Nisoratin’i Jaona 12:1-50
12 Niavy ta Betania ao Jesosy, enin’andro talohan’ny Paska. Tao ty nisy an’i Lazarosy, azy nimaty le nivelominy ndraiky iny.
2 Nasàn’olo tamy sakafo hariva Jesosy lafa tao. Marta ro nizara sakafo, fa Lazarosy raiky amin’olo niaraky nihina* tamy Jesosy rey.
3 Bakeo nangalaky menaky manitsy livatra raiky* Maria. Narda tena ie menaky io sady sarotsy biby. Le nailiny tamy tombon’i Jesosy teo raha iny, bakeo nimaihiny tamy volony ty tombon’i Jesosy. Lasa nimanimanitsy ty tan-trano ao tratsin’ny menaky iny.
4 Fe nivola Jodasy Iskariota, raiky amy mpianatsiny rey, azy fa hamadiky azy iny hoe:
5 “Manino tsy navily 300 denaria menaky manitsy tỳ, bakeo namea ho an’ny mahantra drala zay?”
6 Fe tsy ty fiferinesany mahantra ro nahavy azy nivola ani-zay, fa amy maha mpangalatsy azy. Ie moa ro nitanjaky ty boaty fasia drala, le nangalariny avao ze drala tanatiny ao.
7 Bakeo hoy Jesosy: “Engaonareo ie, fa mba hanomàna ty andro handevena ahy ro anaovany an’io.
8 Satria ho aminareo eo avao ty mahantra, fa zaho tsy raha ho aminareo eo avao.”
9 Lasa maro amy zay ty Jiosy nahay hoe ta Betania ao ie. Le niavy ao koa rozy, tsy hoe mba hahita an’i Jesosy avao, fa mba hahita an’i Lazarosy koa, azy nimaty le nivelominy ndraiky iny.
10 Le niaraky nila hevitsy hamonoa an’i Lazarosy koa sefon’ny mpisoro rey,
11 satria ie ro nahavy an’ny Jiosy maro rey ho a Betania any noho hino an’i Jesosy.
12 Hamarain’iny, niren’olo maro niavy hamonjy an’ny fety iny fa ho a Jerosalema any Jesosy.
13 Le nangalaky sampan’ny palmie rozy, bakeo nandeha nitsena azy sady nikaikaiky hoe: “Mba arovo* lahy ie! Enganè mba hahazo fitahia azy avy amy anaran’i Jehovah iny, azy Mpanjakan’ny Israely iny!”
14 Le nahita anak’ampondra Jesosy, le niondranany raha iny satria fa voasoratsy hoe:
15 “Ka matahotsy anakampelan’i Ziona, ingy niavy mpanjakanao iny nitikitsy anak’ampondra!”
16 Tsy niazon’ny mpianatsiny rey tse raha zay tamy voalohany, fa lafa namea voninahitsy Jesosy vo nitiaron-drozy hoe raha fa nivoasoratsy mikasiky an’i Jesosy rey mihintsy nataon-drozy reo.
17 Le mbo nitantara ty raha niseho avao vahoaky rey. Rozy moa nahita an’i Jesosy nikaiky an’i Lazarosy hiboaky baka an-dolo ao sady nahita azy nivelomy ndraiky.
18 Le zay koa ty nahavy an’ny vahoaky rey nitsena azy, satria niren-drozy hoe fa nanao an’ny famantara io ie.
19 Farany nifampiresaky Fariseo rey hoe: “Mba henteo! Tsy misy raha vitantsika mihintsy. Henteo fa manaraky azy iaby zao tontolo zao!”
20 Nisy Grika koa tamin’olo niavy teo tamy andro fety iny mba hivavaky.
21 Le namonjy an’i Filipo azy baka a Betsaida, a Galilia any iny rozy, ka nangataky taminy hoe: “Mba ta hahita an’i Jesosy lahy zahay!”
22 Le nandeha Filipo nivola tamy Andrea, le Andrea noho Filipo amy zay nandeha nivola tamy Jesosy.
23 Fe hoy ty asan’i Jesosy tamin-drozy: “Avy ty fotoa* hanomeza voninahitsy ty Anak’olo.
24 Ambarako anareo mazava soa fa laha tsy latsaky amy tany ty voa raiky ka maty, le mijano ho voa raiky avao. Fa laha maty ie le manome voany maro.
25 Ze tea ty ainy ro hamoy* ty ainy, fa ze malay ty ainy amy fiaina henanizao ro hiaro ty ainy mba hahazoany fiaina mandrakizay.
26 Ze ta hanompo ahy le tokony hanaraky ahy, le ze misy ahy ro hisy ty mpanompoko koa. Ze manompo ahy, le hamean’ny Baba voninahitsy.
27 Matahotsy aho zao! Ino lahy ty hovolaniko e? Baba, avoto ho afaky amy lera toy aho, kanefa lera toy mihintsy ty antony niaviako.
28 Baba, ameo voninahitsy ty anaranao.” Le nisy feo baka an-danitsy any nivola hoe: “Fa nanome voninahitsy azy aho, le mbo hanome voninahitsy azy ndraiky.”
29 Naharè ani-zay olo nitsanga teo rey ka nivola hoe nisy hotroky ty teo. Fe nivola ty olo sisany hoe: “Anjely niresaky taminy teo iny.”
30 Le hoy ty asan’i Jesosy: “Tsy natao ho ahy feo zay, fa ho ahinareo.
31 Avy henanizao ty fitsarà ani-zao tontolo zao, le horoasy mpanday ani-zao tontolo zao iny.
32 Fe lafa hasondrotsy* baka amy tany eo aho, le hitao ty karazan’olo iaby mba hamonjy ahy.”
33 Nivola ani-zay ie, mba hivolana ty fomba hahafatesany tsy ho ela afarani-zay.
34 Bakeo nivola olo rey hoe: “Renay tamy Lalàna tao fa ho velo mandrakizay Kristy. Ka ino ty antony ivolananao hoe tsy maintsy asondrotsy ty Anak’olo? Ka ia zany Anak’olo io?”
35 Le hoy ty asan’i Jesosy: “Sisa kely ty hisian’ny mazava aminareo eo. Mandehana amy mazava eo tany mbo aminareo eo ty mazava, amy zay tsy haharesy anareo ty maìky. Le ze mandeha amy maìky ao tsy hahay ty lala hombany.
36 Minoa ty mazava tany mbo aminareo eo ty mazava, mba ho lasa anan’ny mazava nareo.”
Nivola ani-zay Jesosy, bakeo nandeha nivony an-drozy.
37 Ndre nanao famantara maro tamin-drozy eo aza ie le tsy ninoan-drozy,
38 mba ho tanteraky safàn’i Isaia mpaminany iny hoe: “Jehovah, ia ty mba nino ty raha nireny taminay?* Le ia ty nampisehoan’i Jehovah ty tanany mahery?”*
39 Tsy afaky hino koa rozy satria mbo nivola Isaia hoe:
40 “Nataony jiky ty mason-drozy sady nihiliany ty fon-drozy, amy zay ty mason-drozy tsy hahita, le ty fon-drozy tsy hahazo ty dikan’ny raha zay, le tsy himpoly amiko rozy ka tsy hafahiko ty aretin-drozy.”
41 Nivola an’ny raha zay Isaia satria nihitany ty voninahitsin’i Kristy, le niresaky mikasiky azy ie.
42 Fe maro nino azy koa ty mpitariky tamy Jiosy eo, kanefa natahotsy an’ny Fariseo rey rozy le tsy nahasaky nivola hoe mpianatsiny, tsy no ho voaroaky baka amy synagoga ao,
43 satria naleon-drozy ty voninahitsy baka amin’olo tany ty voninahitsy baka amy Ndranahary.
44 Fe nivola marè Jesosy hoe: “Ze mino ahy, le tsy hoe zaho avao ro inoany, fa azy naniraky ahy iny koa.
45 Le ze mahita ahy, le mahita ani-Azy naniraky ahy iny koa.
46 Avy aho mba ho fahazavà amy zao tontolo zao, amy zay tsy hijano amy maìky ao ze mino ahy.
47 Fe laha misy olo maharè ty safàko kanefa tsy manoriky an’ny raha zay, le tsy hitsara azy aho, satria tsy avy hitsara ani-zao tontolo zao aho, fa hanavotsy ani-zao tontolo zao.
48 Ze tsy midary ahy ka tsy mandramby ty safàko, le hisy hitsara azy. Ty safà nivolaniko ro hitsara azy amy andro farany.
49 Satria tsy ty hevitsiko ro nivolaniko, fa Baba naniraky ahy iny ro nandidy ahy mikasiky ze raha horesahiko noho hovolaniko.
50 Sady haiko fa ty didiny ro hahazoa fiaina mandrakizay. Ka ze raha volaniko, le volaniko mifanaraky amy ze nivolanin’ny Baba tamiko.”
Fanamariha ambany pejy
^ Na: “nandry nihorira tan-databo.”
^ Zany hoe livatra romanina, na 327g eo ho eo.
^ Abt: “avoto.”
^ Abt: “lera.”
^ Abt: “handripaky.”
^ Zany hoe ahanto amy tsato-kazo eo.
^ Na: “ty raha nivolaninay.”
^ Abt: “sirakiny.”
