Nisoratin’i Marka 10:1-52
-
Fanambalea noho fisaraha (1-12)
-
Namean’i Jesosy tso-drano ajà rey (13-16)
-
Fanontanean’ny lahilahy panarivo iny (17-25)
-
Mahafoy raha ho an’ny Fanjakà iny (26-31)
-
Nambaran’i Jesosy ndraiky hoe hovonoa ie (32-34)
-
Fangatahan’i Jakoba noho Jaona (35-45)
-
Vilim-panavota ho an’olo maro Jesosy (45)
-
-
Nampahitan’i Jesosy, Bartimeo (46-52)
10 Niala teo ie, le nitsaky ty Vavaranon’i Jordana ka niavy tamy sisin-tanin’i Jodia. Nisy vahoaky nivorivory ndraiky taminy teo, le nampianariny manahaky fataony rey rozy.
2 Le nisy Fariseo namonjy azy satria ta hamandriky azy. Le nanontanean-drozy ie hoe azon’ny lahilahy atao va ty misaraky amy valiny.
3 Le hoy ty navaliny an-drozy: “Ino ty didy namean’i Mosesy anareo?”
4 Le hoy ty asan-drozy: “Nengan’i Mosesy hanoratsy taratasy fisaraha ty lahilahy lafa misaraky amy valiny.”
5 Fe hoy Jesosy tamin-drozy: “Satria olo tsy hay atao nareo, le zay ro nahavy an’i Mosesy hanoratsy an’ny didy zay ho anareo.
6 Kanefa tamy famorona tam-boalohany any, ‘nataony lahilahy noho ampela rozy.
7 Hiala amy babany noho reniny zany ty lahilahy,
8 le ho nofotsy raiky avao rozy roe.’ Ka tsy roe sasy rozy, fa nofotsy raiky avao.
9 Ao tsy hosarahin’olo zany ze naharo-Ndranahary bao.”*
10 Lafa tan-trano ao ndraiky rozy, le nanontany azy mikasiky ani-zay mpianatsiny rey.
11 Le hoy ty asany tamin-drozy: “Ze lahilahy misaraky amy valiny ka manambaly olo hafa, le mandranto.
12 Laha manambaly olo hafa koa ty ampela nisaraky tamy valiny, le mandranto.”
13 Nisy olo amy zay nanday ajà tamy Jesosy eo mba hokasihiny, fe nihelofan’ny mpianatsy rey rozy.
14 Le neloky Jesosy lafa nahita ani-zay ka nivola tamin-drozy hoe: “Engao ajà reo hamonjy ahy fa ka sakana, satria ho ani-ze olo manahaky an-drozy ty Fanjakà-Ndranahary.
15 Ambarako anareo mazava fa tsy maintsy mandramby ty Fanjakà-Ndranahary manahaky ty ajà nareo, fa laha tsy zay, le tsy ho tafilitsy ao mihintsy.”
16 Le nitrotroany ajà rey, ka nitsofiny rano sady nametrahany tana.
17 Lafa niala teo ie, le nisy lahilahy nilailay namonjy azy, ka nandohaliky talohany eo sady nanontany hoe: “Mpampianatsy Soa, ino ty raha tsy maintsy ataoko mba handovako fiaina mandrakizay?”
18 Le hoy Jesosy taminy: “Manino aho ro kaihinao hoe soa? Tsy misy olo soa laha tsy Ndranahary raiky avao.
19 Fa hainao didy rey hoe: ‘Ka mamono olo, ka mandranto, ka mangalatsy, ka mitsanga ho vavolombelo mavandy, ka mamerivery, le hajao ty babanao noho ty reninao.’”
20 Le hoy lahilahy iny taminy: “Mpampianatsy e, fa norihiko iaby reo liany nahakely ahy.”
21 Le nanenty azy Jesosy. Nitea azy ie ka nivola hoe: “Raha raiky avao sisa ro mbo tsy nataonao: Ndany avilio ty hanananao le ameo ho an’ny mahantra, amy zay hana hanana an-danitsy any iha. Le ndao hanara-dia ahy.”
22 Nangonotsy lahilahy iny lafa naharè an’ny valin-teny zay, ka nandeha sady nalahelo satria nimaro ty hananany.
23 Nitolitoliky Jesosy, bakeo nivola tamy mpianatsiny rey hoe: “Tena ho sarotsy amy panarivo ty hilitsy amy Fanjakà-Ndranahary ao!”
24 Fe nitseriky mpianatsy rey tamy resakin’i Jesosy zay, farany ie nivola hoe: “Tena sarotsy anako ty militsy amy Fanjakà-Ndranahary ao!
25 Mbo moramora ty hiliran’ny rameva amy loaky amy fitrebiky rey, tany ty hiliran’ny panarivo amy Fanjakà-Ndranahary ao.”
26 Vomaiky nitseriky rozy ka nivola taminy* hoe: “Ka mety hisy ho avotsy avao laha zay?”
27 Nanenty an-drozy soa Jesosy le nivola hoe: “Tsy hain’olombelo zay fe hai-Ndranahary, satria hai-Ndranahary ty kila raha iaby.”
28 Le hoy Petera taminy: “Fa nafoinay ty kila raha iaby le nanaraky anao zahay.”
29 Le hoy Jesosy: “Ambarako anareo mazava fa tsy misy olo fa nahafoy trano na rahalahy na anabavy na reny na baba na anaky na tonda satria manday ty anarako noho ty vaovao soa,
30 ka tsy hahazo injaton’ny raha zay amy andro henanizao, zany hoe hahazo trano, rahalahy, anabavy, reny, anaky, tonda, miaraky amy fanenjeha, noho fiaina mandrakizay amy tontolo* ho avy iny.
31 Fe maro amy ty voalohany ro ho farany, le ty farany ho voalohany.”
32 Niakatsy a Jerosalema any amy zay rozy. Le nandeha alohan-drozy eo Jesosy, ka nitseriky rozy. Fe natahotsy olo niaraky amin-drozy rey. Le nandesiny nihataky kelikely ndraiky Apostoly 12 rey, ka niresahany an’ny raha fa hiseho aminy rey, le hoy ty asany:
33 “Hitanareo, ho a* Jerosalema any tsika henanizao. Le hamean’olo an’ny sefon’ny mpisoro noho mpanora-dalàna rey ty Anak’olo. Hotsaran-drozy ie, le hovonoan-drozy. Hamean-drozy an-tanan’olo tsy Jiosy ie,
34 le hataon-drozy fiheheza, handoran-drozy, hofilapilarin-drozy, noho hovonoan-drozy. Fe ho velo ndraiky ie afaky telo andro.”
35 Namonjy azy Jakoba noho Jaona, azy anan’i Zebedio rey, ka nivola taminy hoe: “Mpampianatsy e, mba teanay hataonao aminay ze raha angatahinay aminao.”
36 Le hoy ty asany tamin-drozy: “Ino ty teanareo hataoko aminareo?”
37 Le namaly rozy hoe: “Mba engao zahay hipetraky anilanao eo lafa mahazo voninahitsy iha, ka ty raiky ankavananao eo, le ty raiky ankavianao eo.”
38 Fe hoy Jesosy tamin-drozy: “Tsy hainareo mihintsy raha angatahinareo zao. Vitanareo va ty hino amy kopy inomako, na hatao batisa amy batisa hanaova batisa ahy?”
39 Le hoy ty asan-drozy taminy: “Ee, vitanay!” Le hoy Jesosy tamin-drozy: “Hino amy kopy inomako nareo, le hatao batisa amy batisa hanaova batisa ahy.
40 Fe tsy anjarako ty mitingy ani-ze hipetraky ankavanako eo na ankaviako eo, fa ze nifilỳ avao ro hahazo an’ny pilasy zay.”
41 Lafa naharè ani-zay mpianatsy folo lahy rey, le neloky tamy Jakoba noho Jaona.
42 Fe nikaihin’i Jesosy ho aminy eo rozy, le nivolaniny hoe: “Hainareo fa manindritindry ty firenena andesiny ze eken’olo ho mpitondra, le manerisery koa ze bebè.
43 Fe tsy tokony hisy manahaky ani-zay aminareo eo. Fa ze ta ho be aminareo, le tsy maintsy ho mpanomponareo.
44 Le ze ta ho voalohany aminareo le tsy maintsy manompo ty olo iaby.
45 Fa ndre ty Anak’olo aza tsy niavy mba hotompoa fa mba hanompo, ka hanome ty ainy ho vilim-panavota ho takalon’olo maro.”
46 Bakeo niavy ta Jeriko rozy. Fe lafa niboaky baka a Jeriko ao rozy amy mpianatsiny rey noho olo maro rezay, le ingo nipetraky tan-tsisin-dala teo Bartimeo, anan’i Timeo. Jiky ie sady mpangataky.
47 Lafa nireny hoe Jesosy baka a Nazareta iny nandalo io, le nanomboky nikaikaiky ie hoe: “ Jesosy Anan’i Davida, mba ferineso lahy aho!”
48 Le maro ty neloky azy sady nampitsỳ azy. Fe vomaiky ie nikaikaiky marè hoe: “Anan’i Davida, mba ferineso lahy aho!”
49 Farany nijano Jesosy le nivola hoe: “Kaiho bakao ie.” Le nikaihin-drozy lahilahy jiky iny. Nivolanin-drozy ie hoe: “Ka matahotsy, mitsangàna fa mikaiky anao ie.”
50 Le napotany sikiny* iny, sady nitsanga malaky ie namonjy an’i Jesosy.
51 Le hoy Jesosy taminy: “Ino ty teanao hataoko aminao?” Le hoy lahilahy jiky iny: “Rabôny,* mba anovo mahita ndraiky aho.”
52 Le hoy Jesosy taminy: “Mandehana, ty finoanao ro nahafaky an’ny aretinao iny.” Avy le nahita lahilahy iny, ka nanomboky nanaraky azy tan-dala eny.
Fanamariha ambany pejy
^ Na: “joko.”
^ Na mety hoe “ka nifampiresaky.”
^ Na: “amy fotoa.” Henteo F.S.B. “Zao tontolo zao.”
^ Abt: “hiakatsy a.”
^ Abt: “sikiny ivelany.”
^ Midika hoe “Mpampianatsy.”
