Nisoratin’i Jaona 16:1-33
16 “Nivola an’ny raha rezay taminareo aho, mba tsy ho rava ty finoanareo.*
2 Horoasin’olo baka amy synagoga ao nareo. Mbo ho avy aza ty fotoa* hieritseretani-azy mamono anareo rey hoe manao fanompoa masy ho ahi-Ndranahary rozy lafa manao ani-zay aminareo.
3 Hanao an’ny raha rezay rozy, satria samby mbo tsy hain-drozy ndre Baba ndre zaho.
4 Fe nivolaniko aminareo raha rezay, amy zay lafa avy ty fotoa isehoany, le ho tiaronareo hoe fa nivola an’ny raha rezay taminareo aho.
“Tsy nivolaniko aminareo raha rezay tamy voalohany, satria mbo taminareo eo aho.
5 Fe henanizao, handeha ho amy Azy naniraky ahy iny any aho, kanefa tsy misy manontany ahy nareo hoe: ‘Ho aia iha io?’
6 Tsy zay moa fa malahelo biby ty fonareo satria nivola an’ny raha rezay taminareo aho.
7 Fe ambarako anareo ty marina hoe tena mahasoa anareo ty handehanako, satria laha tsy mandeha aho, le tsy ho avy aminareo atoy mpanampy iny. Kanefa laha mandeha aho, le hirahiko aminareo atoy ie.
8 Le lafa avy ie, le hanome porofo mampieky ani-zao tontolo zao mikasiky ty fahotà, noho mikasiky ty fahamarina, noho mikasiky ty fitsarà.
9 Voalohany, porofo mikasiky ty fahotà, satria tsy mino ahy rozy.
10 Bakeo, porofo mikasiky ty fahamarina, satria ho amy Baba any aho, le tsy ho hitanareo sasy.
11 Le farany, porofo mikasiky ty fitsarà, satria fa nitsarà azy mpanday ani-zao tontolo zao iny.
12 “Mbo maro ty raha tokony hovolaniko aminareo, fe tsy zakanareo raha rezay henanizao.
13 Kanefa lafa avy ie, zany hoe ty fanahin’ny fahamarina, le hitariky anareo mba ho azonareo soa ty fahamarina iaby, satria tsy ty hevitsiny avao ro hovolaniny, fa ze raha reny ro hovolaniny, le hambarany anareo ty raha mbo ho avy.
14 Hanome voninahitsy ahy ie, satria hambarany aminareo ze raha azony baka amiko.
15 Ze raha iaby ahin’ny Baba le ahy. Zay nahavy ahy nivola hoe hambarany aminareo ze raha azony baka amiko.
16 Sisa kely le tsy hahita ahy sasy nareo, fa sisa kely ndraiky le hahita ahy nareo.”
17 Le nifampiresaky ty sisany amy mpianatsiny rey hoe: “Ino kay ty teany hovolany amy hoe: ‘Sisa kely le tsy hahita ahy nareo, fa sisa kely ndraiky le hahita ahy nareo’, noho ty hoe: ‘Satria ho amy Baba any aho’?”
18 Le hoy ty asan-drozy: “Ino zany ty teany hovolany amy hoe: ‘Sisa kely’? Tsy haintsika ty teany hovolany.”
19 Nihain’i Jesosy hoe ta hanontany azy rozy, farany nivola ie hoe: “Lasa mifanontany va nareo satria nivola aho hoe: ‘Sisa kely le tsy hahita ahy nareo, fa sisa kely ndraiky le hahita ahy nareo’?
20 Ambarako anareo mazava soa fa hitàny noho hirohaky ty tany nareo, fa zao tontolo zao ho falifaly. Halahelo nareo, kanefa hanjary fifalea alahelonareo zay.
21 Mijaly ty ampela lafa avy ty fotoa* iterahany. Fe tsy tiarony sasy fijaleany zay lafa teraky ie, satria falifaly ie fa misy olo ateraky amy zao tontolo zao eo.
22 Malahelo koa nareo henanizao. Fe hahita ahy ndraiky nareo, le ho falifaly ty fonareo. Le tsy hisy hangalaky fifaleanareo zay.
23 Tsy hanontany ahy sasy nareo amy andro zay. Ambarako anareo mazava soa fa ze raha iaby angatahinareo amy Baba, le hameany anareo amy anarako.
24 Mbo tsy nangataky raha tamy anarako mihintsy nareo zisiky henanizao. Mangataha le hahazo nareo, amy zay ho feno ty fifaleanareo.
25 “Nanao fanohara aho lafa nivola an’ny raha rezay taminareo. Fe avy ty fotoa tsy hanaovako fanohara aminareo sasy, fa avy le horesahiko mivanta aminareo ty mikasiky an’ny Baba.
26 Hangataky amy anarako nareo amy andro zay. Fe tsy midika resako zay hoe zaho ro hangataky amy Baba ho anareo.
27 Tsy zay fa tean’ny Baba nareo, satria nareo fa tea ahy le nino hoe baka amy Baba aho sady solontena-Ndranahary.
28 Solontenan’ny Baba aho, le avy amy zao tontolo zao eto. Fe hiala amy zao tontolo zao eto aho henanizao, le ho amy Baba any.”
29 Hoy ty asan’ny mpianatsiny rey: “Mivola mivanta amy zay iha henanizay fa tsy manao fanohara.
30 Hainay henanizao hoe mahay ty raha iaby iha, sady tsy mila olo hanontany anao. Le lasa mino zahay hoe baka amy Ndranahary iha.”
31 Le hoy Jesosy: “Tena mino va nareo henanizao?
32 Ho avy ty fotoa,* sady ho avy vatany zay, ka hiparitaky amy ze hombanareo* any iaby nareo kiraidraiky, le henganareo ho raiky aho. Fe tsy raiky aho satria miaraky amy Baba.
33 Nivola an’ny raha rezay taminareo aho mba ho amy alalako ro hahazoanareo fiadana. Amy zao tontolo zao eo ro hahitanareo fijalea, fe manàna herim-po! Zaho fa naharesy ani-zao tontolo zao.”
Fanamariha ambany pejy
^ Abt: “tsy ho tafitohina nareo.”
^ Abt: “lera.”
^ Abt: “lera.”
^ Abt: “lera.”
^ Na: “ty tranonareo.”
