Nisoratin’i Marka 11:1-33
11 Lafa nihanarìny an’i Jerosalema rozy, le niavy tamy tanàn’i Betifaga noho Betania, zany hoe tamy Vohitsy Oliva teo. Le naniraky roe tamy mpianatsiny rey Jesosy.
2 Hoy ty asany tamin-drozy: “Mandehana amy tanà kelikely roy eny. Laha vo tafilitsy ao nareo, le hahita anak’ampondra mifehy mbo tsy niondranan’olo mihintsy. Vahao ie le andeso atoy.
3 Ka laha misy olo mivola aminareo hoe: ‘Manino raha io vahanareo io?’, le volano hoe: ‘Ilàn’ny Tompo raha toy, fa avy le hampoliny eto avao lafa bakeo.’”
4 Le nandeha rozy ka nihitan-drozy anak’ampondra iny nifehy tanilan’ny varavaran’ny trano tan-dala teo, le nivahan-drozy.
5 Fe nivola ty sisany tamin’olo nitsanga teo rey hoe: “Manino anak’ampondra io vahanareo io?”
6 Le azy raha nivolanin’i Jesosy iny mihintsy ro nivolanin’ny mpianatsy rey tamin-drozy, ka nengan’olo rey handeha rozy.
7 Bakeo nandesin-drozy tamy Jesosy any anak’ampondra iny, ka nataon-drozy tanabon’ny raha iny teo ty sikin-drozy,* le niondra teo Jesosy.
8 Maro koa ty olo namelatsy ty sikin-drozy* tan-dala teo, fa ty sisany nanampaky ravin-kazo baka am-baibò any.
9 Le nikaikaiky avao ze nandeha talohany noho tafarany tao hoe: “Mba arovo* lahy ie! Enganè mba hahazo fitahia azy avy amy anaran’i Jehovah iny!
10 Enganè mba hahazo fitahia Fanjakà ho avy iny, azy ahin’i Davida razanay iny! Iha azy amy farany anabo any iny, mba arovo* lahy ie!”
11 Le nilitsy ta Jerosalema tao ie, ka nandeha tamy tempoly ao, le nanentinenty ty raha iaby tao. Fe fa nihariva ty andro, ka niboaky nana a Betania any ie niaraky amy Apostoly 12 rey.
12 Hamarain’iny, niala ta Betania ao rozy. Nimosarè ie tamy zay.
13 Nahita aviavy ta lavidavitsy teny ie. Feno raviny aviavy io, le namonjy teny ie vasa mba hahita voany. Fe raviny avao ty nihitany lafa niavy teny ie, satria mbo tsy mamoa ty aviavy tamy zay.
14 Farany nivola tamy hazo iny ie hoe: “Enganè mba tsy hisy hihina voany baka aminao sasy mandrakizay!” Naharè an’ny raha zay mpianatsiny rey.
15 Bakeo niavy ta Jerosalema ao rozy. Le nilitsy tamy tempoly ao ie, ka nanomboky nandroaky ani-ze namarotsy noho nivily raha tao. Naongany koa latabon’ny mpanakalo drala noho sezin’ny mpamarotsy pizon rey.
16 Le tsy nisy nengany hanampaky mbamy tempoly mbeo koa ze olo nanday enta.
17 Le nampianatsy an-drozy ie hoe: “Tsy fa voasoratsy va hoe: ‘Ty tranoko hokaihy hoe trano fivavaha ho an’ny firenena iaby’? Kanefa raha io ataonareo lakato fivonian’ny malaso.”
18 Naharè an’ny raha zay sefon’ny mpisoro noho mpanora-dalàna rey, ka nila hevitsy hamonoa azy. Fe natahotsy azy rozy, satria nitseriky tamy fampianarany ty olo iaby.
19 Lafa niharivariva ty andro, le niboaky tan-tanà ao Jesosy noho mpianatsiny rey.
20 Fe vo maraindray, lafa tan-dala teny rozy, le nihitan-drozy fa fa nalazo rekitsy fotony aviavy iny.
21 Nitiaron’i Petera raha iny ka hoy ty asany tamy Jesosy: “Raby, ndroa aviavy niozoninao iny ie nalazo!”
22 Le hoy Jesosy tamin-drozy: “Manàna finoa a-Ndranahary.
23 Ambarako anareo mazava fa ndre ia ndre ia mivola amy vohitsy toy hoe: ‘Mialà eto le miravoha an-driaky any’, sady tsy misalasala ie am-pony ao fa manam-pinoa hoe hiseho vatany raha volaniny iny, le ho tanteraky zay.
24 Zay mahavy ahy mivola aminareo hoe: Ze raha iaby angatahinareo amy vavaky, le minoa hoe fa azonareo raha zay, le ho azonareo vatany zay.
25 Lafa mitsanga hivavaky nareo, ka misy olo anananareo alahelo, le engao ty hadisoany, mba hengan’ny Babanareo an-danitsy any iny koa ty hadisoanareo.”
26 ——
27 Niavy ta Jerosalema ao ndraiky rozy. Lafa nandehandeha tamy tempoly ao ie, le namonjy azy ty sefon’ny mpisoro noho ty mpanora-dalàna noho ty anti-panahy,
28 ka nivola taminy hoe: “Fahefà baka aia anaovanao raha ataonao reto io? Le ia ty nanome anao fahefà hanao ani-reo?”
29 Le hoy Jesosy tamin-drozy: “Mba hametraky fanontanea raiky aminareo aho. Laha valeanareo zay, le hovolaniko aminareo koa hoe baka aia ty fahefà anaovako an’ny raha reto.
30 Baka an-danitsy any sa baka amin’olo ty nahazoan’i Jaona fahefà hanao batisa? Mba valeo fanontaneako zay.”
31 Le nifampiresaky rozy hoe: “Laha tsika mivola hoe: ‘Baka an-danitsy any’, le hivola ie hoe: ‘Ka nanino nareo ro tsy nino azy?’
32 Fe ho sakintsika va ty hivola hoe: ‘Baka amin’olo’?” Natahotsy an’olo rey rozy tamy zay, satria ataon’olo iaby rey hoe mpaminany vatany Jaona.
33 Ka hoy ty navalin-drozy an’i Jesosy: “Tsy hainay.” Le hoy Jesosy: “Zaho koa tsy hivola aminareo hoe fahefà baka aia ty anaovako ani-reto.”
Fanamariha ambany pejy
^ Abt: “sikin-drozy ivelany.”
^ Abt: “sikin-drozy ivelany.”
^ Abt: “avoto.”
^ Abt: “avoto.”
