Nisoratin’i Marka 1:1-45
-
Nitory Jaona Mpanao Batisa (1-8)
-
Natao batisa Jesosy (9-11)
-
Nalan’i Satana fanahy Jesosy (12, 13)
-
Nanomboky nitory ta Galilia any Jesosy (14, 15)
-
Mpianatsy nikaihy voalohany (16-20)
-
Nandroaky fanahy maloto Jesosy (21-28)
-
Nanafaky aretin’olo maro ta Kapernaomy any Jesosy (29-34)
-
Nivavaky tamy pilasy mitoka (35-39)
-
Niafaky ty habokan’ny lahilahy iny (40-45)
1 Ty fanombohan’ny vaovao soa mikasiky an’i Jesosy Kristy, azy Anaki-Ndranahary iny:
2 Ho zao ty nisoratin’i Isaia mpaminany:* “(Halefako alohanao eo* olo irahiko iny, le ie ro hanoma ty lalanao.)
3 Nay misy feo mikaikaiky amy dezera* any hoe: ‘Omano ty lala homban’i Jehovah! Anovo mahity ty lalany.’”
4 Tamy dezera* any Jaona Mpanao Batisa, le nitory hoe tokony hatao batisa ty olo mba ho famantara hoe fa nibebaky rozy, ka hengà ty fahotan-drozy.
5 Le niboaky ho amy Jaona eo ty olo iaby tamy faritsin’i Jodia, noho ty olo iaby nipetraky ta Jerosalema any. Nataony batisa* tamy Vavaranon’i Jordana teo rozy sady nieky ty fahotan-drozy tamin’olo maro.
6 Volom-biby* ty siky nisikinan’i Jaona tamy zay, le angozy ty sentirany. Valala noho tantely* ty fihaniny.
7 Le nitory ie hoe: “Misy olo mahery mandilatsy ahy ho avy afarako ao. Tsy maeva ahy ndre ty hiondriky hamaha ty taly amy kapany aza.
8 Zaho nanao batisa anareo tamy rano, fa ie hanao batisa anareo amy fanahy masy.”
9 Niala ta Nazareta a Galilia any Jesosy tamy fotoa zay, le nataon’i Jaona batisa tamy Vavaranon’i Jordana teo.
10 Laha vo niakatsy baka anaty rano ao ie, le nihitany lanitsy iny nivoha, le nijotso manahaky pizon tanabony teo koa ty fanahy masy.
11 Le nisy feo baka an-danitsy any nivola hoe: “Anako teako iha. Mahafalifaly ahy iha.”
12 Avy le nandesin’ny fanahy masy nana amy dezera* any ie bakeon’iny.
13 Nijano tany 40 andro ie, le nalan’i Satana fanahy. Nisy bibinala tany fe nanampy azy ty anjely.
14 Lafa nivoasambotsy Jaona, le nandeha ta Galilia any Jesosy mba hitory ty vaovao soa baka amy Ndranahary.
15 Le hoy ty asany: “Fa avy ty fotoa voatondro, sady fa marìny ty Fanjakà-Ndranahary. Mibebaha, le minoa ty vaovao soa baka amy Ndranahary.”
16 Lafa nandeha tamy sisin’ny Riakin’i Galilia eny ie, le nahita an’i Simona noho Andrea rahalahin’i Simona nandatsaky harato tan-driaky eny, satria mpihaza rozy.
17 Le hoy Jesosy tamin-drozy: “Ndao hanaraky ahy fa hataoko mpihaza olo nareo.”
18 Avy le nengan-drozy haraton-drozy rey, le nanaraky azy rozy.
19 Nandeha alohaloha eny ie, le nahita an’i Jakoba anan’i Zebedio noho Jaona rahalahiny. Tanaty lakan-drozy ao rozy tamy zay, namboatsy ze simba tamy ty haraton-drozy.
20 Avy le nikaihin’i Jesosy rozy. Le nengan-drozy tan-daka ao baban-drozy miaraky amin’olo nikaramà rey, le nanaraky an’i Jesosy rozy.
21 Le nandeha ta Kapernaomy any rozy.
Laha vo niavy ty Sabata, le nilitsy tamy synagoga ao ie ka nanomboky nampianatsy.
22 Le nitseriky tamy fomba fampianarany ty olo, satria lafa nampianatsy ie le hita hoe mana fahefà baka amy Ndranahary, fa tsy manahaky ty mpanora-dalàna.
23 Tamy fotoa zay mihintsy, le nisy lahilahy nisy fanahy maloto tamy synagoga iny tao nikaikaiky marè hoe:
24 “Ino koa ankadalananao anay atoy io* Jesosy baka Nazareta? Niavy handripaky anay va iha? Haiko soa fa iha azy Masy nirahi-Ndranahary iny!”
25 Fe nitrivotin’i Jesosy ie hoe: “Mantsintsìny, le miboaha baka aminy ao!”
26 Le nataon’ny fanahy maloto iny nitipatipaky lahilahy iny. Nikoaikoaiky marè biby koa fanahy iny, bakeo niboaky baka amy lahilahy iny ao.
27 Le nitseri-draha ty olo iaby ka nifampiresaky hoe: “Toy ty ino? Fampianara vaovao koa toy! Ndre ty fanahy maloto aza komandìny sady ananany fahefà, le maneky azy.”
28 Tsy ela avao le niparitaky tamy faritsy iaby ta Galilia any ty lazany.
29 Le niala tamy synagoga iny ao rozy, bakeo nandeha tan-tranon’i Simona noho Andrea any, niaraky tamy Jakoba noho Jaona.
30 Nandry am-pandrea ty rafozambavin’i Petera tamy zay satria nisiloky,* ka avy le nivolanin-drozy tamy Jesosy ty mikasiky azy.
31 Le namonjy an’ny njarahy iny Jesosy, ka nandramby ty tanany sady nampiongaky azy. Le niafaky aretiny iny ka nikarakara hany ho an-drozy ie.
32 Lafa nitsofotsy ty andro tamy hariva iny, le nandesin’olo taminy teo iaby ze narary noho ze nisy demonia,
33 ka nivorivory tam-baravara teo iaby ty olo tan-tanà tao.
34 Nimaro olo narary rey sady samby aretiny iaby, le nafahiny ty aretin-drozy. Le nandroaky demonia maro koa ie, fe tsy nengany hivolambola demonia rey, satria nihain-drozy hoe ie ro Kristy.*
35 Vo maraindray, amy andro mbo maìky iny, le nitsanga ie ka nandeha amy pilasy mitoka any le nivavaky tany.
36 Fe nila azy mbaombao Simona noho azy niaraky taminy rey.
37 Lafa nahita azy rozy le nivola hoe: “Mila anao iaby ty olo.”
38 Fe hoy ty asany tamin-drozy: “Ndao tsika hifindra ho amy tanà hafa mariniriny mbetoy mba hitoriako any koa satria zay ty antony niaviako.”
39 Le nandeha nitety ty faritsy iaby ta Galilia any ie, ka nitory tamy synagoga any sady nandroaky demonia.
40 Nisy boka raiky koa niavy taminy eo. Nisoloho taminy ie sady nandohaliky mihintsy ka nivola hoe: “Laha mba teanao ty hanadio ahy, le ho vitanao zay.”
41 Le niferinesany lahilahy iny ka nanampatsy tana ie, le nikasiky azy sady nivola hoe: “Tena teako zay! Hataoko malio iha.”
42 Avy le niafaky habokàny iny, le nalio ie.
43 Avy le nampandehanin’i Jesosy ie bakeon’iny, ka nafepetsiny
44 sady nivolaniny hoe: “Ao iha tsy hivolambola amin’olo, fa ndany miseho amy mpisoro any, le ameo ty fanomeza nivolanin’i Mosesy hoe tokony hamea, mba ho hitan-drozy hoe fa malio iha.”
45 Fe vo niala teo lahilahy iny, le tsy nisalasala niresaky noho nitantara an’ny raha iny mbaombao. Farany tsy nisy tanà afaky niliran’i Jesosy sasy, satria avy le hain’olo ie. Le tsy nilitsy tan-tanà ao ie fa nijano tamy pilasy mitoka any. Fe mbo namonjy azy teny avao ty olo manodidy mbeny.
Fanamariha ambany pejy
^ Baka amy Malakia 3:1 azy anaty fonon-teny reo, fa ty ankoatsini-zay baka amy faminanian’i Isaia.
^ Abt: “alohan’ny tarehinao eo.”
^ Na: “an-diomonto.”
^ Na: “Tan-diomonto.”
^ Na: “Najobony, Nalentiny.”
^ Abt: “Volon-drameva.”
^ Abt: “tantely baka an’ala.” Maminy iny resahy eto io fa tsy bibikely iny.
^ Na: “an-diomonto.”
^ Na: “Misy raha iharoanay aminao va.”
^ Na: “nafana sandry.”
^ Na mety hoe “nihain-drozy hoe ia ie.”
