Nisoratin’i Jaona 1:1-51
1 Fa nisy tam-boalohany any azy kaihy hoe Safà iny. Niaraky tamy Ndranahary Safà io, le ndranahary* koa Safà io.
2 Niaraky tamy Ndranahary ie tam-boalohany any.
3 Ie ro nampiasà hampisy ty raha iaby. Ndre raha raiky aza tsy ho nisy laha tsy nampiasà ie.
4 Tamy alalany ro nampisy ty fiaina, le ty fiaina ro hazavà ho ahi-ty olombelo.
5 Mamirapiratsy anaty maìky ao hazavà io, fe tsy maharesy azy ty maìky.
6 Nisy lahilahy raiky nirahy ho solontena-Ndranahary. Jaona ty anarany.
7 Niavy lahilahy io, mba ho vavolombelo hanambara mikasiky an’ny hazavà iny, amy zay ty raha nivolaniny ro hahavy ty karazan’olo iaby hino.
8 Tsy Jaona hazavà io, fa nirahy ho vavolombelo hanambara mikasiky an’ny hazavà io avao ie.
9 Tamy fotoa zay, fa sisa kely le ho avy amy zao tontolo zao azy tena hazavà manazava ty karazan’olo iaby iny.
10 Ndre tamy zao tontolo zao teo ie sady nampiasà tamy famorona ani-zao tontolo zao, le tsy nahay azy zao tontolo zao.
11 Niavy tan-tanindrazany any ie, fe tsy nandramby azy ty olo tany.
12 Fe ze olo iaby nandramby azy, le nameany fahafaha ho lasa anaki-Ndranahary, satria natoron-drozy hoe nino ty anarany rozy.
13 Le nateraky rozy, fe tsy naterakin’olombelo,* sady tsy hoe sitrapon’olombelo* na sitrapon’ny baban-drozy ty niteraha an-drozy fa nateraki-Ndranahary.
14 Le nanjary olombelo* Safà iny, ka nipetraky taminay etoy. Nihitanay ty voninahitsiny. Nanahaky voninahitsin’ny anaky lahitokan’ny babany raha io. Tena nahazo hatò tamy Ndranahary* ie sady nampianatsy ty fahamarina.
15 —Nanome porofo mikasiky azy Jaona, le nikaikaiky hoe: “Ie azy nivolaniko iny hoe: ‘Lasa alohako eo azy ho avy afarako ao iny satria fa nisy talohako ie.’”—
16 Feno hasoam-panahy miavaky* ie, ka tozoro mahazo hasoam-panahy miavaky avao koa tsika.
17 Namea tamy alalan’i Mosesy ty Lalàna, fa ty hasoam-panahy miavaky noho ty fahamarina namea tamy alalan’i Jesosy Kristy.
18 Mbo tsy nisy olo nahita a-Ndranahary mihintsy, fa azy ndranahary nateraky iny, zany hoe azy anaky toka anilan’ny Baba eo iny ro nanazava ty mikasiky azy.
19 Nisy mpisoro noho Levita baka a Jerosalema any nirahin’ny Jiosy hanontany an’i Jaona hoe: “Ia va iha io?”
20 Le tsy nisalasala ie namaly an’ny fanontanea iny ka nivola hoe: “Tsy Kristy aho.”
21 Le nanontanean-drozy ie hoe: “Ka ia zany? Elia zany iha?” Le hoy ty asany: “Tsy ie aho.” Le hoy ty asan-drozy: “Iha zany Mpaminany ho avy iny?” Le hoy ty asany: “Aha!”
22 Farany hoy ty asan-drozy taminy: “Ka ia iha io? Ambarao anay, soa hisy raha hovolaninay amy azy naniraky anay rey. Ambarao anay ty mikasiky anao.”
23 Le hoy ty asany: “Zaho azy nivolanin’i Isaia mpaminany iny, azy feo mikaikaiky amy dezera* any iny hoe: ‘Anovo mahity ty lala homban’i Jehovah.’”
24 Nirahin’ny Fariseo rey rozy,
25 ka nanontany azy hoe: “Ka manino iha ro manao batisa laha tsy iha ro Kristy, na Elia, na Mpaminany ho avy iny?”
26 Le hoy ty navalin’i Jaona: “Zaho manao batisa amy rano. Fe misy olo raiky zay aminareo eo kanefa tsy hainareo.
27 Ie azy ho avy afarako ao iny, sady tsy maeva ahy ndre ty hamaha ty taly amy kapany.”
28 Ta Betania any ty nisehoan’ny raha reo, tampitan’ny Vavaranon’i Jordana, amy nanaovan’i Jaona batisa eny.
29 Hamarain’iny, nihitany namonjy azy Jesosy, ka hoy ty asany: “Ingy Anak’aondri-Ndranahary iny, azy manafaky ty fahotani-zao tontolo zao iny!
30 Ie azy nivolaniko iny hoe: ‘Misy olo ho avy afarako ao, kanefa lasa alohako eo ie, satria fa nisy talohako.’
31 Ndre zaho aza tsy nahay azy, fa mba hampisehoa azy amy Israely ro antony anaovako batisa amy rano.”
32 Nanome porofo koa Jaona le nivola hoe: “Nihitako ty fanahy masy, nijotso manahaky pizon baka an-danitsy any, le nijano tanabony teo.
33 Ndre zaho aza tsy nahay azy, fa azy naniraky ahy hanao batisa amy rano iny ro nivola tamiko hoe: ‘Ze olo hitanao ijotsoan’ny fanahy masy noho ijanonany, le olo zay azy manao batisa amy fanahy masy iny.’
34 Fa nihitako raha zay, ka mahasaky mivola aho hoe ie ro Anaki-Ndranahary.”
35 Hamarain’iny ndraiky, nitsanga niaraky tamy mpianatsiny roe rezay Jaona.
36 Le nahita an’i Jesosy nandalo ie, ka nivola hoe: “Ingy Anak’aondri-Ndranahary iny!”
37 Lafa naharè azy nivola ani-zay mpianatsy roe rey, le nanaraky an’i Jesosy.
38 Le nitoliky Jesosy ka nahita an-drozy nanaraky azy. Farany nanontany ie hoe: “Ino ilànareo io?” Le hoy ty asan-drozy: “Mipetraky aia iha io Raby?”—“Mpampianatsy” ty dikan’ny hoe Raby—
39 Le hoy ty asany tamin-drozy: “Avia soa ho hitanareo.” Le nandeha rozy ka nahita ty nipetrahany, le nipetraky taminy tao rozy tamy andro iny. Lera fahafolo* teo ho eo tamy zay.
40 Andrea rahalahin’i Simona Petera ty raiky amy mpianatsy roe rey. Lafa naharè an’ny safàn’i Jaona iny moa rozy le nanaraky an’i Jesosy.
41 Tafarani-zay, avy le nandeha amy Simona rahalahiny any Andrea, le nivola taminy hoe: “Fa nihitanay Mesia iny!”—“Kristy” ty dikan’ny hoe Mesia.—
42 Le nandesiny tamy Jesosy any ie. Lafa nanenty azy Jesosy le nivola hoe: “Simona anan’i Jaona, manomboky henanizao iha le hokaihy hoe Kefasy”—“Petera” ty dikan’ny hoe Kefasy.—
43 Nita handeha a Galilia any Jesosy hamarain’iny. Bakeo nahita an’i Filipo ie, le nivola taminy hoe: “Andao hanara-dia ahy.”
44 Filipo io olo baka a Betsaida, amy tanàn-dry Andrea noho Petera any.
45 Nahita an’i Natanaela koa Filipo, le nivola taminy hoe: “Fa nihitanay Jesosy anan’i Josefa iny, azy baka a Nazareta iny. Fa niresaky mikasiky azy ty Lalànan’i Mosesy noho ty raha nisoratin’ny Mpaminany.
46 Fe nivola taminy Natanaela hoe: “Mba misy raha soa avao va baka a Nazareta any?” Fe hoy Filipo: “Mba avia moa, henteo!”
47 Le nihitan’i Jesosy namonjy azy Natanaela, ka hoy ty asany mikasiky azy: “Ho zao Israelita zao, sady tsy mamitaky mihintsy!”
48 Le hoy Natanaela taminy: “Taia ty nahaizanao ahy?” Le hoy ty navalin’i Jesosy azy: “Fa nihitako iha talohan’ny nikaihan’i Filipo anao, tamy iha tambany aviavy teo iny.”
49 Le hoy Natanaela: “Anaki-Ndranahary iha Raby! Mpanjakan’ny Israely iha.”
50 Le hoy Jesosy: “Lasa mino zany iha satria nivola aho hoe nihitako tambany aviavy teo iha? Mbo hahita raha bevata mandilatsy ani-zay aza iha ka.”
51 Bakeo nivola koa ie hoe: “Ambarako anareo mazava soa fa ho hitanareo mivoha ty lanitsy, le ho hitanareo ty anjeli-Ndranahary miakatsy noho mijotso mana amy Anak’olo etoy.”
Fanamariha ambany pejy
^ Na: “manahaky a-Ndranahary.”
^ Abt: “tsy naterakin’ny lio.”
^ Abt: “sitrapon’ny nofotsy.”
^ Abt: “nofotsy.”
^ Abt: “Nifeno hasoam-panahy miavaky.”
^ Na: “an-diomonto.”
^ Zany hoe tamy 4 folakandro teo ho eo.
