Nisoratin’i Jaona 20:1-31
20 Tamy andro voalohany amy herinandro* iny, le niavy an-dolo any maraindray be mbo maikiky Maria Magdalena. Le nihitany fa fa nisy nangalaky vato tan-dolo eo iny.
2 Nandeha amy zay ie nilailay nana amy Simona Petera any noho nana amy mpianatsy raiky tean’i Jesosy iny any, le nivola hoe: “Nisy nangalaky tan-dolo ao Tompo ie, le tsy hainay ty nasian-drozy azy.”
3 Bakeo nandeha an-dolo any Petera noho mpianatsy iny.
4 Nilailay rozy roe lahy, fe nahalay mandilatsy an’i Petera mpianatsy iny, ka ie ro niavy aloha tan-dolo any.
5 Niondriky ie mba hahitany ty tao, le nahita lamba rongony nipetraky teo ie, fe tsy nilitsy.
6 Bakeo niavy bakany koa Simona Petera nanaraky azy, le nilitsy tan-dolo ao. Nahita an’ny lamba rongony nipetraky teo iny koa ie.
7 Tsy tanilan’ny lamba nameheza an’ny faty iny teo lamba natao tamy lohan’i Jesosy iny, fa nihoro le nitoka hafa.
8 Bakeo nilitsy koa mpianatsy raiky niavy voalohany tan-dolo eo iny, le nahita ka nino ty raha nivolany taminy.
9 Fe mbo tsy niazon-drozy raha nivolanin’ny Soratsy Masy iny hoe tsy maintsy ho velo ie.
10 Farany samby nandeha noly mpianatsy rey.
11 Fe mbo nitany Maria sady nitsanga ivelan’ny lolo iny teo. Sady nitany ie, ro niondriky mba hahitany ty tan-dolo ao.
12 Le nahita anjely roe nanao siky foty ie nipetraky tamy pilasy nametraha an’ny fatin’i Jesosy iny teo: Ty raiky tamy nisy an’ny lohany iny teo, le ty raiky tamy nisy an’ny tombony iny teo.
13 Le hoy anjely rey tamy Maria: “Njarahy, manino iha tomany io?” Le hoy ty navaliny an-drozy: “Tsy zay fa nisy nangalaky Tompoko iny, le tsy haiko ty nasian-drozy azy.”
14 Nitoliky ie bakeo lafa baka nivola ani-zay, le nahita an’i Jesosy nitsanga teo, fe tsy hainy hoe Jesosy eo io.
15 Le hoy Jesosy: “Njarahy, manino iha tomany io? Ia kay ilànao io?” Nataon’i Maria fa mpanao zariday ie, ka hoy ty asany taminy: “Laha iha lahy ro nangalaky azy, le mba volano amiko ze nasianao azy mba hangalako azy.”
16 Le hoy ty asan’i Jesosy: “Maria!” Le nitoliky Maria ka nivola tamy safà hebreo hoe: “Rabôny!”, midika hoe “Mpampianatsy!”
17 Le hoy Jesosy taminy: “Ka tanjahy sasy aho, fa mbo tsy niakatsy tamy Baba any. Fe mandehana amy rahalahiko rey any le volano rozy hoe: ‘Handeha ho amy Babako noho Babanareo any aho, sady handeha ho amy Ndranahariko noho Ndranaharinareo iny any.’”
18 Le nanday an’ny vaovao zay tamy mpianatsy rey any Maria Magdalena, ka hoy ty asany: “Nahita an’ny Tompo aho!” Nitantaraniny tamin-drozy koa ty raha nivolanin’i Jesosy taminy.
19 Lafa nihariva ty andro, tamy andro voalohany tamy herinandro io, le niavy Jesosy ka nitsanga tanivon’ny mpianatsy rey teo. Nihily tan-trano ao rozy tamy zay satria natahotsy an’ny Jiosy rey. Le hoy Jesosy tamin-drozy: “Ho aminareo lahy ty fiadana!”
20 Lafa baka nivola ani-zay ie, le natorony an-drozy ty tanany noho ty tamy sisin’ny kibony* eo. Le nifalifaly mpianatsy rey nahita an’ny Tompo.
21 Le hoy ndraiky Jesosy tamin-drozy: “Ho aminareo lahy ty fiadana! Naniraky ahy Baba, le zaho koa maniraky anareo.”
22 Lafa baka nivola ani-zay ie, le nitsoky rivotsy nana amin-drozy any sady nivola hoe: “Rambeso ty fanahy masy.
23 Ze fahotan’olo engànareo le hengà, fa ze tsy engànareo le tsy hengà ty fahotany.”
24 Fe tsy niaraky tamy mpianatsy rey Tomasy tamy Jesosy niavy tamin-drozy teo iny. Anisan’ny Apostoly 12 rey Tomasy io, le kaihy koa hoe Ikambana.
25 Farany nivola taminy mpianatsy sisany rey hoe: “Nahita an’ny Tompo zahay!” Fe hoy ty asany: “Tsy hino ani-zao mihintsy aho, laha tsy hitako loakin’ny fantsiky* tamy tanany eo rey, le ataoko amy loakin’ny fantsiky iny eo ty rantsantanako sady ataoko amy sisin’ny kibony iny* eo ty tanako.”
26 Tan-trano ao ndraiky mpianatsiny rey valo andro tafarani-zay, le tao koa Tomasy. Le niavy tamin-drozy ao Jesosy, ndre nihily aza varavara rey, le nitsanga tanivon-drozy teo sady nivola hoe: “Ho aminareo lahy ty fiadana!”
27 Bakeo nivola tamy Tomasy ie hoe: “Anovo etoa rantsantananao io, le henteo ty tanako, anovo amy sisin’ny kiboko etoa koa ty tananao. Le ka misalasala* sasy fa minoa amy zay.”
28 Le hoy ty asan’i Tomasy: “Tompoko noho Ndranahariko!”
29 Le hoy Jesosy taminy: “Iha nahita ahy io va mahavy anao mino io? Sambatsy ze tsy nahita fe mino.”
30 Mbo nanao famantara* maro tamy mpianatsy rey teo koa Jesosy, fe tsy voasoratsy amy horonam-boky toy ato raha rey.
31 Fe nisoraty raha reo mba hinoanareo fa Jesosy ro Kristy Anaki-Ndranahary. Ka lafa mino nareo, le hahazo fiaina amy anarany.
Fanamariha ambany pejy
^ Zany hoe Lahady. Tamy Jiosy, le io ty andro voalohany amy herinandro.
^ Na: “takibany.”
^ Na: “marikin’ny fantsiky.”
^ Na: “takibany.”
^ Abt: “tsy mino.”
^ Na: “fahagagà.”
