Nisoratin’i Jaona 21:1-25
21 Tafarani-zay, niseho tamy mpianatsiny rey ndraiky Jesosy tamy Riakin’i Tiberiasy eo. Ho zao ty nisehoany:
2 Teo iaby ry Simona Petera noho Tomasy—azy kaihy hoe Ikambana iny—noho Natanaela baka a Kana, a Galilia any iny, noho anakilahin’i Zebedio rey, noho ty mpianatsy roe hafa.
3 Hoy ty asan’i Simona Petera: “Handeha hihaza aho.” Le nivola ty sisany hoe: “Zahay koa hiaraky aminao.” Le nandeha rozy niondra laka, fe tsy nisy raha niazon-drozy tamy haly iny.
4 Fe laha vo nivaky andro iny, le nitsanga tamoron-driaky eo Jesosy, kanefa tsy nihain’ny mpianatsiny rey hoe Jesosy io.
5 Le hoy ty asan’i Jesosy: “Misy raha* azo hany va lahy ty aminareo any anako?” Le hoy ty navalin-drozy: “Tsy misy!”
6 Le hoy ty asany tamin-drozy: “Atoraho ankavanan’ny laka eo haratonareo io fa hahazo nareo.” Natoran-drozy amy zay harato iny, le tsy nileon-drozy satria nimaro marè ty fia tao.
7 Bakeo nivola tamy Petera, mpianatsy tean’i Jesosy iny hoe: “Tompo io!” Laha vo niren’i Simona Petera fa Tompo io, le nanisiany* ty sikiny,* satria tsy nisiky* ie. Le nijobo tan-driaky ao ie.
8 Fa ty mpianatsy hafa nandeha tamy laka iny, sady nitariky an’ny harato feno fia iny, satria tsy lavitsy an’ny tety iny rozy, fa 90 metra* teo ho eo avao.
9 Lafa niavy tan-tety eny rozy le nahita mofo. Nisy afo koa ty teo, le nisy fia ty tanabony eo.
10 Hoy ty asan’i Jesosy tamin-drozy: “Anandeso amy fia vo niazonareo rey aho.”
11 Nandeha tamy laka iny eny amy zay Simona Petera, ka nitaritariky an’ny harato feno fia iny nana an-tety eny. Nisy fia bevata 153 ty tao. Tsy nitataky harato iny ndre nimaro biby aza ty fia tao.
12 Hoy ty asan’i Jesosy tamin-drozy: “Avia hihina maray.” Fe tsy nisy nahasaky nanontany rozy hoe: “Ia iha io?”, satria hain-drozy hoe Tompo io.
13 Le nangalaky mofo Jesosy bakeo nameany an-drozy, le nataony ho zay koa fia iny.
14 Tamy fotoa io Jesosy ro niseho fanintelony tamy mpianatsiny rey, tafaran’ny nameloma azy.
15 Lafa baka nihina maray rozy, le hoy ty asan’i Jesosy tamy Simona Petera: “Simona anan’i Jaona, tea ahy mandilatsy ty itiavanao ani-retia va iha?” Le hoy ty navaliny azy: “Eka, hainao fa tena tea anao aho Tompo!” Le hoy Jesosy: “Fahano moa ty anak’aondriko.”
16 Nivola fanindroany ndraiky ie hoe: “Simona anan’i Jaona, tea ahy va iha?” Le hoy ty navaliny: “Eka, hainao fa tena tea anao aho Tompo!” Le hoy Jesosy: “Arakandrovo moa ty anak’aondriko.”
17 Nivola fanintelony ie hoe: “Simona anan’i Jaona, tena tea ahy va iha?” Le nalahelo biby Petera tamy fanontaneany fanintelony iny hoe: “Tena tea ahy va iha?” Farany nivola ie hoe: “Tompo, mahay ty kila raha iaby iha, hainao fa tena tea anao aho.” Le hoy Jesosy: “Fahano moa ty anak’aondriko.
18 Ambarako anao mazava soa fa tamy iha mbo nitanora, le iha avao ro nampisiky ty vatanao, sady nandeha tamy ze teanao handehana. Fa lafa mihaantitsy iha, le hamparinao ty tananao, ka olo hafa ro hampisiky anao noho handay anao amy ze tsy teanao handehana any.”
19 Nivola an’ny raha zay ie mba hivolana ty fomba hahafatesan’i Petera, ka hanomezany voninahitsy a-Ndranahary amy raha zay. Lafa baka nivola ani-zay ie, le hoy ty asany tamy Petera: “Manaraha ahy avao.”
20 Bakeo nitoliky Petera, le hitany nanaraky baka afara ao mpianatsy tean’i Jesosy iny, azy nionda tan-tratrany eo tamy sakafo hariva iny sady nanontany iny hoe: “Ia va hamadiky anao zao io Tompo?”
21 Ka lafa nahita an’ny mpianatsy iny Petera, le hoy ty asany tamy Jesosy: “Tompo, ka manao akory raiky tia?”
22 Le hoy Jesosy taminy: “Mampanino anao kay laha mbo teako ho eo avao ie lafa avy aho? Fa iha manaraha ahy avao.”
23 Le nandeha ty resaky tamy mpanori-dia an’i Jesosy* rey teo hoe tsy ho maty zao hoe mpianatsy iny. Fe Jesosy tsy nivola hoe tsy ho maty ie, fa hoasany hoe: “Mampanino anao kay laha mbo teako ho eo avao ie lafa avy aho?”
24 Io mpianatsy mitsanga ho vavolombelon’ny raha iaby rey iny sady nanoratsy an’ny raha rey. Hainay koa fa marina ty resakiny.
25 Misy raha hafa maro koa nataon’i Jesosy, sady laha nisoraty tamy an-tsipiriany iaby raha rey, le ataoko fa ndre zao tontolo zao aza tsy ho tendriky ty horonam-boky voasoratsy.
Fanamariha ambany pejy
^ Na: “fia.”
^ Na: “le narohiny tam-baniany eo.”
^ Abt: “sikiny ivelany.”
^ Na: “zara fa nisiky.”
^ Abt: “200 hakiho.”
^ Abt: “tamy rahalahy.”
