Nisoratin’i Lioka 1:1-80
1 Maro ty fa niezaky namory noho nanoratsy an’ny tantara tena nisy rey. Tena inoantsika* raha rey.
2 Vavolombelo nahita maso sady mpanompo nanambara ty Safà-Ndranahary liany tam-boalohany tany ro nitantara an’ny raha rey tamintsika.
3 Nanapa-kevitsy koa aho Teofilo,* fa hanoratsy an’ny raha rey aminao araky ty filaharany, satria fa nikarohiko soa baka am-boalohany any ty raha iaby sady fa nihamariniko.
4 Amy zay ho hainao soa hoe azo antoky ty raha nampianary* anao.
5 Tamy andron’i Heroda* mpanjakan’i Jodia, le nisy mpisoro kaihy hoe Zakaria tamy fizarà nisy an’i Abia. Baka amy taranakin’i* Arona ty valiny. Elizabeta ty anarany.
6 Samby olo marina ty fahità-Ndranahary an-drozy morovaly, sady tsy nisy tsiny* satria norihin-drozy ty didy iaby noho ze raha nitakin’ny lalànan’i Jehovah.
7 Fe tsy nanan’anaky rozy satria kanda Elizabeta sady samby fa antitsy rozy.
8 Ndraiky andro, nanao asa fanompoa a-Ndranahary Zakaria. Nanao ty asan’ny mpisoro ie, satria toron’ny fizarà nisy azy tamy zay.
9 Torony ty nañoro emboky manitsy manahaky fataon’ny mpisoro rey, ka nilitsy tamy pilasy masin’i Jehovah ao ie.
10 Nivavaky ta amonto ao ty vahoaky iaby tamy lera fanomeza emboky manitsy iny.
11 Bakeo nisy anjelin’i Jehovah niseho tamy Zakaria, le nitsanga ta ankavanan’ny alitara fañoroa emboky manitsy iny teo.
12 Nitaitsy Zakaria lafa nahita azy sady tena natahotsy.
13 Fe hoy anjely iny taminy: “Ka matahotsy Zakaria, fa fa nijanjini-Ndranahary ty fisolohoanao, ka hiteraky anakilahy aminao Elizabeta valinao, le anovo hoe Jaona ty anarany.
14 Ho falifaly noho hanitranitra iha, le maro koa ty ho falifaly lafa hateraky ie,
15 satria hiavaky ty fahitan’i Jehovah azy. Fe tsy mahazo mino divay na toaky* mihintsy ie, sady ho feno fanahy masy ndre mbo tsy ateraky aza.*
16 Le hampeany himpoly amy Jehovah Ndranaharin-drozy ty ankamaroan’ny anan’Israely.
17 Handeha aloha-Ndranahary eo koa ie, sady hana ty toe-tsay* noho ty herin’i Elia, mba hampimpoliany ty fon’ny baba hanahaky ty fon’ny anaky, sady mba hanampeany ani-azy tsy manoriky safà rey ho hendry amy ze raha ataon-drozy manahaky ty ataon’olo marina. Hanoma vahoaky ho an’i Jehovah ie amy zay.”
18 Hoy ty asan’i Zakaria tamy anjely iny: “Aia koa ty hahamarina ani-zao? Zaho fa antitsy toy! Valiko koa fa antitsy biby.”
19 Le hoy anjely iny taminy: “Gabriela ty anarako le mitsanga aloha-Ndranahary eo aho. Nirahy hiresaky aminao aho sady hivola an’ny vaovao soa zay aminao.
20 Fe zao, satria iha tsy nino ty safàko, azy ho tanteraky amy fotoa voatondro iny, le ho moa iha, ka tsy ho afaky hivola zisiky hahatanteraky an’ny raha zay.”
21 Tanatin’ny fotoa zay, nandiny an’i Zakaria avao vahoaky rey. Le nitseriky rozy satria niela biby tamy pilasy masy iny tao ie.
22 Lafa niboaky ie le tsy niafaky niresaky tamin-drozy, ka nihain-drozy hoe vo baka nahita fahità tamy pilasy masy tao ie. Nanao bekomoa tamin-drozy avao ie satria mbo nimoa.
23 Le nandeha noly ie lafa nitampitsy andro nanaovany fanompoa masy* rey.
24 Andro vitsivitsy tafara atoy, nibevoka Elizabeta valiny, le tsy niboaboaky tan-trano ao tanatin’ny limy vola. Le hoy ty asan’i Elizabeta:
25 “Zao ty raha nataon’i Jehovah ho ahy: Nanenty ahy ie mba tsy ho afa-baraka amin’olo sasy aho.”
26 Lafa nibevoka enim-bola ie, le nirahi-Ndranahary anjely Gabriela mba ho amy tanà kaihy hoe Nazareta, a Galilia any,
27 le handeha ho amy virjiny raiky zay any. Maria ty anaran’ny ampela io. Vo hifanambaly amy lahilahy mana anara Josefa zay ie. Baka amy taranakin’i Davida lahilahy io.
28 Le hoy ty asan’ny anjely iny lafa niavy aminy ao: “Akory Maria! Tena mahazo hatò amy Jehovah vatany iha sady mitahy anao ie.”
29 Fe nitaitsy biby ie tamy resakin’ny anjely iny, ka niezaky hahay hoe mety ho ino ty dikan’ny safàny* zay.
30 Nivola taminy amy zay anjely iny hoe: “Ka matahotsy Maria, satria fa nahazo hatò tamy Ndranahary iha.
31 Ho bevoka iha ka hiteraky anakilahy, le anovo hoe Jesosy ty anarany.
32 Hiavaky ie ka hokaihy hoe Anakini-azy Farany Anabo iny, le hamean’i Jehovah Ndranahary azy ty sezim-panjakàn’i Davida babany.
33 Le ho Mpanjaka amy taranakin’i Jakoba eo mandrakizay ie, sady tsy ho tampitsy mihintsy ty Fanjakàny.”
34 Fe nivola tamy anjely iny Maria hoe: “Akory ty hampety ani-zay kanefa zaho mbo tsy nanao firaisa tamy lahilahy?”
35 Le nivola anjely iny hoe: “Hiasa aminao* ty fanahy masy, le hanaloky anao ty herini-Azy Farany Anabo iny, ka ho masy azy haterakinao iny le hokaihy hoe Anaki-Ndranahary.
36 Bevoka koa Elizabeta longonao ndre fa antitsy aza. Fa bevoka enim-bola ie henanizao, ndre nikaihin’olo hoe ampela kanda aza,
37 satria tsy hisy tsy ho tanteraky ze raha volani-Ndranahary.”*
38 Bakeo nivola Maria hoe: “Toy aho mpanompovavin’i Jehovah! Enganè ho tanteraky amiko raha nivolaninao zay!” Le niala taminy eo anjely iny.
39 Niala tao amy zay Maria tafara kelikelini-zay, le nandeha malaky nana amy faritsy be vohitsy any, mba ho amy tanà raiky a Joda any.
40 Le nilitsy tan-tranon’i Zakaria tao ie, ka niarahaba an’i Elizabeta.
41 Lafa naharè an’i Maria niarahaba azy Elizabeta, le nikofoky* ajà tan-kibony ao iny. Le nifeno fanahy masy Elizabeta,
42 ka nivola marè hoe: “Nahazo fitahia iha laha amy ty ampela iaby, le nahazo fitahia azy haterakin’ny kibonao iny!
43 Zaho moa ty ia ro mahazo tombotsoa ho zao, ka ty renin’ny Tompoko ro mamangy ahy?
44 Henteo fa laha vo niren’ny sofiko ty feonao niarahaba ahy, le nikofoky ajà an-kiboko ato toy satria nifalifaly!
45 Sambatsy koa iha fa nanam-pinoa, satria ho tanteraky iaby ze safàn’i Jehovah nivolany taminao.”
46 Le nivola Maria hoe: “Midera an’i Jehovah aho,*
47 sady tsy tanjako ty hafaleako tamy ty raha nataon’ny Ndranahary Mpanavotsy ahy iny,
48 satria nihenteany mpanompovaviny toy ndre olo ambany aza. Manomboky henanizao le hivola ty taranaky iaby hoe sambatsy aho,
49 satria nanao asa bevata ho ahy Azy mahery iny, sady masy ty anarany.
50 Ferinesany ze olo matahotsy azy, ndre zisiky amy taranaky afara any aza.
51 Nanao asa bevata tamy tanany mahery ie, sady nanaparitaky ani-azy mpirengirengy reo.
52 Nampialany tamy sezim-panjakà ty olo mana fahefà, fa nasondrotsiny ty olo ambany.
53 Nataony vintsy raha soa ty mosarè, fa nalefany noly tanampolo ty panarivo.
54 Nanampy ty Israely mpanompony ie, satria tsy halinony fa nampitamà ie hoe hiferinay an-drozy.
55 Tsy halinony mandrakizay raha zay, araky ty fa nivolaniny tamy razambentsika, zany hoe tamy Abrahama noho ty taranakiny.”
56 Nijano telo vola teo ho eo tamy Elizabeta any Maria, bakeo noly tamin-drozy any.
57 Niavy amy zay ty fotoa hiterahan’i Elizabeta, le niteraky anakilahy ie.
58 Niren’olo tanà raiky aminy noho ty longony fa tena niferinay azy Jehovah, ka niaraky nifalifaly taminy rozy.
59 Niavy hanavatsy an’ny ajà iny rozy tamy andro fahavalo, le fa ho nataon-drozy hoe Zakaria ty anarany, manahaky ty anaran’ny babany.
60 Fe nivola reniny hoe: “Tsy atao ani-zay ty anarany fa atao hoe Jaona.”
61 Le hoy ty asan-drozy taminy: “Ka tsy misy mana an’ny anara zay ty longonao!”
62 Le nanao bekomoa tamy baban’ny ajà iny rozy mba hahaiza hoe ia ty teany hatao anarany.
63 Farany Zakaria nangataky raha hanorata,* le nisoratiny teo hoe: “Jaona ty anarany.” Le nitseriky iaby rozy.
64 Teo no ho eo avao le niafaky nivola ndraiky Zakaria,* ka nanomboky niresaky noho nidera a-Ndranahary ie.
65 Le natahotsy iaby ty olo tanà raiky amin-drozy, ka lasa nataon’olo resaky tamy faritsy be vohitsy ta Jodia any raha iaby rezay.
66 Nandiniky soa* ze naharè an’ny raha zay ka nivola hoe: “Ajà hanao akory lahy io e?” Hita hoe tena nanampy azy ty tanan’i Jehovah.
67 Bakeo nifeno fanahy masy Zakaria babany ka naminany hoe:
68 “Enganè hoderà Jehovah Ndranaharin’Israely, satria nanenty ty vahoakiny ie sady nanafaky an-drozy!
69 Le nananga tsifa fanavota* ho antsika tamy taranakin’i Davida mpanompony ao ie,
70 araky ty nivolaniny tamy alalan’ny mpaminaniny masy fa ela taloha tany rey.
71 Nampitamà ie hoe hanavotsy antsika amy fahavalontsika noho an-tanani-ze olo iaby malay antsika.
72 Hiferinay ty razambentsika ie sady hahatiaro ty fifanekea masy nataony,
73 zany hoe fifantà nataony tamy Abrahama razambentsika iny.
74 Lafa baka nanafaky antsika tan-tanan’ny fahavalontsika ie, le hengany hanompo azy tsika sady tsy hatahotsy lafa manao ani-zay,
75 ka tsy hivaliky aminy le hanao ty marina aminy eo, amy andro iaby iainantsika.
76 Fa iha lahy anako, hokaihy hoe mpaminanini-Azy Farany Anabo iny, satria handeha alohan’i Jehovah eo iha mba hanoma ty lalany,
77 noho hanambara amy vahoakiny hoe hahazo fanengà hadisoa rozy ka ho avotsy,
78 satria tena miferinay olo Ndranaharintsika iny. Ka vokatsin’ny fiferinesany zay, le hisy hazavà hiboaky ho antsika baka anabo any,
79 mba hanome hazavà ho ani-ze mipetraky amy maìky noho amy alokin’ny fahafatesa ao, sady mba hitariky ty liantsika ho amy lalan’ny fiadana.”
80 Le nihabè ajà iny ka nihamatotsy. Le nipetraky tamy dezera* any ie zisiky niavian’ny andro nisehoany tamy Israely eo.
Fanamariha ambany pejy
^ Na: “Ekentsika hoe tena marina.”
^ Amy safà Grika, le safà mampiseho fanajà na firesaha amy manam-pahefà ro nampiasan’i Lioka eto, lafa niresaky tamy Teofilo.
^ Fampianara ambava resahy eto io.
^ Abt: “anakampelan’i.”
^ Abt: “nandeha tsy nisy tsiny.”
^ Na: “raha hafa misy alkoly.”
^ Na: “baka an-kibon-dreniny any; baka an-tron-dreniny.”
^ Na: “hafanam-po; fanahy.”
^ Na: “fanompoa ho ahi-ty maro.”
^ Na: “fiarahabany.”
^ Abt: “Ho avy aminao.”
^ Na: “tsy hisy raha tsy ho vita-Ndranahary.”
^ Zany hoe nikofoky satria falifaly.
^ Na: “ty vatako iaby.”
^ Zany hoe plansy kelikely, azo anorata ty anabony eo.
^ Na: “le nivoha ty vavan’i Zakaria sady nivaha raha nampivanditsy lelany iny.”
^ Abt: “Nieritseritsy tam-pon-drozy ao.”
^ Na: “tan-diomonto.”
