Nisoratin’i Lioka 15:1-32
15 Nivorivory tamy Jesosy teo amy zay ty mpitaky hetra noho ty mpanota iaby mba hijanjy azy.
2 Le nimenimeny Fariseo noho mpanora-dalàna rey hoe: “Mandramby soa an’ny mpanota reo lahilahy tỳ sady miaraky mihina amin-drozy.”
3 Bakeo nanao fanohara ho zao Jesosy ka nivola tamin-drozy hoe:
4 “Ia aminareo reo laha mana aondry 100 ka nitrobo ty raiky, ro tsy hanenga an’ny 99 rey amy dezera* any, le hila an’ny raiky nitrobo iny zisiky hahitany azy?
5 Ka lafa hitany aondry iny, le hataony an-tsorokiny eny sady ho falifaly ie.
6 Lafa avy an-tranony any amy zay ie, le hokaihiny ty namany noho ty olo tanà raiky aminy, le hovolaniny hoe: ‘Mifalifalea miaraky amiko fa fa nihitako aondriko nitrobo iny.’
7 Ambarako anareo koa, fa ty mpanota raiky mibebaky ro tena hahafalifaly an-drozy an-danitsy any, mandilatsy ty olo marina 99 tsy mila mibebaky.
8 “Na ia ty ampela mana drala vy kelikely folo drakma ka nitrobo ty raiky, ro tsy handrehitsy jiro le hamafa ty tranony bakeo hila soa an’ny raha iny zisiky hahitany azy?
9 Ka lafa hitany raha iny, le hokaihiny ty namany* noho ty olo tanà raiky aminy le hovolaniny hoe: ‘Mifalifalea miaraky amiko fa fa nihitako drala* nitrobo iny.’
10 Ambarako anareo fa falifaly manahaky ani-zay koa ty anjeli-Ndranahary lafa misy mpanota raiky mibebaky.”
11 Hoy ty asany bakeon’iny: “Nisy lahilahy raiky nana anaky roe lahy.
12 Le nivola tamy babany azy zay iny hoe: ‘Baba, ameo ahy ty anjara hanana tokony ho ahy.’ Le nizaràn’ny baban-drozy tamin-drozy roe lahy ty hananany.
13 Andro vitsivitsy tafarani-zay, navorin’ny zainy iny ty hananany iaby, le nandeha an-tany lavitsy any ie. Naheriloha biby* ie lafa tany, ka nilanilany fahatany hananany rey.
14 Lafa nilaniny iaby hananany rey, le nisy kerè tamy tany iny iaby, ka lasa nahantra ie.
15 Nandeha namonjy tompon-tany raiky tamy tany iny ao mihintsy aza ie, le nisisiky hiasa taminy ao. Farany nirahin’olo io hiaraky ty kosòny ta an-tonda any ie.
16 Le nainany ho vintsin’ny hanin-kosò* rey ie, fe tsy nisy raha namean’olo azy mihintsy.
17 “Lafa nandiniky soa ie, le nivola hoe: ‘Maro henanizay ty olo karamàn’ny babako tsy mijaly hany, kanefa zaho ho matin’ny kerè atoy!
18 Aleo aho himpoly amy babako any le hivola aminy hoe: “Baba, fa nanota tamy lanitsy noho taminao aho.
19 Tsy maeva hokaihy hoe ananao sasy aho, fa mba anovo manahaky ty raiky amin’olo karamànao reo.’”
20 Farany niongaky ie, le nandeha amy babany any. Fe mbo nilavitsy ie, le fa nijilon’ny babany. Le niferinay azy babany iny ka nilailay le nandrakoky azy* sady nanoroky azy.
21 Bakeo nivola taminy anany iny hoe: ‘Baba, fa nanota tamy lanitsy noho taminao aho. Tsy maeva hokaihy hoe ananao sasy aho.’
22 Fe nivola tamy ty mpanompony babany iny hoe: ‘Ndany malaky! Mangalà siky lava azy farani-ze soa iny, le ampisikino azy. Le asio peratsy ty tanany, le asio kapa ty tombony.
23 Alao koa anak’aomby nivondrahy iny le vonò. Le ndao tsika hihina noho hanao fety,
24 satria fa nimaty anako toy fe nivelo ndraiky, sady fa nitrobo fe nihita ndraiky.’ Le niaraky nifalifaly rozy.
25 “Ta an-tonda any zokiny iny tamy zay. Lafa noly ie ka nihanarìny an’ny trano iny, le naharè moziky noho olo mitsinjaky.
26 Farany nikaiky mpanompo raiky ie le nanontany azy hoe misy ino ty ao.
27 Nivola mpanompo iny hoe: ‘Niavy ao rahalahinao iny, le namono an’ny anak’aomby nivondrahy iny babanao, satria tafimpoly aminy eto rahalahinao iny sady salama soa.’
28 Fe neloky zokiny iny ka tsy nahefa nilitsy. Le niboaky babany iny ka nangataky azy mba hilitsy.
29 Fe hoy ty navaliny an’ny babany: ‘Hainao, fa tao maro zay ty nanompoako anao, sady mbo tsy nandà ty raha nampanovinao ahy mihintsy aho ndre indraiky aza, kanefa ndre anak’aosy* raiky aza mbo tsy nameanao ahy mba hifalifaleako miaraky amy ty namako.
30 Kanefa laha vo niavy ananao io le namonoanao an’ny anak’aomby nivondrahy iny. Ie amin’io nandany ty hanananao tamy makorely any.’
31 Le nivola taminy babany hoe: ‘Ka iha anè anako tamiko teto avao, le ahinao iaby ze raha iaby ananako!
32 Fe tsy maintsy manao fety noho mifalifaly tsika, satria fa nimaty rahalahinao io fe nivelo ndraiky, sady fa nitrobo fe nihita ndraiky.’”
Fanamariha ambany pejy
^ Na: “an-diomonto.”
^ Na: “ty ampela namany.”
^ Abt: “drakma.”
^ Na: “Nanao ze teany hatao.”
^ Abt: “voan’ny hazo karobie.”
^ Abt: “niambotraky am-bozony eny.”
^ Na: “anaka bengy.”
