Nisoratin’i Lioka 8:1-56
-
Ampela niaraky tamin-dry Jesosy (1-3)
-
Fanohara mikasiky mpamboly iny (4-8)
-
Ty antony nanaovan’i Jesosy fanohara (9, 10)
-
Ty dikan’ny fanohara mikasiky mpamboly iny (11-15)
-
Tsy natao hosaroma ty jiro (16-18)
-
Renin’i Jesosy noho rahalahiny (19-21)
-
Nataon’i Jesosy kalma tsioky be iny (22-25)
-
Niroasin’i Jesosy ho amy kosò rey ao demonia rey (26-39)
-
Anakampelan’i Jairo; ampela nikasiky ty sikin’i Jesosy (40-56)
8 Tafara kelikelini-zay, nandeha nitory Jesosy sady nanambara ty vaovao soan’ny Fanjakà-Ndranahary, le niteteziny iaby ndre tanàmbe ndre tanà kelikely. Niaraky taminy koa Apostoly 12 rey,
2 noho ty ampela sisany fa niboahan’ny fanahy raty noho nafahy tamy ty aretin-drozy. Retoa iaby rozy: Maria, kaihy hoe Magdalena, azy niboahan’ny demonia fito iny;
3 Johana, valin’i Koza mpiandraikitsy tan-tranon’i Heroda ao; Sosana; noho ampela maro hafa koa. Samby nampiasa ty hananan-drozy hikarakarà an’i Jesosy noho ty mpianatsiny rozy.
4 Nisy olo maro amy zay nivorivory teo niaraky tamy ty olo namonjy azy baka amy tanà samby hafa any, le nanao an’ny fanohara toy ie:
5 “Nisy mpamboly niboaky mba hamboly vary.* Lafa namafy ie le nilatsaky tan-dala eny ty voa sisany, ka nivoakitsakitsaky le nihanin’ny voro.
6 Ty sisany nilatsaky tamy vato le nitiry, fe bakeo nalazo satria tsy nisy rano.
7 Ty sisany nilatsaky tamy fatiky ka niaraky nitiry tamy fatiky rey le nivoatindry tao.
8 Fa ty sisany nilatsaky tamy tany soa le nitiry, ka nahazoa vokatsy in-jatoni-azy nambolè iny.” Lafa baka niresaky ani-zay ie, le nivola marè hoe: “Ze mana sofy hijanjina, le mijanjina soa.”
9 Fe nanontanean’ny mpianatsiny rey azy hoe ino ty dikan’ny fanohara iny.
10 Le hoy ty asany: “Nareo ro nengà hahay ty dikan’ny sekirè masy mikasiky ty Fanjakà-Ndranahary. Fe fanohara ro atao amin’olo hafa, amy zay hanenty rozy fe tsy hahita, le haharè fe tsy ho hain-drozy ty dikan’ny raha rey.
11 Ho zao amy zay ty dikan’ny fanohara iny: Voa iny manondro ty safà-Ndranahary.
12 Azy tan-dala teny rey manondro ani-ze maharè an’ny raha zay, fe bakeo avy ty Devoly mangalaky an’ny safà iny am-pon-drozy ao, tsy no hino avao rozy ka ho avotsy.
13 Azy tanabo vato teny rey manondro ani-ze maharè an’ny safà iny sady falifaly maneky an’ny raha zay. Fe tsy misy vahany raha rey. Mino tsielatsiela avao rozy, fe miala lafa tojiky fitsapà.
14 Le azy nilatsaky tamy fatiky teny rey manondro ani-ze maharè an’ny safà iny fe nanjary nitandrena tamy fiasan-doha noho ty hanana noho ze raha teatean-drozy amy fiaina toy. Lasa voalimboky ao safà iny, ka tsy manome voany soa.
15 Fa azy tamy tany soa teny rey manondro ani-ze mana fo soa noho malio. Ka lafa maharè an’ny safà iny rozy, le manajary an’ny raha zay am-pon-drozy ao, ka manome voany sady miaritsy.
16 “Tsy misy olo mandrehitsy jiro ka hoe hanaro azy, na hanao azy ambany kitrely ao, fa ataony amy fasia azy eny raha iny mba hahita an’ny hazavà iny ty olo militsy amy trano iny ao.
17 Tsy misy raha avony anè ka hoe tsy haseho, na raha soa hajary ka hoe tsy ho hay mihintsy na tsy hiboaky.
18 Tandremo zany ty fomba fijanjinanareo, satria ze mana le mbo hamea maro ka hana maro biby. Fa ze tsy mana, ndre ty raha eritseretiny hoe ananany aza halà aminy.”
19 Namonjy an’i Jesosy amy zay reniny noho rahalahiny rey, fe tsy niafaky niharìny azy satria nimaro marè ty olo teo.
20 Farany nisy olo nivola taminy hoe: “Mitsanga amonto ao reninao noho rahalahinao rey fa ta hahita anao.”
21 Le hoy ty asany tamin-drozy: “Olo mijanjy noho manoriky ty safà-Ndranahary retoa ro reniko noho rahalahiko.”
22 Ndraiky andro, niondra laka rozy amy mpianatsiny rey, le hoy ty asany tamin-drozy: “Ndao tsika ho ampita eny.” Le lasa rozy niampita an’ny ranovory iny.
23 Fe niazon-droro ie amy rozy mbo an-dala eny iny. Nisy tsioky be tamy ranovory iny teo, le nifeno rano lakan-drozy iny ka nanaly ho raty amin-drozy.
24 Namonjy an’i Jesosy amy zay mpianatsiny rey, le namoha azy sady nivola hoe: “Mpampianatsy e, Mpampianatsy e! Ho maty tsika!” Le nitsanga ie, bakeo nitrivotiny tsioky noho rano nitavoaly iny, ka nijano. Le nikalma andro iny.
25 Le hoy ty asany tamin-drozy: “Nanaia ty finoanareo?” Fe tena navaka rozy sady nitseriky ka nifampiresaky hoe: “Ia marina olo toy io? Fa ndre ty tsioky noho ty rano aza komandìny, le maneky azy.”
26 Le niavy tamy faritsy nisy ty Gerasianina, tampitan’i Galilia eny rozy.
27 Lafa niala baka anaty laka ao Jesosy ka nandeha an-tety eny, le nitojiky lahilahy raiky baka an-tanà ao. Nisy demonia lahilahy io, sady fa ela ro tsy nisiky. Tsy nipetraky tamy trano koa ie fa nipetraky tan-dolo eny.
28 Laha vo nahita an’i Jesosy ie, le nikoaikoaiky ka nandohaliky taminy eo sady nivola marè biby hoe: “Ino ankadalananao ahy atoy io* Jesosy Anakini-azy Ndranahary Farany Anabo iny? Azafady* mba ka ampijalỳ aho!”
29 —Nivola ani-zay lahilahy iny satria nikomandin’i Jesosy fanahy maloto iny mba hiboaky baka aminy ao. Fa imaro ie ro niliran’ny fanahy io,* le nirohiza tamy seny sady nambena soa. Fe nitampatampahiny raha nandrohiza azy rey, le nandesin’ny demonia iny tamy pilasy mitoka any ie.—
30 Nanontany azy Jesosy hoe: “Ia ty anaranao?” Le nivola ie hoe: “Tafiky”,* satria demonia maro ro nilitsy taminy ao.
31 Le nisoloho taminy eo avao rozy mba tsy horoasiny mana amy lavaky mangoakoaky* any.
32 Nisy kosò maro biby nihina tam-bohitsy eny tamy zay, ka nisoloho tamy Jesosy rozy mba hengany hilitsy amy kosò rey ao, le naneky ie.
33 Farany niboaky baka amy lahilahy iny ao demonia rey, le nilitsy tamy kosò rey tao. Le namoko ty lay nana an-teva* any kosò rey, ka nilatsaky tamy ranovory iny any le nimaty an-drano iaby.
34 Fe lafa nahita an’ny raha niseho iny mpiamby kosò rey, le nilay ka nitantara an’ny raha iny tan-tanà ao noho ta ambanivohitsy any.
35 Le niboaky ty olo mba hanenty an’ny raha niseho iny. Namonjy an’i Jesosy rozy, le nahita an’ny lahilahy niboahan’ny demonia iny. Fa nisiky ie sady fa nisalama say soa, le nipetraky tan-tombon’i Jesosy eo. Natahotsy amy zay olo rey.
36 Ze nahita an’ny raha iny koa, le nitantara tamin-drozy ty fomba nahasalama an’ny lahilahy nisy demonia iny.
37 Le nangataky an’i Jesosy mba hiala amin-drozy eo olo maro baka amy faritsy nisy an’ny Gerasianina rey, satria tena natahotsy rozy. Farany niondra tanaty laka ao ie, le niala teo.
38 Le tsy nivitavita lahilahy niboahan’ny demonia iny fa nangataky taminy mba hanaraky azy. Fe nampolìn’i* Jesosy ie le nivolaniny hoe:
39 “Ndany moly le tantarao amin’olo ty raha natao-Ndranahary taminao.” Le nandeha ie, ka niresahiny tamin’olo iaby tamy tanà iny ty raha nataon’i Jesosy taminy.
40 Lafa nimpoly ta Galilia any Jesosy, le nirambesin’ny vahoaky rey soa satria fa nandinindiny azy rozy iaby.
41 Fe namonjy an’i Jesosy lahilahy mana anara Jairo zay. Mpiandraikitsy synagoga ie. Niankohoky tan-tombon’i Jesosy teo ie, le nangataky azy mba ho an-tranony any,
42 satria fa ho maty anakampelany zay. Folo roe amby tao teo ho eo ajà io, le io avao ty anany.
Ka lafa nandeha Jesosy, le nisisiky taminy teo ty olo.
43 Nisy ampela nandeha lio fa tanatin’ny 12 tao tamy zay, kanefa tsy nisy olo nahafaky ty aretiny mihintsy.
44 Namonjy an’i Jesosy baka afara ao ie, le nikasiky ty ramborambony amy sikin’i Jesosy,* le avy le nijano lio iny.
45 Le hoy ty asan’i Jesosy: “Ia nikasiky ahy teo iny?” Fe nandà iaby ty olo le nivola Petera hoe: “Mpampianatsy e, hamaroan’olo manodidy anao noho misisiky aminao retia!”
46 Fe hoy Jesosy: “Nisy olo nikasiky ahy teo satria reko nisy hery niala tamiko.”
47 Hitan’ny ampela iny hoe nisy naharaky ie, ka namonjy an’i Jesosy ie sady nangitikitiky. Nandohaliky taminy teo ie, le nitantaraniny tanatrehan’olo iaby teo hoe ino ty antony nikasihany azy noho hoe akory ty nahafaky an’ny aretiny iny teo no ho eo.
48 Fe hoy ty asan’i Jesosy taminy: “Ty finoanao ro nahafaky an’ny aretinao iny anako. Soasoava!”
49 Mbo tsy tampitsy iaby safàny iny, le nisy olo niavy baka an-tranon’ny mpiandraikitsy synagoga iny any nivola hoe: “Maty ananao iny, fa ka sahirany sasy Mpampianatsy io.”
50 Lafa niren’i Jesosy raha zay, le hoy ty asany: “Ka matahotsy! Minoa avao le ho avotsy ie.”
51 Lafa niavy tamy trano iny teo Jesosy, le tsy nisy olo nengany hilitsy miaraky aminy laha tsy Petera, Jaona, Jakoba, noho baba noho renin’ajà ampela iny.
52 Nitany noho nalahelo* an’ny ajà ampela iny iaby ty olo, ka nivola Jesosy hoe: “Ka tomany sasy. Tsy maty ie fa miroro.”
53 Le nihehezan-drozy ie satria hain-drozy hoe fa maty ajà ampela iny.
54 Fe nirambesin’i Jesosy ty tanan’ajà iny, le nikaihiny ie hoe: “Nao aka, miongaha!”
55 Le nimpoly ndraiky ty ainy,* ka avy le niongaky ie. Le nivolanin’i Jesosy rozy mba hanome hany azy.
56 Le nifalifaly biby ty ray aman-drenin’ny ajà iny. Fe niresahin’i Jesosy rozy mba tsy hovolanin-drozy amin’olo mihintsy raha niseho iny.
Fanamariha ambany pejy
^ Abt: “hamafy ty voany.”
^ Na: “Misy raha iharoako aminao va.”
^ Abt: “Misoloho aminao aho.”
^ Na mety hoe “Fa ela ie ro niforosevan’ny fanahy io hanao ze teany hatao.”
^ Na: “Maramila tropy raiky.” Nisy maramila 4000 zisiky 6000 eo ho eo ty tropy raiky tamy tafikin’ny Romanina taloha tany.
^ Na: “amy kintsỳ.”
^ Abt: “niroasin’i.”
^ Abt: “sikin’i Jesosy ivelany.”
^ Abt: “nanao vangotratra satria nalahelo.”
^ Na: “ty hery mamelo azy.”
