinareo ty hahita ty raiky amy andron’ny Anak’olo, fe tsy ho hitanareo raha zay.
23 Le hivola aminareo ty olo hoe: ‘Aroy ie!’ na ‘Atoy ie!’, fe ka mandeha any na manaraky an-drozy.
24 Satria sahala amy helatsy manazava ty faritsy raiky amy lanitsy zisiky amy faritsy hafa amy lanitsy eny, le hanahaky ani-zay koa ty Anak’olo amy androny.
25 Fe tsy maintsy hampijalijalỳ tse ie, sady tsy heken’ny taranaky toy.
26 Hanahaky ty raha niseho tamy andron’i Noa koa ty raha hiseho amy andron’ny Anak’olo:
27 Nihina ty olo, nino, nangata-baly noho nalàn’olo valy, zisiky niavian’ny andro niliran’i Noa tamy sambofiara ao. Le niavy ranobe iny ka nandripaky an-drozy iaby.
28 Hanahaky ty raha niseho tamy andron’i Lota koa fotoa zay: Nihina ty olo, nino, nivily, namarotsy, namboly, noho namboatsy trano.
29 Fa tamy andro niboahan’i Lota baka a Sodoma ao, le nisy afo noho solifara* nilatsaky baka an-danitsy any manahaky ora rey, ka nandripaky an-drozy iaby.
30 Hanahaky ani-zay koa amy andro hampisehoa ty Anak’olo.
31 “Amy andro zay, le tsy tokony hijotso hangalaky ty hananany an-trano ao ze anabo trano any. Tsy tokony himpoly mana afara* any koa ze am-baibò any.
32 Tiarovo valin’i Lota iny.
33 Ze miezaky miaro ty ainy ro hamoy ty ainy, fa ze mamoy ty ainy ro hiaro ty ainy.
34 Ambarako anareo fa amy haly zay, hisy olo roe amy fandrea raiky, fe ty raiky handesy fa ty raiky hengà.
35 Le hisy ampela roe hanodiky vato fikoseha vary raiky avao, fe ty raiky handesy fa ty raiky hengà.”
36 ——
37 Farany rozy nivola taminy hoe: “Aia zao io Tompo?” Le hoy ty asany: “Amy ze pilasy misy an’ny faty iny, le any koa ro hivorian’ny voromahery.”
Fanamariha ambany pejy
^ Abt: “raha manafitohina.”
^ Abt: “ho tafitohina.”
^ Na: “Helofo.”
^ Abt: “Mibebaky.”
^ Voaroihazo ty nikaiha an’ny raha io. Mahery hazo io sady mety hahasesy 6 metra eo ho eo ty haabony. Bevata ty raviny, le manahaky fo io ty poziny. Mena na mainty manahaky voaroimainty rey ty voany.
^ Abt: “hanoriky ty safànareo.”
^ Abt: “ie.”
^ Abt: “ie.”
^ Na: “aminareo.”
^ Safà hoe solifara eto io manondro vato mirehitsy.
^ Abt: “mana amy raha afara.”
