Nisoratin’i Lioka 2:1-52
2 Tamy fotoa zay, nampiboaky didy Aogosto Kaisara hoe tsy maintsy misoratsy anara ty olo iaby amy tany iny eo.*
2 Kyrenio ty nigoverneran’i Syria, tamy fotoa nanaova an’ny fisorata anara voalohany io.
3 Le samby nandeha an-tanàn-drozy any iaby ty olo iaby mba hosorata anara.
4 Le niala baka a Galilia, baka amy tanàn’i Nazareta ao Josefa satria taranakin’i Davida koa ie sady fianakaviany. Nandeha tamy tanàn’i Davida a Jodia any ie, zany hoe ta Betlehema any.
5 Nandeha any ie mba hisoratsy anara miaraky amy Maria valiny.* Nibevoka be fa ho teraky Maria tamy zay.
6 Amy rozy mbo tany iny, niavy ty fotoa hiterahany.
7 Le niteraky an’ny anany talanolo iny ie, ka nifonosany lamba ajà iny, le nampiroroany tamy mpisy akata* ao, satria tsy nisy trano ho an-drozy sasy tamy hotely firoroa any.
8 Nisy mpiaraky aondry koa tamy faritsy io. Nijano ta an-tonda* any rozy niamby an’ny aondrin-drozy rey tamy andro haly.
9 Tampoky teo, nisy anjelin’i Jehovah nitsanga talohan’ny mpiaraky aondry rey teo. Namirapiratsy nanodidy an-drozy ty voninahitsin’i Jehovah, ka tena natahotsy rozy.
10 Fe hoy ty asan’ny anjely iny hoe: “Ka matahotsy fa hanambara vaovao soa aminareo aho. Vaovao soa handay fifalea bevata ho ahi-ty olo iaby raha io,
11 satria mpanavotsy ro teraky ho anareo androany amy tanàn’i Davida ao, tsy ia io fa Kristy Tompo.
12 Ka zao ty famantara ho anareo: Hahita ajà vo teraky nareo. Nifonosa lamba ie, le miroro amy mpisy akata* ao.”
13 Tampoky teo, nisy anjely maro baka amy tafikin’ny lanitsy any niaraky tamy anjely iny. Le nidera a-Ndranahary rozy ka nivola hoe:
14 “Voninahitsy ho ahi-Ndranahary amy farany anabo any, le fiadana* an-tany etoy ho ahi-ty olo mahazo hatò aminy!”
15 Lafa niala teo anjely rey ka nana an-danitsy any, le nivola mpiaraky aondry rey hoe: “Ndao tsika ho a Betlehema any hanenty an’ny raha niseho nambaran’i Jehovah antsika zay!”
16 Le nandeha malaky rozy ka nahita an’i Maria noho Josefa, le nihitan-drozy koa ajà vo teraky iny niroro tamy mpisy akata* ao.
17 Lafa nahita an’ny raha zay rozy, le nitantara ze raha nivolany tamin-drozy mikasiky an’ny ajà iny.
18 Le nitseri-draha ze olo iaby naharè ty raha nivolanin’ny mpiaraky aondry rey.
19 Fe nitiarovin’i Maria soa resaky iaby rezay, le nidinihiny soa* hoe mety ho ino ty dikan’ny raha rey.
20 Bakeo nimpoly mpiaraky aondry rey, le nanome voninahitsy noho nidera a-Ndranahary rozy satria raha nivolany tamin-drozy rey mihintsy ro nihitan-drozy noho niren-drozy.
21 Lafa nifeno valo andro ajà iny ka niavy ty fotoa hanavara azy, le natao hoe Jesosy ty anarany, satria zay ty anara nivolanin’ny anjely iny talohan’ny nampisy azy tan-kibo* any.
22 Lafa niavy ty fotoa fidiova* araky ty Lalànan’i Mosesy, le nandesin’i Josefa noho Maria nana a Jerosalema any ie mba hatolotsy ho an’i Jehovah,
23 satria voasoratsy amy Lalànan’i Jehovah ao hoe: “Ho masy ho an’i Jehovah ty talanolo iaby.”
24 Nanome fanatitsy mifanaraky amy raha volanin’ny Lalànan’i Jehovah koa rozy, zany hoe “dehoky roe na pizon kelikely roe.”
25 Nisy lahilahy kaihy hoe Simeona ta Jerosalema ao. Olo marina noho mpivavaky be ie. Nandiny fampionona ho an’Israely ie, sady nitarihin’ny fanahy masy.
26 Ankoatsini-zay, nambara-Ndranahary taminy tamy alalan’ny fanahy masy, fa tsy ho maty ie laha tsy fa mahita an’ny Kristin’i Jehovah iny.
27 Le nitarihin’ny fanahy ie, ka nilitsy tamy tempoly tao. Tamy fotoa zay mihintsy ro nandesin’ny babany noho reniny tao Jesosy,* mba hanao ty fomba mahazatsy nitakin’ny Lalàna.
28 Le nitrotroan’i Simeona ajà iny, ka nidera a-Ndranahary ie hoe:
29 “Tompo Faratampony, engànao handeha am-piadana amy zay mpanomponao toy araky ty fa nivolaninao,
30 satria fa hitan’ny masoko ty fomba handaisanao fanavota.
31 Nataonao hitan’ny firenena iaby ty nanomananao azy.
32 Ie ro hazavà hanafaky ty raha nanampy ty mason’ny firenena rey sady ho voninahitsin’ny Israely vahoakinao.”
33 Le nitseriky ty ray aman-drenin’ny ajà iny lafa naharè ty resakiny mikasiky an’ny ajà iny.
34 Le nitso-drano an-drozy Simeona, ka hoy ty asany tamy renin’ny ajà iny, zany hoe tamy Maria: “Ajà toy ro hahavy olo maro amy Israely eo ho lavo noho ho tafiongaky ndraiky. Ho famantara tsy hasian’olo dikany koa ie,
35 mba hiseho ty eritseritsy am-pon’olo maro any. (Ndre iha io aza ho sahala amy voatomboky amy sabatsy lava rey.)”
36 Le nisy mpaminanivavy kaihy hoe Ana, baka amy fokon’i Asera. Anakampelan’i Fanoela ie. Fa antitsy biby ampela io. Niaraky nipetraky tamy valiny ie tanatin’ny fito tao, tafaran’ny nifanambalean-drozy.*
37 Fa maty valy ie, le fa 84 tao. Niavy tsy tampaky tamy tempoly ao ie, nanao fanompoa masy ndre andro ndre haly, sady nifaly hany noho nanao vavaky fisolohoa.
38 Tamy fotoa zay mihintsy, namonjy teo ie ka nanomboky nisaotsy a-Ndranahary, noho niresaky mikasiky an’ny ajà iny tamy ze olo iaby nandiny ty fanavota an’i Jerosalema.
39 Ka lafa nivitan’i Josefa noho Maria ze raha iaby nitakin’ny Lalànan’i Jehovah, le nimpoly ta Galilia any rozy, zany hoe tamy tanàn-drozy ta Nazareta ao.
40 Le nihabè ajà iny, ka nihanatanjaky noho nitombo fahendrea sady nahazo hatò tamy Ndranahary avao.
41 Fa mpandeha a Jerosalema any ty ray aman-dreniny santao, saky fetin’ny Paska.
42 Lafa ni-12 tao ie, le nandeha any manahaky fataon-drozy saky fety rey rozy.
43 Noly rozy lafa nitampitsy fety iny. Fe Jesosy mbo nijano ta Jerosalema any, kanefa tsy niambin’ny ray aman-dreniny rey. Mbo nikelikely ie tamy zay.
44 Ataon-drozy fa niaraky tamin’olo lia raiky tamin-drozy rey ie. Fa nandeha tanatin’ny andro raiky rozy vo nila azy tamy longon-drozy noho tamy ze olo hain-drozy any.
45 Fe tsy nihitan-drozy ie, farany nimpoly ta Jerosalema any rozy le nila azy mbaombao.
46 Telo andro tafara atoy, nihitan-drozy tamy tempoly ao ie. Nipetraky tanivon’ny mpampianatsy rey teo ie, sady nijanjy an-drozy noho nanontany an-drozy.
47 Le nitseriky tamy ty fahihirany noho ty valin-teniny ze olo iaby nijanjy azy.
48 Lafa nahita azy amy zay babany noho reniny le nitseriky, ka hoy reniny taminy: “Nanino lahy zahay anako nataonao ho toy io? Nisahira nila anao zahay amy babanao.”
49 Fe hoy ty asany tamin-drozy: “Manino nareo nila ahy io? Tsy hainareo va fa tsy maintsy ho an-tranon’ny Babako ato aho?”
50 Fe tsy niazon-drozy hoe ino ty teany hovolany.
51 Bakeo nijotso niaraky tamin-drozy ie, ka nimpoly ta Nazareta any. Nanoriky ty safàn-drozy* avao ie. Le nitiarovin’ny reniny soa* koa safà iaby rezay.
52 Le nihanitombo avao ty fahendrean’i Jesosy, sady nihabè ie, le nihanahazo hatò tamy Ndranahary noho tamin’olo.
Fanamariha ambany pejy
^ Abt: “amy tany iaby misy olo.”
^ Na: “azy fa lasa valiny iny, araky ty fa nifanekea.”
^ Abt: “fihinana akata.”
^ Na: “tamy pilasy fiarakandrova.”
^ Abt: “fihinana akata.”
^ Na: “filongoa.”
^ Abt: “fihinana akata.”
^ Abt: “nidinihiny soa tam-pony ao.”
^ Na: “tan-troky.”
^ Resahin’ny Lalànan’i Mosesy hoe lafa misy ajà ateraky le misy fotoa anomezan’ny ray aman-dreniny fanatitsy mba halio ty fahita-Ndranahary an-drozy.
^ Abt: “Jesosy mbo nianakajà.”
^ Abt: “naha virjiny azy.”
^ Na: “Naneky an-drozy.”
^ Abt: “nihajarin’ny reniny tam-pony ao.”
