Nisoratin’i Lioka 10:1-42
10 Nitingy mpianatsy 70 hafa koa Tompo tafarani-zay, ka naniraky an-drozy kiroedroe mba handeha alohany mana amy ze tanà noho pilasy mbo handehanany any.
2 Le hoy ty asany tamin-drozy: “Tena maro ty vokatsy fa ty mpiasa ro tsy ampy, ka angataho Tompon’ny vokatsy iny mba haniraky mpiasa hamory an’ny vokatsy reo.
3 Le mandehana, fe miambena soa. Maniraky anareo aho, manahaky maniraky anak’aondry handeha anivon’ny amboanala eny.
4 Ka manday saky fasia drala na saky fandaisa vatia na kapa, le ka miarahaba olo* an-dala eny.
5 Lafa militsy amy trano raiky nareo* le mivolana tse hoe: ‘Enganè mba hahazo fiadana trano toy!’
6 Laha misy anan’ny fiadana ao, le hijano aminy ao ty fiadananareo, fa laha tsy misy ao, le himpoly aminareo ty fiadananareo.
7 Ka zao, mijanòna amy trano zay ao, le hano noho inomo ze raha amean-drozy, satria maeva hahazo ty karamany ty mpiasa. Ka mifindrafindra trano.*
8 “Lafa militsy amy tanà raiky koa nareo* ka mandramby anareo ty olo ao, le hano ze raha amean-drozy anareo.
9 Afaho ty aretini-ze marary ao le volano rozy hoe: ‘Fa marìny anareo ty Fanjakà-Ndranahary.’
10 Fe lafa militsy amy tanà raiky nareo* kanefa tsy mandramby anareo ty olo ao, le mandehana amy lala be eny bakeo mivolana hoe:
11 ‘Ndre ty lemboky baka amy tanànareo toy aza laha misy manaraky ty tombonay, le hofafanay mba ho fampitandrema anareo. Fe tiarovo zao, fa marìny ty Fanjakà-Ndranahary.’
12 Ambarako anareo, fa mbo ho moramora ty raha hahazo an’i Sodoma amy fotoa zay, tany ty raha hahazo an’ny tanà zay.
13 “Ho azon-draha iha Korazina! Ho azon-draha iha Betsaida! Satria laha ta Tyro noho ta Sidona tany ro nanaova an’ny fahagagà natao taminareo tao rey, le fa ela rozy ro nibebaky ka nisiky akanjo gony noho nipetraky tamy lavenoky.
14 Mbo ho moramora ty raha hahazo an’i Tyro noho Sidona amy fitsarà, tany ty raha hahazo anareo.
15 Iha koa Kapernaomy, iha va le hasondrotsy zisiky amy lanitsy eny? Hijotso amy Lolo* any aza iha ka!
16 “Ze mijanjy anareo, le mijanjy ahy. Fa ze tsy maneky anareo, le tsy maneky ahy. Ze tsy maneky ahy koa, le tsy maneky ani-Azy naniraky ahy iny.”
17 Lafa nimpoly amy zay mpianatsy 70 rey, le nifalifaly ka nivola hoe: “Tompo, ndre ty demonia aza maneky anay lafa zahay mampiasa ty anaranao.”
18 Le nivola tamin-drozy Jesosy hoe: “Hitako fa fa nitonta* manahaky helatsy baka an-danitsy any Satana.
19 Fa nameako fahefà hanitsaky bibilava noho hala* nareo, ka handresy ty hery iaby ananan’ny fahavalo iny, sady tsy hisy raha hahazo anareo mihintsy.
20 Fe ndre zay, ka falifaly satria hoe lasa maneky anareo fanahy rey, fa mifalifalea satria voasoratsy an-danitsy any ty anaranareo.”
21 Tena nifalifaly biby Jesosy tamy fotoa* zay, sady nifeno fanahy masy ka nivola hoe: “Baba, Tompon’ny lanitsy noho ty tany iha, ataoko hitan’olo iaby reto hoe midera anao aho, satria fa navoninao soa raha rey, soa tsy ho hain’olo hendry noho mahay raha, kanefa nambaranao tamy ty ajà kelikely.* Zay mihintsy moa ty sitraponao Baba!
22 Fa namean’ny Babako ahy iaby ty raha iaby. Tsy misy mahay hoe ia aho* laha tsy Babako avao, sady tsy misy mahay hoe ia Babako laha tsy zaho avao noho ze olo teako hanambarà ty mikasiky azy.”
23 Le nitoliky tamy mpianatsy rey any ie. Lafa nitoka rozy le nivolaniny hoe: “Sambatsy ty maso mahita ty raha hitanareo.
24 Ambarako anareo fa maro ty mpaminany noho ty mpanjaka ta hahita ty raha hitanareo fe tsy nahita, sady ta haharè ty raha renareo fe tsy naharè.”
25 Nitsanga amy zay lahilahy raiky nahay Lalàna zay. Nivola ho zao ie mba hamandriha an’i Jesosy: “Mpampianatsy e, ino ty raha mila ataoko mba handovako fiaina mandrakizay?”
26 Le hoy ty asan’i Jesosy taminy: “Ino ty misoratsy amy Lalàna ao? Akory ty fahazoanao azy?”
27 Le hoy ty navaliny: “‘Tiavo Jehovah Ndranaharinao amy ty fonao iaby noho ty vatanao iaby noho ty herinao iaby noho ty sainao iaby’, le ‘tiavo ty namanao manahaky itiavanao ty vatanao.’”
28 Le hoy Jesosy taminy: “Marina valin-teninao zay. Anovo avao zay, le hahazo fiaina mandrakizay iha.”
29 Fe ta hanaporofo lahilahy iny hoe olo marina ie, ka hoy ty asany tamy Jesosy: “Ka ia kay ty namako?”*
30 Le hoy ty navalin’i Jesosy: “Nisy lahilahy raiky nijotso tamy lala baka a Jerosalema mana a Jeriko any iny, fe nisakanan’ny malaso ie ka nalan-drozy iaby ze raha taminy eny, le nivangovangoan-drozy ie bakeo nengan-drozy teo. Fa sisa kely tsy ho maty ie amin’io.
31 Nisy mpisoro raiky amy zay sendra nijotso mbamy lala iny mbeo, fe niampita mpisoro iny lafa nahita azy, le nandrio avao.
32 Nisy Levita raiky koa niavy teo, fe niampita koa ie lafa nahita azy, le nandrio avao.
33 Fe nisy Samaritanina raiky nandeha mbamy lala iny mbeo, le niavy taminy eo. Niferinesan’ny Samaritanina iny ie lafa nihitany,
34 farany nivonjeny, le nibandìny* bainy rey sady nasiany menaky noho divay. Bakeo naondrany tamy biby nandesiny iny ie, le nandesiny tamy hotely firoroa any sady nikarakaràny.
35 Hamarain’iny ie nampiboaky roe denaria, le nameany an’ny tompon’ny hotely iny. Le hoy ty asany: ‘Karakarao ie. Laha mandilatsy ani-reto ty laninao, ndre hotrino ndre hotrino, le haloako lafa mimpoly aho.’
36 Ka laha ty fahitanao azy, ia amin-drozy telo reo ro lasa naman’ny lahilahy nisakanan’ny malaso iny?”
37 Le hoy ty asany: “Azy niferinay azy iny.” Bakeo hoy Jesosy taminy: “Ndany, le manaova manahaky azy koa.”
38 Nitohizan-drozy amy zay ty lian-drozy ka nilitsy tamy tanà kelikely raiky zay rozy. Le nisy ampela mana anara Marta zay nampiantrano an’i Jesosy.
39 Nana rahavavy koa ie. Maria ty anarany. Nipetraky tan-tombon’ny Tompo eo Maria, le nijanjy ani-ze raha nivolaniny* avao.
40 Fe tsy nanahaky ani-zay Marta. Tsy nifantoky ie satria nimaro ty raha nataony. Farany ie namonjy an’i Jesosy le nivola hoe: “Tompo, tsy mampanino anao va zaho engan’ny rahavaviko tia hiasa raiky amy raha maro reto io? Mba volano ie hanampy ahy!”
41 Le hoy ty navalin’ny Tompo azy: “Marta a! Marta a! Maro loatsy ty raha mampiasa loha anao noho ty raha ataonao.
42 Kanefa raha vitsivitsy avao ro tena ilà, ndre ie ka raiky avao aza. Fa Maria nifily ty farany soa,* ka tsy halà aminy zay.”
Fanamariha ambany pejy
^ Na: “ka mandany fotoa amy fombafomba fiarahabà.”
^ Abt: “Ndre aia ndre aia trano iliranareo.”
^ Na: “Ka mila trano hafa hivantàna.”
^ Abt: “Ndre aia ndre aia tanà iliranareo.”
^ Abt: “ndre aia ndre aia tanà iliranareo.”
^ Na: “natonta.”
^ Fransè: scorpion.
^ Abt: “lera.”
^ Zany hoe ze miambany manahaky ajà kelikely.
^ Abt: “ty Anaky.”
^ Safà Grika nadika hoe nama io, tsy hoe ze tena nama marìny an-tena avao, fa ty olo iaby mihintsy.
^ Na: “nifeheziny.”
^ Abt: “ty safàny.”
^ Na: “soa kokoa.”
