Nisoratin’i Jaona 13:1-38
13 Nihain’i Jesosy talohan’ny fetin’ny Paska iny fa avy ty fotoa hialany amy zao tontolo zao eo noho handehanany amy Baba any. Fa sandra nitea ty mpianatsiny* amy zao tontolo eo avao ie, le teany zisiky farany rozy.
2 Mbo nisakafo hariva rozy tamy zay. Le nampilirin’ny Devoly tam-pon’i Jodasy Iskariota anan’i Simona ao ty faniria hamadiky an’i Jesosy.
3 Fa hain’i Jesosy koa hoe fa namean’ny Baba an-tanany eo ty raha iaby, sady baka amy Ndranahary any ie, le ho amy Ndranahary any.
4 Nitsanga Jesosy tamy rozy mbo nisakafo hariva iny, ka napetrakiny ty sikiny.* Le nangalaky servieta ie, ka nisikinany.*
5 Bakeo nanisy rano tanaty koveta ie, le nanomboky nanasa tombon’ny mpianatsiny rey. Le nifafàny tamy servieta nisikinany iny tombon-drozy rey.
6 Bakeo amy zay ie niavy tamy Simona Petera eo. Fe hoy ty asan’i Petera: “Tompo, le iha va ro hanasa ty tomboko?
7 Le hoy ty navalin’i Jesosy azy: “Mbo tsy azonao tse henanizao raha ataoko toy, fa mbo ho azonao avao afarafara any.”
8 Le hoy ty asan’i Petera: “Tsy hengako hanasa ty tomboko zao mihintsy iha!” Fe hoy ty asan’i Jesosy: “Laha tsy sasàko ty tombonao, le tsy misy raha iharoako aminao.”*
9 Le nivola Simona Petera hoe: “Tompo, aleo sasao koa ty tanako noho ty lohako, fa tsy ty tomboko avao.”
10 Le hoy ty asan’i Jesosy: “Ze olo fa baka nandro le fa malio soa, ka ty tombony avao sisa ro mila sasà. Fa malio nareo, fe tsy nareo iaby.”
11 Fa hainy amin’io azy hamadiky azy iny, ka zay nahavy azy nivola io hoe: “Tsy nareo iaby ro malio.”
12 Lafa baka nisasàny iaby ty tombon-drozy, le nisikinany sikiny* iny. Bakeo nangalaky pilasy* tamy latabo eo ndraiky ie, le nivola hoe: “Hainareo va ty dikan’ny raha nataoko taminareo teo iny?
13 Nareo mikaiky ahy hoe ‘Mpampianatsy’ noho ‘Tompo’, le marina raha zay satria zay vatany aho.
14 Ka laha zaho Tompo noho Mpampianatsy aza nanasa ty tombonareo, le tokony hifanasa* tomboky koa nareo.
15 Satria modely nameako anareo rey, mba hanaovanareo manahaky nataoko taminareo rey koa.
16 Ambarako anareo mazava soa fa ty mpanompo tsy anabo mandilatsy ty tompony, le ze irahy tsy anabo mandilatsy ani-ze naniraky azy.
17 Laha hainareo raha zay, le sambatsy nareo laha manao ani-rezay.
18 Tsy nareo iaby ro volaniko amy raha zay, fa haiko ze nifiliko. Fe tsy maintsy miseho zay mba ho tanteraky ty Soratsy Masy hoe: ‘Azy niaraky nihina mofo tamiko iny ro lasa nanohitsy ahy.’*
19 Mivola aminareo sandrany aho manomboky henanizao, amy zay lafa miseho raha zay, le hino nareo hoe zaho ro ie.
20 Ambarako anareo mazava soa fa ze mandramby ani-ze irahiko le mandramby ahy, le ze mandramby ahy le mandramby ani-Azy naniraky ahy iny koa.”
21 Tena natahotsy Jesosy lafa baka nivola ani-zay, le navantany ty resaky hoe: “Ambarako anareo mazava soa fa hamadiky ahy ty raiky aminareo.”
22 Le nifanenty mpianatsiny rey, sady niasa loha hoe ia resahiny io.
23 Nisy raiky tamy mpianatsin’i Jesosy rey nangalaky pilasy tanilany* eo tamy zay, zany hoe azy mpianatsiny teany iny.
24 Le nanao fihetsiky tamy lohany Simona Petera, ka nivola taminy hoe: “Ia va volaniny zao io?”
25 Farany nionda tan-tratran’i Jesosy eo mpianatsy teany iny, le nanontany hoe: “Ia zao io Tompo?”
26 Le hoy ty navalin’i Jesosy: “Azy hameako an’ny mofo ajoboko anaty finga ao iny ro ie.” Najobony tanaty finga ao amy zay mofo iny, le nalany ka nameany an’i Jodasy, azy anan’i Simona Iskariota iny.
27 Lafa nalan’i Jodasy mofo iny, le nilitsy taminy ao Satana. Le hoy Jesosy taminy: “Anovo malaky ze raha ataonao.”
28 Fe tsy nisy nahay ty antony nivolanany ani-zay azy nihina* teo rey.
29 Nisy amin-drozy aza nieritseritsy hoe satria Jodasy ro nitanjaky an’ny boaty fasia drala iny, le nivola taminy Jesosy hoe: “Ndany vilio ty raha ilàntsika amy fety”, na hoe tokony hanao fanomeza ho an’ny mahantra ie.
30 Farany avy le niboaky ie lafa nahazo an’ny mofo iny. Fa haly ty andro tamy zay.
31 Lafa nandeha Jodasy, le hoy Jesosy: “Amea voninahitsy ty Anak’olo henanizao, sady amy alalany ro anomeza voninahitsy a-Ndranahary.
32 Ndranahary mihintsy ro hanome voninahitsy azy, sady avy le hanome voninahitsy azy.
33 Anako teako nareo, sisa kely ty fotoa hiarahako aminareo. Hila ahy nareo, le ze raha nivolaniko tamy Jiosy rey avao koa ro volaniko aminareo henanizao hoe: ‘Ze andehanako, le tsy azonareo andehana.’
34 Zao ty didy vaovao ameako anareo: Mifankatiava nareo, le manahaky ty nitiavako anareo ro tokony hifankatiavanareo koa.
35 Laha mifankatea nareo, le zay ro hahaizan’olo iaby fa mpianatsiko nareo.”
36 Hoy ty asan’i Simona Petera: “Ho aia iha io Tompo?” Le hoy ty navalin’i Jesosy: “Tsy afaky manaraky ahy amy ze andehanako any iha henanizao, fe hanaraky ahy avao afarafara any.”
37 Le hoy ty asan’i Petera: “Tompo, manino aho ro tsy afaky manaraky anao henanizao? Ndre ty aiko aza hafoiko ho anao.”
38 Le hoy ty asan’i Jesosy: “Tena hahafoy ty ainao ho ahy vatany va iha? Ambarako anao mazava soa fa mbo tsy maneno ty akoho, le fa handà ahy intelo iha.”
Fanamariha ambany pejy
^ Na: “ty azy.”
^ Abt: “sikiny ivelany.”
^ Na: “narohiny tam-baniany eo.”
^ Abt: “tsy hisy anjara iharoako aminao.”
^ Abt: “sikiny ivelany.”
^ Na: “nandry nihorira.”
^ Na: “tsy maintsy mifanasa.”
^ Abt: “nampiakatsy ty voditombony mba hamangoa ahy.”
^ Abt: “nandry nihorira tan-tratrany.”
^ Na: “nandry nihorira tan-databo.”
