Nisoratin’i Marka 2:1-28
2 Fe andro vitsivitsy tafarani-zay, nilitsy ta Kapernaomy ao ndraiky Jesosy, le nandeha ty resaky hoe tan-trano ao ie.
2 Le nivorivory taminy ao ty olo, ka tsy nisy pilasy sasy ndre tam-baravara teny. Le nanomboky nitory ty vaovao soa tamin-drozy ie.
3 Le nisy lahilahy kombo nandesin’olo efa-dahy ho aminy eo.
4 Fe tsy afaky nanday azy tamy Jesosy ao rozy, satria nimaro marè ty olo tao. Farany niloahin-drozy ty tafo tandrify amy Jesosy eo, le najotson-drozy mbeo fandrea nisy an’ny lahilahy kombo iny.
5 Lafa nihitan’i Jesosy hoe nanam-pinoa rozy, le hoy ty asany tamy lahilahy kombo iny: “Fa nengà ty hadisoanao anako.”
6 Nisy mpanora-dalàna nipetraky teo, le nieritseritsy* hoe:
7 “Manino rahabe tỳ mivola ho zao io? Mivaza a-Ndranahary ie. Ia koa ty afaky manenga hadisoa laha tsy Ndranahary avao?”
8 Fe avy le nihain’i Jesosy raha nieritseretin-drozy zay, ka hoy ty asany tamin-drozy: “Manino nareo mieritseritsy* raha ho zao io?
9 Aia kay ty mora kokoa: Ty mivola amy lahilahy kombo io hoe: ‘Fa nengà ty hadisoanao’, sa hoe: ‘Mitsangàna, alao fandreanao io le mandehana?’
10 Fe mba hahaizanareo hoe mana fahefà hanenga hadisoa an-tany etoy ty Anak’olo...” Le hoy ty asany tamy lahilahy kombo iny:
11 “Zao ty volaniko anao: Mitsangàna, andeso fandreanao io le ndany moly.”
12 Le nitsanga lahilahy iny ka avy le nalany fandreany iny, le niboaky mbamin’olo rey mbeo ie. Nitseriky iaby rozy ka nanome voninahitsy a-Ndranahary sady nivola hoe: “Mbo tsy nahita raha manahaky ani-toy mihintsy tsika.”
13 Niboaky tamoron-driaky eny ndraiky ie, le namonjy azy teny iaby vahoaky rey le nampianariny.
14 Lafa tan-dala teny ie, le nahita an’i Levy anan’i Alfeo nipetraky tamy birò famoria hetra teo. Le hoy ty asany taminy: “Ndao hanara-dia ahy.” Le nitsanga Levy ka nanaraky azy.
15 Tafarani-zay, nihina* tan-tranon’i Levy tao Jesosy. Nimaro mpitaky hetra noho mpanota ty tao. Niaraky nihina* tamy Jesosy noho mpianatsiny rey rozy satria nilasa mpanori-dia an’i Jesosy.
16 Fe nisy Fariseo mpanora-dalàna rezay nahita an’i Jesosy niaraky nihina tamy mpanota noho mpitaky hetra, le nivola tamy mpianatsin’i Jesosy rey hoe: “Fa miaraky mihina amy mpitaky hetra noho mpanota koa ie?”
17 Lafa niren’i Jesosy raha zay, le hoy ty asany tamin-drozy: “Tsy mila dokotera ty olo matanjaky, fa ty marary ro mila ani-zay. Tsy avy hikaiky ty olo marina aho, fa hikaiky ty mpanota.”
18 Fa fomban’ny mpianatsin’i Jaona noho Fariseo reo ty mifaly hany. Le namonjy an’i Jesosy rozy ka nivola hoe: “Manino va ty mpianatsin’i Jaona noho ty mpianatsin’ny Fariseo mifaly hany matetiky io, kanefa mpianatsinao reo tsy mifaly hany?”
19 Le hoy Jesosy tamin-drozy: “Tsy misy antony mahavy ty naman’ny mpampakatsy hifaly hany laha mbo miaraky amin-drozy eo mpampakatsy iny. Tsy afaky mifaly hany rozy laha mbo miaraky amin-drozy eo mpampakatsy iny.
20 Fe ndraiky andro any, tsy hiaraky amin-drozy eo sasy* mpampakatsy iny, ka amy fotoa zay rozy vo hifaly hany.
21 Tsy tampenan’olo amy tapa-damba vaovao ty siky* fa ho momoky, satria laha ho zay ty anaovany azy, le hosintonin’ny tapa-damba iny siky iny, le hirirotsy ka vomaiky hihatataky.
22 Tsy ataon’olo anaty angozy* fa ho momoky koa ty divay vaovao, tsy no hahadriatsy* an’ny angozy iny divay iny, ka samby hafoy ndre divay iny ndre angozy iny. Atao anaty angozy vaovao zany ty divay vaovao.”
23 Ndraiky andro, Sabata ty andro tamy zay, nandalo tan-tanimbary eny Jesosy, le nangalaky vary tan-tanimbary eny mpianatsiny rey sady nandeha avao.
24 Le hoy Fariseo rey taminy: “Henteo retỳ! Manino rozy manao raha tsy azo atao amy Sabata io?”
25 Fe hoy Jesosy tamin-drozy: “Mbo tsy nivakinareo mihintsy va ty raha nataon’i Davida lafa tsy nisy raha hohany ie, ka nimosarè rozy amy lahilahy niaraky aminy rey?
26 Nilitsy tan-trano-Ndranahary ao ie araky ty tantara mikasiky an’i Abiatara sefon’ny mpisoro, le nihina ty mofo aseho,* bakeo nameany koa olo niaraky aminy rey, kanefa tsy nisy nahazo nihina an’ny raha iny laha tsy ty mpisoro avao.”
27 Bakeo hoy ty asany tamin-drozy: “Ty Sabata ro natao ho ahi-ty olo, fa tsy ty olo ro natao ho ahi-ty Sabata.
28 Tompon’ny Sabata koa zany ty Anak’olo!”
Fanamariha ambany pejy
^ Abt: “nieritseritsy tanaty fon-drozy ao.”
^ Abt: “mieritseritsy am-ponareo ao.”
^ Na: “nandry nihorira tamy latabo.”
^ Na: “Nandry nihorira tamy latabo niaraky.”
^ Abt: “halà amin-drozy eo.”
^ Abt: “siky ivelany.”
^ Fanajaria divay namboary tamy angozy.
^ Abt: “hahavaky.”
^ Na: “mofo atolotsy.”
