Nisoratin’i Marka 12:1-44
12 Bakeo nanomboky nanao fanohara tamin-drozy ie hoe: “Nisy lahilahy raiky nanao tanimboaloboky, le nasiany lakoro manodidy azy. Nihaly lavaky fanamboara divay* ie, le nananga tilikambo. Bakeo nampanoviny taravay tamy mpamboly raha iny, le nandeha an-tany hafa any ie.
2 Lafa niavy ty fotoa famoria vokatsy, le naniraky mpanompo ho amy mpamboly rey any ie, mba hangalaky ty sisany amy vokatsy baka amy tanimboaloboky iny amin-drozy any.
3 Fe nalan-drozy mpanompo iny le nivangoan-drozy, bakeo nampolìn-drozy tanampolo.
4 Naniraky mpanompo hafa ho amy mpamboly rey any ndraiky lahilahy iny, fe nivangoan-drozy tamy lohany mpanompo iny sady nafahin-drozy baraka.
5 Le naniraky mpanompo hafa ndraiky ie, fe nivonoan-drozy mpanompo iny. Mbo naniraky olo maro hafa koa ie, fe ty sisany nivangoan-drozy, le ty sisany nivonoan-drozy.
6 Olo raiky sisa ty taminy eo. Tsy ia io fa anakilahiny tena teany iny. Io ty nirahiny farany tamin-drozy any satria nieritseritsy ie hoe: ‘Hanaja an’ny anako io rozy.’
7 Fe nifampiresaky mpamboly rey hoe: ‘Ingy mpandova iny! Ndao hovonoantsika ie, amy zay ho azontsika ty lovany!’
8 Le nisamborin-drozy ie, bakeo nivonoan-drozy, ka nitaritaritin-drozy tambalikin’ny tanimboaloboky iny any.
9 Ka ino zany ty hataon’ny tompon’ny tanimboaloboky iny? Ho avy ie le hovonoany mpamboly rey, bakeo hameany olo hafa tanimboaloboky iny.
10 Mbo tsy nivakinareo mihintsy va raha resahin’ny Soratsy Masy toy hoe: ‘Ty vato tsy nitean’ny* mpamboatsy trano ro lasa vato fehizoro farany bevata.*
11 Baka amy Jehovah raha zay ka mahatseriky antsika’?”
12 Le ta ho nanambotsy an’i Jesosy ty fahavalony, satria nihain-drozy hoe rozy ty tan-tsain’i Jesosy ao tamy fanohara iny. Fe natahotsy an’ny vahoaky rey rozy, farany nandeha.
13 Le nirahin-drozy ho amy Jesosy any ty sisany amy Fariseo rey noho ty mpanoha an’i Heroda mba hamandriky azy amy ty raha volaniny.
14 Lafa niavy teo rozy, le nivola taminy hoe: “Mpampianatsy e, hainay fa mivola ty marina avao iha. Tsy mila hatò amin’olo mihintsy iha satria tsy mitingy volon’olo,* sady marina ty fampianaranao mikasiky a-Ndranahary. Azo atao sa tsy azo atao* ty mandoa hetra* amy Kaisara?
15 Tokony handoa hetra va zahay sa tsy tokony handoa?” Fe hain’i Jesosy hoe niatsaravelatsihy rozy, ka hoy ty asany: “Manino nareo ro mamandriky ahy? Anandeso denaria raiky bakao aho hohenteako.”
16 Le nanandesan-drozy denaria raiky ie. Le hoy ty asany tamin-drozy: “Sarin’ia io, le anaran’ia eo io?” Le nivola rozy hoe: “Ahin’i Kaisara.”
17 Le hoy Jesosy: “Aloavo amy Kaisara ze ahin’i Kaisara, le amy Ndranahary ze ahi-Ndranahary.” Le nitseriky amy ty raha nivolaniny rozy.
18 Namonjy azy amy zay Sadoseo rey, azy mivola hoe tsy misy fameloma ty maty rey. Nanontanean-drozy ie hoe:
19 “Mpampianatsy e, nanoratsy ho antsika Mosesy hoe laha maty ty lahilahy raiky ka nanenga ty valiny kanefa mbo tsy niteraky, le tokony hanambaly an’ny valiny iny ty rahalahin’ny lahilahy io, ka hanome taranaky ho an’ny rahalahiny nimaty iny.
20 Nisy olo rezay amy zay, fito mirahalahy rozy. Nanambaly talanolo iny, le nimaty fe tsy niteraky.
21 Le nanambaly an’ny ampela iny azy faharoe iny, fe nimaty sady tsy niteraky koa, le ho zay koa azy fahatelo iny.
22 Samby tsy niteraky rozy fito mirahalahy. Nimaty koa ampela iny tamy farany.
23 Ka lafa hovelomy ty maty, ho valin’ia zany ampela iny? Satria samby fa nanambaly azy iaby rozy fito mirahalahy.”
24 Hoy Jesosy tamin-drozy: “Tsy zay va maha diso hevitsy anareo io, satria samby tsy hainareo ndre ty Soratsy Masy ndre ty heri-Ndranahary?
25 Fa lafa hovelomy ty maty, le tsy hangata-baly na halàn’olo valy, fa hanahaky anjely an-danitsy any rey.
26 Fe laha mikasiky fameloma ty maty, mbo tsy nivakinareo va amy bokin’i Mosesy ao iny, amy tantara mikasiky hazo* nirehitsy iny? Nivola taminy Ndranahary hoe: ‘Zaho ro Ndranaharin’i Abrahama noho Ndranaharin’i Isaka noho Ndranaharin’i Jakoba.’
27 Tsy Ndranaharin’olo maty Ie, fa ahi-ty velo. Tena diso hevitsy nareo.”
28 Nisy mpanora-dalàna raiky namonjy teo ka naharè an-drozy nialy hevitsy. Nihainy hoe nahay namaly an-drozy Jesosy, ka nanontaneany hoe: “Ino ty voalohany* amy didy iaby?”
29 Le nivola Jesosy hoe: “Ty voalohany: ‘Janjino toy vahoakin’Israely: Jehovah Ndranaharintsika le Jehovah raiky avao.
30 Le tiavo Jehovah Ndranaharinao amy ty fonao iaby noho ty vatanao iaby noho ty sainao iaby noho ty herinao iaby.’
31 Toy ty faharoe: ‘Tiavo ty namanao manahaky itiavanao ty vatanao.’ Tsy misy didy bevata mandilatsy ani-reo.”
32 Hoy mpanora-dalàna iny taminy: “Zay mihintsy mpampianatsy! Marina resakinao iny hoe: ‘Raiky avao Ie, sady tsy misy hafa ankoatsy azy.’
33 Tena mbo lafovily mandilatsy ty fanatitsy oroa noho ty soro iaby koa ty fitiava azy amy fo iaby, amy say* iaby, amy hery iaby, noho ty fitiava nama manahaky itiavan-tena ty vatan-tena.”
34 Hitan’i Jesosy hoe nahay lahilahy iny lafa namaly an’ny resakiny iny, ka hoy ty asany: “Tsy lavitsy anao ty Fanjakà-Ndranahary.” Tsy nisy nahasaky nanontany azy sasy tafarani-zay.
35 Fe nivola Jesosy tamy ie mbo nampianatsy tamy tempoly ao iny hoe: “Manino mpanora-dalàna reo ro mivola hoe anan’i Davida, Kristy?
36 Davida aza lafa nitarihin’ny fanahy masy le nivola hoe: ‘Hoy Jehovah tamy Tompoko: “Mipetraha ankavanako etoa, zisiky hanaovako ty fahavalonao ho ambany tombonao eo.”’
37 Ka laha Davida aza nikaiky azy hoe Tompo, akory zany ty maha anany azy?”
Le nitean’ny vahoaky maro rey ty nijanjy azy.
38 Nivola koa ie tamy ie nampianatsy iny hoe: “Miambena amy mpanora-dalàna, azy tea mandehandeha manao siky lava rey. Tean-drozy ty hoarahaban’olo am-bazary eny
39 noho ty hahazo pilasy aloha eny* lafa amy synagoga ao. Tean-drozy koa ty pilasy farani-ze soa amy fihinana hariva rey.
40 Lanìn-drozy ty hananan’ny* ampela maty valy rey, le manao vavaky lava biby rozy mba hahitan’olo an-drozy. Hahazo sazy marerè* kokoa rozy.”
41 Le nipetraky tandrifin’ny fandatsaha drala rey ie, ka nandiniky ty olo nandatsaky drala tamy raha rey tao. Maro ty panarivo nandatsaky drala vy maro tao.
42 Niavy amy zay ampela maty valy sady mahantra zay, nandatsaky drala vy roe farani-ze kelikely.*
43 Farany nikaiky an’ny mpianatsiny rey ho aminy eo Jesosy, ka hoy ty asany tamin-drozy: “Ambarako anareo mazava fa ampela maty valy sady mahantra io ro nandatsaky maro mandilatsy ani-ze olo iaby nandatsaky drala tao rey.
44 Satria olo iaby rey, ze sisa tsy nilanin-drozy ro namean-drozy, fa ampela io ndre mahantra aza, le nanome ze raha iaby nananany, zany hoe ty velomam-pony iaby.”
Fanamariha ambany pejy
^ Na: “vato tsy neken’ny.”
^ Abt: “lasa lohan’ny zoro.”
^ Na: “Tsy manavakavaky.”
^ Na: “Mety sa tsy mety.”
^ Hetra takỳ amin’olo kiraidraiky resahy eto io.
^ Hazo kelikely misy fatipatiky resahy eto io.
^ Na: “farany bevata.”
^ Na: “fahaiza.”
^ Na: “pilasy farani-ze soa.”
^ Abt: “Akapan-drozy ty tranon’ny.”
^ Na: “mavesatsy.”
^ Abt: “leptona roe, zany hoe kadràna raiky.”
