Nisoratin’i Lioka 5:1-39
5 Nitsanga tamy sisin’ny ranovorin’i Genesareta* eo Jesosy ndraiky zay, le nanao kisitsy taminy eo vahoaky rey mba hijanjy ty safà-Ndranahary.
2 Nahita laka roe nijano tamy sisin’ny ranovory iny teo ie tamy zay, fe tsy tamy laka rey tao mpihaza rey fa nandeha nanasa an’ny haraton-drozy rey.
3 Le niakatsy tamy raiky amy laka rey ao Jesosy. Ahin’i Simona laka io, ka nangatahiny Simona mba hampikisaky kelikely an’ny laka iny mana amy rano any. Bakeo nipetraky ie, le nampianatsy an’ny vahoaky rey baka amy laka iny ao.
4 Lafa nitampitsy ty resakiny tamy vahoaky rey, le hoy ty asany tamy Simona: “Mikisaha amy lalidaliky eny, le alatsaho ty haratonareo fa hahazo fia nareo!”
5 Fe hoy ty asan’i Simona: “Mpampianatsy e, fa niasa mafy liany nankaly zahay kanefa tsy nahazo na ino na ino. Fe mivola moa iha hoe alatsaho, le halatsako avao harato toy.”
6 Le nahazo fia maro rozy lafa nanao ani-zay, ka fa ho nitataky mihintsy harato iny.
7 Farany nikaihin-drozy* ty naman-drozy tamy laka raiky iny, mba ho avy hanampy an-drozy. Le niavy rozy ka nifenoan-drozy laka roe rey, le fa ho nilentiky mihintsy.
8 Lafa nahita ani-zay Simona Petera, le nandohaliky talohan’i Jesosy eo ka nivola hoe: “Tsy maeva hiharìny anao aho Tompo satria olombelo mpanota.”*
9 Nivola ani-zay Simona satria nitseri-draha rozy amin’olo niaraky aminy rey, amy fia maro niazon-drozy rey.
10 Nitseri-draha koa azy niaraky niasa tamy Simona rey, anatini-zay Jakoba noho Jaona anan’i Zebedio. Fe hoy Jesosy tamy Simona: “Ka matahotsy sasy fa olo velo ro ho azonao manomboky henanizao.”
11 Le nandesin-drozy nimpoly tan-tety eny laka rey, ka nengan-drozy ty raha iaby, le nanaraky azy rozy.
12 Nisy fotoa koa ie tamy tanà raiky zay tao, le nisy lahilahy feno habokà ty tao. Laha vo nahita an’i Jesosy lahilahy io, le niankohoky sady nisoloho taminy hoe: “Tompo, laha mba teanao ty hanadio ahy, le ho vitanao zay.”
13 Le naampatsin’i Jesosy ty tanany ka nikasiky azy ie sady nivola hoe: “Tena teako zay! Hataoko malio iha.” Avy le niafaky habokàny iny.
14 Bakeo niraràn’i Jesosy lahilahy iny mba tsy hivolambola amin’olo. Hoy ty asany: “Fe ndany miseho amy mpisoro any, le ameo ty fanomeza nivolanin’i Mosesy hoe tokony hamea, mba ho hitan-drozy hoe fa malio iha.”
15 Fe vomaiky niparitaky ty resaky mikasiky azy, ka nisy vahoaky maro nivory mba hijanjy azy noho hafahiny amy ty aretin-drozy.
16 Fe ndre zay, le nandeha tamy pilasy mitoka any matetiky ie mba hivavaky.
17 Ndraiky andro, le nisy Fariseo noho mpampianatsy Lalàna nipetraky teo lafa nampianatsy ie. Baka amy tanà iaby ta Galilia noho Jodia noho Jerosalema rozy. Namean’i Jehovah hery hanafaha arety Jesosy tamy zay.
18 Nisy olo nanday lahilahy kombo amy zay bakao. Nandesin-drozy am-pandrea lahilahy iny, le nila fomba rozy mba hampilira azy noho hametraha azy talohan’i Jesosy teo.
19 Fe tsy nahita fomba hampilira azy rozy satria nimaro olo ty tao. Farany nanganiky tanabo tafo any rozy, le nangalan-drozy tafo iny,* bakeo najotson-drozy niaraky amy fandrea iny talohan’i Jesosy teo lahilahy iny.
20 Lafa nihitan’i Jesosy fa nanam-pinoa rozy, le hoy ty asany tamy lahilahy iny: “Fa nengà ty hadisoanao.”
21 Bakeo nifampiresaky mpanora-dalàna noho Fariseo rey hoe: “Toy ty ia mivaza a-Ndranahary io? Ia koa ty afaky manenga hadisoa laha tsy Ndranahary avao?”
22 Fe nihain’i Jesosy ty raha tan-tsain-drozy any, ka hoy ty asany: “Manino nareo mieritseritsy ho zao io?*
23 Aia kay ty moramora kokoa: Ty mivola hoe: ‘Fa nengà ty hadisoanao’ sa hoe: ‘Mitsangàna le mandehana’?
24 Fe mba hahaizanareo hoe mana fahefà hanenga hadisoa an-tany etoy ty Anak’olo...” Le hoy ty asany tamy lahilahy kombo iny: “Zao ty volaniko anao: Mitsangàna, andeso fandreanao io le ndany moly.”
25 Le nitsanga talohan-drozy eo lahilahy iny, ka nalàny fandreany iny le nandeha noly ie sady nanome voninanitsy a-Ndranahary.
26 Le nitseriky iaby ty olo iaby ka nanome voninahitsy a-Ndranahary. Nitseri-draha rozy ka nivola hoe: “Hafa mihintsy* raha nihitantsika androany toy!”
27 Tafarani-zay, niboaky ie le nahita mpitaky hetra kaihy hoe Levy, nipetraky tamy birò famoria hetra teo. Le hoy ty asany taminy: “Ndao hanara-dia ahy.”
28 Le nengan’i Levy ty raha iaby ka nitsanga ie, le nanaraky azy.
29 Bakeo nanasa olo maro hisakafo tan-tranony ao Levy. Ho an’i Jesosy ty nanaovany ani-zay. Nisy mpitaky hetra noho olo hafa koa ty tao, le niaraky nihina* tamin-drozy.
30 Le nimenimeny tamy mpianatsin’i Jesosy rey Fariseo noho mpanora-dalàna rey, ka nivola hoe: “Manino nareo ro miaraky mihina noho miaraky mino amy mpitaky hetra noho mpanota?”
31 Le hoy ty navalin’i Jesosy an-drozy: “Tsy mila dokotera ty olo salama, fa ty marary ro mila ani-zay.
32 Tsy avy hikaiky ty olo marina aho, fa hikaiky ty mpanota mba hibebaky.”
33 Hoy ty asan-drozy taminy: “Matetiky mifaly hany mpianatsin’i Jaona rey sady manao vavaky fisolohoa, le ho zay koa ty mpianatsin’ny Fariseo, kanefa mpianatsinao reo mihina noho mino.”
34 Le hoy Jesosy tamin-drozy: “Tsy azonareo ampifalỳ hany ty naman’ny mpampakatsy laha mbo miaraky amin-drozy eo mpampakatsy iny, sa tsy zay?
35 Fe ndraiky andro any, tsy hiaraky amin-drozy eo sasy* mpampakatsy iny, ka amy fotoa zay rozy vo hifaly hany.”
36 Niresaky fanohara tamin-drozy koa ie hoe: “Tsy misy olo mangalaky tapa-damba baka amy siky* vaovao, bakeo anampenany siky fa ho momoky. Satria laha ho zay ty anaovany azy, le hosintonin’ny tapa-damba vaovao iny siky iny sady tsy hifanaraky aminy.
37 Tsy ataon’olo anaty angozy* fa ho momoky koa ty divay vaovao, satria laha zay ty ataony, le hahadriatsy* an’ny angozy iny divay iny, ka ho jia divay iny, le ho simba angozy iny.
38 Tsy maintsy atao anaty angozy vaovao zany ty divay vaovao.
39 Tsy misy olo mino an’ny divay fa ela rey ka hoe hangataky an’ny divay vaovao rey, satria hivola ie hoe: ‘Hafa avao* ty fa ela.’”
Fanamariha ambany pejy
^ Zany hoe ty Riakin’i Galilia.
^ Na: “nanaovan-drozy fihetsiky tamy tana.”
^ Abt: “Mialà amiko eto iha Tompo satria mpanota aho.”
^ Abt: “tafo tanimanga iny.”
^ Abt: “mieritseritsy ho zao am-ponareo ao io.”
^ Na: “Tena soa.”
^ Na: “nandry nihorira an-databo.”
^ Abt: “halà amin-drozy eo.”
^ Abt: “siky ivelany.”
^ Fanajaria divay namboary tamy angozy.
^ Abt: “hahavaky.”
^ Na: “Soa.”
