Nisoratin’i Jaona 17:1-26
17 Niandra nana an-danitsy any Jesosy lafa baka nivola an’ny raha zay, le hoy ty asany: “Baba, fa avy ty fotoa.* Ameo voninahitsy ty ananao mba hanomezany voninahitsy anao,
2 satria fa nameanao fahefà amin’olo* iaby ie, mba ho afaky hanome fiaina mandrakizay ho ani-ze olo iaby nameanao azy.
3 Laha ta hahazo fiaina mandrakizay rozy, le mila mianatsy hahay anao,* azy Ndranahary marina iny,* noho Jesosy Kristy, azy nirahinao iny.
4 Fa nanome voninahitsy anao aho tan-tany etoy satria vitako ty asa nampanovinao ahy.
5 Baba, mba ameo voninahitsy anilanao eo amy zay aho henanizao, zany hoe voninahitsy nananako tanilanao teo iny, tamy zao tontolo zao mbo tsy nisy iny.
6 “Fa nambarako tamin’olo nameanao ahy tamy zao tontolo zao eo reto ty anaranao. Ahinao rozy le namenao ahy, sady fa norihin-drozy ty safànao.
7 Fa hain-drozy henanizao fa baka aminao ty raha iaby nameanao ahy,
8 satria fa nambarako an-drozy ty raha nivolaninao tamiko, le neken-drozy raha rezay, ka nanjary hain-drozy soa hoe solontenanao aho. Nino koa rozy hoe iha ro naniraky ahy.
9 Mangataky aminao ho an-drozy aho. Tsy mangataky ho ani-zao tontolo zao aho, fa ho ani-azy nameanao ahy reto, satria ahinao rozy.
10 Ahinao koa ty raha iaby ananako, le ahy ty raha anananao, sady fa namea voninahitsy tamin-drozy teo aho.
11 “Tsy ho amy zao tontolo zao eto sasy aho satria ho aminao any, fa rozy ro eto. Baba, Masy iha. Arovo rozy mba hanomeza voninahitsy an’ny anaranao nameanao ahy iny, amy zay ho raiky* manahaky antsika avao koa rozy.
12 Tamy zaho mbo tamin-drozy teo, le niaro an-drozy aho mba hanomeza voninahitsy an’ny anaranao nameanao ahy iny. Niaro an-drozy aho, ka tsy nisy ripaky rozy ndre raiky, laha tsy azy anan’ny fandripaha iny avao, mba ho tanteraky ty Soratsy Masy.
13 Fe ho aminao any aho henanizao, le volaniko amy zao tontolo zao raha rezay, mba ho tena tsapan-drozy am-pon-drozy ao ty fifaleako.
14 Fa nameako an-drozy ty safànao. Fe halani-zao tontolo zao rozy, satria tsy anisani-zao tontolo zao, manahaky ahy tsy anisani-zao tontolo zao.
15 “Tsy mangataky aminao aho mba hampialanao an-drozy amy zao tontolo zao eo, fa mba hiarovanao an-drozy amy azy raty iny.
16 Tsy anisani-zao tontolo zao rozy, manahaky ahy tsy anisani-zao tontolo zao.
17 Mba hamasino* amy alalan’ny fahamarina rozy, fa ty safànao ro fahamarina.
18 Nirahinao ho amy zao tontolo zao aho, le manahaky ani-zay koa fa nirahiko ho amy zao tontolo zao rozy.
19 Le ho an-drozy ro anamasinako ty vatako, amy zay koa rozy hohamasiny amy alalan’ny fahamarina.
20 “Fe tsy mangataky ho an-drozy avao aho, fa ho ani-ze mino ahy koa vokatsin’ny raha nampianarin-drozy,
21 mba ho raiky avao manahaky antsika rozy iaby Baba, iha miaraky amiko le zaho miaraky aminao, le hiaraky amintsika koa rozy, amy zay hino zao tontolo zao hoe iha ro naniraky ahy.
22 Nameako an-drozy voninahitsy nameanao ahy iny, mba ho raiky manahaky antsika koa rozy.
23 Zaho miaraky amin-drozy le iha miaraky amiko, mba ho tena raiky rozy, ka ho haini-zao tontolo zao fa iha ro naniraky ahy sady fa tea an-drozy manahaky ty nitiavanao ahy.
24 Baba, teako laha miaraky amiko amy ze misy ahy any olo nameanao ahy reo, mba ho hitan-drozy voninahitsiko nameanao ahy iny, satria iha fa nitea ahy talohan’ny nanorena ani-zao tontolo zao.
25 Baba, manao ty rariny* iha. Tena tsy mahay anao zao tontolo zao, fa zaho fa mahay anao, le azy nameanao ahy reo koa fa mahay hoe iha ro naniraky ahy.
26 Fa nambarako an-drozy ty anaranao sady mbo hambarako avao, amy zay hanahaky ty nitiavanao ahy ty hitiavan-drozy ty olo hafa, le mba hiaraky amin-drozy koa aho.”
Fanamariha ambany pejy
^ Abt: “lera.”
^ Abt: “nofotsy.”
^ Na: “mila mahay anao.”
^ Abt: “iha raiky avao, azy Ndranahary marina iny.”
^ Na: “miharo raiky.”
^ Na: “atokano.”
^ Na: “marina.”
