Nisoratin’i Lioka 24:1-53
24 Fe tamy andro voalohany amy herinandro* iny, le niavy maraindray be tan-dolo any rozy nanday an’ny menaky manitsy fa nomanin-drozy rey.
2 Fe nihitan-drozy hoe fa nikisaky vato iny fa tsy tamy lolo iny eo sasy.
3 Lafa nilitsy rozy, le tsy nahita an’ny fatin’i Jesosy Tompo iny.
4 Amy rozy mbo nitseri-draha teo iny, le ndreo nisy lahilahy roe nanao siky mamirapiratsy nitsanga tanilan-drozy eo.
5 Natahotsy ampela rey le niondriky soa tsy hahita an-drozy, ka hoy ty asan’ny lahilahy rey tamin-drozy: “Manino olo velo iny ro ilànareo amy maty atoy?
6 Tsy ato ie fa fa nivelo. Tiarovo raha nivolaniny taminareo tamy ie mbo ta Galilia any iny.
7 Nivola ie tamy zay hoe tsy maintsy hamea an-tanan’ny mpanota ty Anak’olo, bakeo hovonoa amy tsato-kazo eo, le ho velo amy andro fahatelo.”
8 Zay vo nitiaron’ny ampela rey raha nivolaniny iny,
9 le niala tamy lolo iny eo rozy, ka nitantara an’ny raha iaby rezay tamy Apostoly 11 rey noho tamy mpianatsiny hafa rey.
10 Tsy ia ampela reo fa Maria Magdalena noho Johana noho Maria renin’i Jakoba. Le niresaky an’ny raha rezay tamy apostoly rey koa ampela hafa niaraky tamin-drozy rey.
11 Fe atao raha olo mivolambola fahatany ty fahitan-drozy an’ny ampela reo, farany tsy ninoan-drozy.
12 Fe nitsanga Petera le nilay nana an-dolo any. Le niondriky ie mba hahitany ty tao, fe lamba rongony namonosa an’ny faty iny avao ty nihitany tao. Farany niala teo ie sady nieritseritsy hoe ino ty raha niseho.
13 Fe tamy fotoa zay mihintsy, ndrey nisy mpianatsy roe nandeha nana amy tanà kelikely raiky zay. Emaosy ty anaran’ny tanà io, le 11 kilometra* eo ho eo miala baka a Jerosalema ao ty misy azy.
14 Nifampiresaky mikasiky an’ny raha iaby niseho rey rozy.
15 Amy rozy niresadresaky mikasiky an’ny raha rey iny, namonjy an-drozy Jesosy, le nandeha mbeo niaraky tamin-drozy.
16 Nihitan-drozy ie fe tsy nihain-drozy.
17 Le hoy ty asany: “Ino raha mampialy hevitsy anareo an-dala etoy io?” Le nijano rozy sady hita hoe nalahelo.
18 Le hoy ty navalini-azy raiky mana anara Kleopasy iny: “Vahiny mipetraky raiky a Jerosalema any va iha io, ka tsy hainao* ty raha niseho tany tato ho ato zay?”
19 Le nanontany ie hoe: “Raha ino zao io?” Le hoy ty asan-drozy taminy: “Ty raha mikasiky an’i Jesosy baka a Nazareta any iny! Mpaminany ie, le tena niavaky ty fahità-Ndranahary azy noho ty fahitan’olo* azy, ndre tamy ty raha nataony zay ndre tamy ty raha nivolaniny.
20 Le nanday azy tamy Pilato any ty sefon’ny mpisoro noho ty mpitariky tamy Jiosy eo mba hamonoa azy. Le nifantsihin-drozy tamy tsato-kazo ie,
21 kanefa zahay nitamà hoe lahilahy iny ro hanavotsy ty Israely. Sady androany koa ty andro fahatelo tafaran’ny nisehoan’ny raha zay.
22 Nahatseriky anay koa raha nivolanin’ny ampela sisany taminay eo rezay, satria nandeha tan-dolo any vo maraindray be rozy,
23 ka lafa tsy nihitan-drozy fatiny iny, le nimpoly rozy sady nivola hoe nahita anjely niresaky tamin-drozy hoe fa nivelo ie.
24 Bakeo nandeha tan-dolo any ty sisany taminay, le nitovy tamy ty raha nivolanin’ny ampela rey mihintsy ty raha nihitan-drozy. Fe tsy nahita an’i Jesosy rozy.”
25 Le nivola tamin-drozy ie hoe: “Tsy mandiniky soa nareo, sady tsy avy le* mino ani-ze raha niresahin’ny mpaminany!
26 Tsy tokony ho niaritsy an’ny raha rezay va Kristy mba hanomeza voninahitsy azy?”
27 Le nihazavaniny tamin-drozy ze raha iaby volanin’ny Soratsy Masy mikasiky azy, nanomboky tamy raha nisoratin’i Mosesy noho ty Mpaminany iaby.
28 Lafa rozy amy zay narìny an’ny tanà kelikely handehanan-drozy iny, le nanao kisary tsy nijano ie fa mbo nandeha avao.
29 Fe nitanjatanjahin-drozy ie, ka nivolanin-drozy hoe: “Mijanòna aminay etoa fa fa ho hariva ty andro sady fa haìky.” Farany nilitsy ie le nijano niaraky tamin-drozy.
30 Lafa niaraky nihina* amy zay rozy, le nandramby mofo ie ka nisaotsy a-Ndranahary. Bakeo nitampahiny mofo iny, le nameany an-drozy.
31 Tamy zay ie vo niarakin-drozy* ka nihain-drozy hoe ia ie. Fe bakeo tsy nihitan-drozy tampoky ie.
32 Le nifampiresaky rozy hoe: “Tsy atao raha nisy afo niroaroa va tam-pontsika ao tamy ie niresaky tamintsika tan-dala teny iny, ka nanazava soa* ty Soratsy Masy tamintsika?”
33 Tamy fotoa* iny avao, le nitsanga rozy ka nimpoly ta Jerosalema any. Le nihitan-drozy Apostoly 11 rey, noho apostoly hafa nivory niaraky amin-drozy rey.
34 Nivola olo reo hoe: “Tena nivelo vatany Tompo sady fa niseho tamy Simona!”
35 Le nitantaranin’ny mpianatsy roe rey koa ty raha niseho tan-dala eny, noho ty fomba nahaizan-drozy azy tamy ie nanampaky mofo iny.
36 Mbo niresadresaky an’ny raha iny eo rozy, le nitsanga tanivon-drozy eo Jesosy ka nivola hoe: “Ho aminareo lahy ty fiadana!”*
37 Le nitofotsy rozy sady natahotsy, ka nieritseritsy hoe anjely* hitan-drozy eo io.
38 Farany nivola tamin-drozy ie hoe: “Manino nareo matahotsy io? Le manino nareo ro misalasala am-ponareo ao?
39 Zaho avao toy, henteo tanako noho tomboko reto. Tsapao aho le henteo, satria ty anjely tsy mana nofotsy noho taola manahaky ahitanareo ahy zao.”
40 Sady nivola ani-zay ie ro natorony an-drozy tanany noho tombony rey.
41 Fe mbo tsy nampino an-drozy raha zay satria nifalifaly marè rozy sady nitseriky biby. Le hoy ty asany tamin-drozy: “Misy raha hohany va aminareo ato?”
42 Farany namean-drozy fia tono ie.
43 Le nirambesiny raha iny bakeo nihaniny tamin-drozy eo.
44 Bakeo nivola tamin-drozy ie hoe: “Tamy zaho mbo taminareo teto rey, fa nivola taminareo aho hoe tsy maintsy ho tanteraky ze raha nisoraty mikasiky ahy amy Lalànan’i Mosesy noho amy Mpaminany noho amy Salamo ao.”
45 Le nisokafiny soa ty sain-drozy mba ho azon-drozy soa ty tean’ny Soratsy Masy hovolany,
46 ka hoy ty asany: “Mivola ty Soratsy Masy hoe: Hijaly Kristy, le ho velo ndraiky amy andro fahatelo,
47 le amy anarany ro hitoria ty fibebaha hahazoa fanengà hadisoa. Hotorỳ amy firenena iaby raha zay, le a Jerosalema eto ty anomboha azy.
48 Nareo ro ho vavolombelon’ny raha rezay.
49 Le halefako aminareo raha nampitamanin’ny Babako iny. Fe mijanòna an-tanà eto zisiky hahazoanareo* hery baka anabo any.”
50 Bakeo nandesiny niboaky an’ny tanà iny rozy, le niavy zisiky a Betania any. Le nataony anabo tanany rey ka nitso-drano an-drozy ie.
51 Amy ie mbo nitso-drano an-drozy iny, le nisaraky tamin-drozy ie ka nampiakari-Ndranahary an-danitsy any.
52 Le niankohoky taminy eo rozy, sady nifalifaly biby nimpoly ta Jerosalema any.
53 Le tamy tempoly ao avao rozy sanandro, nidera a-Ndranahary.
Fanamariha ambany pejy
^ Zany hoe Lahady. Tamy Jiosy, le io ty andro voalohany amy herinandro.
^ Abt: “60 stadio.” 1 stadio = 185 m.
^ Na mety hoe “Iha avao va ty vahiny a Jerosalema any tsy mahay?”
^ Abt: “fahitan’olo iaby.”
^ Abt: “malao ty fonareo ka ela vo.”
^ Na: “niaraky nandry nihorira tan-databo eo.”
^ Abt: “Tamy zay vo nivoha soa ty mason-drozy.”
^ Abt: “nanokatsy soa.”
^ Abt: “lera.”
^ Manahaky ani-zay ty fiarahaban’ny Jiosy.
^ Abt: “fanahy.”
^ Abt: “hampisikìna anareo.”
