Nisoratin’i Lioka 9:1-62
-
Namea toromariky mikasiky fanompoa Apostoly 12 rey (1-6)
-
Tsy nihitan’i Heroda ty hatao lafa naharè mikasiky an’i Jesosy ie (7-9)
-
Nanome hany olo 5 000 Jesosy (10-17)
-
Nihain’i Petera hoe Jesosy ro Kristy (18-20)
-
Fa nivolanin’i Jesosy hoe hovonoa ie (21, 22)
-
Ty tena mpianatsin’i Jesosy (23-27)
-
Niova tarehy Jesosy (28-36)
-
Tsy nanahy sasy ajà lahilahy nisy demonia iny (37-43a)
-
Nambaran’i Jesosy ndraiky hoe hovonoa ie (43b-45)
-
Nialy hevitsy mpianatsy rey hoe ia amin-drozy ty farany anabo (46-48)
-
Ze tsy manohitsy antsika le miaraky amintsika (49, 50)
-
Tsy nandramby an’i Jesosy ty olo ta Samaria ao (51-56)
-
Ty tokony hatao laha ta hanara-dia an’i Jesosy (57-62)
9 Bakeo nikaihiny Apostoly 12 rey, le nameany hery noho fahefà handroaky ty demonia iaby noho hanafaky arety.
2 Le nirahiny hitory ty Fanjakà-Ndranahary noho hanafaky aretin’olo rozy,
3 ka hoy ty asany tamin-drozy: “Ka manday ndre ino ndre ino nareo lafa mandeha, ndre fitono zay, ndre saky fandaisa vatia, ndre mofo, ndre drala,* le ka manday siky roe* koa.
4 Fe lafa militsy amy trano raiky nareo,* le mijanona ao zisiky hialanareo amy tanà zay ao.
5 Laha misy olo tsy mandramby anareo koa, ndre aia ndre aia zay, le apopoho ty lemboky amy tombonareo lafa miala amy tanà iny ao nareo, mba ho hain-drozy hoe fa nampitandremy rozy.”*
6 Le nandeha rozy nanao toro an’ny faritsy iny, ka nitety tanà le nitory ty vaovao soa noho nanafaky aretin’olo mbaombao.
7 Niren’i Heroda* sefo distriky amy zay raha iaby niseho rezay, ka tsy nihitany ty hatao satria nisy nivola hoe nivelo ndraiky Jaona.
8 Fe ty sisany nivola hoe niseho Elia, le ty ilany koa nivola hoe nivelo ndraiky ty raiky amy mpaminany taloha rey.
9 Le nivola Heroda hoe: “Jaona anè fa nitampahiko ty lohany. Ka mbo ia koa reko manao an’ny raha rezao io?” Farany nataony ze hahitany an’i Jesosy.
10 Lafa nimpoly apostoly rey, le nitantaranin-drozy tamy Jesosy ze raha iaby nataon-drozy. Le nandesin’i Jesosy nitoka nana amy tanà kaihy hoe Betsaida zay rozy.
11 Fe nihain’ny vahoaky rey raha zay, ka norihin-drozy ie. Le nandramby soa an-drozy Jesosy, ka niresaky tamin-drozy mikasiky ty Fanjakà-Ndranahary sady nanafaky ty aretini-ze narary.
12 Lafa narìny ho tsofotsy ty andro, le namonjy azy Apostoly 12 rey, ka nivola hoe: “Ampandehano moly vahoaky reo, soa hamonjy tanà manodidy mbetoy, le hila pilasy hiroroa noho raha hohanin-drozy satria mitoka pilasy misy antsika toy.”
13 Fe nivola tamy mpianatsy rey ie hoe: “Ameo raha hohany rozy.” Le hoy mpianatsy rey: “Ka zahay tsy mana ankoatsin’ny mofo limy noho fia roe, laha tsy hoe zahay vasa ro handeha hivily hany ho an’olo iaby reto.”
14 Lahilahy 5000 teo ho eo ty teo tamy zay. Fe hoy ty asany tamy mpianatsiny rey: “Volano rozy hipetraky le hitambatambatsy kidimampolo dimampolo.”
15 Le nataon’ny mpianatsiny rey raha zay, ka nampipetrahin-drozy iaby olo rey.
16 Nalan’i Jesosy amy zay mofo limy noho fia roe rey, ka niandra nana an-danitsy any ie le nisaotsy a-Ndranahary. Bakeo nitampahiny raha rey, le nameany an’ny mpianatsy rey mba hozaran-drozy amy vahoaky iny.
17 Le nihina iaby rozy ka nivintsy. Bakeo navorin-drozy ze sisa tsy nilany, ka nahafeno paniè 12.
18 Tafarani-zay, nivavaky nitoka ie. Niavy taminy eo mpianatsy rey tamy zay ka nanontaneany hoe: “Ia va ty fahaizan’olo ahy?”
19 Le hoy ty navalin-drozy: “Misy mivola hoe Jaona Mpanao Batisa. Fe misy koa mivola hoe Elia, le misy koa mivola hoe raiky amy mpaminany taloha rey nivelo ndraiky io.”
20 Bakeo hoy ty asany tamin-drozy: “Ka nareo, ia ty fahaizanareo ahy?” Le namaly Petera hoe: “Kristy azy nirahi-Ndranahary iny.”
21 Bakeo nafepetsiny rozy mba tsy hivolambola an’ny raha zay amin’olo.
22 Nivola koa ie hoe: “Tsy maintsy hampijalijalỳ ty Anak’olo, ka tsy haneky azy ty anti-panahy noho ty sefon’ny mpisoro noho ty mpanora-dalàna. Bakeo hovonoa ie, le hovelomy amy andro fahatelo.”
23 Mbo nivola tamin’olo iaby teo rey ie bakeon’iny hoe: “Laha misy ta hanaraky ahy, le tsy maintsy mandà ty vatany ie ka manday ty hazo fijaleany* sanandro sady manaraky ahy avao.
24 Satria ze ta hanavotsy ty ainy ro hamoy ty ainy, fa ze mamoy ty ainy satria mpanori-dia ahy ro hanavotsy ty ainy.
25 Ino vatany moa ty soa ho azon’olo raiky laha azony zao tontolo zao fe afoiny ty ainy na potiky ty fiainany?
26 Fa ze menatsy hampiseho amin’olo hoe mpanori-dia ahy, sady menatsy manoriky ty safàko, le ho menatsy aminy koa ty Anak’olo, lafa ho avy amy voninahitsiny noho ty voninahitsin’ny Babany, miaraky amy ty ahin’ny anjely masy.
27 Fe ambarako anareo mazava fa misy amin’olo mitsanga eto reto tsy ho maty mihintsy, laha tsy fa hitany ty Fanjakà-Ndranahary.”
28 Valo andro teo ho eo tafaran’ny nivolanany an’ny safà reo, nandesiny niaraky taminy Petera noho Jaona noho Jakoba, le niakatsy tamy vohitsy teny ie mba hivavaky.
29 Amy ie mbo nivavaky iny, niova ty tarehiny le lasa namirapiratsy ty sikiny sady nifoty biby.
30 Le ndreo fa nisy lahilahy roe niresaky taminy, tsy ia reo fa Mosesy noho Elia.
31 Namirapiratsy* lahilahy reo sady niresaky mikasiky ty handehanan’i Jesosy. Sisa kely le ho tanteraky a Jerosalema any raha zay.
32 Fa nisaofin-droro Petera noho azy niaraky taminy rey tamy zay. Fe lafa nifoha soa rozy, le nahita ty voninahitsin’i Jesosy sady nahita an’ny lahilahy roe niaraky nitsanga taminy rey.
33 Lafa hiala baka amy Jesosy eo lahilahy rey, le hoy Petera tamy Jesosy: “Mpampianatsy e, tena soa ty eto. Mba engao zahay hananga tanty telo, ka ty raiky ho anao, ty raiky ho an’i Mosesy, le ty raiky ho an’i Elia.” Tsy nihainy iaby amin’io raha nivolaniny iny.
34 Fe tamy ie nivola iny, nisy rahona nanaloky an-drozy. Le natahotsy rozy lafa nisaronan’ny rahona iny.
35 Bakeo nisy feo nivola baka amy rahona iny ao hoe: “Anako io, ie ro nifiliko. Janjino ie.”
36 Tamy fotoa nahareza an’ny feo zay, le Jesosy raiky avao sisa nihitan-drozy teo. Fe nitsỳ rozy, ka mbo tsy nivolambolanin-drozy tamin’olo tse raha nihitan-drozy rey tamy zay.
37 Hamarain’iny, lafa nijotso baka am-bohitsy eny rozy, le nisy vahoaky maro nitsena an’i Jesosy.
38 Le nisy lahilahy raiky nikaikaiky baka anaty vahoaky rey ao hoe: “Mpampianatsy e, azafady lahy mba henteo anako io, fa ie avao ty anakilahiko!
39 Iliran’ny fanahy maloto ie le mikoaikoaiky tampoky, bakeo ataony mitipatipaky le misy raha mitaboroboro ty vavany. Tsy engàny mihintsy ie laha tsy fa maradratsy.
40 Fa nangataky an’ny mpianatsinao rey aho mba handroaky an’ny fanahy iny fe tsy nivitan-drozy.”
41 Le hoy ty asan’i Jesosy: “Vahoaky* tsy manam-pinoa noho raty fanahy nareo, zisiky ombia aho ro tsy maintsy mbo hijano aminareo eto noho handefitsy aminareo? Andeso bakao ananao iny.”
42 Lafa namonjy teo ajà lahilahy iny, le naravokin’ny demonia iny tamy tany eo sady nataony nitipatipaky marè biby. Fe nitrivotin’i Jesosy fanahy maloto iny, ka niafaky aretin’ny ajà lahilahy iny, le namean’i Jesosy an’ny babany ie.
43 Le nitseriky tamy habevatan’ny heri-Ndranahary ty olo iaby.
Amy rozy iaby mbo nitseriky tamy ty raha iaby nataon’i Jesosy iny, le nivola tamy mpianatsiny rey Jesosy hoe:
44 “Janjino soa le tiarovo safà retoa: Fa hisy hamadiky ty Anak’olo, le ho azon-tanan’ny fahavalo.”
45 Fe tsy niazon-drozy raha nivolaniny iny satria navony an-drozy raha zay mba tsy ho hain-drozy sady natahotsy hanontany azy mikasiky an’ny raha zay rozy.
46 Le nialy hevitsy mpianatsy rey hoe ia amin-drozy ty farany anabo.
47 Hain’i Jesosy ty tam-pon-drozy ao, ka nangalaky ajà raiky ie le nampitsanganiny tanilany eo,
48 le hoy ty asany tamin-drozy: “Ze mandramby an’ny ajà toy amy anarako le mandramby ahy, le ze mandramby ahy le mandramby ani-Azy naniraky ahy iny koa. Satria ze manao ty vatany ho farany kelikely aminareo iaby, le ie ro anabo aminareo.”
49 Le nivola Jaona hoe: “Mpampianatsy e, nisy olo nihitanay nandroaky demonia tamy anaranao, le nisakananay ie satria tsy namantsika.”
50 Fe hoy Jesosy taminy: “Ka sakatsakana ie, fa ze tsy manohitsy anareo le miaraky aminareo.”
51 Lafa nihanarìny* ty fotoa hiakaran’i Jesosy* an-danitsy any, le tena nitapa-kevitsy ie hoe ho a Jerosalema any.
52 Farany naniraky olo handeha alohany ie. Le nandeha olo rey ka nilitsy tamy tanà raiky ta Samaria ao zay mba hanoma ty fiaviany.
53 Fe tsy nandramby an’i Jesosy ty olo tao, satria fa nitapa-kevitsy ho a Jerosalema any ie.
54 Lafa nahita an’ny raha zay Jakoba noho Jaona, azy mpianatsiny rey, le nivola hoe: “Tompo, teanao va laha mivola zahay mba hisy afo hilatsaky baka an-danitsy any handripaky an-drozy?”
55 Fe nitoliky ie bakeo nitrivotiny rozy.
56 Farany nandeha tamy tanà* hafa rozy amy mpianatsiny rey.
57 Lafa tan-dala eny amy zay rozy, le nisy olo nivola taminy hoe: “Hanaraky anao aho ndre aia ndre aia hombanao.”
58 Fe hoy Jesosy: “Mana lavaky hisitriha ty amboanala, le mana ty tranony ty voro mitily, fa ty Anak’olo tsy mba mana ze hametrahany ty lohany.”
59 Bakeo nisy olo hafa koa nivolaniny hoe: “Ndao hanara-dia ahy.” Fe hoy lahilahy iny: “Engao tse aho Tompo handeha handevy an’ny babako.”
60 Fe nivola taminy ie hoe: “Engao ty maty handevy ty maty, fa iha mandehana le torio mbaombao ty Fanjakà-Ndranahary.”
61 Mbo nisy olo hafa koa nivola hoe: “Hanaraky anao aho Tompo, fe engao tse aho hanao veloma ty olo an-trano aminay* any.”
62 Le hoy Jesosy: “Tsy misy olo mitanjaky sarỳ sady mitoliky mana afara any, ka hoe haeva hilitsy amy Fanjakà-Ndranahary ao.”
Fanamariha ambany pejy
^ Abt: “saba.”
^ Na: “siky fanampiny.”
^ Abt: “ndre aia ndre aia trano iliranareo.”
^ Abt: “mba ho vavolombelo hanohitsy an-drozy.”
^ Abt: “Niseho tamim-boninahitsy.”
^ Abt: “Taranaky.”
^ Abt: “Lafa ho feno.”
^ Abt: “fotoa hangalà an’i Jesosy hiakatsy.”
^ Na: “tanà kelikely.”
^ Abt: “an-tranoko.”
