Nisoratin’i Marka 15:1-47
15 Laha vo nangoantinana ty andro, le niaraky nandiniky ty sefon’ny mpisoro noho ty anti-panahy noho ty mpanora-dalàna, zany hoe ty Fitsarà Anabo Jiosy iaby. Le nirohizan-drozy Jesosy, bakeo nandesin-drozy le namean-drozy an’i Pilato.
2 Le nanontany azy Pilato hoe: “Iha va ro Mpanjakan’ny Jiosy?” Le hoy Jesosy: “Ka fa ie volaninao zay.”
3 Mbo nasaran’ny sefon’ny mpisoro rey raha maro koa ie.
4 Bakeo nanontany azy ndraiky Pilato hoe: “Ka mba raha tsy mamaly iha? Henteo raha maro asaran-drozy anao zao!”
5 Fe tsy namaly sasy Jesosy, ka nitseriky Pilato.
6 Fa fataon’i Pilato ty mampibototsy gadra raiky saky fety, le ze nangatahin’ny vahoaky ro nabototsiny.
7 Tamy fotoa zay, nisy lahilahy mana anara Barabasy zay, niaraky nigadra tamy ty namany mpanohitsy fanjakà noho namono olo.
8 Niavy amy zay vahoaky rey, le nangataky tamy Pilato mba hanao an’ny raha fataony amin-drozy iny.
9 Le hoy ty asany tamin-drozy: “Teanareo va laha Mpanjakan’ny Jiosy iny ro habototsiko ho anareo?”
10 Satria fa nihain’i Pilato hoe fialona ro nahavy an’ny sefon’ny mpisoro rey nanday an’i Jesosy teo.
11 Fe narisirisikin’ny sefon’ny mpisoro rey ty vahoaky, mba hangataky amy Pilato hoe Barabasy ro habototsy fa tsy Jesosy.
12 Nivola ndraiky Pilato hoe: “Ka hataoko akory zany azy kaihinareo hoe Mpanjakan’ny Jiosy io?”
13 Le nikorakoraky ndraiky rozy ka nivola hoe: “Fantsiho* amy tsato-kazo ie!”
14 Fe nivola tamin-drozy ndraiky Pilato hoe: “Fa manino? Ino ty raha raty nataony?” Fe vomaiky nikorakoraky rozy hoe: “Fantsiho* amy tsato-kazo ie e!”
15 Nabototsin’i Pilato amy zay Barabasy satria teany ho falifaly vahoaky rey. Naniraky olo hamilapilatsy an’i Jesosy ie, bakeo nameany an’ny maramila rey Jesosy mba hovonoa amy tsato-kazo.
16 Le nandesin’ny maramila rey tamonto ao, tanaty lakoron’ny governera ao ie, le navorin-drozy ty maramila iaby.
17 Le nampisikinin-drozy siky volomparasy ie. Nisy fatiky koa nitalitalin-drozy,* le nataon-drozy tan-dohan’i Jesosy eny.
18 Le nikorakoraky rozy ka nivola hoe: “Akory lahy Mpanjakan’ny Jiosy!”
19 Nivangoan-drozy tamy bararata koa ty lohany sady nandoran-drozy ie. Le nandohaliky noho niankohoky talohany eo rozy.
20 Tamy farany, lafa baka nikizakizahin-drozy ie, le nafahin-drozy siky volomparasy iny, bakeo nampanovin-drozy azy ndraiky sikiny* taloha iny. Bakeo nandesin-drozy hofantsihy amy tsato-kazo ie.
21 Nahita lahilahy raiky nandalo teo rozy, le niforosevan-drozy handay an’ny hazo fijalean’i* Jesosy iny. Simona ty anarany, baka ambanivohitsy a Kyrena any ie, baban’i Aleksandra noho Rofosy.
22 Le nandesin-drozy ie, ka nana amy pilasy kaihy hoe Golgota. Laha adika zay le hoe “Ikarandoha.”
23 Namean-drozy divay nasia miora maha ango ie, fe tsy nahefa nino.
24 Le nifantsihin-drozy tamy tsato-kazo iny teo ie, bakeo nanaovan-drozy kiloka ty sikiny mba hahafahan-drozy hizara azy, ka hahaiza ze ho azon-drozy kiraidraiky.
25 Tamy lera fahatelo* namantsihan-drozy azy tamy tsato-kazo teo io.
26 Le nisoraty tanabony eny raha nasaran-drozy azy iny hoe: “Mpanjakan’ny Jiosy.”
27 Nisy malaso roe koa nataon-drozy tamy tsato-kazo tanilany teo, ka ty raiky ta ankavanany, le ty raiky ta ankaviany.
28 ——
29 Le niolinkoly ze nandalo mbeo sady nanambanimbany azy ka nivola hoe: “Akorinao zay! Ataoko iha handrava ty tempoly noho hampitsanga azy anatin’ny telo andro zao?
30 Tavano ty ainao,* le mijotsoa baka amy hazo fijalea* eny.”
31 Nikizakizaky azy manahaky ani-zay koa ty sefon’ny mpisoro noho ty mpanora-dalàna, le nifampiresaky hoe: “Ty olo hafa navotany, fa ty vatany tsy hainy avota!
32 Engao hijotso baka amy hazo fijalea* eny Kristy, azy Mpanjakan’ny Israely io, soa ho hitantsika le hino azy tsika.” Ndre azy tamy tsato-kazo tanilany teo rey koa aza mba nivola azy ho zay.
33 Le naìky ty lanitsy tamy faritsy iny iaby, nanomboky tamy lera fahaeny* zisiky tamy lera fahasivy.*
34 Tamy lera fahasivy, le nikaikaiky marè biby Jesosy hoe: “Ely, Ely, lamà sabaktany?” Laha adika zay le hoe: “Ndranahariko e, Ndranahariko e, nanino iha ro nanenga ahy?”
35 Lafa naharè ani-zay ty olo sisany nitsanga teo le nivola hoe: “Henteo, mikaiky an’i Elia ie.”
36 Bakeo nisy olo raiky nilay, nampijobo eponzy tanaty divay madiro, le nataony tamy bararata raha iny ka nameany hinomin’i Jesosy sady nivola ie hoe: “Engao ie! Ho hitantsika eo laha ho avy hanavotsy azy Elia.”
37 Fe nikoaiky marè Jesosy, le nimaty.*
38 Le nizara roe baka ambony zisiky ambany ridô tamy pilasy masy ao iny.
39 Lafa nahita an’ny raha iaby niseho rey sefon’ny maramila nitsanga tanilan’i Jesosy teo iny sady nahita hoe nimaty Jesosy, le nivola hoe: “Anaki-Ndranahary vatany lahilahy tia.”
40 Nisy ampela maromaro koa nanenty baka lavitsy eroy, anatini-zay ry Maria Magdalena, noho Maria renin’i Jakoba* noho Josesy, noho Salome.
41 Samby fa nanaraky an’i Jesosy noho nikarakara azy rozy tamy ie ta Galilia any. Teo koa nisy ampela maro hafa fa niaraky taminy nana a Jerosalema any.
42 Fa narìny ho tsofotsy ty andro tamy zay, sady Andro Fiomana, zany hoe andro alohan’ny Sabata.
43 Le niavy Josefa azy baka Arimatia any iny. Lahilahy nihajàn’olo ie, sady anisan’ny Fitsarà Anabo Jiosy. Nandiny ty Fanjakà-Ndranahary koa ie. Nahasaky nandeha* amy Pilato any ie, le nangataky ty fatin’i Jesosy.
44 Fe nahatseriky an’i Pilato hoe fa nimaty sahady Jesosy, ka nikaihiny sefon’ny maramila iny, le nanontaneany.
45 Ka lafa nireny baka amy sefon’ny maramila iny hoe maty vatany Jesosy, le nekeniny hoe hamea an’i Josefa faty iny.
46 Lafa baka nivily lamba rongony tena soa Josefa, le najotsony faty iny, ka nifonosany tamy lamba rongony tena soa iny, le nataony tamy lolo vatolampy niloahy zay. Bakeo nanosiky vato tamy varavaran’ny lolo iny teo ie.
47 Fe mbo nanenty an’ny pilasy nametraha fatin’i Jesosy iny avao ry Maria Magdalena noho Maria renin’i Josesy.
Fanamariha ambany pejy
^ Na: “Vonò.”
^ Na: “Vonò.”
^ Nitalitalin-drozy ho lasa korôny.
^ Abt: “sikiny ivelany.”
^ Zany hoe tamy 9 maray teo ho eo.
^ Na: “Avoto ty vatanao.”
^ Zany hoe midỳ teo ho eo.
^ Zany hoe tamy 3 folakandro teo ho eo.
^ Na: “tsy niay sasy.”
^ Na: “Jakoba kely.” Safà hoe kely io, mety midika hoe Jakoba resahy eto io mbo zay na mbo boribory mandilatsy an’i Jakoba anan’i Zebedio iny.
^ Na: “Niezaky hahasaky handeha.”
