Nisoratin’i Lioka 6:1-49
-
“Tompon’ny Sabata” Jesosy (1-5)
-
Nimpoly amy pilasiny tanan’ny lahilahy maty tana iny (6-11)
-
Apostoly 12 rey (12-16)
-
Nampianatsy noho nanafaky aretin’olo maro Jesosy (17-19)
-
Ty olo sambatsy noho ty olo ho azon-draha (20-26)
-
Tiavo ty fahavalonao (27-36)
-
Ka mitsara sasy (37-42)
-
Ty voany ro ahaiza azy (43-45)
-
Trano soa fototsy; trano raty fototsy (46-49)
6 Nandalo tan-tanimbary eny amy zay Jesosy noho mpianatsiny rey. Sabata ty andro tamy zay. Nangalaky vary tan-tanimbary eny mpianatsiny rey, le nikosekosehin-drozy tamy tana bakeo nihanin-drozy.
2 Le nivola ty Fariseo sisany hoe: “Manino nareo manao raha tsy azo atao amy Sabata io?”
3 Le hoy ty navalin’i Jesosy an-drozy: “Mbo tsy nivakìnareo mihintsy va ty raha nataon’i Davida, lafa nimosarè rozy amy lahilahy niaraky aminy rey?
4 Nilitsy tan-trano-Ndranahary ao ie, le namea azy ty mofo aseho* ka nihaniny, bakeo nameany koa olo niaraky aminy rey, kanefa tsy nisy nahazo nihina an’ny raha iny laha tsy ty mpisoro avao.”
5 Bakeo hoy ty asany tamin-drozy: “Tompon’ny Sabata ty Anak’olo.”
6 Nilitsy tamy synagoga ao ie le nampianatsy. Sabata ndraiky ty andro tamy zay. Nisy lahilahy maty tana ankavana ty tao.
7 Nanenty an’i Jesosy soa mpanora-dalàna noho Fariseo rey vasa hanafaky ty aretin’ny lahilahy iny ie amy andro sabata io, amy zay hisy raha hasaran-drozy azy.
8 Fe nihain’i Jesosy ty raha tan-tsain-drozy any ka hoy ty asany tamy lahilahy maty tana iny: “Miongaha le mitsangàna anivo etia.” Le niongaky lahilahy iny, ka nitsanga teo.
9 Bakeo nanontany an-drozy Jesosy hoe: “Aia ty tokony hatao* amy andro sabata: Manao raha soa va sa manao raha raty? Manavotsy ay sa mamono olo?”
10 Nihenteany olo nanodidy azy teo rey, bakeo ie nivola tamy lahilahy iny hoe: “Amparo tananao iny.” Le naampatsiny tanany iny ka nimpoly amy pilasiny.
11 Fe neloky biby rozy ka nifampiresaky hoe hataon-drozy akory Jesosy.
12 Ndraiky andro, niakatsy tam-bohitsy eny ie mba hivavaky. Nivavaky tamy Ndranahary ie tamy haliky iny, le zisiky maraindray.
13 Lafa nimaraindray amy zay ty andro, le nikaiky an’ny mpianatsy rey ie ka nifily 12 tamin-drozy. Nikaihiny hoe apostoly rozy.
14 Retoa ty anaran-drozy: Simona azy nikaihiny hoe Petera iny, Andrea rahalahiny, Jakoba, Jaona, Filipo, Bartolomeo,
15 Matio, Tomasy, Jakoba anan’i Alfeo, Simona kaihy hoe “azy mafana fo iny”,
16 Jodasy anan’i Jakoba, le Jodasy Iskariota azy lasa mpamadiky iny.
17 Le nijotso niaraky tamin-drozy ie, ka nijano tamy pilasy* raiky zay. Nisy mpianatsiny maro teo, le nisy vahoaky maro baka amy faritsy iaby a Jodia noho Jerosalema noho baka amy faritsy an-tsonin-driaky a Tyro noho Sidona any. Niavy hijanjy azy noho hafahiny tamy ty arety nahazo an-drozy olo reo.
18 Ndre azy nampijalin’ny fanahy maloto rey aza nisalama iaby.
19 Lafa nisy olo nikasiky an’i Jesosy, le nisy hery niala taminy, ka niafaky iaby ty aretin-drozy. Farany ta hikasiky azy iaby ty olo.
20 Le niandra ie ka nanenty an’ny mpianatsiny rey, bakeo nivola hoe:
“Sambatsy nareo mahantra io, fa ahinareo ty Fanjakà-Ndranahary.
21 “Sambatsy nareo mosarè henanizao io, fa hovintsìna nareo.
“Sambatsy nareo mitany henanizao io, fa hihehy nareo.
22 “Sambatsy nareo laha halan’olo noho tsy darean’olo* noho haratìn’olo, ka volanin’olo hoe raty fanahy* satria hoe mpianatsin’ny Anak’olo nareo.
23 Mifalifalea noho manitranitrà amy andro zay fa bevata ty valisoanareo an-danitsy any, satria nanahaky ani-zay koa ty nataon’ny razamben-drozy tamy ty mpaminany.
24 “Fe ho azon-draha nareo panarivo io, satria fa azonareo iaby ze raha mahafa-po anareo.
25 “Ho azon-draha nareo vintsy henanizao io, fa mbo ho mosarè nareo.
“Ho azon-draha nareo mihehy henanizao io, fa halahelo noho hitàny nareo.
26 “Ho azon-draha nareo laha mivola raha soa mikasiky anareo ty olo iaby, satria zay ty nataon’ny razamben-drozy tamy mpaminany sandoky.
27 “Fe mivola aminareo mijanjy ahy reo aho hoe: Tiavo avao ty fahavalonareo. Ka mieny manao raha soa amy ze olo malay anareo,
28 le ka mieny mangataky amy Ndranahary mba hanao raha soa amy ze olo manozo anareo. Ka mieny mivavaky ho ani-ze manerisery anareo koa.
29 Laha misy olo mamango ty fifinao raiky, le ameo azy koa raiky iny. Laha misy olo mangalaky ty sikinao,* le engao halàny koa ty siky hafa isikinanao.*
30 Ameo ze olo mangataky aminao, le ka takỳ amy ze mangalaky azy ty hanananao.
31 “Ze teanareo hataon’olo aminareo le anovo aminy koa.
32 “Fa laha ze olo tea anareo avao ro teanareo, ino ty soa ho azonareo? Ndre ty mpanota anè mba tea ty olo tea an-drozy koa.
33 Laha ze olo manao raha soa aminareo avao koa ro anaovanareo raha soa, ino ty soa ho azonareo? Ndre ty mpanota aza mba manao ho zay koa.
34 Laha ze olo eritseretinareo hampimpoly ty dralanareo avao koa ro ampitrosanareo,* ino ty soa ho azonareo? Ndre ty olo samby mpanota aza mifampitrosa, satria mitamà hoe himpoly dralany iny.
35 Ka manao manahaky ani-zay nareo, fa tiavo avao ty fahavalonareo, manaova raha soa avao, le mampitrosà fe ka mitamà valiny. Amy zay hahazo valisoa bevata nareo, le ho anakini-azy Farany Anabo iny, satria ie soa fanahy amy ty olo tsy mahay misaotsy noho amy ty raty fanahy.
36 Miferinesa olo avao, manahaky an’ny Babanareo miferinay olo iny.
37 “Ankoatsini-zay, ka mitsara sasy, amy zay tsy hotsarà mihintsy nareo. Ka mikinokino olo sasy, amy zay tsy hokinokinoa koa nareo. Manengà hadisoa* avao, amy zay hengà koa ty hadisoanareo.*
38 Miezaha ho zatsy hanome, amy zay hamea koa nareo. Meza soa, nitindria, nihozonkozony, noho mihoatsy ro hararaky am-potronanareo, satria arakaraky ze meza ampiasanareo ro hanamezà ho anareo.”
39 Bakeo niresaky fanohara tamin-drozy ie hoe: “Afaky mitariky olo jiky va ty jiky? Tsy samby ho latsaky an-davaky any va rozy roe?
40 Tsy anabon’ny mpampianatsy azy ty mpianatsy, fe hitovy amy mpampianatsy azy ze olo tena nampianary soa.
41 Ka manino iha ro manenty ty potin-kazo amy mason’ny rahalahinao eny, kanefa ty bodan-kazo amy masonao eny aza tsy hitanao?
42 Akory moa ty ivolananao amy rahalahinao hoe: ‘Ao halàko potin-kazo amy masonao tỳ rahalahy’, kanefa bodan-kazo amy masonao eny iny aza tsy hitanao? Mpiatsaravelatsihy! Afaho tse ty bodan-kazo amy masonao eny, le ho hitanao soa hoe akory ty hanafaha ty potin-kazo amy mason’ny rahalahinao eny.
43 “Tsy misy hazo soa manome voany raty, le tsy misy hazo raty manome voany soa,
44 satria ty voany ro ahaiza ty hazo kiraidraiky. Tsy misy olo mila aviavy amy fatiky eny, ohatsy, na mila voaloboky amy fatipatiky eny.
45 Ty olo soa le mampiboaky ani-ze raha soa nihajarìny tam-pony ao, fa ty raty fanahy mampiboaky ani-ze raha raty nihajarìny tam-pony ao. Ze mameno ty fon’olo anè ro volanin’ny vavany.
46 “Ka manino nareo ro mikaiky ahy hoe: ‘Tompo! Tompo!’, kanefa tsy ataonareo ze raha volaniko?
47 Hatoroko anareo hoe azo ampitovizy amin’ino ze olo mamonjy ahy sady mijanjy noho manoriky ty safàko:
48 Mitovy amy lahilahy namboatsy trano ie, ka nihaly laliky vo nandatsaky fototsy tanabo vatolampy. Ka lafa nisy vavarano nivaky, le nahazo an’ny trano iny ranobe iny, fe tsy nampihozo azy satria soa fototsy trano iny.
49 Fa ze olo maharè fe tsy manao raha, le manahaky lahilahy namboatsy trano tamy tany eo, fe tsy nihaly fototsy. Nahazo an’ny trano iny vavarano iny, ka avy le niropaky trano iny, le nirava tanteraky.”
Fanamariha ambany pejy
^ Na: “mofo atolotsy.”
^ Na: “azo atao; mety.”
^ Abt: “pilasy tsy misy kodekodeo.”
^ Na: “ihatakatahan’olo.”
^ Na: “raty fanahy ty anaranareo.”
^ Abt: “ty sikinao ivelany.”
^ Abt: “ty sikinao anatiny.”
^ Zany hoe trosa tsy misy anany.
^ Na: “Manafaha.”
^ Na: “hafahy koa nareo.”
