Nisoratin’i Lioka 7:1-50
-
Nanam-pinoa sefon’ny maramila iny (1-10)
-
Nivelomin’i Jesosy anan’ny ampela maty valy ta Naina any iny (11-17)
-
Nideran’olo Jaona Mpanao Batisa (18-30)
-
Natoron’i Jesosy hoe tsy mety miova taranaky iny (31-35)
-
Nengà ty hadisoan’ny ampela mpanota iny (36-50)
-
Fanohara mikasiky olo nananan’olo trosa (41-43)
-
7 Lafa nivitan’i Jesosy ze raha tokony hovolaniny tamy vahoaky rey, le nilitsy ta Kapernaomy ao ie.
2 Tamy zay, nisy sefon’ny maramila raiky zay nana mpanompo narary mafy fa ho maty. Tena niteany mpanompo io,
3 ka lafa naharè mikasiky an’i Jesosy ie, le nisy anti-panahin’ny Jiosy nirahiny ho amy Jesosy any, mba hangataky azy ho avy aminy any ka hanafaky an’ny aretin’ny mpanompo iny.
4 Le niavy tamy Jesosy any rozy, ka nisoloho taminy hoe: “Tena maeva hanaovanao ani-zay ie,
5 satria tea ty firenenantsika sady ie ro namboatsy synagoga taminay eto.”
6 Farany nandeha niaraky amin-drozy Jesosy. Fe lafa nariniriny an’ny trano iny ie, le fa naniraky an’ny namany rezay sefon’ny maramila iny hivola aminy hoe: “Ka misahira mana amiko atoy lahy, fa tsy maeva handramby anao an-tranoko atoy aho.
7 Ndre zaho koa aza tsy mieritseritsy hoe maeva handeha aminao eny. Fa mivolana avao le ho afaky aretin’ny mpanompoko io.
8 Tsy zay fa zaho koa mba ambany fahefàn’olo sady mana maramila ambany fahefàko. Ka laha mivola amy maramilako raiky aho hoe: ‘Mandehana!’, le lasa ie, na amy ty raiky hoe: ‘Avia!’, le avy ie, na amy mpanompoko hoe: ‘Anovo toy!’, le ataony raha zay.”
9 Lafa naharè ani-reo Jesosy, le nitseriky ka nitoliky tamy vahoaky nanaraky azy rey sady nivola hoe: “Ambarako anareo fa mbo tsy nahita finoa bevata manahaky ani-zay aho, ndre tamy Israely eo aza.”
10 Bakeo nimpoly tamy sefon’ny maramila iny any olo nirahiny rey. Lafa niavy tan-tranony any rozy, le nihitan-drozy mpanompo iny fa salama soa.
11 Tafara kelikelini-zay, nandeha nana amy tanà kaihy hoe Naina zay Jesosy, le nisy vahoaky maro niaraky taminy, ankoatsin’ny mpianatsiny rey.
12 Lafa nihanarìny an’ny vavahadin’ny tanà iny ie, le ingy fa nisy faty nandesin’olo niboaky. Io avao ty anan-dreniny,* sady fa maty valy reniny io. Nisy vahoaky maro baka an-tanà ao koa niaraky nandeha tamy ampela io.
13 Laha vo nihitan’ny Tompo ie, le niferinesany ka nivolaniny hoe: “Fa soa zay.”*
14 Le namonjy ie, ka nikasiky an’ny fitarazoa faty iny, le nijano olo nitarazo faty rey. Bakeo hoy ty asany: “Nao leroa, zao ty volaniko anao: Mifohaza!”
15 Le nifoha olo nimaty iny ka nanomboky nivola, le namean’i Jesosy an-dreniny.
16 Le natahotsy marè olo rey,* ka nanome voninahitsy a-Ndranahary sady nivola hoe: “Nisy mpaminany be niavy amintsika eto”, noho hoe: “Niferinay ty vahoakiny Ndranahary.”
17 Le niparitaky tamy faritsy iaby a Jodia noho tamy faritsy iaby manodidy mbeny vaovao mikasiky azy zay.
18 Nitantara an’ny raha iaby rezay tamy Jaona ty mpianatsiny.
19 Le nikaiky ty roe amy mpianatsiny rey Jaona, ka naniraky an-drozy ho amy Tompo any mba hanontany hoe: “Iha va Azy ho avy iny, sa olo hafa ro tokony holinisanay?”
20 Lafa niavy taminy any rozy le nivola hoe: “Nirahin’i Jaona Mpanao Batisa zahay mba hanontany anao hoe: ‘Iha va Azy ho avy iny, sa olo hafa ro tokony holinisanay?’”
21 Tamy fotoa* zay Jesosy nanafaky arety sankarazany, le nimaro ty jiky lasa nahita. Nandroaky fanahy raty koa ie.
22 Le hoy ty navaliny an-drozy roe lahy: “Ndany tantarao amy Jaona ty raha hitanareo noho renareo hoe: Lasa mahita ty jiky, mandeha ty kombo, malio ty boka, maharè ty mareny, velomy ty maty, le itoria ty vaovao soa ty mahantra.
23 Sambatsy ze matoky ahy ka tsy misalasala mihintsy.”
24 Lafa nandeha olo nirahin’i Jaona rey, le niresaky mikasiky an’i Jaona tamy vahoaky rey Jesosy. Hoy ty asany: “Hanenty ino niboahanareo tamy dezera* any io? Hanenty bararata ahetsiketsikin’ny tsioky va?
25 Sa hanenty ino niboahanareo tany io? Hanenty olo manisy akanjo soasoa* va? An-tranon’ny mpanjaka any ro misy manisy akanjo soasoa noho mana ze raha iaby teany!
26 Ino marina zany tena niboahanareo io? Hanenty mpaminany va? Ambarako anareo fa mbo anabo mandilatsy ty mpaminany ie.
27 Ho zao ty voasoratsy mikasiky azy: ‘Halefako alohanao eo* olo hirahiko iny, le ie ro hanoma ty lala hombanao.’
28 Ambarako anareo fa mbo tsy nisy olo naterakin’ampela ka hoe anabo mandilatsy an’i Jaona. Fe mbo anabo mandilatsy azy ze farany kelikely amy Fanjakà-Ndranahary ao.”
29 —Lafa naharè ani-zay ty olo iaby noho ty mpitaky hetra, le nieky hoe manao ty rariny Ndranahary, satria ty batisan’i Jaona ro nanaova batisa an-drozy.
30 Fe Fariseo noho azy nahay Lalàna rey tsy nidary ty sitrapo-Ndranahary* mikasiky an-drozy, satria tsy naneky hataon’i Jaona batisa.—
31 “Hampitoviko amin’ino zany taranaky toy? Le ia ty manahaky an-drozy?
32 Manahaky ajà mipetraky am-bazary eny rozy, le mifampiresaky hoe: ‘Fa nitsoky sody zahay, fe tsy nitsinjaky nareo. Fa nanao hira mampalahelo zahay, fe tsy nitany nareo.’
33 Ho zay koa fa lafa niavy Jaona Mpanao Batisa, le sady tsy nihina mofo ie noho tsy nino divay. Fe hoasanareo hoe: ‘Misy demonia ie.’
34 Lafa niavy koa ty Anak’olo, le nihina noho nino, fe hoasanareo hoe: ‘Henteo lahilahy tia! Tea hany noho mpiboboky divay, sady naman’ny mpitaky hetra noho ty mpanota.’
35 Fe ze vokatsin’ny raha ataon’olo ro ahità hoe hendry ie sa tsy hendry.”*
36 Le nisy Fariseo raiky zay tsy nieny nanasa azy mba hiaraky hihina aminy. Farany nilitsy tan-tranon’ny Fariseo iny ao ie, le nangalaky pilasy* tan-databo eo.
37 Nisy ampela raiky zay nalaza ho mpanota tamy tanà iny ao. Lafa nihainy hoe nihina* tan-tranon’ny Fariseo iny ao Jesosy, le nanday tavoangy kelikely* nisy menaky manitsy ie.
38 Namonjy tafaran’i Jesosy ao ie le nitany tan-tombony eo, ka nilontsiky tamy ranomasony ty tombon’i Jesosy, bakeo nimaihiny tamy volon-dohany. Norofany koa tombon’i Jesosy iny, sady nanilinany menaky manitsy.
39 Lafa nahita ani-zay Fariseo nanasa azy iny, le nieritseritsy hoe: “Laha nimpaminany vatany lahilahy toy, le ho nihainy hoe olo manao akory mikasiky azy io. Ho hainy hoe mpanota ampela io.”
40 Fe hoy ty navalin’i Jesosy azy: “Simona a, misy raha teako hovolany aminao.” Le hoy ty asany: “Ino lahy zay mpampianatsy e?”
41 “Nisy roe lahy nananan’olo trosa. Ty raiky nanàna 500 denaria, fa ty raiky 50.
42 Lafa tsy nana raha handoava an’ny trosa iny rozy, le nengan’olo iny any trosan-drozy iny. Ka ia amin-drozy roe lahy ro ho tea an’olo iny kokoa?”
43 Le hoy ty navalin’i Simona: “Laha ty fahitako azy, le azy nananany trosa maro iny.” Le hoy ty asany: “Marina zay.”
44 Le nitoliky tamy ampela iny any Jesosy, sady nivola tamy Simona hoe: “Hitanao ampela tia? Nilitsy tan-tranonao tato aho, fe iha tsy nanome ahy rano hanasà tomboky. Fa ampela tia, nanao ze hahalontsiky ty tomboko tamy ranomasony, le nanamaiky azy tamy volon-dohany.
45 Iha tsy nanoroky ahy, fa ampela tia tsy nieny nanoroky ty tomboko liany nilirako tato.
46 Iha tsy nanily menaky tamy lohako, kanefa ampela tia nanily menaky manitsy tamy tomboko.
47 Ka zao ty ambarako anao, nengà ty hadisoany ndre maro* aza satria be fitiava ie. Fa ze nengà tamy hadisoa kelikely nataony, le kelikely koa ty fitiavany.”
48 Le hoy ty asany tamy ampela iny: “Fa nengà ty hadisoanao.”
49 Le nifampiresaky azy niaraky nihina* taminy tan-databo teo rey hoe: “Ka toy ty ia manenga hadisoa io?”
50 Fe hoy ty asany tamy ampela iny: “Ty finoanao ro nanavotsy anao. Soasoava* iha.”
Fanamariha ambany pejy
^ Abt: “Anaky lahitokan-dreniny ie.”
^ Abt: “Ka tomany sasy.”
^ Na: “tena natahotsy rozy iaby.”
^ Abt: “lera.”
^ Na: “tan-diomonto.”
^ Na: “akanjo malemilemy.”
^ Abt: “alohan’ny tarehinao eo.”
^ Na: “taridala-Ndranahary; torohevitsi-Ndranahary.”
^ Na: “Fe ty fahendrean’olo le hita amy ty anany iaby.”
^ Na: “nandry nihorira.”
^ Na: “nandry nihorira tan-databo.”
^ Tavoangy vita tamy vato foty malisoliso resahy eto io.
^ Na: “bevata.”
^ Na: “nandry nihorira.”
^ Abt: “Mandehana am-piadana.”
