Nisoratin’i Lioka 22:1-71
-
Nila hevitsy hamonoa an’i Jesosy ty mpisoro (1-6)
-
Fanomana an’ny Paska farany iny (7-13)
-
Sakafo Harivan’ny Tompo voalohany (14-20)
-
‘Amiko an-databo eto azy hamadiky ahy iny’ (21-23)
-
Nifamaly mikasiky hoe ia ty farany anabo (24-27)
-
Nanao fifanekea mikasiky fanjakà Jesosy (28-30)
-
Fa nivola Jesosy hoe handà azy Petera (31-34)
-
Mila mioma; sabatsy roe (35-38)
-
Vavakin’i Jesosy tamy Vohitsy Oliva teo (39-46)
-
Nisambory Jesosy (47-53)
-
Nandà an’i Jesosy, Petera (54-62)
-
Nikizakizahy Jesosy (63-65)
-
Tamy Fitsarà Anabo Jiosy eo (66-71)
22 Fa nihanarìny tamy zay ty Fetin’ny Mofo Tsy Misy Levira, azy kaihy hoe Paska iny.
2 Le nila hevitsy* hamonoa azy ty sefon’ny mpisoro noho ty mpanora-dalàna satria natahotsy an’ny vahoaky rey rozy.
3 Bakeo nilitsy tamy Jodasy Iskariota ao Satana. Raiky amy Apostoly 12 rey Jodasy io.
4 Le nandeha Jodasy ka niresaky tamy sefon’ny mpisoro noho sefon’ny mpiamby tempoly rey mikasiky hoe akory ty hamadihany an’i Jesosy mba hahazoan-drozy azy.
5 Le nifalifaly rozy ka nifanaraky hoe hanome drala* azy.
6 Le naneky ie, ka nanomboky nila fotoa mety soa hamadiha an’i Jesosy mba hahazoan-drozy azy lafa tsy misy olo.
7 Niavy amy zay ty andro voalohany hankalazà ty Fetin’ny Mofo Tsy Misy Levira, zany hoe ty andro tsy maintsy hamonoa biby hatao soro amy Paska.
8 Le nirahin’i Jesosy ry Petera noho Jaona, ka nivolaniny hoe: “Ndany karakarao fankalazà Paska hataontsika* iny.”
9 Le hoy ty asan-drozy taminy: “Aia ty teanao hikarakaranay azy?”
10 Le hoy ty asany tamin-drozy: “Lafa militsy an-tanà ao nareo, le hifankatojiky amy lahilahy raiky manday siny* tany feno rano. Oriho zisiky amy ze trano ilirany ie.
11 Le volano tompon’ny trano iny hoe: ‘Zao ty nivolanin’ny mpampianatsy: “Aia ty trano fandrambesa vahiny azoko ankalazà* Paska miaraky amy ty mpianatsiko?”’
12 Le hisy trano malalaky anabo etazy any hatorony anareo. Fa misy ze raha ilà ty ao, le karakarao ao Paska iny.”
13 Le nandeha rozy roe, ka nihitan-drozy iaby raha nivolaniny tamin-drozy rey. Le nikarakaran-drozy Paska iny.
14 Lafa niavy amy zay fotoa iny, le nangalaky pilasy* tan-databo eo rozy amy apostoly rey.
15 Le hoy ty asany tamin-drozy: “Tena fa niriko ty hiaraky hankalaza* Paska toy aminareo alohan’ny hijaleako.
16 Satria ambarako anareo fa tsy hankalaza Paska sasy aho zisiky hahatanteraky an’ny raha zay amy Fanjakà-Ndranahary ao.”
17 Bakeo namean-drozy kopy ie le nirambesiny, ka nisaotsy a-Ndranahary ie le nivola hoe: “Rambeso toy, le minoma amy toy nareo kiraidraiky.
18 Satria ambarako anareo fa manomboky henanizao, le tsy hino amy vokatsin’ny voaloboky sasy aho zisiky hiavian’ny Fanjakà-Ndranahary.”
19 Le nandramby mofo koa ie ka nisaotsy a-Ndranahary, bakeo nitampahiny mofo iny, le nameany an-drozy ka nivola ie hoe: “Toy ty* vatako azy hamea anareo iny. Anovo avao zao ho fahatiarova ahy.”
20 Le ho zay koa ty nataony tamy kopy iny, lafa rozy baka nihina hariva iny. Le nivola ie hoe: “Kopy toy ro* fifanekea vaovao, le hampanan-kery an’ny fifanekea io ty lioko, zany hoe lio halatsaky ho anareo iny.
21 “Fe fa amiko an-databo eto ty tanani-azy hamadiky ahy iny.
22 Handeha vatany ty Anak’olo satria zay ty fa voasoratsy. Fe ndre zay, ho azon-draha olo hamadiky azy zay!”
23 Nanomboky nifampiresaky amy zay rozy hoe ia amin-drozy ty mieritseritsy hanao an’ny raha zay.
24 Fe le vatany nifamaly koa rozy le samby nivola hoe ia ty eritseretin-drozy hoe farany anabo amin-drozy.
25 Fe hoy ty asany tamin-drozy: “Manindritindry ty firenena andesiny ty mpanjaka, le kaihy hoe Mpanao Raha Soa ze mana fahefà amin-drozy eo.
26 Fe tsy tokony hanahaky ani-zay nareo. Fa ze farany be aminareo eo ro sahala zainy marè, le ze mitariky ho sahala amy mpanompo.
27 Fa ia moa ty anabo: Azy mihina* iny sa azy manompo* iny? Tsy azy mihina* iny va? Fa zaho, mpanompo* aho aminareo eto.
28 “Fe nareo tsy niala tamiko mihintsy tamy raha iaby nahazo ahy rey.
29 Ka manao fifanekea aminareo aho, manahaky ty nanaovan’ny babako fifanekea tamiko, zany hoe fifanekea mikasiky fanjakà raiky,
30 soa hihina noho hino amy lataboko amy Fanjakàko ao nareo, ka hipetraky amy sezim-panjakà mba hitsara ty foko 12 amy Israely eo.
31 “Simona, Simona, nivola Satana hoe teany hotararà manahaky vary io nareo iaby.
32 Fe fa nangataky* ho anao aho mba tsy ho rava ty finoanao. Ka laha vo tafimpoly amiko iha, le ampaherezo rahalahinao reo.”
33 Le hoy ty asan’i Petera: “Parè hiaraky aminao aho Tompo, ndre ho gadra iha ndre ho maty.”
34 Fe hoy ty asany: “Ambarako anao Petera, fa mbo tsy maneno ty akoho androany, le fa handà intelo iha ka hivola hoe tsy mahay ahy.”
35 Le nivola tamin-drozy koa ie hoe: “Nisy raha nijaleanareo va tamy nareo nirahiko rey, tamy nareo tsy nanday mpisy drala na saky fandaisa vatia na kapa rey?” Le hoy ty asan-drozy: “Tsy nisy!”
36 Le hoy ty asany: “Fa henanizao, laha iha mana mpisy drala, na mana saky fandaisa vatia, le andeso. Laha iha tsy mana sabatsy, le avilio ty sikinao* le miviliana sabatsy.
37 Satria ambarako anareo, fa tsy maintsy ho tanteraky amiko raha voasoratsy mikasiky ahy toy hoe: ‘Nataon’olo sahala amy mpandika lalàna ie.’ Satria fa manomboky tanteraky amiko raha reo.”
38 Le hoy ty asan-drozy: “Retoa misy sabatsy roe Tompo!” Le hoy ty asany: “Ampy rey.”
39 Le nandeha tamy Vohitsy Oliva eny ie, manahaky fataony rey. Le nanaraky azy koa mpianatsiny rey.
40 Lafa niavy tamy pilasy iny teny rozy, le nivolaniny hoe: “Mivavaha avao mba tsy ho resin’ny fakam-panahy.”
41 Le nikisaky lavidavitsy* ie, bakeo nandohaliky ka nivavaky
42 hoe: “Baba, laha mety aminao, le afaho amiko kopy* toy, fe aleo tsy ty sitrapoko ro hatao, fa ty ahinao.”
43 Bakeo nisy anjely raiky baka an-danitsy any niseho taminy sady nampahery azy.
44 Fe niasa loha marè ie, ka vomaiky nivavaky marerè avao. Le lasa nanahaky lio nitè tamy tany ty linitsiny.
45 Nitsanga ie lafa baka nivavaky, le namonjy an’ny mpianatsiny rey. Henteany rozy niazon-droro satria nalahelo.
46 Le nivola tamin-drozy ie hoe: “Manino nareo miroro io? Mitsangàna le mivavaha avao mba tsy ho resin’ny fakam-panahy.”
47 Mbo tsy tampitsy iaby resakiny iny, le ndrey nisy olo maro niavy bakany. Nitariky an-drozy Jodasy, raiky amy Apostoly 12 rey. Le namonjy an’i Jesosy ie mba hanoroky azy.
48 Fe hoy Jesosy taminy: “Jodasy e, oroky va ro amadihanao an’ny Anak’olo iny?”
49 Lafa niarakarakin’olo manodidy azy teo rey ty raha hiseho, le nivola rozy hoe: “Tompo e, riatanay amy sabatsy va rozy?”
50 Ty raiky amin-drozy aza nandratsy an’ny mpanompon’ny mpisorobe iny mihintsy, ka niafaky ty sofiny ankavana.
51 Fe nivola Jesosy hoe: “Ka manao an’io!”* Le nikasihiny ty sofin’ny mpanompo iny ka tsy nanahy sasy ie.
52 Le hoy Jesosy tamy sefon’ny mpisoro noho tamy sefon’ny mpiamby tempoly noho tamy anti-panahy niavy teo mba hanambotsy azy rey: “Nareo io zany manday sabatsy noho kobay manahaky olo hanambotsy malaso rey?
53 Niaraky taminareo tamy tempoly tao aho sanandro, fe tsy nanambotsy ahy nareo. Fe henanizao moa zany ty fotoanareo* noho ty fotoa anjakan’ny maìky.”
54 Le nisamborin-drozy ie ka nandesin-drozy tan-tranon’ny mpisorobe any. Fe Petera nanaraky ta lavidavitsy eny avao.
55 Nisy olo sisany amy zay nandrehitsy afo tanivon’ny lakoro iny teo le niaraky nipetraky teo. Le nipetraky teo niaraky tamin-drozy koa Petera.
56 Fe lafa nahita azy nipetraky tanilan’ny afo teo ajà ampela* raiky zay, le nandiniky azy soa ka nivola hoe: “Niaraky taminy koa lahilahy tia.”
57 Fe nandà ie hoe: “Tsy haiko zao io!”
58 Tafara kelikelini-zay nisy olo hafa koa nahita azy le nivola hoe: “Naman-drozy koa iha.” Fe nivola Petera hoe: “Tsy naman-drozy aho nahoda.”
59 Lera raiky teo ho eo tafarani-zay, nisy lahilahy raiky hafa koa tsy nanekineky fa nivola hoe: “Tena niaraky taminy mihintsy lahilahy io satria Galilianina!”
60 Fe nivola Petera hoe: “Tsy haiko raha volaninao zao.” Amy ie mbo mivola iny, avy le nisy akoho naneno.
61 Le nitoliky Tompo ka nanenty an’i Petera. Le nitiaron’i Petera resakin’ny Tompo taminy iny hoe: “Mbo tsy maneno ty akoho androany, le fa handà ahy intelo iha.”
62 Farany niboaky tamonto any ie, le nirohaky ty tany.
63 Nanomboky nikizaky noho namango an’i Jesosy olo niamby azy rey,
64 le nisaroman-drozy ty tarehiny. Le nampolimpolin-drozy nanontanea ie hoe: “Maminania! Ia namango anao teo iny?”
65 Le nivola raha raty maro hafa tamy Jesosy rozy ka tsy nanaja a-Ndranahary.
66 Lafa niavy ty maraindray, le nivory iaby anti-panahin’ny vahoaky rey, zany hoe ty sefon’ny mpisoro noho ty mpanora-dalàna. Le nandesin-drozy tamy trano misy ty Fitsarà Anabo Jiosy ao ie ka nivolanin-drozy hoe:
67 “Ambarao anay laha iha Kristy zao.” Fe hoy ty asany tamin-drozy: “Ndre hambarako anareo aza zay, le tsy hinoanareo mihintsy.
68 Sady laha anontaneako koa nareo tsy raha hamaly.
69 Fe manomboky henanizao, le hipetraky ankavanani-azy Ndranahary mahery iny eo ty Anak’olo.”
70 Le nivola rozy iaby hoe: “Anaki-Ndranahary va zany iha?” Le hoy ty asany tamin-drozy: “Ka ie volaninareo zay hoe ie aho.”
71 Le hoy ty asan-drozy: “Ino koa ty mbo ilàntsika porofo? Tsika mihintsy ro naharè ty vavany nivola an’ny raha zay.”
Fanamariha ambany pejy
^ Abt: “nila hevitsy mety soa.”
^ Drala namboary tamy volafoty.
^ Abt: “hohanintsika.”
^ Na: “sajoa.” Raha fantsakà na fanajaria rano.
^ Abt: “ihinana.”
^ Na: “nandry nihorira.”
^ Abt: “hihina.”
^ Grika: estin, zany hoe “midika ho.”
^ Grika: estin, zany hoe “midika ho.”
^ Na: “mandry mihorira an-databo.”
^ Na: “mpikarakara.”
^ Na: “mandry mihorira an-databo.”
^ Na: “mikarakara.”
^ Abt: “nisoloho.”
^ Abt: “sikinao ivelany.”
^ Abt: “tokotokony ho toraky vato indraiky.”
^ Tsy ino “kopy” io fa ty sitrapo-Ndranahary mikasiky an’i Jesosy hoe hengany ho maty ie lafa asaran’olo hoe nitiva a-Ndranahary.
^ Abt: “Fa soa zay!”
^ Abt: “leranareo.”
^ Mpanompovavy ajà ampela io.
