Nisoratin’i Marka 13:1-37
13 Lafa niboaky baka amy tempoly ao ie, le nivola taminy ty raiky amy mpianatsiny rey hoe: “Mpampianatsy e, mba henteo tse! Hasoan-draha vato noho trano retia!”
2 Fe hoy Jesosy taminy: “Hitanao va tranobe reo? Tsy hisy vato hengà hifampitikitsy mihintsy ty eo fa haropaky iaby.”
3 Le nipetrapetraky tamy Vohitsy Oliva teo ie sady nahajilo an’ny tempoly iny. Tamy fotoa zay, nanontany azy mitoka ry Petera noho Jakoba noho Jaona noho Andrea hoe:
4 “Ambarao anay hoe ombia ty hisehoan’ny raha rezay, le ino ty ho famantara lafa ho tampitsy raha iaby rezay?”
5 Le nivola tamin-drozy Jesosy hoe: “Miambena soa tsy no hisy olo hamitaky anareo.
6 Maro ty hisandoky ty anarako le hivola hoe: ‘Zaho ro ie’, ka tena maro ty ho voafitakin-drozy.
7 Ankoatsini-zay, ka matahotsy nareo lafa maharè aly na lafa misy mivola aminareo hoe misy aly amy pilasy hafa any. Raha tsy maintsy hiseho avao reo, kanefa mbo tsy ho avy ty farany.
8 “Hisy firenena hialy amy firenena, le hisy fanjakà hialy amy fanjakà. Hisy horohoron-tany amy pilasy samby hafa any, le hisy kerè koa. Reo ro fanombohan’ny fijalea.*
9 “Fa nareo, miambena soa satria hampiakarin’olo tribinaly. Hovangovangoa amy synagoga any nareo, le handesy amy governera noho mpanjaka any satria manday ty anarako. Afaky ho vavolombeloko amin-drozy eo nareo amy zay.
10 Ankoatsini-zay, tsy maintsy hotorỳ amy firenena iaby tse ty vaovao soa.
11 Lafa andesin-drozy ho amy manam-pahefà any nareo, le ka miasa loha hoe ino ty hovolaninareo. Volano ze amean’ny fanahy masy anareo amy fotoa* zay, satria tsy nareo ro mivola fa ty fanahy masy.
12 Ankoatsini-zay, hanome ty rahalahiny hovonoa ty olo, le ty baba hanome ty anany, le ty anaky hanohitsy ty ray aman-dreniny ka hampamono an-drozy.
13 Le halay anareo ty olo iaby satria manday ty anarako nareo. Fe ze miaritsy zisiky farany ro ho avotsy.
14 “Fe lafa hitanareo mitsanga amy pilasy tsy tokony hitsanganany raha mampangaroharo mahavy faharavà iny, (mila mandiniky soa ze mamaky) le mila milay am-bohitsy any ze a Jodia any.
15 Tsy tokony hijotso na hilitsy an-tranony ao mba hangalaky raha ze anabo trano any.
16 Le tsy tokony himpoly mana afara* any mba hangalaky ty sikiny* ze am-baibò any.
17 Ho sahira ty ampela bevoka noho ty mampinono amy fotoa zay!
18 Mivavaha avao mba tsy ho amy asotry ty hisehoani-zay.
19 Satria fotoa zay, ho fotoa fijalea mbo tsy nisy tetoy ndraiky, liany nanombohan’ny raha niforoni-Ndranahary zisiky amy fotoa zay, sady fa tsy hisy hanahaky azy sasy.
20 Laha tsy nahenan’i Jehovah ty halavan’ny fotoa zay, le tsy hisy olo* ho avotsy. Fe ty fisian’olo nifiliny rey ro nahavy azy nampihena an’ny fotoa zay.
21 “Le ka inoa koa laha misy mivola aminareo hoe: ‘Atoy Kristy!’, na hoe ‘Aroy ie!’
22 Satria hisy Kristy sandoky noho mpaminany sandoky ho avy, le hanao famantara noho fahagagà rozy, mba hampivio lala ty olo voafily laha azon-drozy atao.
23 Miambena soa zany nareo. Fa nivolaniko anareo sandrany ty raha iaby.
24 “Fe amy fotoa zay, lafa tampitsy fijalea iny le haìky ty masoandro, tsy hanome hazavà ty vola,
25 ho latsaky baka an-danitsy eny ty basia, le hohozonkozony ty hery amy lanitsy eny.*
26 Le bakeo ho hitan-drozy ty Anak’olo ho avy amy rahona eny, sady tena hana hery noho ho be voninahitsy.
27 Le haniraky anjely ie, ka havorin-drozy ty olo nifiliny baka amy vazan-tany efatsy,* baka amy faravodilanitsy iaby any.
28 “Mangalà fianara baka amy fanohara mikasiky aviavy toy: Laha vo mitiry ty tahony* ka manomboky misy raviny, le hainareo hoe fa marìny ty asara.
29 Ho zay koa fa lafa hitanareo hoe miseho raha reo, le tiarovo hoe fa marìny ie, zany hoe fa am-baravara eo.
30 Ambarako anareo mazava fa tsy ho lany mihintsy taranaky toy, zisiky hisehoan’ny raha iaby reo.
31 Ty lanitsy noho ty tany ho rava, fa ty safàko tsy ho rava mihintsy.
32 “Tsy misy mahay an’ny andro zay na lera zay, ndre anjely an-danitsy any rey, ndre Anaky iny, laha tsy Baba avao.
33 Mitandrema avao sady miambena avao, satria tsy hainareo hoe ombia ty fotoa voatondro.
34 Io manahaky lahilahy raiky nandeha an-tany hafa any. Talohan’ny nandehanany, le nameany fahefà ty mpanompony sady samby nameany asa iaby. Nivolaniny koa ty mpiamby varavara mba hiamby avao.
35 Miambena avao zany, satria tsy hainareo hoe ombia ty hiavian’ny tompon-trano iny, ndre harivariva, ndre vakimirahaly, ndre maneno akoho,* ndre maraindray be.
36 Amy zay lafa avy tampoky ie, le tsy ho hitany miroro nareo.
37 Fe raha volaniko aminareo zao, volaniko amin’olo iaby hoe: Miambena avao.”
Fanamariha ambany pejy
^ Abt: “fahararin’ampela tsongoen-jaza.”
^ Abt: “lera.”
^ Abt: “mana amy ty raha afara.”
^ Abt: “sikiny ivelany.”
^ Abt: “nofotsy.”
^ Mety hoe ty masoandro noho ty vola noho ty basia.
^ Zany hoe baka avaratsy, antimo, andrefa, noho antinana.
^ Na: “rantsany.”
^ Na: “mbo tsy mangoantinana.”
