Nisoratin’i Lioka 21:1-38
21 Nanenty amy zay Jesosy, ka nahita an’ny olo panarivo rey nandatsaky ty fanomezan-drozy tamy fandatsaha drala ao.
2 Bakeo ie nahita ampela raiky maty valy sady mahantra, nandatsaky drala vy roe farani-ze kelikely.*
3 Le hoy ty asany: “Ambarako anareo mazava fa ampela maty valy sady mahantra io ro nandatsaky maro mandilatsy an-drozy iaby.
4 Satria olo iaby reo nandatsaky fanomeza baka amy ze sisa tsy nilanin-drozy, fa ampela io ndre mahantra aza, nanome ty velomam-pony iaby.”
5 Tafarani-zay, nisy olo niresaky mikasiky ty tempoly, noho ty fomba nampipozipozỳ azy tamy vato soasoa noho tamy raha voatoka ho ahi-Ndranahary.
6 Le hoy Jesosy: “Ho avy ty andro handropaha an’ny raha hitanareo henanizao reo, ka tsy hisy vato hengà hifampitikitsy ty eo.”
7 Le nanontany azy rozy hoe: “Mpampianatsy e, ombia marina ty hisehoan’ny raha rezay, le ino ty ho famantara lafa ho avy raha rezay?”
8 Le hoy ty asany: “Miambena soa tsy no ho voafitaky nareo. Fa maro ty hisandoky ty anarako le hivola hoe: ‘Zaho ro ie’, noho hoe: ‘Fa marìny ty fotoa voatondro.’ Fe ka manaraky an-drozy.
9 Ankoatsini-zay, ka matahotsy nareo lafa maharè aly noho koronta.* Satria raha tsy maintsy hiseho tse reo, kanefa tsy avy le ho avy ty farany.”
10 Bakeo ie nivola tamin-drozy hoe: “Hisy firenena hialy amy firenena, le hisy fanjakà hialy amy fanjakà.
11 Hisy horohoron-tany be, le hisy kerè noho arety mandripaky amy pilasy samby hafa any. Hisy raha mampatahotsy ho hitan’olo, le hisy famantara bevata baka an-danitsy any.
12 “Fe alohan’ny hisehoan’ny raha iaby reo, le hanambotsy anareo noho hanenjiky anareo ty olo, ka handay anareo amy synagoga noho amy prizon any. Handesy amy mpanjaka noho amy governera any nareo satria manday ty anarako.
13 Ho afaky hitory amin-drozy nareo amy zay.
14 Anovo am-ponareo ao zany toy: Tsy voatery homaninareo sandrany ze raha havalinareo,
15 satria hatoroko anareo ze safà hovolaninareo sady hameako fahendrea nareo, ka ndre ty fahavalonareo iaby mitambatsy aza tsy haharesy anareo na hahavita hanohitsy anareo.
16 Ankoatsini-zay, ndre ty ray aman-dreninareo noho ty rahalahinareo noho ty longonareo noho ty namanareo aza, handay anareo amy manam-pahefà any,* ka hovonoan-drozy ty sisany aminareo.
17 Le halay anareo ty olo iaby satria manday ty anarako nareo.
18 Fe tsy hisy hihintsa* ndre ty raiky amy volon-dohanareo aza.
19 Laha miaritsy nareo, le hanavotsy ty ainareo.
20 “Fe lafa hitanareo hoe misy maramila manodidy an’i Jerosalema, le tiarovo fa fa marìny ty fandravà azy.
21 Le mila milay am-bohitsy any ze a Jodia any. Ze a Jerosalema ao koa mila miala ao, le ze ambanivohitsy any tsy tokony hilitsy a Jerosalema ao sasy.
22 Satria fotoa hanaova ty rariny* fotoa zay, mba hahatanteraky ty raha iaby voasoratsy.
23 Ho sahira ty ampela bevoka noho ty mampinono amy fotoa zay, satria tena harè ty fijalea amy tany toy eto sady hosazỳ firenena toy.
24 Ho matin’ny sabatsy rozy, ka handesy ho babo amy firenena iaby any, le hohitsahin’ny firenena hafa* Jerosalema zisiky hitamperan’ny fotoa voatondro ho ahi-ty firenena hafa.*
25 “Hisy famantara koa amy masoandro noho amy vola noho amy basia eny. Le ty an-tany etoy amy zay, hiasa loha ty olo sady hatahotsy satria hidoboky riaky iny sady hitavoaly.
26 Ty olo ho toira tratsin’ny tahotsy noho fandinisa ty raha ho avy ambony tany* etoy, satria hohozonkozony ty herin’ny lanitsy.*
27 Le bakeo ho hitan-drozy ty Anak’olo ho avy amy rahona eny, sady hana hery noho ho be voninahitsy.
28 Fa lafa manomboky miseho raha rezay, le mitsangàna soa ka miandrà satria fa marìny ty fanafaha anareo.”
29 Le nanao fanohara ie ka nivola tamin-drozy hoe: “Mba diniho ty aviavy noho ty hazo hafa iaby.
30 Lafa hitanareo manomboky misy raviny ie, le hainareo hoe fa marìny ty asara.
31 Ho zay koa fa lafa hitanareo hoe miseho raha reo, le tiarovo hoe fa marìny ty Fanjakà-Ndranahary.
32 Ambarako anareo mazava fa tsy ho lany mihintsy taranaky toy, zisiky hisehoan’ny raha iaby reo.
33 Ty lanitsy noho ty tany ho rava, fa ty safàko tsy ho rava mihintsy.
34 “Fe miambena soa tsy no hanavesatsy ty fonareo ty fihinana lisatsy marè noho ty fiboboha toaky noho ty fiasan-doha amy fiaina, ka tsy ho ambinareo ty hiavian’ny andro zay aminareo, fa ho tampoky
35 manahaky fandriky. Satria ho avy amy ze olo iaby mipetraky an-tany etoy raha zay.
36 Miambena avao zany, le misolohoa avao mba ho afaky hilay an’ny raha iaby tsy maintsy hiseho zay nareo, sady ho afaky hitsanga alohan’ny Anak’olo eo.”
37 Le nampianatsy tamy tempoly ao ie lafa atoandro, fe niala tao ie lafa haly, ka nijano tamy Vohitsy Oliva any.
38 Vo maraindray le fa niavy taminy tamy tempoly ao ty olo iaby mba hijanjy azy.
Fanamariha ambany pejy
^ Abt: “roe leptona.”
^ Na: “grevy; fanohera fahefà.”
^ Na: “hamadiky anareo.”
^ Na: “hanjavo.”
^ Na: “andro famalea.”
^ Na: “Jentilisa.”
^ Na: “Jentilisa.”
^ Na: “tany misy olo.”
^ Mety hoe ty masoandro noho ty vola noho ty basia.
