Nisoratin’i Lioka 20:1-47
20 Ndraiky andro, lafa nampianatsy an’ny olo tamy tempoly ao rey Jesosy sady nanambara ty vaovao soa, le namonjy azy ty sefon’ny mpisoro noho ty mpanora-dalàna noho ty anti-panahy,
2 ka nivola taminy hoe: “Ambarao anay hoe fahefà baka aia anaovanao raha ataonao reto io? Le ia ty nanome anao an’ny fahefà zay?”
3 Le hoy ty navaliny an-drozy: “Zaho koa mba hametraky fanontanea aminareo ka valeo:
4 Baka an-danitsy any va sa baka amin’olo ty nahazoan’i Jaona fahefà hanao batisa?”
5 Le nifampiresaky rozy hoe: “Laha tsika mivola hoe: ‘Baka an-danitsy any’, le hivola ie hoe: ‘Ka nanino nareo ro tsy nino azy?’
6 Kanefa laha mivola tsika hoe: ‘Baka amin’olo’, le hitoraky vato antsika vahoaky iaby reo, satria resy lahatsy rozy hoe mpaminany Jaona.”
7 Farany namaly rozy hoe tsy hain-drozy hoe baka aia.
8 Le hoy Jesosy tamin-drozy: “Zaho koa tsy hivola aminareo hoe fahefà baka aia ty anaovako ani-reto.”
9 Bakeo nanao an’ny fanohara toy ie, le nivola tamy vahoaky iny hoe: “Nisy lahilahy raiky nanao tanimboaloboky, le nampanoviny taravay tamy mpamboly raha iny. Bakeo nandeha an-tany hafa any ie, le nielaela tany.
10 Lafa niavy ty fotoa famoria vokatsy, le naniraky mpanompo ho amy mpamboly rey any ie, mba hangalaky vokatsy sisany baka amy tanimboaloboky iny. Fe nivangovangoan’ny mpamboly rey ie, bakeo nampolìn-drozy tanampolo.
11 Le naniraky mpanompo hafa ndraiky lahilahy iny. Fe nivangovangoan-drozy koa mpanompo io sady nafahin-drozy baraka,* le nampolìn-drozy tanampolo.
12 Naniraky mpanompo fahatelo koa ie, fe mbo nivangovangoan-drozy koa mpanompo io, le naratsy bakeo niroasin-drozy.
13 Le hoy tompon’ny tanimboaloboky iny: ‘Ino lahy ty hataoko? Aleo hirahiko any anako teako iny, fa mety mba hohajan-drozy ie.’
14 Lafa nahita azy mpamboly rey le nifampiresaky hoe: ‘Ingy mpandova iny! Ndao hovonoantsika ie, amy zay ho azontsika ty lovany!’
15 Le nitaritaritin-drozy tambalikin’ny tanimboaloboky iny any ie, bakeo nivonoan-drozy. Ka ino amy zay ty hataon’ny tompon’ny tanimboaloboky iny amin-drozy?
16 Ho avy ie, le hovonoany mpamboly reo, bakeo hameany olo hafa tanimboaloboky iny.”
Lafa naharè ani-zay rozy le nivola hoe: “Enganè mba tsy hisy zay!”
17 Fe nanenty an-drozy soa Jesosy sady nivola hoe: “Ka ino zany ty dikani-azy voasoratsy iny hoe: ‘Ty vato tsy nitean’ny* mpamboatsy trano ro lasa vato fehizoro farany bevata?’*
18 Ho potipotiky ze miravoky amy vato io eo, le ho torotoro ze iravohany.”
19 Tamy fotoa* zay mihintsy, le nila hevitsy hanambora azy mpanora-dalàna noho sefon’ny mpisoro rey, satria nihain-drozy fa rozy ty tan-tsain’i Jesosy ao tamy fanohara io. Fe natahotsy an’ny vahoaky rey rozy.
20 Farany nambembenan-drozy* amy zay Jesosy, bakeo naniraky olo ho aminy any rozy. Nikaramàn-drozy tambalimbaliky any olo reo mba hanao kisary olo marina, amy zay hamandriky an’i Jesosy amy ty raha volaniny, le ho afaky handay azy amy manam-pahefà noho amy governera* any rozy.
21 Le nanontany an’i Jesosy rozy hoe: “Mpampianatsy e, hainay fa marina ty raha volaninao noho ampianarinao, sady tsy mitingy volon’olo* iha fa marina ty fampianaranao mikasiky a-Ndranahary.
22 Azonay atao va sa tsy azonay atao* ty mandoa hetra* amy Kaisara?”
23 Fe nihain’i Jesosy hoe ta hamandriky azy rozy, ka hoy ty asany tamin-drozy:
24 “Mba ameo denaria raiky bakao aho. Sarin’ia io, le anaran’ia eo io?” Le hoy ty asan-drozy: “Ahin’i Kaisara.”
25 Le hoy ty asany tamin-drozy: “Dikani-zay zany, aloavo amy Kaisara ze ahin’i Kaisara, le amy Ndranahary ze ahi-Ndranahary.”
26 Le tsy niafaky namandriky azy tamy ty raha nivolaniny rozy, ka tsy nahafivola satria nitseriky tamy valin-teniny iny. Tamin’olo maro eo rozy amin’io.
27 Fe namonjy azy ty sisany amy Sadoseo rey, azy mivola hoe tsy misy fameloma ty maty rey. Nanontanean-drozy ie hoe:
28 “Mpampianatsy e, nanoratsy ho antsika Mosesy hoe: ‘Laha maty ty lahilahy raiky ka nanenga ty valiny kanefa mbo tsy niteraky, le tokony hanambaly an’ny valiny iny ty rahalahin’ny lahilahy io, ka hanome taranaky ho an’ny rahalahiny nimaty iny.’
29 Nisy olo rezay amy zay, fito mirahalahy rozy. Nanambaly talanolo iny, le nimaty fe tsy niteraky.
30 Le nimaty koa azy faharoe iny,
31 ka nanambaly an’ny ampela iny azy fahatelo iny. Nanahaky ani-zay iaby rozy fito. Samby nimaty tsy niteraky rozy.
32 Nimaty koa ampela iny tamy farany.
33 Ka lafa hovelomy ty maty, ho valin’ia zany ampela iny? Satria samby fa nanambaly azy iaby rozy fito mirahalahy.”
34 Nivola tamin-drozy Jesosy hoe: “Ty anani-zao tontolo zao* ro mangata-baly noho alan’olo valy.
35 Fa ze hita hoe maeva hiay amy tontolo ho avy iny noho maeva hovelomy ndraiky, le tsy hangata-baly na halàn’olo valy.
36 Tsy ho mety maty sasy rozy laha ty marina, fa hanahaky an’ny anjely rey. Ho anaki-Ndranahary koa rozy, satria anan’ny fameloma ty maty.
37 Fa ndre Mosesy aza niresaky hoe hovelomy ty maty, tamy tantara mikasiky an’ny hazo* nirehitsy iny, lafa ie nikaiky an’i Jehovah hoe ‘Ndranaharin’i Abrahama noho Ndranaharin’i Isaka noho Ndranaharin’i Jakoba.’
38 Tsy Ndranaharin’olo maty ie, fa ahi-ty velo, satria aminy le velo iaby rozy iaby reo.”
39 Le nivola ty mpanora-dalàna sisany hoe: “Marina resakinao zay mpampianatsy.”
40 Le tsy nahasaky nanontany azy sasy rozy.
41 Fe nanontany an-drozy koa Jesosy hoe: “Manino ty olo ro mivola hoe anan’i Davida, Kristy?
42 Kanefa Davida mihintsy ro mivola amy bokin’ny Salamo ao hoe: ‘Hoy Jehovah tamy Tompoko: “Mipetraha ankavanako etoa,
43 zisiky hanaovako ty fahavalonao ho fasianao tomboky.”’
44 Ka laha Davida aza nikaiky azy hoe Tompo, akory zany ty maha anany azy?”
45 Amy olo rey iaby mbo nijanjy azy iny, le nivola tamy mpianatsiny rey ie hoe:
46 “Miambena amy mpanora-dalàna, azy tea mandehandeha manao siky lava rey. Tean-drozy ty hoarahabàn’olo am-bazary eny, noho ty hahazo pilasy aloha eny* lafa amy synagoga ao. Tean-drozy koa ty pilasy farani-ze soa amy fihinana hariva rey.
47 Lanìn-drozy ty hananan’ny* ampela maty valy rey, le manao vavaky lava biby rozy mba hahitan’olo an-drozy. Hahazo sazy marerè* kokoa rozy.”
Fanamariha ambany pejy
^ Na: “nataon-drozy ze hahamenatsy azy.”
^ Na: “vato tsy neken’ny.”
^ Abt: “lasa lohan’ny zoro.”
^ Abt: “lera.”
^ Abt: “narahin-drozy maso soa.”
^ Abt: “amy fanjakà noho amy fahefàn’ny governera.”
^ Na: “tsy manavakavaky.”
^ Na: “Mety va sa tsy mety.”
^ Hetra takỳ amin’olo kiraidraiky resahy eto io.
^ Na: “anan’ny fotoa henanizao.” Henteo F.S.B. “Zao tontolo zao.”
^ Hazo kelikely misy fatipatiky resahy eto io.
^ Na: “pilasy farani-ze soa.”
^ Abt: “Akapan-drozy ty tranon’ny.”
^ Na: “mavesatsy.”
