Nisoratin’i Marka 16:1-8
-
Nivelo ndraiky Jesosy (1-8)
16 Lafa nivita amy zay ty Sabata, le nivily raha manitsy ry Maria Magdalena, noho Maria renin’i Jakoba, noho Salome, mba handesin-drozy an-dolo any le hahosotsin-drozy amy fatin’i Jesosy.
2 Vo maraindray be vo miboaky masoandro iny, le fa niavy an-dolo any rozy. Andro voalohany amy herinandro* iny tamy zay.
3 Le nifampiresaky rozy hoe: “Ia lahy ty hampikisaky an’ny vato amy varavaran’ny lolo eo io?”
4 Fe lafa nitoliky amy lolo iny any rozy, le nihitan-drozy hoe fa nikisaky vato iny, kanefa bevata biby.
5 Lafa nilitsy tamy lolo iny ao rozy, le nahita pamaraky nanao siky foty lava nipetraky ta ankavana eo. Le nitseriky rozy.
6 Nivola tamin-drozy pamaraky iny hoe: “Ka taitsy nareo. Haiko nareo fa mila an’i Jesosy baka a Nazareta iny, azy nivonoa tamy tsato-kazo iny. Fa tsy ato ie fa fa nivelo. Henteo fa tetoa ty nametrahan-drozy azy.
7 Ndany volano mpianatsiny rey, anatini-zay Petera hoe: ‘Ho tratsinareo a Galilia any ie, le any nareo mifankahita. Fa nivolaniny anareo zay.’”
8 Niboaky baka amy lolo iny ao amy zay rozy, le nilay. Nangitikitiky rozy amin’io sady nitseri-draha. Le tsy nivola ndre ino ndre ino tamin’olo rozy satria natahotsy.*
Fanamariha ambany pejy
^ Zany hoe Lahady. Tamy Jiosy, le io ty andro voalohany amy herinandro.
^ Laha hentea ty sora-tana azo antoky taloha kokoa, le tampitsy amy andininy 8 eo ty Filazantsaran’i Marka.
