Nisoratin’i Jaona 6:1-71
6 Tafarani-zay Jesosy nandeha tampitan’ny Riakin’i Galilia na Riakin’i Tiberiasy any.
2 Le nisy vahoaky maro nanaraky azy mbaombao, satria nihitan-drozy ty famantara mahatseriky nataony, tamy ie nanafaky aretin’olo rey.
3 Farany Jesosy niakatsy tamy vohitsy raiky zay, le nipetraky teny niaraky tamy mpianatsiny rey.
4 Fa narìny tamy zay ty Paska, zany hoe ty fetin’ny Jiosy.
5 Lafa nanenty Jesosy, le nihitany hoe nisy vahoaky maro namonjy azy, ka hoy ty asany tamy Filipo: “Aia ty hivilianantsika mofo hohanin’olo reto?”
6 Fa hainy amin’io ty raha fa hataony, fe mba teany ho hay ty eritseritsin’i Filipo.
7 Le nivola Filipo hoe: “Ndre mofo valeran’ny 200 denaria aza mbo tsy ho ampy, ndre samby hamea kelikely avao rozy!”
8 Le nivola ty raiky amy mpianatsiny rey, zany hoe Andrea rahalahin’i Simona Petera hoe:
9 “Tia misy ajà lahilahy mana mofo* limy noho fia maliniky roe. Fe aia koa ty hahampy ani-zay amin’olo maro retia?”
10 Le hoy Jesosy: “Ampipetraho olo reo.” Nimaro akata mitiry mbeny, le nipetraky teny rozy. Nisy 5 000 teo ho eo ty lahilahy tamin’olo rey.
11 Nalàn’i Jesosy amy zay mofo rey, le nanao vavaky fisaora ie, bakeo nizaràny tamin’olo nipetraky teo rey raha rey. Ho zay koa ty nataony tamy fia maliniky rey, ka samby nihina ze nilanin-drozy rozy.
12 Fe lafa nivintsy rozy, le hoy ty asany tamy mpianatsiny rey: “Avorio ze sisa tsy lany, amy zay tsy hisy raha hisera.”
13 Le navorin-drozy raha rey, ka nahafeno paniè 12 ty sisa tsy nilany tamy mofo limy rey.
14 Lafa nahita ty famantara nataon’i Jesosy olo rey, le nivola hoe: “Io mihintsy Mpaminany ho avy amy zao tontolo zao iny.”
15 Le nihain’i Jesosy hoe fa ho avy hiforosè azy ho mpanjaka rozy. Farany niala teo ie, le nandeha nitoka tam-bohitsy any ndraiky.
16 Lafa nihariva ty andro, le nandeha nijotso tan-driaky eny mpianatsiny rey,
17 bakeo niondra laka, le niampita an’ny riaky iny. Ho a Kapernaomy any rozy amin’io. Fa naìky ty andro tamy zay, kanefa mbo tsy niavy tamin-drozy any avao Jesosy.
18 Nanomboky nitavoaly koa riaky iny, satria narè biby ty tsioky.
19 Fe lafa nivè limy na eny kilometra* eo ho eo rozy, le nihitan-drozy nandeha tanabo riaky eny Jesosy, sady namonjy an’ny laka iny. Le natahotsy rozy.
20 Fe hoy Jesosy: “Ka matahotsy fa zaho avao toy!”
21 Le nifalifaly rozy nampiondra azy tanaty laka ao, sady nitsielatsiela avao le niavy tamy tany tean-drozy handehana any laka iny.
22 Hamarain’iny, nihitan’olo nijano tampitan’ny riaky eny rey hoe tsy nisy laka ty teo. Nisy laka kelikely raiky zay avao teo, fe fa nandesin’ny mpianatsin’i Jesosy rey, kanefa Jesosy tsy niondra an’ny laka iny niaraky tamin-drozy.
23 Fe nisy laka hafa baka a Tiberiasy any niavy tanilan’ny pilasy iny teo, zany hoe tanilan’ny nihinanan-drozy an’ny mofo nizaràn’ny Tompo iny, tamy ie baka nanao vavaky fisaora iny.
24 Lafa nihitan’olo rey amy zay hoe samby tsy teo ndre Jesosy ndre mpianatsiny rey, le niondra tamy laka rey rozy, le nandeha a Kapernaomy any mba hila an’i Jesosy.
25 Lafa nihitan-drozy tampitan’ny riaky iny eny ie, le hoy ty asan-drozy: “Raby, nombia ty niavianao teto?”
26 Le hoy ty navalin’i Jesosy an-drozy: “Ambarako anareo mazava soa fa tsy hoe nareo nahita an’ny famantara rey ilànareo ahy io, fa nareo nivintsy lafa nihina an’ny mofo rey.
27 Miasà, kanefa tsy hoe mba hahazoa hany mety simba, fa mba hahazoa hany maharitsy, azy mitariky ho amy fiaina mandrakizay iny. Tsy ino io fa azy hany hamean’ny Anak’olo anareo iny, satria ie ro nasia-Ndranahary Baba iny kasè* hoe mahazo hatò aminy.”
28 Le hoy ty asan-drozy taminy: “Ino ty tsy maintsy ataonay mba hanaovanay ty asa-Ndranahary?”
29 Le hoy ty navalin’i Jesosy an-drozy: “Manao ty asa-Ndranahary nareo laha atoronareo hoe mino ani-azy nirahiny iny nareo.”
30 Bakeo hoy ty asan-drozy: “Ka ino ty famantara ataonao soa ho hitanay, le hino anao zahay? Ino ty raha hataonao?
31 Tsy zay moa fa nihina mana ty razambentsika tamy dezera* any, satria fa voasoratsy hoe: ‘Nameany mofo baka an-danitsy any rozy mba hohanin-drozy.’”
32 Le hoy Jesosy tamin-drozy: “Ambarako anareo mazava soa fa tsy nanome anareo an’ny mofo baka an-danitsy any iny Mosesy, fa Babako ro manome anareo ty tena mofo baka an-danitsy any,
33 satria azy mijotso baka an-danitsy any iny sady manome fiaina ho ani-zao tontolo zao iny ro mofo-Ndranahary.”
34 Le hoy ty asan-drozy taminy: “Mba ameo an’ny mofo zay avao zahay Tompo!”
35 Hoy Jesosy tamin-drozy: “Zaho ro mofon’ny fiaina. Ze mamonjy ahy tsy ho mosarè mihintsy, le ze mampiseho finoa ahy tsy haran-drano* mihintsy.
36 Fe fa nivolaniko taminareo hoe tsy mino nareo ndre fa nahita ahy.
37 Hamonjy ahy ze amean’ny Baba ahy, le tsy horoasiko mihintsy ze mamonjy ahy,
38 satria tsy hanao ty sitrapoko ro nijotsoako baka an-danitsy any, fa hanao ty sitraponi-Azy naniraky ahy iny.
39 Ho zao ty sitraponi-Azy naniraky ahy iny: Tsy tokony hisy hengako ho trobo ze nameany ahy, fa tokony hovelomiko ndraiky amy andro farany.
40 Fa ty sitrapon’ny Babako, le hoe hahazo fiaina mandrakizay iaby ze maneky an’ny Anaky iny ka mampiseho finoa azy, le hamelo azy ndraiky aho amy andro farany.”
41 Farany nimenimeny Jiosy rey satria ie nivola hoe: “Zaho ro mofo nijotso baka an-danitsy any.”
42 Le hoy ty asan-drozy: “Tsy io va Jesosy anan’i Josefa iny? Haintsika ty babany noho ty reniny, ka manino ie henanizao mivola hoe: ‘Nijotso baka an-danitsy any aho’?”
43 Le hoy ty navalin’i Jesosy an-drozy: “Ka mimenimeny sasy nareo.
44 Tsy misy olo afaky mamonjy ahy laha tsy taomin’ny* Baba naniraky ahy iny. Le hamelo azy ndraiky aho amy andro farany.
45 Nisoratin’ny Mpaminany hoe: ‘Hampianarin’i Jehovah iaby rozy.’ Ze nijanjy an’ny Baba noho naneky ty fampianarany, le mamonjy ahy.
46 Tsy nisy olo nahita an’ny Baba, laha tsy azy baka amy Ndranahary any iny avao. Ie ro nahita an’ny Baba.
47 Ambarako anareo mazava soa fa hahazo fiaina mandrakizay ze mino ahy.
48 “Zaho ro mofon’ny fiaina.
49 Nihina mana ty razambenareo tamy dezera* any, kanefa nimaty avao.
50 Fa raiky toy mofo nijotso baka an-danitsy any, soa ho afaky hihina amy toy ty olo ka tsy ho maty.
51 Zaho ro mofo velo nijotso baka an-danitsy any. Ho velo mandrakizay ze mihina amy mofo toy. Ty nofotsiko laha ty marina ro mofo hameako, mba hahazoani-zao tontolo zao fiaina.”
52 Le nialy hevitsy Jiosy rey, ka nivola hoe: “Hataon’ny lahilahy tỳ akory ty hanomezany ty nofotsiny mba hohanintsika?”
53 Farany nivola Jesosy hoe: “Ambarako anareo mazava soa fa laha tsy mihina ty nofotsin’ny Anak’olo noho mino ty liony nareo, le tsy hahazo fiaina.*
54 Ze mihina ty nofotsiko noho mino ty lioko, le hahazo fiaina mandrakizay, sady hamelo azy aho amy andro farany,
55 satria tena hany ty nofotsiko, sady tena raha finomy ty lioko.
56 Ze mihina ty nofotsiko noho mino ty lioko le miaraky amiko, sady miaraky aminy koa aho.
57 Velo azy Baba naniraky ahy iny, le velo aho satria namean’ny Baba iny ay. Manahaky ani-zay koa fa ze mihina ahy, le ho velo satria mino ty sorom-panavota nataoko.
58 Toy mofo nijotso baka an-danitsy any iny. Tsy manahaky an’ny mofo nihanin’ny razambenareo rey raha toy, satria nimaty avao rozy. Fa ze mihina an’ny mofo toy le ho velo mandrakizay.”
59 Nivola an’ny raha rezay ie tamy ie nampianatsy tamy synagoga* ta Kapernaomy any zay.
60 Lafa naharè ani-zay rozy, le maro amy mpianatsy rey ty nivola hoe: “Mahakamo* koa resakiny zao! Ia hijanjy ani-zao io?”
61 Fe nihain’i Jesosy* hoe nimenimeny mikasiky an’ny raha zay mpianatsiny rey, ka hoy ty asany tamin-drozy: “Lasa tsy mino ahy va nareo tratsin’ny raha nivolaniko* iny?
62 Ka manao akory zany laha hitanareo miakatsy amy nisy azy taloha any Anak’olo iny?
63 Ty fanahy ro manome fiaina, fa ty nofotsy tsy mahasoa mihintsy. Baka amy fanahy safà nivolaniko taminareo rey sady manome fiaina.
64 Fe misy aminareo tsy mino.” Nivola ani-zay Jesosy satria fa nihainy baka am-boalohany any hoe ia iaby ty tsy mino, le ia azy hamadiky azy iny.
65 Hoy koa ty asany: “Zay nahavy ahy nivola taminareo hoe: Tsy misy olo afaky mamonjy ahy, laha tsy ze nengàn’ny Baba hamonjy ahy avao.”
66 Le nimaro tamy mpianatsiny rey ty nihemotsy, ka tsy nanaraky azy sasy.
67 Farany nivola tamy Apostoly 12 rey Jesosy hoe: “Nareo koa va mba ta hiala?”
68 Le hoy ty asan’i Simona Petera: “Hanaia* moa zahay io Tompo? Ty safà volaninao ro hahazoa fiaina mandrakizay.
69 Inoanay sady hainay hoe iha Azy Masy nirahi-Ndranahary iny.”
70 Le hoy Jesosy tamin-drozy: “Nitingy anareo apostoly 12 reo aho, sa tsy zay? Fe mpandratiraty* ty raiky aminareo.”
71 Jodasy anan’i Simona Iskariota ty teany hovolany tamy zay, satria io azy hamadiky azy iny, kanefa ie anisan’ny Apostoly 12 rey.
Fanamariha ambany pejy
^ Mofo namboary tamy vary orza resahy eto io.
^ Abt: “tokotokony ho 25 na 30 stadio.”
^ Na: “tombokasè; tampôn.”
^ Na: “tan-diomonto.”
^ Abt: “tsy haran-drano sasy mihintsy.”
^ Na: “tarihin’ny.”
^ Na: “tan-diomonto.”
^ Abt: “tsy mana fiaina anatinareo ao.”
^ Na mety hoe “vahoaky nivorivory.”
^ Na: “Manafitohina.”
^ Abt: “nihain’i Jesosy tan-tsainy any.”
^ Abt: “Manafitohina anareo va raha nivolaniko iny.”
^ Abt: “Ho amin’ia any.”
^ Na: “Devoly.”
