Nisoratin’i Jaona 18:1-40
-
Namadiky an’i Jesosy, Jodasy (1-9)
-
Nampiasa sabatsy Petera (10, 11)
-
Nandesy tamy Anasy any Jesosy (12-14)
-
Nandà an’i Jesosy voalohany Petera (15-18)
-
Jesosy tamy Anasy eo (19-24)
-
Nandà an’i Jesosy fanindroany noho fanintelony Petera (25-27)
-
Jesosy tamy Pilato eo (28-40)
-
“Tsy anisani-zao tontolo zao ty Fanjakàko” (36)
-
18 Lafa baka nivola an’ny raha rezay Jesosy, le nandeha niampita an’ny Sakasakan’i Kidrona,* niaraky tamy mpianatsiny rey. Le nilitsy tamy zariday raiky zay tao rozy amy mpianatsiny rey.
2 Nihain’i Jodasy azy namadiky azy iny koa pilasy io, satria mpandeha matetiky ao Jesosy noho mpianatsiny rey.
3 Le nanday maramila noho mpiamby maromaro baka amy sefon’ny mpisoro noho Fariseo rey any Jodasy, le niavy tao nanday jiro noho fitaova fandesy mialy.
4 Fa hain’i Jesosy amin’io ty raha iaby hahazo azy, ka namonjy an-drozy ie sady nanontany hoe: “Ia ilànareo io?”
5 Le hoy ty navalin-drozy azy: “Jesosy baka a Nazareta any iny.” Le hoy ty asany: “Zaho ro ie.” Teo koa Jodasy azy namadiky azy iny tamy zay, nitsanga niaraky tamin-drozy teo.
6 Fe lafa nivola Jesosy hoe: “Zaho ro ie”, le nihemotsy rozy bakeo niravoky an-tany eo.
7 Farany nanontany ndraiky ie hoe: “Ia hoasako ilànareo io?” Le hoy ty asan-drozy: “Jesosy baka a Nazareta any iny.”
8 Le hoy ty asan’i Jesosy: “Fa nivola aminareo aho hoe zaho ro ie! Ka laha zaho ro ilànareo, le engao olo retia handeha.”
9 Niseho raha zay mba ho tanteraky raha nivolaniny iny hoe: “Tsy nisy nengako ho trobo ze nameanao ahy ndre raiky aza.”
10 Nana sabatsy Simona Petera ka naboakiny raha iny. Le nasiany azy ty mpanompon’ny mpisorobe iny, le nitampaky ty sofiny ankavana. Malko ty anaran’ny mpanompo io.
11 Fe hoy Jesosy tamy Petera: “Ampiliro amy mpisy azy sabatsinao iny. Zaho va le tsy hino amy ty kopy namean’ny Baba ahy?”
12 Le nanambotsy an’i Jesosy maramila rey noho ty sefon’ny maramila noho mpiamby tamy Jiosy teo rey, le namehy azy.
13 Nandesin-drozy tamy Anasy any tse ie, satria Anasy rafozandahin’i Kaiafa. Kaiafa io ro mpisorobe tamy fotoa* zay.
14 Laha ty marina, Kaiafa azy nanoro hevitsy an’ny Jiosy rey iny hoe mahasoa an-drozy laha olo raiky ro maty ho ahi-ty vahoaky.
15 Nanaraky an’i Jesosy, Simona Petera noho mpianatsy raiky zay. Hain’ny mpisorobe iny mpianatsy io. Le nilitsy tan-dakoron’ny mpisorobe iny ao niaraky tamy Jesosy ie,
16 fa Petera nijano tamonto tam-bavahady eo.* Farany niboaky mpianatsy hain’ny mpisorobe iny, le niresaky tamy mpiamby vavahady iny ka nampilitsy an’i Petera.
17 Le hoy ajà ampela* mpiamby vavahady iny tamy Petera: “Tsy mpianatsin’ny lahilahy io koa va iha?” Le hoy ty asan’i Petera: “Aha, tsy mpianatsiny aho!”
18 Nandrehitsy afo mpanompo noho mpiamby rey tamy zay, le nitsanga nanodidy an’ny afo iny satria nanintsy ty andro. Namindro teo rozy, le nitsanga namindro teo koa Petera.
19 Le nanontany an’i Jesosy mikasiky an’ny mpianatsiny rey noho ty fampianarany ty sefon’ny mpisoro.
20 Le hoy ty asan’i Jesosy: “Nivola tamin’olo maro teo aho. Nampianatsy tamy synagoga noho tamy tempoly teo avao koa aho, zany hoe tamy pilasy nivorian’ny Jiosy iabiaby. Tsy nivonivony mihintsy aho lafa nivola.
21 Ka manino iha manontany ahy io? Anontaneo olo nijanjy safàko rey, fa rozy ro mahay ani-ze raha nivolaniko.”
22 Lafa baka nivola an’ny raha zay ie, le nitampifin’ny mpiamby raiky nitsanga teo zay, sady nivola mpiamby io hoe: “Ho zay va ty famaleanao ty sefon’ny mpisoro?”
23 Le hoy ty asan’i Jesosy: “Laha misy diso ty raha nivolaniko, le porofò hoe ino ty diso. Fa laha marina ty resako, manino aho vangoanao io?”
24 Nalefan’i Anasy ho amy mpisorobe any Jesosy bakeo, sady mbo nifehy avao tanany rey.
25 Mbo nitsanga namindro tamy afo teo Simona Petera tamy zay. Bakeo nisy nanontany ie hoe: “Tsy mpianatsiny koa moa iha io?” Le nandà ie hoe: “Aha, tsy mpianatsiny aho!”
26 Nivola ty raiky amy mpanompon’ny mpisorobe iny, azy longon’olo nitampahin’i Petera ty sofiny iny hoe: “Tsy iha va nihitako niaraky taminy tamy zariday ao iny?”
27 Fe nandà ndraiky Petera, le avy le nisy akoho naneno tamy fotoa zay.
28 Bakeo niala tamy Kaiafa tao rozy, le nandesin-drozy tan-tranon’ny governera any Jesosy. Vo maraindray be ty andro tamy zay. Fe tsy nilitsy tan-tranon’ny governera tao rozy mba tsy haloto, satria ta hankalaza Paska.*
29 Le niboaky tamin-drozy tamonto eo Pilato sady nivola hoe: “Ino ty raha raty asaranareo an’ny lahilahy io?”
30 Hoy ty navalin-drozy: “Laha tsy mpanao raha raty* ie, le tsy ho nandesinay aminao etoa.”
31 Bakeo hoy ty asan’i Pilato: “Andesonareo ie, le tsarao mifanaraky amy ty lalànanareo.” Le hoy ty asan’ny Jiosy rey: “Tsy azonay atao ty mamono olo.”
32 Niseho raha zay mba ho tanteraky ty safà nivolanin’i Jesosy mikasiky ty fomba hahafatesany.
33 Nilitsy tan-tranon’ny governera ao ndraiky Pilato, le nikaihiny Jesosy ka nanontaneany hoe: “Iha va ro Mpanjakan’ny Jiosy?”
34 Le hoy ty navalin’i Jesosy: “Iha mihintsy va ro ta hahay an’ny raha zay, sa naharè resakin’olo mikasiky ahy avao iha?”
35 Le hoy ty navalin’i Pilato: “Zaho anè tsy Jiosy! Ty firenenanao noho ty sefon’ny mpisoro avao ro nanday anao amiko etoa. Nanao ino iha io?”
36 Le hoy ty asan’i Jesosy: “Tsy anisani-zao tontolo zao ty Fanjakàko. Laha anisani-zao tontolo zao ty Fanjakàko, le ho nialy ty mpanori-dia ahy mba tsy ho namea an-tanan’ny Jiosy aho. Fe tsy baka amy zao tontolo zao ty Fanjakàko.”
37 Le hoy ty asan’i Pilato: “Mpanjaka zany iha io?” Le hoy ty navalin’i Jesosy: “Ka fa ie volaninao zay hoe mpanjaka aho. Toy ty antony nahaterahako, le toy ty antony niaviako amy zao tontolo zao eto, le ty hanambara ty marina.* Sady mijanjy ty feoko ze olo miay mifanaraky amy ty marina.”
38 Hoy ty asan’i Pilato: “Ino zany ty marina?”
Le niboaky tamy Jiosy rey teo ndraiky Pilato lafa baka nivola an’ny raha zay, ka hoy ty asany: “Tsy hitako ty hadisoan’ny lahilahy io.
39 Sady laha ty fataonareo le tokony hampibototsy olo raiky ho ahinareo aho lafa Paska. Ka teanareo va laha Mpanjakan’ny Jiosy iny ro habototsiko ho anareo?”
40 Fe nikorakoraky ndraiky rozy hoe: “Tsy lahilahy io, fa Barabasy!” Malaso amin’io Barabasy io.
Fanamariha ambany pejy
^ Maiky sakasaka io ndre asotry aza, laha tsy hoe lafa mizinja ty ora.
^ Abt: “tao.”
^ Na: “tamy filira eo.”
^ Mpanompovavy ajà ampela io.
^ Abt: “ta hihina Paska.”
^ Na: “mpanao raha farani-ze raty.”
^ Na: “ty fahamarina.”
