Nisoratin’i Jaona 10:1-42
10 “Ambarako anareo mazava soa fa ze tsy militsy amy vavahadin’ny valan’aondry eo, fa manganiky amy pilasy hafa any, le mpangalatsy noho mpandrava rahan’olo.
2 Fa ze militsy amy vavahady eo ro mpiaraky an’ny aondry rey.
3 Vohan’ny mpiamby vavahady iny ie, le mijanjy ty feony aondry rey. Kaihiny amy ty anarany iaby aondriny rey, le andesiny miboaky.
4 Lafa baka naboakiny iaby aondriny rey, le mandeha alohan-drozy eo ie. Le manaraky azy aondry rey satria mahay ty feony.
5 Tsy harahin-drozy mihintsy ty olo tsy hain-drozy, fa hilaisan-drozy satria tsy hain-drozy ty feony.”
6 Niresahin’i Jesosy tamin-drozy fanohara zay, fe tsy niazon-drozy ty tean’i Jesosy hovolany.
7 Farany nivola ndraiky Jesosy hoe: “Ambarako anareo mazava soa fa zaho ro vavahady iliran’ny aondry.
8 Mpangalatsy noho mpandrava rahan’olo iaby ze nangalaky ty pilasiko, fe tsy nijanjy an-drozy aondry rey.
9 Zaho ro vavahady. Ho avotsy ze militsy mbamiko eto, le hilitsy noho hiboaky ie, sady hahita pilasy misy akata maintso.
10 Tsy avy ty mpangalatsy laha tsy hangalatsy noho hamono noho hanimba raha. Fa zaho, niavy mba hahazoan-drozy fiaina noho hahavy an-drozy ho lava velo.
11 Zaho ro mpiarakandro tena soa. Mahafoy ty ainy ho ahi-ty aondry ty mpiarakandro tena soa.
12 Fa ty olo karamà, lomay lafa mahita amboanala mamonjy bakany, ka engàny eo aondry rey, satria tsy mpiarakandro ie sady tsy tompon’ny aondry rey. Le rotarotan’ny* amboanala iny aondry rey bakeo miparitaky.
13 Lomay ie satria olo karamà, ka tsy dareany aondry rey.
14 Zaho ro mpiarakandro tena soa. Haiko ty aondriko, le ty aondriko koa mahay ahy,
15 manahaky ty ahaizan’ny Baba ahy noho ty ahaizako an’ny Baba. Le foiko ho ahi-ty aondriko ty aiko.
16 “Mana aondry hafa tsy anatin’ny vala toy ato aho. Tsy maintsy andesiko koa rozy, le hijanjy ty feoko. Hitambatsy raiky rozy sady ho raiky avao ty mpiarakandro an-drozy.
17 Zay itiavan’ny Baba ahy io, satria mahafoy ty aiko aho, mba hahazoako azy ndraiky.
18 Tsy misy olo mangalaky ty aiko amiko, fa sitrapoko ty mahafoy azy. Mana fahefà hamoy ty aiko aho, sady mana fahefà hahazo azy ndraiky. Zay ty didy niazoko baka amy Babako.”
19 Vokatsin’ny safà rezay, le tsy nitovy hevitsy ndraiky Jiosy rey.
20 Maro amin-drozy ty nivola hoe: “Misy demonia ie sady voavoa, ino ijanjinanareo azy io?”
21 Fa ty ilany nivola hoe: “Tsy safàn’olo misy demonia rezao, aia koa ty demonia ro hahavita hampahita* mason’olo jiky?”
22 Fetin’ny Fitokana tamy zay ty ta Jerosalema any. Asotry ty andro tamin’io,
23 le nandeha tamy tempoly ao Jesosy, tamy lala mitafon’i Solomona ao.
24 Le nivorivory taminy eo Jiosy rey, ka nivola hoe: “Ombia iha vo tena hivola ty mikasiky anao? Avy le volano aminay laha iha ro Kristy.”
25 Le hoy ty navalin’i Jesosy an-drozy: “Fa nivolaniko anareo zay, fa nareo ro tsy mino. Ty asa ataoko amy anaran’ny Babako ro porofo manamarina ahy.
26 Fe tsy mino nareo, satria tsy aondriko.
27 Ty aondriko mijanjy ty feoko, le haiko rozy sady manaraky ahy.
28 Ameako fiaina mandrakizay rozy, sady tsy ho ripaky mihintsy, le tsy hisy handrava an-drozy an-tanako etoy.
29 Lafovily mandilatsy ty raha hafa iaby ze raha namean’ny Babako ahy, le tsy misy mahavita mandrava azy an-tanan’ny Baba eny.
30 Raiky avao* zaho noho Baba.”
31 Le nangalaky vato hitoraha azy ndraiky Jiosy rey.
32 Le nivola tamin-drozy Jesosy hoe: “Maro ty asa soa nampanovin’ny Baba, le fa nasehoko anareo. Ka aia amy rey ty hitorahanareo vato ahy?”
33 Le hoy ty navalin’ny Jiosy rey azy: “Tsy raha asa soa zao itorahanay vato anao io, fa iha mitiva a-Ndranahary io. Iha olombelo avao kanefa manao ty vatanao ho ndranahary.”*
34 Le hoy ty asan’i Jesosy: “Tsy fa voasoratsy amy Lalànanareo ao va hoe: ‘Nivola aho hoe “ndranahary* nareo”’?
35 Laha nikaihi-Ndranahary hoe ‘ndranahary’ ty olo volanin’ny safàny hoe maeva sazỳ, kanefa tsy azo foana ty Soratsy Masy,
36 le manino zaho nihamasinin’ny Baba noho nirahiny ho amy zao tontolo zao toy, ro volaninareo hoe mitiva a-Ndranahary lafa nivola hoe: ‘Anaki-Ndranahary aho’?
37 Laha tsy manao ty asan’ny Babako aho, le ka mino ahy.
38 Fe laha manao an’ny asa rey aho, ndre tsy mino ahy aza nareo, le mba minoa an’ny asa ataoko rey. Amy zay ho azonareo sady ho hainareo soa avao, fa miaraky amy Baba aho le Baba miaraky amiko.”
39 Le nita hanambotsy azy ndraiky rozy, fe nilay ie le tsy niazon-drozy.
40 Nandeha ampitan’ny Vavaranon’i Jordana any ndraiky ie, mba ho amy pilasy nanaovan’i Jaona batisa tamy voalohany iny, le nijano tany.
41 Nisy olo maro niavy taminy teo, le nivola hoe: “Tsy nanao famantara Jaona ndre raiky, fe marina iaby ty raha nivolaniny mikasiky an’ny lahilahy io.”
42 Le nimaro olo nino an’i Jesosy ty tany.
Fanamariha ambany pejy
^ Na: “romidromitin’ny.”
^ Abt: “hanokatsy.”
^ Na: “Miharo raiky.”
^ Na: “mitovy amy Ndranahary.”
^ Na: “mitovy amy Ndranahary.”
