Nisoratin’i Matio 28:1-20
28 Tafaran’ny Sabata, lafa nihanazava ty andro tamy andro voalohany amy herinandro* iny, le niavy ry Maria Magdalena noho Maria raiky iny nanenty an’ny lolo iny.
2 Le nay nisy horohoron-tany marè satria nisy anjelin’i Jehovah nijotso baka an-danitsy any, nanosiky an’ny vato iny le nipetraky tanabony eo.
3 Nipelapelatsy manahaky helatsy anjely iny, sady foty biby ty sikiny.
4 Natahotsy azy amy zay mpiamby rey ka nangitikitiky sady tsy nahafihetsiky atao ho olo maty io.
5 Le hoy anjely iny tamy ampela rey: “Ka matahotsy. Haiko nareo fa mila an’i Jesosy, azy nivonoa tamy tsato-kazo iny.
6 Tsy ato ie fa fa nivelo, zay raha fa nivolaniny iny. Avia, henteo ty pilasy nasia azy.
7 Ndany volano malaky ty mpianatsiny hoe: ‘Fa nivelo ie. Ho tratsinareo a Galilia any ie, le any nareo mifankahita.’ Hivola ani-zay aminareo niaviako eto io.”
8 Le niala malaky tamy lolo iny teo rozy. Natahotsy rozy sady nifalifaly biby, ka nilailay mba hitantara tamy mpianatsin’i Jesosy rey.
9 Fe ingy Jesosy nifankahita tamin-drozy sady nivola hoe: “Akory iaby!” Namonjy azy rozy ka nitanjaky ty tombony sady niankohoky taminy teo.
10 Le hoy Jesosy tamin-drozy: “Ka matahotsy! Ndany volano rahalahiko rey ho a Galilia any, fa any ty hahitan-drozy ahy.”
11 Amy rozy mbo an-dala eny iny, le nilitsy an-tanà ao ty mpiamby sisany, ka nitantara tamy sefon’ny mpisoro rey ty raha iaby niseho.
12 Le nivory noho niaraky nidiniky ty sefon’ny mpisoro noho ty anti-panahy, bakeo namean-drozy drala* be maramila rey,
13 sady hoy ty asan-drozy: “Volano hoe: ‘Niavy haly ty mpianatsiny nangalatsy azy tamy zahay mbo niroro iny.’
14 Laha ren’ny* governera koa zay, le hohazavaninay aminy,* ka tsy misy tokony hatahoranareo.”
15 Farany nirambesin’ny maramila rey drala rey, le nataon-drozy raha nampanovy an-drozy zay. Le niparitaky tamy Jiosy teo tantara zay zisiky henanizao.
16 Fe mpianatsy 11 rey nandeha a Galilia any, le namonjy an’ny vohitsy nivolanin’i Jesosy hoe hifankahitan-drozy iny.
17 Lafa nahita azy rozy le niankohoky, fe ty sisany nisalasala.
18 Namonjy an-drozy Jesosy le nivola hoe: “Fa namea ahy ty fahefà iaby an-danitsy any noho an-tany etoy.
19 Ka mandehana zany, ampianaro ty olo amy firenena iaby mba ho lasa mpanori-dia ahy. Anovo batisa amy anaran’ny Baba noho amy anaran’ny Anaky iny noho amy anaran’ny fanahy masy rozy.
20 Ampianaro koa rozy hanaraky ze raha iaby nandidiako anareo. Le hiaraky aminareo avao aho sanandro, zisiky hiavian’ny farani-zao tontolo zao.”*
Fanamariha ambany pejy
^ Zany hoe Lahady. Tamy Jiosy, le io ty andro voalohany amy herinandro.
^ Drala namboary tamy volafoty.
^ Abt: “avy an-tsofin’ny.”
^ Abt: “horesenay lahatsy ie.”
^ Henteo F.S.B. “Fotoa alohan’ny farani-zao tontolo zao.”
