Nisoratin’i Lioka 11:1-54
11 Ndraiky andro, nivavaky tamy pilasy raiky zay Jesosy. Lafa baka nivavaky ie, le nivola taminy ty raiky amy mpianatsiny rey hoe: “Tompo, mba ampianaro mivavaky zahay, manahaky nampianaran’i Jaona an’ny mpianatsiny rey.”
2 Le hoy ty asany tamin-drozy: “Saky mivavaky nareo le mivolana hoe: ‘Baba, enganè hohamasìny* ty anaranao! Enganè ho avy ty Fanjakànao!
3 Ameo anay sanandro ze hany* ilànay sanandro.
4 Le engao ty hadisoanay fa zahay koa mba manenga ty hadisoani-ze olo nanao hadisoa* taminay. Le ka engà ho resin’ny fakam-panahy zahay.’”*
5 Nivola tamin-drozy ie bakeon’iny hoe: “Ndao hatao hoe mana nama ty raiky aminareo, le mamonjy azy any vakimirahaly bakeo mivola aminy hoe: ‘Nao koahy nama, mba ameo* mofo telo aho,
6 fa misy namako baka nanao lia lavitsy zay vo niavy amiko ao, kanefa tsy mana raha hameako azy aho.
7 Fe namaly baka an-trano ao raiky iny hoe: ‘Ka ankadalany aho fa fa mihily varavara io. Sady fa amiko am-pandrea eto koa anako kelikely reto, ka tsy afaky mitsanga hanome raha anao aho.’
8 Ambarako anareo fa tsy maintsy hitsanga ie hanome ani-ze raha ilàn’ny namany iny, tsy hoe satria mpinama rozy, fa satria tsy nivitavita* namany iny.
9 Ka zao ty ambarako anareo: Mangataha avao le hamea nareo. Milà avao le hahita nareo. Dondòno* avao le hovohà nareo.
10 Fa ze mangataky ro mahazo, ze mila ro mahita, le ze mandondò* ro hovohà.
11 Nareo baba reo, ia aminareo vatany moa laha angatahan’ny anany fia, ka hanome azy bibilava fa tsy fia?
12 Na laha angatahany atoly ka hanome azy hala?*
13 Ka laha nareo, ndre raty fanahy io aza, mahay manome raha soa ho ahi-ty ananareo, tsy vo handraky va azy Babanareo an-danitsy any iny? Tena hanome fanahy masy ho ani-ze mangataky aminy ie.”
14 Tafara kelikelini-zay, nandroaky demonia nahavy lahilahy raiky ho moa ie. Lafa niala demonia iny, le nahay nivola lahilahy iny ka nitseriky vahoaky rey.
15 Fe nivola ty olo sisany hoe: “Belzeboba* sefon’ny demonia iny ahavitany mandroaky demonia io.”
16 Ty ilany koa nangataky azy hampiseho famantara baka an-danitsy any mba hitsapà azy.
17 Nihain’i Jesosy ty raha tan-tsain-drozy any, ka hoy ty asany tamin-drozy: “Ho rava ze fanjakà mialy an-trano, le hisaratsaraky ze fianakavia mialy an-trano.
18 Manahaky ani-zay koa fa laha mialy an-trano Satana, akory ty hampaharitsy ty fanjakàny? Nareo moa mivola hoe Belzeboba ahavitako mandroaky demonia io.
19 Laha hery baka amy Belzeboba ro androahako demonia, hery baka amin’ia zany ro androahan’ny ananareo reo an-drozy? Laha zay zany ie, le ananareo reo ro hitsara anareo.
20 Fe laha ty heri-Ndranahary* ro androahako demonia, le midika zay hoe fa niavy ty Fanjakà-Ndranahary fe tsy niambinareo.*
21 Laha lahilahy raiky matanjaky noho ampy fitaova handesy mialy ro miamby ty lapany, le ho voaaro ty hananany.
22 Fe laha misy olo matanjaky mandilatsy azy manafiky azy ka mandresy azy, le ho azon’olo io iaby fitaova fandesy mialy natokisany rey, le ho zarazarany raha nalany taminy rey.
23 Ze tsy manoha ahy le manohitsy ahy, le ze tsy miaraky mamory amiko le manaparitaky.
24 “Lafa miboaky baka amin’olo raiky ty fanahy maloto, le mila pilasy hitofà ka mandalo mbamy tany maiky mbeny. Fe lafa tsy mahita ie, le mivola hoe: ‘Himpoly amy trano nialako iny any aho.’
25 Lafa avy ie, le hitany hoe fa voafafa malio trano iny sady misy pozipoziny.
26 Bakeo mandeha ie, le manday fanahy fito hafa raty mandilatsy azy lafa mimpoly. Bakeo militsy ao rozy le mijano ao, ka ho raty mandilatsy ani-tamy voalohany iny ty hiafaran’olo iny.”
27 Amy ie mbo mivola ani-zay iny, nisy ampela nivola marè biby baka anaty vahoaky ao hoe: “Sambatsy ty kibo nanday anao noho ty nono ninonoanao!”
28 Fe hoy ty asany: “Tsy zay mihintsy, fa ze mijanjy ty safà-Ndranahary noho manoriky an’ny raha zay ro sambatsy!”
29 Lafa nihamaro ty vahoaky nivorivory teo, le nanomboky nivola ie hoe: “Taranaky raty fanahy taranaky toy! Mila famantara rozy, fe tsy hisy famantara hamea an-drozy laha tsy famantara mikasiky an’i Jona iny avao,
30 satria lasa famantara ho ahin’olo ta Ninive ao rey Jona. Le hanahaky ani-zay koa ty Anak’olo ho an’ny taranaky toy.
31 Hiaraky hovelomy amy ze olo amy taranaky toy ty mpanjakavavin’ny antimo amy Andro Fitsarà, ka hatorony hoe raty taranaky toy, satria baka amy faran’ny tany any ie ro niavy mba hijanjy ty fahendrean’i Solomona. Fe mbo misy anabo mandilatsy an’i Solomona eto.
32 Hiaraky hovelomy amy taranaky toy ty vahoakin’i Ninive amy Andro Fitsarà, ka hatoron-drozy hoe raty taranaky toy satria nibebaky rozy lafa nitory tamin-drozy Jona. Fe mbo misy anabo mandilatsy an’i Jona eto.
33 Lafa mandrehitsy jiro ty olo, le tsy mametraky azy ankapiky any na ambany sobiky* ao, fa amy fasia azy eny mba hahita an’ny hazavà iny ty olo militsy amy trano iny ao.
34 Ty masonao ro jiron’ny vatanao. Lafa mifantoky soa* ty masonao, le hazava soa* ty vatanao iaby. Fa lafa maniry rahan’olo* ty masonao, le haìky ty vatanao.
35 Miambena soa zany tsy no haìky ty hazavà anatinao ao.
36 Ka laha mazava ty vatanao iaby fa tsy misy maìky mihintsy, le hazava sahala tarafin’ny jiro ty vatanao iaby.”
37 Lafa baka niresaky ani-reo ie, le nisy Fariseo nanasa azy hiaraky hihina aminy. Farany nilitsy ie, le nangalaky pilasy* tan-databo eo.
38 Fe nitseriky Fariseo iny lafa nahita hoe tsy nanasa tana* tse ie talohan’ny hihina.
39 Fe hoy Tompo taminy: “Nareo Fariseo io mitovy amy kopy noho finga malio ivelany rey,* kanefa anatinareo ao nareo tsy mety afa-po sady raty fanahy.
40 Tsy mandiniky nareo! Tsy azy nanao ty ivelany iny avao va ro nanao ty anatiny?
41 Ameo mba hiferinesanareo ty mahantra* ze raha am-ponareo ao, le halio ze raha iaby mikasiky anareo.
42 Fe ho azon-draha nareo Fariseo reo, satria manao fanomeza solila, rota, noho raha mitiry manimanitsy* rey nareo, kanefa tsy dareanareo ty rariny noho ty fitiava a-Ndranahary. Fanomeza* tsy maintsy ataonareo rey, fe tsy maintsy ataonareo koa raha hafa reo.
43 Ho azon-draha nareo Fariseo reo, satria teanareo ty pilasy aloha* amy synagoga ao noho ty hoarahabàn’olo am-bazary eny!
44 Ho azon-draha nareo, satria mitovy amy lolo tsy hita soa* nareo, ka kitsahin’olo kanefa tsy misy fahaizany azy!”
45 Le namaly ho zao ty raiky amin’olo nahay Lalàna rey: “Mpampianatsy e, manafa-baraka anay koa raha volaninao rezao!”
46 Le hoy Jesosy: “Ho azon-draha koa nareo mahay Lalàna reo, satria ampandesinareo enta sarotsy andesy ty olo, kanefa ndre ty raiky amy rantsantananareo aza tsy akasikinareo an’ny raha rey!
47 “Ho azon-draha nareo, satria mamboatsy ty lolon’ny mpaminany nareo, kanefa ty razambenareo ro namono an-drozy!
48 Hainareo soa* ty raha nataon’ny razambenareo reo, kanefa mahazo hatò aminareo. Rozy moa namono an’ny mpaminany rey, fa nareo mamboatsy ty lolon-drozy.
49 Zay koa ty antony nahavy an’ny Ndranahary hendry iny* nivola hoe: ‘Haniraky mpaminany noho apostoly amin-drozy any aho. Ty sisany hovonoan-drozy noho henjehin-drozy,
50 amy zay taranaky toy ro ho tompon’andraikitsy* amy ty lion’ny mpaminany iaby nalatsaky liany nanorena ani-zao tontolo zao,
51 nanomboky tamy lion’i Abela zisiky tamy lion’i Zakaria, azy nivonoa tanelanelan’ny alitara noho trano-Ndranahary* teo iny. Ambarako anareo vatany fa ho tompon’andraikitsy* amy raha zay taranaky toy.
52 “Ho azon-draha nareo mahay Lalàna reo, satria nalanareo ty lakilèn’ny fahaiza a-Ndranahary! Nareo tsy militsy, kanefa ze hilitsy ao sakananareo.”
53 Ka lafa niala teo ie, le nisamborian’ny mpanora-dalàna noho Fariseo rey, le nientsahin-drozy fanontanea maro.
54 Bakeo nambembenan-drozy ze raha hovolaniny mba hisy raha hitanjahan-drozy azy.
Fanamariha ambany pejy
^ Na: “hatao masy; hohajà satria masy.”
^ Abt: “mofo.”
^ Abt: “nitrosa.”
^ Abt: “ka manday anay amy fakam-panahy.”
^ Abt: “ampitrosao.”
^ Na: “nisisiky.”
^ Na: “Paipaiho.”
^ Na: “mamaipaiky.”
^ Fransè: scorpion.
^ Anara ikaiha an’i Satana.
^ Abt: “rantsantana-Ndranahary.”
^ Abt: “fa nitratsin’ny Fanjakà-Ndranahary nareo.”
^ Na: “sobiky fanamezà.”
^ Na: “ho feno hazavà.”
^ Abt: “raty.”
^ Na: “Lafa mahita soa.” Abt: “Lafa tsotra.”
^ Na: “nandry nihorira.”
^ Fanasà tana mifanaraky amy takin’ny Lalàna resahy eto io.
^ Na: “manadio ty ivelan’ny kopy noho finga.”
^ Na: “ho an’ny mahantra.” Henteo F.S.B. “Fiferinesa ty mahantra.”
^ Na: “traka.”
^ Nitakin’ny Lalàna hoe laha mahavokatsy 10 paniè ty tanin’olo raiky, le tokony hamea a-Ndranahary ty paniè raiky.
^ Na: “pilasy farani-ze soa.”
^ Na: “tsy misy famantara.”
^ Na: “Nareo vavolombelo mahay.”
^ Abt: “fahendrea-Ndranahary.”
^ Na: “hatao ankety.”
^ Na: “tempoly.”
^ Na: “hatao ankety.”
