Nisoratin’i Marka 4:1-41
4 Nampianatsy tamoron-driaky eny ndraiky ie, le nisy vahoaky maro nivorivory taminy eo. Farany niakatsy tanaty laka ie le nipetraky. Niala kelikely an’ny sisin’ny riaky iny ie, fa vahoaky iaby rey tamy sisiny eny avao.
2 Le nanomboky nampianatsy an-drozy raha maro ie ka nampiasa fanohara. Hoy ty asany tamin-drozy:
3 “Janjino tse toy: Nisy mpamboly niboaky mba hamboly vary.*
4 Lafa namafy ie le nilatsaky tan-dala eny ty voa sisany, ka niavy ty voro nihina an’ny raha rey.
5 Fa ty ilany nilatsaky tamy vatovato tsy de nisy tany, ka avy le nitiry satria tsy laliky tany iny.
6 Fe lafa niboaky ty masoandro, le nimain’ny masoandro raha rey le nalazo satria tsy nisy vahany.
7 Ty voa sisany nilatsaky tamy fatiky ka nivoatindry tao lafa nitiry fatiky rey, farany tsy namoa.
8 Fa ty sisany nilatsaky tamy tany soa, ka nitiry noho namoa. Le nisy ty nahazoa vokatsy intelopoloni-azy nambolè iny, nisy inenimpolony, le nisy injatony.”
9 Bakeo hoy ty asany: “Ze mana sofy hijanjina, le mijanjina soa.”
10 Lafa tsy nisy olo sasy teo, le nanomboky nanontany azy mikasiky an’ny fanohara rey ty mpianatsy sisany noho Apostoly 12 rey.
11 Hoy ty asany tamin-drozy: “Nareo ro nengà hahay ty dikan’ny sekirè masy mikasiky ty Fanjakà-Ndranahary, fa ty olo hafa, fanohara ro ampianarako an-drozy ty raha iaby,
12 amy zay hanenty rozy fe tsy hahita, le hijanjy fe tsy hahazo ty dikan’ny raha ren-drozy rey. Tsy himpoly amy Ndranahary mihintsy koa rozy ka tsy hahazo fanengà hadisoa.”
13 Nivola tamin-drozy koa ie hoe: “Fanohara iny aza tsy azonareo ty dikany, ka akory moa ty hahazoanareo ty dikan’ny fanohara hafa rey?
14 “Mamafy safà-Ndranahary mpamboly iny.
15 Azy tan-dala eny rey zany, le manondro ani-ze namafaza ty safà-Ndranahary fe laha vo naharè an’ny raha iny rozy, le niavy Satana nangalaky an’ny safà nafafy tamin-drozy ao rey.
16 Ho zay koa azy nilatsaky tamy vatovato eny rey: Laha vo naharè ty safà-Ndranahary rozy, le naneky an’ny raha iny sady nifalifaly.
17 Fe tsy mamahatsy am-pon-drozy ao safà iny, fa mitiry tsielatsiela avao. Ka laha vo tratsin’ny raha sarotsy na fanenjeha rozy satria naneky an’ny safà iny, le avy le mihemotsy.
18 Mbo misy hafa koa nilatsaky tamy fatiky eny. Tsy ia reo fa ze maharè ty safà-Ndranahary,
19 fe nilitsy am-pon-drozy ao ty fiasan-doha amy fiaina amy zao tontolo zao* noho ty famitahan’ny hanana noho ty faniria raha hafa, ka voatindry ao ty safà-Ndranahary le lasa tsy mamokatsy.
20 Farany, azy nafafy tamy tany soa eny rey manondro ani-ze mijanjy ty safà-Ndranahary noho mandramby soa an’ny raha iny sady mamokatsy intelopoloni-azy nambolè iny, inenimpolony, noho injatony.”
21 Nivola tamin-drozy koa ie hoe: “Apetraky ambany sobiky* na ambany kitrely ao va ty jiro, fa tsy apetraky amy fasia azy eny?
22 Tsy misy raha avony anè ka hoe tsy haseho sady tsy misy raha soa hajary ka hoe tsy hiboaky.
23 Ze mana sofy hijanjina, le mijanjina soa.”
24 Nivola tamin-drozy koa ie hoe: “Janjino soa ze raha renareo. Arakaraky ze meza ampiasanareo ro hanamezà ho anareo, le hahazo fanampiny aza nareo.
25 Satria ze mana, le mbo hamea maro. Fa ze tsy mana, ndre ty raha ananany aza halà aminy.”
26 Nivola koa ie hoe: “Ty Fanjakà-Ndranahary le mitovy amy lahilahy raiky manindraky ilim-bary* amy tany eny.
27 Miroro ie lafa haly, le mifoha lafa maray. Le nitiry vary* rey sady nitombo, fe tsy hainy hoe nanao akory ty nampitombo azy.
28 Mitiry tsikelikely baka anaty tany ao raha iny. Miboaky tse ty tahony, bakeo ty lohany, le amy farany feno voany lohany iny.
29 Fe laha vo masaky raha iny, le tampahiny amy mesom-bary* satria fa avy ty fotoa famoria azy.”
30 Le nivola koa ie hoe: “Azontsika ampitovizy amin’ino ty Fanjakà-Ndranahary, le ino ty fanohara azontsika anazavà azy?
31 Manahaky voan-tsinapy* raha io. Io ty farani-ze kelikely amy voan-draha iaby an-tany etoy, amy fotoa ambolea azy iny.
32 Fe lafa mitiry ie, le lasa traka bevata mandilatsy ty traka iaby sady misy tahony bevata. Afaky mamboatsy ty tranony eo amy zay ty voro sady afaky mialokaloky eo.”
33 Nanao fanohara maro manahaky ani-zay ie lafa nitory ty safà-Ndranahary tamin-drozy, arakaraky ze raha mety ho hain-drozy.
34 Le tena tsy niresaky tamin-drozy ie laha tsy tamy fanohara, fe nihazavaniny tamy mpianatsiny rey ty raha iaby lafa nitoka rozy.
35 Tamy andro iny avao, lafa nihariva ty andro, le nivola tamy mpianatsiny rey ie hoe: “Ndao tsika ho ampita eny.”
36 Le nalefan-drozy noly vahoaky rey, bakeo avy le naondran-drozy laka Jesosy. Nisy laka hafa koa niaraky tamin-drozy.
37 Narè amy zay tsioky iny, le nanjeky lozoky iny ka nilitsy tanaty laka ao rano rey, le fa ho nifeno laka iny.
38 Fe niroro tamy faran’ny laka iny any Jesosy tamy zay, sady nionda. Le nifohazin-drozy ie sady nivolanin-drozy hoe: “Mpampianatsy e, le tsy mahataitsy anao va tsika fa ho maty toy?”
39 Le nitsanga ie ka nitrivotiny tsioky iny sady nivolaniny riaky iny hoe: “Fa soa zay! Mantsintsìny!” Le nijano tsioky iny ka nikalma soa ty andro.
40 Le hoy ty asany tamin-drozy: “Manino nareo mavaka raty io?* Mbo tsy manam-pinoa avao nareo?”
41 Fe natahotsy marè rozy le nifampiresaky hoe: “Ka ia marina olo toy io? Ndre ty tsioky noho ty riaky aza maneky azy.”
Fanamariha ambany pejy
^ Na: “varimbazaha.”
^ Na: “sobiky fanamezà.”
^ Abt: “manoraky voa.”
^ Na: “voa.”
^ Na: “fandily.”
^ Grika: sinapi. Raha mitiry sinapy io, le kaihy koa hoe motarda.
^ Na: “Ino mampitempo anareo io?”
