Nisoratin’i Marka 14:1-72
-
Nila hevitsy hamonoa an’i Jesosy ty mpisoro (1, 2)
-
Menaky manitsy naily tamy Jesosy (3-9)
-
Namadiky an’i Jesosy, Jodasy (10, 11)
-
Paska farany iny (12-21)
-
Sakafo Harivan’ny Tompo voalohany (22-26)
-
Fa nivola Jesosy hoe handà azy Petera (27-31)
-
Nivavaky ta Getsemane any Jesosy (32-42)
-
Nisambory Jesosy (43-52)
-
Tamy Fitsarà Anabo Jiosy eo (53-65)
-
Nandà an’i Jesosy, Petera (66-72)
14 Tamy zay, roe andro sisa le ho avy ty Paska noho ty Fetin’ny Mofo Tsy Misy Levira. Le nila hevitsy hamitaha* noho hanambora azy ty sefon’ny mpisoro noho ty mpanora-dalàna, mba hamonoa azy.
2 Fe nivola rozy hoe: “Aleo tsy amy andro fety tsy no hisabadida ty vahoaky.”
3 Tamy Jesosy ta Betania any, tamy ie nihina* tan-tranon’i Simona boka ao, le nisy ampela raiky niavy nanday tavoangy kelikely* feno menaky manitsy. Narda tena ie menaky io sady tena sarotsy biby. Nivakin’ampela iny tavoangy iny, le nailiny tan-dohan’i Jesosy eo menaky iny.
4 Le neloky ty sisany amin-drozy ka nifampiresaky hoe: “Manino menaky manitsy tỳ seràny io?
5 Laha navily zao menaky manitsy iny le nahazoa drala mandilatsin’ny 300 denaria, le afaky namea ho an’ny mahantra drala zay.” Le nihelofan-drozy ampela iny.*
6 Fe hoy Jesosy: “Engaonareo ie. Manino ie ataonareo ani-zao io? Tena soa ty raha nataony tamiko.
7 Satria ho aminareo eo avao ty mahantra, ka saky ta hanao raha soa amin-drozy nareo le afaky manao ani-zay, fa zaho tsy raha ho aminareo eo avao.
8 Nanao ze azony natao ie, ka nanilinany an’ny menaky manitsy iny ty vatako mba hanomàna ty fandevena ahy.
9 Ambarako anareo mazava fa ndre aia aia hitoria ty vaovao soa amy tany toy iaby, le horesahy koa ty raha nataon’ampela toy, ho fahatiarova azy.”
10 Le nandeha tamy sefon’ny mpisoro any Jodasy Iskariota, raiky amy Apostoly 12 rey, satria ta hamadiky an’i Jesosy mba hahazoan-drozy azy.
11 Nifalifaly rozy lafa naharè ani-zay ka nampitamà hoe hanome drala* azy. Le nanomboky nila fotoa hamadiha an’i Jesosy amy zay Jodasy.
12 Niavy amy zay ty andro voalohany hankalazà ty Fetin’ny Mofo Tsy Misy Levira, zany hoe ty andro fanomeza biby hatao soro amy Paska. Le hoy mpianatsiny rey taminy: “Aia ty teanao handehananay mba hikarakarà an’ny fankalazà Paska iny ho anao?”*
13 Le nirahiny ty roe amy mpianatsiny rey ka hoy ty asany: “Mandehana an-tanà any nareo fa hisy lahilahy raiky manday siny* tany feno rano hifankatojiky aminareo. Oriho ie,
14 ka volano ze tompon’ny trano ilirany hoe: ‘Zao ty nivolanin’ny Mpampianatsy: “Aia ty trano fandrambesa vahiny azoko ankalazà Paska miaraky amy ty mpianatsiko?”’
15 Le hisy trano malalaky anabo etazy any hatorony anareo. Fa misy ze raha ilà ty ao sady fa parè, le karakaraonareo ao fankalazà Paska hataontsika iny.”
16 Le nandeha mpianatsy rey nilitsy an-tanà ao, ka nihitan-drozy iaby raha nivolaniny tamin-drozy rey. Le nikarakaran-drozy Paska iny.
17 Lafa nihariva ty andro, le niavy Jesosy noho Apostoly 12 rey.
18 Lafa namonjy pilasy* tan-databo eo rozy mba hihina, le nivola Jesosy hoe: “Ambarako anareo mazava fa hamadiky ahy ty raiky aminareo miaraky mihina amiko eto reto.”
19 Le nalahelo rozy ka samby nanontany azy hoe: “Zaho va zao io?”
20 Le hoy ty asany tamin-drozy: “Raiky aminareo Apostoly 12 reo ie. Mampijobo ty mofony anaty boly ao miaraky amiko ie.
21 Handeha ty Anak’olo satria zay ty fa voasoratsy mikasiky azy, fe ho azon-draha olo hamadiky an’ny Anak’olo zay! Ty nisoa taminy aza tsy nateraky mihintsy ie.”
22 Amy rozy mbo nihina iny, nandramby mofo Jesosy. Nivavaky ie, bakeo nitampahiny mofo iny ka nameany an-drozy, sady nivola ie hoe: “Rambeso toy, fa toy ty* vatako.”
23 Nandramby kopy koa ie ka nisaotsy a-Ndranahary, le nameany an-drozy kopy iny, le nino tamin’iny iaby rozy.
24 Le hoy ty asany tamin-drozy: “Toy ty* lioko, zany hoe lion’ny fifanekea halatsaky hahasoa olo maro.
25 Ambarako anareo mazava fa tsy hino amy vokatsin’ny voaloboky sasy aho, zisiky hiavian’ny andro hinomako divay vaovao amy Fanjakà-Ndranahary ao.”
26 Farany, lafa baka nanao hira fiderà* rozy, le nandeha amy Vohitsy Oliva any.
27 Le nivola tamin-drozy Jesosy hoe: “Hanenga ahy* iaby nareo, satria fa voasoratsy hoe: ‘Hovangoako ty mpiarakandro, le hiparitaky ty aondry.’
28 Fe lafa velo ndraiky aho, le ho tratsinareo a Galilia any.”
29 Fe hoy Petera taminy: “Ndre hanenga anao* iaby aza rozy, le tsy hanenga anao* mihintsy aho.”
30 Le hoy Jesosy taminy: “Ambarako anao mazava fa androany, amy haly toy mihintsy, mbo tsy maneno indroe ty akoho, le fa handà ahy intelo iha.”
31 Fe tsy nanekineky Petera fa nivola hoe: “Ndre tsy maintsy ho maty miaraky aminao aza aho, le tsy handà anao mihintsy!” Nivola ho zay iaby koa mpianatsy hafa rey.
32 Farany rozy niavy tamy pilasy raiky kaihy hoe Getsemane. Le hoy ty asany tamy mpianatsiny rey: “Mipetraha eto fa zaho handeha hivavaky.”
33 Le nandesiny niaraky taminy Petera noho Jakoba noho Jaona. Le nanomboky nalahelo marè ie.
34 Nivola tamin-drozy ie hoe: “Tena malahelo aho zao, sahala fa ho maty mihintsy. Mijanòna eto, le ka miroro fa miambena.”
35 Bakeo nandeha kelikely nana aloha ie, le niankohoky tamy tany ka nanomboky nivavaky mba tsy handalo an’ny fotoa* zay ie, laha azo atao.
36 Le hoy ty asany: “Aba,* Baba, hainao ty raha iaby. Afaho amiko kopy* toy, fe aleo tsy ze teako ro hatao, fa ze teanao.”
37 Bakeo nimpoly tamy mpianatsiny rey teo ie. Henteany niroro rozy, ka hoy ty asany tamy Petera: “Simona! Miroro va iha? Le tsy nivitanao va ty tsy niroro lera raiky avao?
38 Miambena noho mivavaha avao mba tsy ho resin’ny fakam-panahy. Mazoto* avao mbakany ty sain’olombelo fa ty nofotsiny ro malemy.”
39 Le nandeha nivavaky ndraiky ie, ka raha nivolaniny taloha teo iny avao ro nampoliny.
40 Le nimpoly ndraiky ie ka mbo nahita an-drozy niroro satria fa nita hiroro biby rozy. Le tsy nihitan-drozy ty hovolany.
41 Bakeo nimpoly fanintelony ie, le nivola tamin-drozy hoe: “Amy fotoa ho zao va nareo le mbo miroro noho mitofa avao? Ampy zay! Fa avy ty lera! Henteo fa hisy hamadiky ty Anak’olo, ka hamea an-tanan’ny mpanota ie.
42 Mitsangàna! Ndao tsika handeha fa fa marìny mpamadiky ahy iny.”
43 Mbo tsy tampitsy iaby safàny iny, le niavy bakany Jodasy, raiky amy Apostoly 12 rey. Nisy vahoaky niaraky taminy, le nanday sabatsy noho kobay rozy. Ty sefon’ny mpisoro noho ty mpanora-dalàna noho ty anti-panahy ro naniraky an-drozy.
44 Fa namean’ny mpamadiky iny famantara rozy hoe: “Ze orofako le samboro fa zay ro ie. Andeso ie, le ambeno soa.”
45 Avy le namonjy an’i Jesosy ie, le nivola hoe: “Akory Raby!”, sady norofany ie.
46 Le nisamborin-drozy Jesosy ka nandesin-drozy.
47 Fe nampiboaky ty sabatsy taminy eny ty raiky amy azy nitsanga teo rey, le nasiany azy ty mpanompon’ny mpisorobe iny ka niafaky ty sofiny.
48 Le hoy Jesosy tamin-drozy: “Nareo va zany niavy hanambotsy ahy miaraky amy sabatsy noho kobay, manahaky olo hanambotsy malaso rey?
49 Sanandro aho niaraky taminareo, tamy zaho nampianatsy tamy tempoly ao, fe tsy nisamborinareo. Fe miseho raha iaby zao mba ho tanteraky ty Soratsy Masy.”
50 Bakeo mpianatsy rey nanenga azy iaby, le nilay.
51 Fe nanaraky azy mariniriny mbeny pamaraky raiky zay. Lamba rongony tena soa zay avao ty tan-koliny eny. Niezaky nanambotsy azy ty olo,
52 fe nengany sikiny iny le nilay tsy amin-tsiky ie.*
53 Le nandesin-drozy tamy mpisorobe any Jesosy. Fa nivory tany iaby tamy zay ty sefon’ny mpisoro noho ty anti-panahy noho ty mpanora-dalàna.
54 Fe nanaraky azy ta lavidavitsy eny avao Petera, zisiky niavian-drozy tan-dakoron’ny mpisorobe iny ao. Bakeo nipetrapetraky niaraky tamy mpiasa an-trano rey ie sady namindro teo.
55 Ta hamono an’i Jesosy ty sefon’ny mpisoro noho ty olo iaby tanatin’ny Fitsarà Anabo Jiosy, ka nila raha hasara azy fe tsy nahita.
56 Maro ty vavolombelo nanasara vandy azy, fe nifanohitsy ty raha nivolanin-drozy.
57 Nisy olo hafa koa nitsanga ho vavolombelo fe namoro vandy mikasiky azy ka nivola hoe:
58 “Nirenay ie nivola hoe: ‘Horavàko tempoly namboarin’ny tanan’olombelo toy, le hamboatsy raiky hafa tsy namboary tana aho afaky telo andro.’”
59 Fe ndre tamy resaky zay aza, mbo nifanohitsy avao ty raha nivolanin-drozy.
60 Bakeo nitsanga tanivon-drozy eo mpisorobe iny ka nanontany an’i Jesosy hoe: “Ka mba raha tsy mamaly iha? Manao akory raha asaran’olo reo anao zao?”
61 Fe mbo tsy nivola avao ie, sady tsy namaly mihintsy. Le nanontany ndraiky mpisorobe iny hoe: “Iha va Kristy Anakini-azy Farany Anabo Iny?”
62 Le hoy Jesosy: “Eka, zaho zay. Ho hitanareo koa ty Anak’olo hipetraky ankavanani-Azy Mahery Iny sady ho avy miaraky amy ty rahon’ny lanitsy.”
63 Le nandriatsy ty sikiny mpisorobe iny sady nivola hoe: “Ino koa ty mbo ilàntsika vavolombelo?
64 Renareo fitivàny a-Ndranahary teo iny. Ka akory ty hevitsinareo?” Le nanapa-kevitsy rozy iaby hoe tokony* hovonoa ie.
65 Le nandora taminy ty sisany amin-drozy, bakeo nisaronan-drozy ty tarehiny, le nikomondroan-drozy ie sady nivola rozy hoe: “Maminania!” Le nandravoky tampify azy ty mpanatanteraky didim-pitsarà, bakeo nanday azy.
66 Amy Petera mbo an-dakoro* ao iny, niavy bakao ty raiky amy mpanompovavin’ny mpisorobe iny.
67 Laha vo nahita an’i Petera namindro ie, le nanenty azy soa sady hoy ty asany: “Iha koa niaraky amy azy Jesosy baka a Nazareta tỳ.”
68 Fe nandà Petera le nivola hoe: “Tsy misy fahaizako azy, sady tsy haiko raha volaninao zao.” Le niboaky narìny an’ny vavahady iny eny ie.
69 Nahita azy teo mpanompovavy iny, le nivola tamin’olo nitsanga teo rey ndraiky hoe: “Naman-drozy io.”
70 Fe nandà ndraiky Petera. Kanikanin’iny, nivola taminy olo nitsanga teo rey hoe: “Tena naman-drozy iha fa Galilianina.”
71 Fe mbo nandà avao ie sady nifanta hoe: “Le zaho maty io, tsy haiko lahilahy volaninareo zao!”
72 Avy le nisy akoho naneno fanindroeny tamy fotoa zay. Le nitiaron’i Petera raha nivolanin’i Jesosy iny hoe: “Mbo tsy maneno indroe ty akoho, le fa handà ahy intelo iha.” Le tena nalahelo ie, ka nanomboky nitany.
Fanamariha ambany pejy
^ Na: “hameriverea.”
^ Na: “nandry nihorira tan-databo.”
^ Tavoangy vita amy vato foty malisoliso resahy eto io.
^ Na: “tena nahakamo an-drozy ampela iny; nivolambolanin-drozy ampela iny.”
^ Drala namboary tamy volafoty.
^ Abt: “hohaninao.”
^ Na: “sajoa.” Raha fantsakà na fanajaria rano.
^ Na: “nandry nihorira.”
^ Grika: estin, zany hoe “midika ho.”
^ Grika: estin, zany hoe “midika ho.”
^ Na: “salamo.”
^ Abt: “Ho tafitohina.”
^ Abt: “Ndre ho tafitohina.”
^ Abt: “tsy ho tafitohina.”
^ Abt: “lera.”
^ Safà hebreo na aramianina midika hoe “Baba a!”
^ Tsy ino “kopy” io fa ty sitrapo-Ndranahary mikasiky an’i Jesosy hoe hengany ho maty ie lafa asaran’olo hoe nitiva a-Ndranahary.
^ Na: “Parè.”
^ Na: “nilay ie ka zara fa nisiky; nilay ie ka koloty anatiny sisa taminy eny.”
^ Abt: “maeva.”
^ Abt: “tambany any tanaty lakoro ao.”
