Nisoratin’i Jaona 7:1-52
7 Mbo nanao toro an’i Galilia avao Jesosy tafarani-zay, satria tsy ta handeha a Jodia any ie, fa nita hamono azy Jiosy rey.
2 Fe fa narìny ty fetin’ny Jiosy, zany hoe ty Fetin’ny Tranolay.*
3 Farany nivola taminy rahalahiny rey hoe: “Mialà eto le mandehana a Jodia any, soa ho hitan’ny mpianatsinao rey koa ty asa ataonao.
4 Satria tsy misy olo ta ho hain’olo kanefa avonivoniny avao ty raha ataony. Laha manao an’ny raha rey iha, le manaova hitani-zao tontolo zao.”
5 Laha ty marina tsy nino azy rahalahiny rey.
6 Farany nivola tamin-drozy Jesosy hoe: “Mbo tsy avy ty fotoa voatondro ho ahy, fa nareo afaky mandeha a Jodia any avao ndre ombia ndre ombia.
7 Tsy misy antony mahavy ani-zao tontolo zao halay anareo. Fa zaho halan-drozy satria manaporofo hoe raty ty raha ataon-drozy.
8 Ndany nareo mandeha amy fety iny any, fa zaho mbo tsy handeha tse satria mbo tsy tena avy ty fotoa voatondro ho ahy.”
9 Lafa baka nivola ani-zay amy zay ie, le nijano ta Galilia any.
10 Fe lafa nana amy fety iny any rahalahiny rey, le nimbeo koa ie kanefa tsy nanao hitan’olo fa nivonivony avao.
11 Le nila azy tamy fety iny tany Jiosy rey, ka nivola hoe: “Ka aia lahilahy iny?”
12 Le niresadresaky mikasiky azy vahoaky rey. Nivola ty sisany hoe: “Olo soa fanahy iny.” Fa ty ilany nivola hoe: “Tsy raha soa fanahy zao iny fa mpamitaky olo.”
13 Fe tsy nisy nahasaky niresaky mikasiky azy tamason’olo satria natahotsy an’ny Jiosy rey.
14 Efatsy andro teo ho eo tafaran’ny nanombohan’ny fety* iny, nandeha niakatsy tamy tempoly ao Jesosy, le nampianatsy.
15 Le nitseriky Jiosy rey ka nivola hoe: “Akory koa ty nahaizan’ny lahilahy tia Soratsy Masy* manahaky ani-zao, kanefa ie tsy nianatsy tamy fianarantsika* rey any?”
16 Le hoy ty navalin’i Jesosy an-drozy: “Tsy ahy ty raha ampianariko, fa ahini-Azy naniraky ahy iny.
17 Laha misy olo ta hanao ty sitrapo-Ndranahary, le ho hain’olo zay laha baka amy Ndranahary ty fampianarako, na ty hevitsiko avao ro volaniko.
18 Ze olo mivola ty hevitsiny avao, le mila voninahitsy ho ahi-ty vatany. Fa ze mila voninahitsy ho ani-Azy naniraky azy iny ro mivola ty marina sady tsy mamitaky.
19 Tsy namean’i Mosesy Lalàna va nareo? Kanefa nareo tsy misy manoriky an’ny Lalàna iny. Manino nareo ta hamono ahy io?”
20 Le hoy ty navalin’ny vahoaky rey: “Misy demonia iha. Ia koa ta hamono anao eo io?”
21 Le hoy Jesosy tamin-drozy: “Raha raiky avao ty nataoko le fa tseriky iaby nareo.
22 Diniho amy zay zao: Namean’i Mosesy didy mikasiky savatsy nareo. Fe tsy baka amy Mosesy ty savatsy, fa baka amy razambenareo. Le manavatsy olo amy andro sabata nareo.
23 Ka laha manavatsy avao nareo ndre amy andro sabata aza mba tsy handikà ty Lalànan’i Mosesy, ino ty maharomotsy anareo laha nafahiko tanteraky ty aretin’ny lahilahy iny tamy andro sabata?
24 Ka mitsara ivelany sasy, fa mitsarà araky ty rariny.”
25 Le hoy ty olo sisany nipetraky ta Jerosalema ao: “Tsy io va lahilahy tean-drozy hovonoa iny?
26 Fe henteo fa mivola amin’olo maro eo ie, kanefa tsy volanin-drozy mihintsy. Tsy no tena fa hain’ny mpitariky amintsika eto reo hoe ie ro Kristy?
27 Fe haintsika anè hoe baka aia lahilahy io. Kanefa lafa avy Kristy, le tsy misy mahay hoe baka aia.”
28 Bakeo lafa nampianatsy tamy tempoly ao Jesosy, le nivola marè biby hoe: “Hainareo aho. Hainareo koa hoe baka aia aho. Tsy hoe niavy etoy aho satria hoe zay ro teateako,* fa tena misy Azy naniraky ahy iny, fe tsy hainareo ie.
29 Haiko ie satria solontenany aho, sady Ie ro naniraky ahy.”
30 Le nita hanambotsy azy rozy. Fe tsy nisy nanambotsy azy rozy, satria mbo tsy niavy ty fotoa voatondro ho azy.
31 Ndre teo zay, le nino azy ty ankamaroan’ny vahoaky rey, ka nivola hoe: “Lafa avy Kristy, hahavita famantara maro mandilatsy ty vitan’ny lahilahy io va ie?”
32 Niren’ny Fariseo reo niresadresaky* mikasiky an’i Jesosy vahoaky rey, ka naniraky mpiamby hanambotsy an’i Jesosy sefon’ny mpisoro noho Fariseo rey.
33 Bakeo nivola Jesosy hoe: “Mbo hiarakaraky aminareo tse aho, alohan’ny handehanako amy Azy naniraky ahy iny any.
34 Hila ahy nareo fe tsy hahita ahy, sady tsy afaky ho avy amy misy ahy any.”
35 Farany nifampiresaky Jiosy rey hoe: “Ka ta ho aia lahilahy tỳ io, ie le tsy ho hitantsika io? Tsy no ta handeha amy Jiosy miparitaky amy Grika rey any ie io, soa hampianatsy an’ny Grika rey?
36 Ino ty teany hovolany amy hoe: ‘Hila ahy nareo fe tsy hahita ahy, sady tsy afaky ho avy amy misy ahy any’?”
37 Tamy andro farany iny, zany hoe tamy fotoa* farany bevata amy fety iny, le nitsanga Jesosy ka nivola marè hoe: “Mamonjea ahy ze maran-drano fa hameako rano hinomy.
38 Ho zao ty resahin’ny Soratsy Masy mikasiky ani-ze mino ahy: ‘Hisy rano velo higororoky baka anainy laliky any.’”
39 Fe fanahy fa ho azoni-azy mino azy rey niresahiny io. Tsy zay fa mbo tsy nisy olo namea an’ny fanahy io, satria Jesosy aza mbo tsy namea voninahitsy.
40 Lafa naharè ani-zay ty olo sisany tamy vahoaky iny, le nivola hoe: “Io mihintsy Mpaminany iny!”
41 Nivola koa ty olo hafa hoe: “Io Kristy iny!” Fe hoy ty ilany: “Kristy zao va baka a Galilia any?
42 Tsy mivola moa ty Soratsy Masy hoe baka amy taranakin’i Davida, Kristy, sady baka a Betlehema, tanà nisy an’i Davida iny any?”
43 Farany nizarazara ty hevitsin’ny vahoaky rey mikasiky azy.
44 Nita hanambotsy azy amin’io ty sisany amin-drozy, fe tsy nisy nanambotsy azy.
45 Bakeo nimpoly tamy sefon’ny mpisoro noho Fariseo rey tany mpiamby rey, le nivola Fariseo rey hoe: “Nanino ie tsy nandesinareo atoy io?”
46 Le namaly mpiamby rey hoe: “Mbo tsy nisy olo nivola manahaky ani-zay mihintsy.”
47 Le hoy Fariseo rey: “Tsy no nivoafitaky koa nareo?
48 Misy mino azy va ty mpitariky amintsika eto na ty Fariseo?
49 Fe voaozo vahoaky tsy mahay Lalàna reo.”
50 Le nivola Nikodemosy, azy Fariseo niavy tamy Jesosy any taloha tany iny hoe:
51 “Ty Lalànantsika moa tsy mivola hoe laha ta hanasazy olo raiky tsika le mila mijanjy azy tse, soa ho hay ty raha ataony?”
52 Le hoy ty navalin-drozy: “Baka a Galilia any koa va iha toy? Diniho soa le ho hitanao fa tsy misy mpaminany baka a Galilia any.”*
Fanamariha ambany pejy
^ Na: “Trano Rantsakazo.”
^ Abt: “Lafa nisasaky fety iny.”
^ Abt: “asa soratsy.”
^ Zany hoe lakilasy nampianaran’ny Raby.
^ Na: “eritseretiko.”
^ Na: “niresadresaky moramora.”
^ Abt: “andro.”
^ Tsy misy andininy 53 zisiky toko 8 andininy 11 ty sora-tana maromaro fa ela taloha tany noho azo atokisa.
