Nisoratin’i Jaona 4:1-54
4 Niren’ny Fariseo rey hoe maro mandilatsy ty mpianatsy niazon’i Jaona ty niazon’i Jesosy noho nataony batisa. Lafa nihain’i Jesosy* raha zay,—
2 ndre tsy Jesosy aza ro nanao batisa fa mpianatsiny rey,—
3 le niala ta Jodia any ie, ka nana a Galilia any.
4 Fe tsy maintsy nandalo mba Samaria ao ie.
5 Bakeo ie niavy tamy tanà kaihy hoe Sykara, a Samaria ao zay. Tanà io tanilan’ny tany namean’i Jakoba an’i Josefa anakilahiny iny.
6 Laha ty marina, tao ty nisy ty vovon’i* Jakoba. Nigona Jesosy tratsin’ny lian-drozy iny, ka nipetraky tamy vovo* iny eo. Tamy lera fahaeny* teo ho eo tamy zay.
7 Nisy ampela samaritanina raiky niavy teo hantsaka. Le hoy Jesosy taminy: “Mba ameo rano aho hinomiko.”
8 —Nandeha nivily hany tan-tanà any mpianatsiny rey tamy zay.—
9 Le hoy ampela samaritanina iny taminy: “Iha Jiosy io va le mangataky rano amiko, kanefa zaho ampela samaritanina?”—Satria tsy mifandramby amy Samaritanina ty Jiosy.—
10 Le hoy Jesosy taminy: “Laha mba nihainao kadò baka amy Ndranahary iny noho azy mivola aminao toy hoe: ‘Mba ameo rano aho hinomiko’, le iha mihintsy ro ho nangataky taminy, ka ho nameany rano velo.”
11 Le hoy ampela iny taminy: “Iha aza nahoda tsy mana fanoby,* kanefa vovo* tia laliky, ka baka aia anananao rano velo zao?
12 Iha va mbo be mandilatsy an’i Jakoba razambenay? Ie ro nanome anay an’ny vovo* toy, sady nino teto rozy moroanaky noho ty biby nihareny.”
13 Le hoy ty navalin’i Jesosy azy: “Mbo haran-drano avao ze mino amy rano toy,
14 fa ze mino amy rano hameako azy zay tsy haran-drano sasy, satria hanjary loharano* anatiny ao rano hameako azy iny, ka hanome azy fiaina mandrakizay.”
15 Le hoy ampela iny taminy: “Mba ameo amy rano zay aho nahoda, soa tsy haran-drano sasy sady tsy himpolimpoly hantsaka eto sasy.”
16 Le hoy ty asany tamy ampela iny: “Ndany kaiho bakao valinao.”
17 Le hoy ty navalin’ny ampela iny: “Tsy manambaly aho.” Le hoy Jesosy: “Marina resakinao zay hoe tsy manambaly iha,
18 satria fa nanambaly indimy iha, le tsy valinao koa lahilahy miaraky mipetraky aminao henanizao io. Ka marina resakinao zay.”
19 Le hoy ampela iny: “Mpaminany vatany iha nahoda.
20 Nivavaky tamy vohitsy toy eto ty razambenay, kanefa nareo mivola hoe a Jerosalema any ro tokony hivavahan’olo.”
21 Le hoy Jesosy taminy: “Ambarako anao mazava fa ho avy ty fotoa, ka tsy ho amy vohitsy toy eto na ho a Jerosalema any ty hivavahanareo amy Baba.
22 Tsy hainareo hoe ia ty ivavahanareo, fa zahay mahay hoe ia ty ivavahanay satria baka amy Jiosy ty fanavota.*
23 Fe ndre zay, ho avy ty fotoa, le fa manomboky ie henanizao, ka ty tena mpivavaky hivavaky amy Baba mifanaraky amy fanahy noho fahamarina, satria olo manahaky ani-zay mihintsy ty ilàn’ny Baba hivavaky aminy.
24 Fanahy Ndranahary, ka ze mivavaky aminy tsy maintsy mivavaky mifanaraky amy fanahy noho fahamarina.”
25 Le hoy ampela iny: “Haiko fa ho avy ty Mesia, azy kaihy hoe Kristy iny. Ka lafa ho avy ie, le hohazavaniny soa amintsika ty raha iaby.”
26 Le hoy Jesosy: “Zaho anè olo volaninao zao.”
27 Niavy amy zay mpianatsiny rey. Nitseriky rozy satria niresaky tamin’ampela ie. Fe tsy nisy nivola rozy hoe: “Misy raha ilànao va?”, na hoe: “Manino iha miresaky aminy io?”
28 Farany nengan’ny ampela iny teo sininy* iny, le nandeha an-tanà any iny ka nivola tamin’olo tany hoe:
29 “Mba avia moa nareo! Misy lahilahy zay aroy hatoroko anareo. Nivolaniny tamiko iaby ze raha nataoko. Mety ie vasa Kristy zao!”
30 Le niala tan-tanà ao rozy ka nandeha amy Jesosy any.
31 Tamy fotoa zay, nampirisiky azy mpianatsiny rey hoe: “Mihinàna iha Raby!”
32 Fe hoy ty asany tamin-drozy: “Mana hany hohany aho, fe tsy hainareo hoe ino.”
33 Farany nifanontany mpianatsiny rey hoe: “Nisy nanday raha hohaniny va tsika?”
34 Le hoy Jesosy tamin-drozy: “Ty haniko le ty manao ty sitraponi-Azy naniraky ahy iny noho mahavita ty asany.
35 Nareo moa mivola hoe mbo misy efa-bola vo ho avy ty fotoa famoria vokatsy, sa tsy zay? Fe zaho mivola aminareo hoe: Mba henteo tse ty an-tanimbary eny, fa fa masaky vokatsy reo ka fa tokony havory. Henanizao,
36 fa mahazo karama sahady ty mpanapa-bary sady fa mamory vokatsy ho amy fiaina mandrakizay, soa hiaraky falifaly mpamboly noho mpanapa-bary rey.
37 Marina zany fivolana ho zao iny hoe: Ty raiky mpamboly, fa ty raiky mpamory vokatsy.
38 Naniraky anareo aho, mba hamory raha tsy nambolenareo. Olo hafa ro niasa mafy, fe nareo koa mba nahazo tamy vokatsin’ny asan-drozy iny.”
39 Maro ty Samaritanina baka amy tanà io ao lasa nino an’i Jesosy, satria nitsanga ho vavolombelo ampela iny ka nivola hoe: “Nivolaniny tamiko iaby ze raha nataoko.”
40 Lafa niavy taminy ao amy zay Samaritanina rey, le nangataky azy mba hijano amin-drozy eo. Le nijano tao roe andro ie.
41 Vokatsini-zay, le nisy olo hafa maro koa nino satria naharè ty raha nivolanin’i Jesosy.
42 Le hoy ty asan-drozy tamy ampela iny: “Tsy safànao rey avao henanizay ro mahavy anay hino, satria zahay mihintsy ro naharè, ka hainay fa lahilahy io vatany ro mpanavotsy ani-zao tontolo zao.”
43 Lafa nitampitsy roe andro rey, le niala tao Jesosy ka nandeha a Galilia any.
44 (Fe ie mihintsy ro nivola hoe tsy hajàn’olo ty mpaminany laha amy taniny ao.)
45 Lafa niavy ta Galilia any amy zay ie, le nandramby azy ty Galilianina, satria fa nihitan-drozy iaby ty raha nataony ta Jerosalema any tamy andro fety. Tsy zay fa fa tamy fety iny tany koa rozy.
46 Bakeo ie niavy ta Kana, a Galilia any ndraiky, tamy tanà nanovàny rano ho divay iny. Le nisy manam-pahefà ta Kapernaomy any zay nana anakilahy narary.
47 Lafa niren’ny lahilahy io hoe niala ta Jodia any Jesosy ka niavy ta Galilia any, le nandeha taminy any ie, ka nangataky azy hijotso a Kapernaomy any, mba hanafaky ty aretin’ny anany iny satria fa atahora ho maty anany io.
48 Fe hoy Jesosy taminy: “Tsy hino mihintsy nareo laha tsy mahita famantara noho fahagagà.”
49 Le hoy manam-pahefà iny taminy: “Mba andao moa Tompo, tany mbo tsy maty anako zay.”
50 Le hoy Jesosy: “Ndany fa velo ananao iny.” Nino an’ny safàn’i Jesosy iny lahilahy iny, le nandeha.
51 Tamy ie mbo an-dala holy iny, le nitsena azy mpanompony rey ka nivola taminy hoe velo* anany iny.
52 Farany nanontaneany rozy hoe tamy firy ie tsy nanahy io. Le nivola rozy hoe: “Nomaly tamy lera fahafito* ty nahafaky an’ny aretiny* iny.”
53 Le nihain’ny lahilahy iny hoe tamy lera zay mihintsy Jesosy ro nivola taminy hoe: “Velo ananao iny.” Le lasa nino an’i Jesosy rozy trano raiky.
54 Zay ty famantara faharoe nataon’i Jesosy, lafa ie niala ta Jodia any ka niavy ta Galilia any.
Fanamariha ambany pejy
^ Abt: “Tompo.”
^ Na: “kirijin’i.”
^ Na: “kirijy.”
^ Zany hoe midỳ teo ho eo.
^ Na: “fioly; fanovo.” Raha fangalà rano amy vovo.
^ Na: “kirijy.”
^ Na: “kirijy.”
^ Abt: “rano teraky.”
^ Na: “satria ty fanavota manomboky baka amy Jiosy eo.”
^ Na: “sajoany.” Raha fantsakà na fanajaria rano.
^ Na: “fa tsy nanahy.”
^ Zany hoe tamy 1 folakandro teo ho eo.
^ Abt: “hasilofany; fafana sandriny.”
