Nisoratin’i Jaona 2:1-25
2 Tamy andro fahatelo, nisy mariazy ta Kana, a Galilia any. Tamy fety io tao ty renin’i Jesosy.
2 Nasà tamy fety* io koa Jesosy noho mpianatsiny rey.
3 Lafa nilany ty divay tao, le hoy renin’i Jesosy iny taminy: “Tsy mana divay sasy rozy.”
4 Fe hoy ty asan’i Jesosy: “Aleo tsika tsy militsy amy zao njarahy.* Mbo tsy avy ty fotoa tokony hanaovako raha.”
5 Le nivola tamin’olo nizara divay rey reniny hoe: “Anovo iaby ze raha volaniny aminareo.”
6 Nisy sinibe vato fanajaria rano miisaky eny rezay ty teo, satria nitaky ani-zay ty lalànan’ny Jiosy, mba ho afaky hanasa tana ty olo alohan’ny hihina. Tendriky siny* roe na telo ty sinibe kiraidraiky.
7 Nivola tamin-drozy Jesosy hoe: “Fenò rano sinibe reo.” Le nifenoan-drozy zisiky am-bavany eny raha rey.
8 Bakeo nivola Jesosy hoe: “Mangalà amy zay, le anandeso mpiandraikitsy fanasà iny.” Le nandesin-drozy tany raha iny.
9 Bakeo nandramanan’ny mpiandraikitsy fety iny rano niova ho divay iny, fe tsy hainy hoe baka aia raha io—fa mpanompo nangalaky rano rey ro nahay an’ny raha iny.—Farany nikaihin’ny mpiandraikitsy fety iny lahilahy atao mariazy iny,
10 le nivolaniny hoe: “Ty ahin’olo divay soa rey tse ro aboaky, le lafa mamo ty olo vo aboaky azy ratiraty rey. Fa ty ahinao, divay soa rey koa ro nihajarìnao zisiky henanizao.”
11 Ta Kana, a Galilia any Jesosy ro nanao an’ny fahagagà* voalohany nataony io. Le nasehony ty voninahitsiny, ka nino azy ty mpianatsiny.
12 Tafarani-zay, nandeha nijotso ta Kapernaomy any rozy amy reniny noho ty rahalahiny noho ty mpianatsiny, fe tsy nijano ela tany.
13 Fa narìny ty Paskan’ny Jiosy tamy zay, ka niakatsy ta Jerosalema any Jesosy.
14 Lafa nilitsy tamy tempoly tao ie, le nahita olo namarotsy aomby noho aondry noho pizon, sady nahita mpanakalo drala samby nipetraky an-tsezy.*
15 Farany ie namboatsy filatsy tamy taly, le niroasiny baka amy tempoly ao iaby rozy niaraky tamy aondry noho aomby rey. Najiajiany koa drala vin’ny mpanakalo drala rey sady naongany latabon-drozy rey.
16 Le hoy ty asany tamin’olo namarotsy pizon rey: “Andeso miboaky any reo! Ka atao trano famarota* sasy ty tranon’ny babako!”
17 Le nitiaron’ny mpianatsiny rey raha nivolanin’ny Soratsy Masy iny hoe: “Hirehitsy an’aiko ato ty hafanam-poko ho ahi-ty tranonao.”
18 Farany nivola Jiosy rey hoe: “Ino ty famantara hatoronao anay mba hampisehoanao hoe mana fahefà hanao an’ny raha rey iha?”
19 Le nivola Jesosy hoe: “Aropaho tempoly toy, fa hatsangako anatin’ny telo andro.”
20 Le nivola Jiosy rey hoe: “Fa 46 tao anè tempoly toy vo nivita! Le iha va ro hahavita hampitsanga azy anatin’ny telo andro?”
21 Fe lafa ie niresaky tempoly iny, le ty vatany ro teany hovolany.
22 Ka lafa nivelomy ie, le nitiaron’ny mpianatsiny rey fa fa nivola ani-zay matetiky ie. Farany lasa nino ty raha volanin’ny Soratsy Masy noho ty raha fa nivolanin’i Jesosy rozy.
23 Fe lafa ie ta Jerosalema any, tamy fetin’ny Paska, le nimaro ty olo lasa nino ty anarany lafa nahita famantara nataony rey.
24 Fe tsy natoky an-drozy Jesosy satria nihainy iaby rozy,
25 sady ie koa tsy nila ndre ia ndre ia hivola aminy ty tan’eritseritsin’olo any, satria fa nihainy ty tam-pon’olo any.
Fanamariha ambany pejy
^ Na: “mariazy.”
^ Abt: “Ino ty ho ahy noho ho ahinao amy zao njarahy?” Fomba ivolana hoe tsy naneky ie. Tsy hoe tsy nanaja ie lafa nivola hoe “njarahy.”
^ Azo inoa hoe bata siny io. 1 bata = 22 litra.
^ Abt: “famantara.”
^ Abt: “nipetraky tamy ty sezin-drozy.”
^ Na: “bazary; filan-drala.”
