Nisoratin’i Jaona 11:1-57
11 Nisy lahilahy mana anara Lazarosy zay amy zay narary. Nipetraky ta Betania any ie, zany hoe tamy tanà nisy an’i Maria noho Marta anabaviny any.
2 Maria io azy nanily menaky manitsy tamy Tompo noho namafa ty tombon’ny Tompo tamy volony iny. Anadahiny Lazarosy, azy narary iny.
3 Le nandefa hafatsy tamy Jesosy any anabavin’ny Lazarosy rey hoe: “Tompo! Marary namanao tsy foinao iny.”
4 Fe lafa naharè ani-zay Jesosy, le nivola hoe: “Tsy hoe hahafaty azy ro nampisy an’ny arety io, fa mba hanomeza voninahitsy a-Ndranahary, amy zay hahazo voninahitsy koa ty Anaki-Ndranahary.”
5 Nitean’i Jesosy, Marta noho rahavaviny iny noho Lazarosy.
6 Fe mbo nijano roe andro tamy nisy azy iny tany avao ie, lafa naharè hoe narary Lazarosy.
7 Tafarani-zay, nivola tamy mpianatsiny rey ie hoe: “Ndao tsika ho a Jodia any ndraiky.”
8 Le nivola taminy mpianatsiny rey hoe: “Nao Raby, vo tsiela ty olo a Jodia ao ro ta hitoraky vato anao, ka mbo ho any ndraiky iha?”
9 Le hoy ty navalin’i Jesosy: “Tsy 12 lera va ro mampazava ty andro? Laha mandeha amy andro mazava ty olo, le tsy ho voafinga mihintsy satria hitany ty fahazavani-zao tontolo zao.
10 Fa laha mandeha amy andro haly ty olo raiky, le ho voafinga satria tsy anatiny ao ty hazavà.”
11 Hoy ty asany lafa baka nivola ani-zay: “Miroro Lazarosy namantsika, fe handeha ho any aho hamoha azy.”
12 Le nivola taminy mpianatsiny rey hoe: “Tompo, laha miroro ie le tsy hanahy sasy.”
13 Ta hivola Jesosy amin’io hoe maty Lazarosy, fe rozy nieritseritsy hoe tean’i Jesosy hovolany io, nitofatofa ie ka niroro.
14 Bakeo navantan’i Jesosy ty resaky hoe: “Maty Lazarosy.
15 Soa avao aho fa tsy tany, satria mahasoa anareo raha zay, amy zay nareo hino. Fe ndao tsika ho aminy any.”
16 Le nivola tamy mpianatsy hafa rey Tomasy, azy kaihy hoe Ikambana iny hoe: “Ndao koa tsika handeha, soa hiaraky maty aminy.”
17 Lafa niavy Jesosy, le nihainy hoe fa efatsy andro Lazarosy ro tan-dolo ao.
18 Tanilan’i Jesoralema any ty nisy an’i Betania, le telo kilometra* eo ho eo ty elanelan-drozy.
19 Nimaro ty Jiosy namonjy an-dry Marta noho Maria, mba hampionona an-drozy tamy anadahin-drozy nimaty iny.
20 Lafa niren’i Marta hoe fa bakao Jesosy, le nandeha nitsena azy ie, fa Maria mbo nipetraky tan-trano ao avao.
21 Le hoy ty asan’i Marta tamy Jesosy: “Tompo, laha teto iha, le tsy ho nimaty anadahiko iny.
22 Fe ndre henanizao, le haiko fa hamea-Ndranahary anao iaby ze raha angatahinao.”
23 Le hoy Jesosy taminy: “Ao fa ho velo anadahinao iny.”
24 Le nivola taminy Marta hoe: “Haiko fa ho velo ie lafa hovelomy ty maty amy andro farany.”
25 Le hoy Jesosy taminy: “Zaho ro fameloma ty maty noho fiaina. Ze mampiseho finoa ahy ndre maty aza, le ho velo ndraiky.
26 Le ze olo mbo velo ka mampiseho finoa ahy, le tsy ho maty mihintsy. Inoanao va zay?”
27 Le hoy ty asany: “Eka Tompo! Mino aho fa iha ro Kristy, azy Anaki-Ndranahary iny, azy ho avy amy zao tontolo zao iny.”
28 Le nandeha Marta lafa baka nivola ani-zay, le nikaiky an’i Maria rahavaviny, bakeo nivola taminy mitoka hoe: “Ao Mpampianatsy iny mila anao.”
29 Laha vo naharè ani-zay Maria, le nitsanga malaky ka nandeha amy Jesosy any.
30 Mbo tsy niavy tan-tanà ao Jesosy, fa mbo tamy pilasy nitsenan’i Marta azy iny any.
31 Lafa nahita an’i Maria nitsanga malaky noho nandeha Jiosy nampionona azy tan-trano ao rey, le nanaraky azy, satria nieritseritsy rozy hoe handeha hitàny an-dolo any ie.
32 Lafa niavy tamy Jesosy eo amy zay Maria, le niankohoky tan-tombony eo sady nivola hoe: “Tompo, laha teto iha le tsy ho nimaty anadahiko iny.”
33 Lafa Jesosy nahita an’i Maria noho Jiosy niaraky taminy rey nirohaky ty tany, le nifoay marè sady tena nalahelo.
34 Le hoy ty asany: “Napetrakinareo aia ie?” Le hoy ty asan-drozy taminy: “Ndao tsika hanenty azy Tompo!”
35 Le nilatsaky ty ranomason’i Jesosy.
36 Le hoy Jiosy rey: “Tena teany vatany ie zao.”
37 Fe hoy ty sisany tamin-drozy hoe: “Tsy vitan’ny lahilahy tia va ty nisaka an’ny olo iny tsy ho maty, kanefa nivitany ty nampahita* ty mason’ny lahilahy jiky iny?”
38 Bakeo nifoay marè ndraiky Jesosy, le nandeha amy lolo iny eo. Lakato raha io laha ty marina, le nitampena vatobe raiky.
39 Le hoy Jesosy: “Akisaho vato io.” Le hoy Marta, anabavin’ny lahilahy maty iny: “Tompo, tsy maintsy fa simba* ie ao zay, satria fa efatsy andro zay.”
40 Le hoy Jesosy taminy: “Tsy fa nivola taminao moa aho hoe laha mino iha, le hahita ty voninahitsi-Ndranahary?”
41 Le nakisakin-drozy vato iny. Bakeo Jesosy niandra nana an-danitsy any, le nivola hoe: “Baba, misaotsy anao aho satria fa nijanjy ahy iha.
42 Haiko fa mijanjy ahy avao iha, fe vahoaky mitsanga manodidy ahy retoa ro mahavy ahy mivola ani-zay, mba hinoan-drozy fa iha ro naniraky ahy.”
43 Lafa baka nivola ani-zay ie, le nikaiky marè hoe: “Lazarosy, miboaha!”
44 Le niboaky lahilahy fa nimaty iny. Mbo nifehy lamba ty tombony noho ty tanany, sady mbo nifono lamba ty tarehiny. Le hoy Jesosy tamin’olo rey: “Vahao ie, le engao handeha.”
45 Lasa nino an’i Jesosy amy zay ty ankamaroan’ny Jiosy niavy tamy Maria ao noho nahita ty raha nataon’i Jesosy.
46 Fe ty ilany nandeha tamy Fariseo rey any, le nitantara ty raha nataon’i Jesosy.
47 Le navorin’ny sefon’ny mpisoro noho Fariseo rey ty Fitsarà Anabo Jiosy, ka nivola rozy hoe: “Ino ty hataontsika fa maro marè ty famantara ataon’ny lahilahy iny?
48 Laha engantsika amy zao avao ie, le hino azy iaby ty olo. Le ho avy ty Romanina ka hangalaky ty tempolintsika* noho ty firenenantsika.”
49 Fe nivola ty raiky amin-drozy, zany hoe Kaiafa, azy mpisorobe tamy fotoa* zay iny hoe: “Tena tsy misy raha hainareo mihintsy!
50 Tsy mba dinihinareo va hoe mahasoa anareo laha olo raiky avao ro maty ho an’ny vahoaky toy, tany firenena toy iaby ro ho rava?”
51 Fe tsy hevitsiny avao raha nivolaniny zay,fa satria ie ro mpisorobe tamy fotoa* io, le naminany ie hoe ho maty ho an’ny firenena iny Jesosy,
52 sady tsy ho an’ny firenena iny avao, fa ho ahi-ty anaki-Ndranahary fa niparitaky koa, amy zay havory raiky rozy.
53 Niaraky nila hevitsy hamonoa an’i Jesosy amy zay rozy nanomboky tamy andro zay.
54 Farany Jesosy tsy nisehoseho tamy Jiosy rey sasy lafa nandeha. Fe niala teo ie, le nandeha amy faritsy mariniriny dezera* any, tamy tanà kaihy hoe Efraima zay any. Le nijano tany niaraky amy mpianatsiny rey ie.
55 Fa narìny ty Paskan’ny Jiosy tamy zay, ka nimaro olo baka ambanivohitsy any niakatsy ta Jerosalema ao talohan’ny Paska, mba hanadio ty vatan-drozy mifanaraky amy takin’ny Lalàna.
56 Nila an’i Jesosy rozy tamy zay, le samby mbo nitsanga tamy tempoly ao, bakeo nifanontany hoe: “Akory ty hevitsinareo? Tsy ho avy amy fety toy atoy mihintsy va ie?”
57 Fe fa nanome baiko sefon’ny mpisoro noho Fariseo rey hoe ze olo mahay ty misy an’i Jesosy le tokony hivola, mba hahafahan-drozy hanambotsy azy.
Fanamariha ambany pejy
^ Abt: “15 stadio.”
^ Abt: “nanokatsy.”
^ Na: “mantsy.”
^ Abt : “ty pilasintsika.”
^ Abt: “tao.”
^ Abt: “tao.”
^ Na: “liomonto.”
