Nisoratin’i Lioka 12:1-59
-
Leviran’ny Fariseo (1-3)
-
Ndranahary ro atahoro, fa tsy olo (4-7)
-
Maneky hoe mpianatsin’i Kristy (8-12)
-
Fanohara mikasiky an’ny lahilahy panarivo tsy mandiniky iny (13-21)
-
Ka miasa loha sasy (22-34)
-
Aondry vitsy (32)
-
-
Miambena avao (35-40)
-
Mpanompo azo atokisa noho mpanompo tsy azo atokisa (41-48)
-
Tsy handay fiadana fa handay fisaratsaraha (49-53)
-
Ilà ty mandiniky ty raha miseho (54-56)
-
Miezaky hifandamy (57-59)
12 Tanatin’ny fotoa zay, nisy vahoaky an’arivony nivorivory le nifanao kisitsy. Le niresaky tamy mpianatsiny rey tse ie hoe: “Miambena amy leviran’ny Fariseo, zany hoe ty fiatsarambelatsihin-drozy.
2 Fe tsy misy raha soa hajary ka hoe tsy haboaky sady tsy misy sekirè tsy ho hay.
3 Ho re amy mazava eny zany ze raha volaninareo amy maìky ao, le hotorỳ baka anabo trano eny ze raha bisibisihinareo an-tranonareo ao.
4 Ho zao koa ty volaniko aminareo namako reo: Ka mavaka ani-ze mahavita mamono anareo, kanefa bakeon’iny tsy mahavita manao raha raty aminareo mandilatsy ani-zay.
5 Fa hatoroko anareo hoe ia ty tokony hatahoranareo: Matahora ani-Azy mana fahefà hamono anareo noho hanoraky anareo amy Gehena* any iny. Ampoliko ndraiky hoe matahora Azy.
6 Drala vy kelikely* roe ro amarota foly limy, sa tsy zay? Fe tsy misy halino-Ndranahary* ndre ty raiky amy raha rey.
7 Fa nareo, ndre ty volon-dohanareo aza voaisaky iaby. Ka matahotsy fa mbo sarotsy mandilatsy foly maro biby nareo.
8 “Ambarako anareo fa ze maneky amason’olo hoe mpianatsiko, le heken’ny Anak’olo anatrehan’ny anjeli-Ndranahary eo koa.
9 Fa ze tsy maneky amason’olo hoe mpianatsiko, le tsy hekè anatrehan’ny anjeli-Ndranahary eo koa.
10 Ze mampiboaky safà manohitsy ty Anak’olo le hahazo fanengà hadisoa, fa ze mitiva fanahy masy tsy hahazo fanengà hadisoa mihintsy.
11 Lafa nareo andesin-drozy amin’olo maro eny* noho amy mpitondra fanjakà any noho amy manam-pahefà any, le ka miasa loha hoe ino ty hovolaninareo mba hiarovanareo ty vatanareo na manao akory ty hivolananareo azy na ze raha hovolaninareo.
12 Fa ty fanahy masy ro hampianatsy anareo ze tokony hovolaninareo amy fotoa* zay.”
13 Bakeo nisy olo raiky baka amy vahoaky ao nivola taminy hoe: “Mpampianatsy e, volano rahalahiko iny mba hizara lova amiko.”
14 Le hoy ty asan’i Jesosy taminy: “Ia va koahy ty nanendry ahy ho mpitsara na mpanelanela anareo roe?”
15 Le hoy ty asany tamy vahoaky rey: “Mba mimarikariha nareo, le mitandrema amy ze raha iaby mety hahavy anareo tsy ho mety afa-po* satria ndre manan-draha maro aza ty olo, le tsy mianky amy raha ananany ty ainy.”
16 Le nanao fanohara ie ka nivola tamin-drozy hoe: “Tena nahavokatsy ty tanin’ny lahilahy panarivo raiky zay,
17 ka nieritseritsy ie hoe: ‘Tsy misy pilasy hamoriako ty vokatsiko sasy, ka ino lahy ty hataoko e?’
18 Le hoy ty asany: ‘Aleo zao ty hataoko: Haropako trano fanajariako vokatsy reo, bakeo hamboatsy bevatavata aho, le hohajarìko ao iaby ty vokatsiko noho ty hananako.
19 Le hanao ho zao aho hoe: “Iha fa mana raha soa maro nihajarìnao sady fa ampy anatin’ny tao maro raha reo, ka ndany mitofatofa, mihinàna, minoma, mifalifalea.”’
20 Fe nivola taminy Ndranahary hoe: ‘Tsy mandiniky iha zao! Hisy hamono iha androany haly, ka ho an’ia raha navorinao reo?’
21 Zay ty hahazo ty olo mamory hanana ho ahi-ty vatany, kanefa tsy mba panarivo anatreha-Ndranahary eo.”
22 Bakeo nivola tamy mpianatsiny rey ie hoe: “Zay mahavy ahy hivola aminareo hoe: Ka atao mampiasa loha anareo sasy ty ainareo, anatini-zay ty hoe ino ty hohaninareo. Ka atao mampiasa loha anareo koa ty vatanareo, anatini-zay ty hoe ino ty hisikinanareo,
23 satria sarotsy mandilatsy ty hany ty ainareo, le sarotsy mandilatsy ty siky ty vatanareo.
24 Mba diniho moa goàky* rey! Tsy mamafy na mamory vokatsy raha rey sady tsy mana trano fanajaria vokatsy, fe amea-Ndranahary hany. Tsy mbo tena sarotsy mandilatsy ani-rey va nareo?
25 Ia aminareo ty mahay manalava ty androm-piainany, ndre kelikely* avao, lafa miasa loha?
26 Ka laha raha kelikely zay aza tsy hainareo, manino nareo ro mbo miasa loha amy raha hafa?
27 Mba diniho moa fitirinan’ny folera* rey! Tsy miasa mafy na mitrebiky* raha rey, kanefa ambarako anareo fa ndre Solomona nana raha soa maro iny aza, mbo tsy nisalotsy manahaky ty raiky amy rey.
28 Ka laha ty raha mitiry an-tonda any aza ampisikini-Ndranahary soasoa manahaky ani-zay, kanefa androany avao rey ro ho eo, fa hamaray hatoraky anaty afo,* vo handraky va nareo, nareo le kely finoa io?
29 Ka atao mampiasa loha sasy zany hoe ino ty hohaninareo na hinominareo, le ka miasa loha marè sasy,
30 satria raha iaby rezay ro tena irini-zao tontolo zao, kanefa hain’ny Babanareo an-danitsy any iny fa ilànareo raha iaby rezay.
31 Aleo ilao avao ty Fanjakàny, le hamea anareo koa raha rezay.
32 “Ka matahotsy nareo aondry vitsy io, fa tean’ny Babanareo ty hanome anareo an’ny Fanjakà iny.
33 Avilio ty hanananareo le manomeza raha mba hiferinesa ty mahantra.* Le manaova mpisy drala tsy mety simba, zany hoe hanana tsy mety lany an-danitsy any, satria tsy avin’ny mpangalatsy ty any sady tsy misy bibikely* manimba.
34 Fa amy ze pilasy misy ty hanananareo, le ho any koa ty fonareo.
35 “Misikìna noho manaova parè,* le areheto ty jironareo.
36 Tokony hanahaky mpanompo miamby ty tompony himpoly baka amy mariazy any nareo, amy zay lafa avy tompony iny ka mandondò,* le avy le hovohàn-drozy.
37 Sambatsy ze mpanompo hitan’ny tompony hoe miamby lafa avy tompony iny! Ambarako anareo mazava fa hisiky akanjo fandesy miasa tompony iny, ka hampangalany pilasy* amy latabo eo mpanompo rey, le ho avy ie hikarakara an-drozy.
38 Laha avy amy fotoa fiambena faharoe* tompony iny, ndre amy fotoa fiambena fahatelo* aza, ka mahita an-drozy parè, le sambatsy mpanompo rezay!
39 Fe tiarovo zao: Laha hain’ny tompon-trano hoe amy firy ty hiavian’ny mpangalatsy, le tsy ho nengany hovakỳ ty tranony.
40 Tokony ho parè avao koa nareo, satria amy lera tsy eritseretinareo ro hiavian’ny Anak’olo.”
41 Bakeo nivola Petera hoe: “Tompo, zahay avao va ro ivolananao an’ny fanohara zao sa ty olo iaby koa?”
42 Le nivola Tompo hoe: “Ia vatany moa mpanompo* azo atokisa noho mahihitsy* iny, azy nitendren’ny tompony hikarakara ty mpanompony* iaby iny, ka hanome hany ampy ho an-drozy avao amy fotoa mety?
43 Sambatsy mpanompo zay laha avy ty tompony ka mahita azy manao ani-zay!
44 Ambarako anareo mazava fa hotendreny hiandraikitsy ty hananany iaby ie.
45 Fa laha mivola anainy any mpanompo iny hoe: ‘Mba ela koa tompoko zay vo avy!’ ka manomboky mamango an’ny mpanompolahy noho mpanompovavy rey ie, sady mihina noho mino bakeo mamo,
46 le ho avy amy andro tsy ampoiziny noho amy lera tsy hainy ty tompony, ka hameany sazy farani-ze marè ie, le halefany miaraky amin’olo tsy azo atokisa rey.
47 Le hahazo vango maro biby mpanompo zay satria fa nihainy ty sitrapon’ny tompony kanefa tsy nioma ie na tsy nanao ze raha nampanoviny azy.*
48 Fa ze tsy nahay ty sitrapon’ny tompony, kanefa nanao raha tokony hamangoa azy, le hahazo vango kelikely avao. Ze namea maro, le ho maro koa ty hotakỳ aminy. Le ze nanankìna raha maro, le ho maro mandilatsy ty mahazatsy ty hotakỳ aminy.
49 “Niavy handrehitsy afo an-tany eto aho. Ka laha fa mirehitsy afo iny, ino koa ty mbo iriko mandilatsy ani-zay?
50 Fe misy batisa tokony hanaova batisa ahy, le tena matahotsy aho zisiky hivitan’ny raha zay!
51 Mieritseritsy va nareo hoe niavy handay filongoa an-tany etoy aho? Tsy zay mihintsy! Ambarako anareo fa niavy handay fisaratsaraha aho.
52 Satria hisy olo limy anaty trano raiky tsy hifanaraky manomboky henanizao, ka ty telo hanohitsy ty roe, le ty roe hanohitsy ty telo.
53 Tsy hifanaraky rozy, ka ty baba hanohitsy ty anakilahiny le ty anakilahy hanohitsy ty babany, ty reny hanohitsy ty anakampelany le ty anakampela hanohitsy ty reniny, ty rafozambavy hanohitsy ty vinantovaviny le ty vinantovavy hanohitsy ty rafozambaviny.”
54 Bakeo nivola tamy vahoaky rey koa ie hoe: “Lafa mahita rahona miakatsy baka andrefa eny nareo, le avy le mivola hoe: ‘Hizinja ora toy.’ Le zay vatany ty miseho.
55 Le lafa hitanareo hoe baka antimo any tsioky iny, le mivola nareo hoe: ‘Hafana biby andro toy.’ Le zay vatany ty miseho.
56 Mpiatsaravelatsihy nareo! Hainareo ty mandiniky ty raha miseho amy tany toy noho amy lanitsy eny, ka manino ro tsy hainareo ty mandiniky an’ny raha miseho amy fotoa henanizao toy?
57 Manino nareo ro tsy miezaky hahay hoe ino ty tokony hataonareo?*
58 Laha mandeha amy manam-pahefà any miaraky amin’olo mitory anao iny, ohatsy, iha le miezaha hifandamy aminy tany mbo an-dala eny nareo. Amy zay tsy hampikaiky anao ho amy mpitsara eny ie, le mpitsara iny tsy hanolotsy anao amy mpanatanteraky didim-pitsarà, le mpanatanteraky didim-pitsarà iny koa tsy hampigadra anao.
59 Ambarako anao fa tsy ho tafaboaky any mihintsy iha, laha tsy fa voaloanao zisiky amy ty drala maliniky* farany tokony haloanao.”
Fanamariha ambany pejy
^ Abt: “Asariona.”
^ Na: “tsy misy hoe tsy darea-Ndranahary.”
^ Na mety hoe “amy synagoga any.”
^ Abt: “lera.”
^ Na: “haniriniry rahan’olo.”
^ Na: “gañàky.”
^ Abt: “hakiho raiky.”
^ Na: “lisy.”
^ Na: “miasa foly.”
^ Abt: “laforo.”
^ Henteo F.S.B. “Fiferinesa ty mahantra.”
^ Abt: “samoina”, a Israely any. Bibikely manan’elatsy mitovitovy amy kiloloky rey.
^ Abt: “Fehezo ty vanianareo.”
^ Na: “mamaipaiky.”
^ Abt: “hovolaniny mba handry mihorira.”
^ Manomboky amy 9 haly eo ho eo zisiky vakimirahaly.
^ Manomboky vakimirahaly zisiky amy 3 maray eo ho eo.
^ Na: “mpiandraikitsy ty an-trano ao.”
^ Na: “hendry.”
^ Na: “ty mpiasany an-trano ao.”
^ Na: “tsy nanao raha mifanaraky amy sitrapon’ny tompony.”
^ Na: “ino ty marina?”
^ Abt: “leptona.”
