Nisoratin’i Jaona 3:1-36
3 Nisy Fariseo mana anara Nikodemosy zay mpitariky tamy Jiosy teo.
2 Niavy haly tamy Jesosy any ie, le nivola taminy hoe: “Raby, hainay fa mpampianatsy nirahi-Ndranahary iha, satria tsy misy olo mahavita an’ny famantara nataonao rey laha tsy ampea-Ndranahary.”
3 Le hoy ty navalin’i Jesosy azy: “Ambarako anao mazava soa fa tsy misy olo afaky mahita ty Fanjakà-Ndranahary laha tsy ateraky ndraiky.”*
4 Le hoy Nikodemosy: “Akory ty hahavy olo raiky hateraky ndraiky lafa antitsy ie? Ie fa tsy afaky hilitsy an-tron-dreniny* any ndraiky mba hateraky.”
5 Le hoy Jesosy: “Ambarako anao mazava soa fa tsy misy olo afaky militsy amy Fanjakà-Ndranahary ao, laha tsy aterakin’ny rano noho fanahy.
6 Ze naterakin’ny nofotsy le nofotsy, fa ze naterakin’ny fanahy le fanahy.
7 Ka tseriky iha laha nivola taminao aho hoe: Tsy maintsy hateraky ndraiky nareo.
8 Mitsioky mana amy ze teany any ty tsioky, sady renao ty feony. Fe tsy hainao hoe baka aia ie, na ho aia. Le manahaky ani-zay koa ze olo iaby naterakin’ny fanahy.”
9 Le hoy Nikodemosy: “Akory ty hampety ani-zay?”
10 Le hoy Jesosy: “Iha mba mpampianatsy amy Israely eo va le tsy mahay ani-zay?
11 Ambarako anao mazava soa fa ze raha hainay ro volaninay, le ze raha hitanay ro ambaranay, fa nareo ro tsy nandramby an’ny raha zay.
12 Laha ty raha an-tany etoy aza nivolaniko taminareo kanefa mbo tsy inoanareo avao, le hino va nareo laha ty raha an-danitsy any ro volaniko aminareo?
13 Ankoatsini-zay, tsy nisy niakatsy tan-danitsy any laha tsy azy nijotso bakany iny, zany hoe ty Anak’olo.
14 Manahaky nampiakaran’i Mosesy an’ny bibilava tamy dezera* any iny, le tsy maintsy hampiakary koa ty Anak’olo,
15 mba hahazo fiaina mandrakizay ze olo iaby mino azy.
16 “Satria tena tea ani-zao tontolo zao Ndranahary, le nanome an’ny Anakilahiny toka iny, mba tsy ho ripaky ze mampiseho finoa azy, fa hahazo fiaina mandrakizay.
17 Tsy hitsara* ani-zao tontolo zao ro naniraha-Ndranahary an’ny Anany iny ho amy zao tontolo zao, fa mba hanavotsy ani-zao tontolo zao amy alalany.
18 Tsy hosazỳ* ze mampiseho finoa an’ny Anaky iny. Fa ze tsy mampiseho finoa azy, le fa nitsarà sahady, satria tsy nampiseho finoa ty anaran’ny Anakilahy toka-Ndranahary iny.
19 Niavy tamy zao tontolo zao eo ty mazava, fe naleon’olo ty maìky tany ty mazava satria raty ty raha ataon-drozy. Zay ty antony hitsarà* ani-zao tontolo zao.
20 Satria ze zatsy manao raha raty le malay mazava sady tsy mamonjy mazava, tsy no ho hain’olo* ty raha ataony.
21 Fa ze manao ty marina le mamonjy mazava, mba haseho ty raha ataony ka ho hita hoe mifanaraky amy sitrapo-Ndranahary.”
22 Tafarani-zay, nandeha ambanivohitsin’i Jodia any Jesosy noho mpianatsiny rey. Nijano elaela tany niaraky tamy mpianatsiny rey ie sady nanao batisa.
23 Fe Jaona koa nanao batisa ta Ainona anilan’i Saleima any, satria mba nisy rano lalidaliky ty tany. Le nimaro ty olo niavy tamy Jaona eo ka natao batisa,
24 satria mbo tsy nigadrà ie tamy zay.
25 Le nialy hevitsy tamy Jiosy raiky zay mpianatsin’i Jaona rey, mikasiky hoe akory ty hatao laha tean-drozy halio ty fahità-Ndranahary an-drozy.
26 Farany niavy tamy Jaona eo rozy le nivola hoe: “Raby, hitanao va lahilahy nivolaninao taminay iny, azy niaraky taminao tampitan’ny Vavaranon’i Jordana teny iny? Manao batisa ie, le mandeha aminy any iaby ty olo.”
27 Le hoy Jaona: “Tsy afaky mahazo na ino na ino ty olo raiky, laha tsy namea azy baka an-danitsy any raha zay.
28 Nareo mihintsy ro vavolombelo fa fa nivola aho hoe: ‘Tsy Kristy aho, fa nirahy handeha alohany avao.’
29 Ze mana olo hakary ro mpampakatsy. Fe falifaly biby ty naman’ny mpampakatsy iny lafa mitsanga anilany eo, ka maharè azy mivola. Ka falifaly biby koa aho henanizao.*
30 Tsy maintsy mitombo ty asa ataony, fa ty ahy tsy maintsy mihena.”
31 Anabon’olo iaby azy baka anabo any iny. Fa azy baka an-tany etoy iny miresaky raha an-tany etoy, satria ie baka an-tany etoy. Anabon’olo iaby azy baka an-danitsy any iny.
32 Ze raha hitany noho reny ro ambarany, kanefa tsy misy maneky an’ny raha rey.
33 Ze naneky an’ny raha nambarany rey, le nanamafy* hoe marina Ndranahary.
34 Mivola ty Safà-Ndranahary azy nirahi-Ndranahary iny, satria tsy matity* Ndranahary lafa manome ty fanahiny.
35 Tean’ny Baba iny ty Anaky, ka nameany tan-tanany eo ty raha iaby.
36 Ze mampiseho finoa an’ny Anaky iny le hahazo fiaina mandrakizay. Fa ze tsy manoriky ty safàn’ny Anaky iny tsy hahazo fiaina, fa ho meloky aminy avao Ndranahary.
Fanamariha ambany pejy
^ Na mety hoe “ateraky baka anabo any.”
^ Na: “an-kibon-dreniny.”
^ Na: “tan-diomonto.”
^ Na: “hanasazy.”
^ Abt: “Tsy hotsarà.”
^ Na: “hanasazia.”
^ Na: “hiseho.”
^ Abt: “Ka fa feno ty hafaleako henanizao.”
^ Abt: “nanisy tampôn.”
^ Na: “tsy manisy fetrany.”
